Santiago 5:10 - Manobo Western Bukidnon

¹⁰ Menge suled, ed-iringan ta is kebmeinentusen te menge ebpeneuven dengan te Megbevayà su zutun te kebpesevuta zan te Lalag te Nengazen nekeantus dan te kemeresayan.

Santiago 5:10 Referans Kwoze

Hibriyuhanen 13:7

Kenè niw lipati is menge egalen niw te nengehuna he timpu he nekepenurù keniyu te Lalag te Megbevayà. Isipa niw is meupiya he nehimu pinaag̵i te menge ulaula zan ne iring kandan hemeni niw is kedtuu niw ki Jesu Kristu.

Nengeulaula 7:52

Duen be minsan sevaha zà he ebpeneuven dengan he wazà resaya te menge kepuun tew? Wazà. Mibpenhimetayan dan is midsug̵ù te Megbevayà, sikan is nemeketagnà dengan te kebpekeuma te metazeng he sulug̵uen din he si Jesus. Ne sikiyu zaan guntaan su heini si Jesus, is sulug̵uen te Megbevayà, mid-ekalan niw ne mibunù niw.

Nengeulaula 3:21

Diyè pa si Jesus ebpekeubpà te langit taman te kenè pa edhimuwen te Megbevayà he veg̵u is minsan hengkey sumalà te netagnà dengan pinaag̵i te ebpemeneuven din.

Lucas 13:34

Ne zutun netenuzan ni Jesus is menge ulaula te menge meg̵inged te Hiruselim ne ke sikandin te, “Igkeseeng ku sikiyu is menge meg̵inged diyà te Hiruselim su ebpemunuen niw is ebpemeneuven te Megbevayà ne is menge sulug̵uen te Megbevayà he ibpehendiyàn, ebpenulengen niw te vatu he edhimetayan niw. Utew zekelà is suat ku pezem he ed-uyemuwen ku sikiyu; ke và dà manuk, iring a te upa he edlekupan din is menge piyak din ne kenè kew ebpelekup.

Santiago 4:11

Menge suled, kenè kew mebpesudsudiey wey mebpesewsewayà su is edsudì wey edsawey te zuma zin he tumutuu, ne iring te edsudien din wey edsewayen din is lavew he sug̵ù. Ne emun edsewayen ta haazà is sug̵ù, kenè ta edtumanen, kekenà, edsumpeliten ta.

Santiago 5:7

Ne sikiyu is menge zuma ku he tumutuu, kinahanglan he meinentusen kew taman te kedlikù te Nengazen. Su is ebasuk, ebpekeantus te kedtag̵ad din taman te edsebpet en is impemula zin diyà te tanè din. Edteg̵azan din is uzan he ebpetuvù te pinemula zin wey is ebpeketesan te pinemula zin.

Santiago 5:9

Kenè kew, menge suled, meked-eepesà su wey kenè kew mesiluti te Megbevayà. Meg̵aan en ebpekeuma is edsusi te menge ulaula ta; iring te ziyè en te g̵emawan.

Santiago 5:13

Ke zuen minsan hentei keniyu he egkeseeng, kinahanglan he med-ampù. Ke zuen egkelipey, megkanta sikandin te kedalig te Megbevayà.