Ruma 3:30 - Manobo Western Bukidnon

³⁰ Su sebsevaha zà is Megbevayà ne ed-isipen din is menge Hudiyu he metazeng emun edtuuwan dan si Jesus. Ne is menge etew he kenà Hudiyu, ed-isipen din daan sikandan he metazeng emun edtuuwan dan si Jesus.

Ruma 3:30 Referans Kwoze

Gelasya 3:8

Daan he migkag̵i is Megbevayà diyà te insurat he lalag din he minsan is menge etew he kenà menge Hudiyu, ne ed-isipen din sikandan he metazeng emun edtuuwan dan sikandin. Impesavut din he zaan ki Abraham is Meupiya he Tudtulanen, ke sikandin te, “Tenged te midtuu ka te migkag̵i ku, midtuvazan ku sikew. Ne pinaag̵i zaan kayi te kedtuu nu edtuvazan ku is tivuuk he menusiyà dini te kelibutan.”

Gelasya 3:20

Iyan, dutun te kebpenaazi te Megbevayà ki Abraham wazà kinahanglan he zuen datù te pid-elangan su sebsevaha zà dutun is nekepenaad he iyan is Megbevayà.

Pilipus 3:3

Iyan kiw kes tutuu he menge sakup te Megbevayà, ne kenà iyan sikandan, su pinaag̵i te Wag̵as he Mulin-ulin ed-azap kiw te Megbevayà ne edlipey kiw tenged te upakat tew ki Jesu Kristu. Ne kenè tew iyan edserig̵an is kelibutanen he ulaula iring te kebpesirkunsidar.

Gelasya 6:15

Kenà ebpulus is kebpesirkunsidar ne kenà daan ebpulus is kenà kebpesirkunsidar. Iyan dekelà is pulus din is kegkehimu kenita he veg̵u en he linimbag.

Gelasya 5:6

Su emun tumutuu ki en ki Jesu Kristu, neked-iiring kiw en diyà te Megbevayà is nengesirkunsidar wey is wazà mesirkunsidar. Iyan dà duen din pulus diyà te Megbevayà is kedtuu ta kandin he egketuusan heini pinaag̵i te g̵ag̵ew ta te zuma ta.

Gelasya 3:28

Ne tenged dutun kinahanglan he kenè niw isipa he ibpelavi te Megbevayà is menge Hudiyu, ne emun kenà, ne iyan is kenà menge Hudiyu, su ziyà te kandin neked-iiring is langun he menge etew, uripen se kenà uripen, maama se vahi, ne sikiyu zaan, neked-iiring kew ziyà te Megbevayà su neked-iiring kew he edtuu ki Jesu Kristu.

Ruma 3:28

Tenged kayi migkag̵i ku en he iyan dà ketezengan ke maan is metazeng is ked-isipa kenita te Megbevayà, kenà iyan is kedtumana ta te kesug̵uan, kekenà, iyan is kedtuu ta ki Jesus.

Ruma 2:26

Ne iring din ded daan penenglitan, ke zuen etew he kenà Hudiyu ne egkepurungan din te edtuman is kesug̵uan, edewaten sikandin gihapun te Megbevayà he iring te nesirkunsidar en.

Ruma 2:27

Ne minsan ke kenà Hudiyu sikandin, pinaag̵i te kedtumana zin te kesug̵uan, igkepeehè din he edsilutan kew is menge Hudiyu te Megbevayà su edsupak kew mulà te kesug̵uan. Ne iyan kew pezem kes mibilvilinan te kesug̵uan ne iyan kew nesirkunsidar!

Ruma 3:22

Ed-isipen kiw te Megbevayà he metazeng emun edtuuwan tew si Jesu Kristu. Is minsan hentei he etew, ne ed-isipen te Megbevayà he metazeng emun edtuuwan din si Jesu Kristu su wazà ibpelavi te Megbevayà te minsan hentei he etew.

Ruma 4:9

Ne heini is kegkezeyzey he migkag̵i ni David, wazà heini ituvad kayi zà te kenami te menge Hudiyu, kekenà, intuvad daan diyà te menge etew he kenà menge Hudiyu. Su sumalà te nekag̵i ku en, si Abraham, midtuu sikandin te Megbevayà ne tenged dutun te kedtuu zin mid-isip te Megbevayà sikandin he metazeng.

Ruma 4:16

Umba midhimu te Megbevayà he egkezawat tew is impenaad din pinaag̵i zà te kedtuu tew su wey mehimu heini pinaag̵i te g̵ag̵ew zin, ne kenà pinaag̵i te ed-ul-ulahan tew. Ne tenged kayi kenè en ebperis he egkezawat tew te langun he menge kevuwazan ni Abraham is impenaad te Megbevayà. Ne kenà iyan dà ebpekezawat is menge Hudiyu he nesakup te kesug̵uan, kekenà, elin daan is minsan hentei he zuen din kedtuu he iring ki Abraham su nehimu si Abraham he kepuun te langun he edtuu, Hudiyu se kenà Hudiyu.

1 Timoteo 2:5

Sebsevaha zà is Megbevayà, ne sebsevaha zà daan is datù diyà te teliwazà te Megbevayà wey menge etew, ne iyan datù tew is etew he si Jesu Kristu.