Ruma 12:3 - Manobo Western Bukidnon

³ Ne tenged te imbeg̵ey kedì te Megbevayà is keg̵ehem te kedsengyawa te lalag din, egkeg̵iyen ku keniyu te langun he kinahanglan he kenè niw isipa he lavew kew te menge zuma niw, kekenà, kinahanglan he hustu is ked-isipa niw te ketau niw sumalà is kedtuu he imbeg̵ey te Megbevayà diyà te kada sevaha keniyu.

Ruma 12:3 Referans Kwoze

Gelasya 6:3

Ke zuen minsan hentei he kunaan din ke wazà kurang te menge ulaula zin su pudu meupiya, nelimbungan din is gehinawa zin.

1 Pedro 5:5

Sikiyu menge menguhed, edhengyuan ku sikiyu he pevayàbayè kew te menge ebmeg̵urangen. Kinahanglan he kenè kew mepelevawen, kekenà, mebpetebtevangè kew su zuen insurat he Lalag te Megbevayà he edhenduen te, “Kuntada te Megbevayà is mepelevawen, iyan, igkehizu zin is kenà ebpelavew.”

Ruma 12:16

Kinahanglan he mesevaha is gehinawa niw te menge tumutuu. Kenè kew mebmepelevawen, kekenà, mebpekiduma kew te menge etew he minus is pid-etawan dan. Ne kenè niw isipa he uluwanen kew kenà sikandan.

1 Pedro 5:8

Med-andam kew, mebantey kew su is kuntada tew he si Setanas, edrig̵urig̵u en he iring te erimaung he edhinig̵er su ebpen-ahà te edewiyen din.

1 Pedro 4:7

Kenè en utew egkeug̵et is ketepusan te kelibutan. Ne tenged dutun, kinahanglan he hustu is ked-isip-isip niw. Kinahanglan daan he purungi niw is menge ulaula niw su wey mehustu is ked-ampù niw ziyà te Megbevayà.

Santiago 4:6

iyan, mezesen pa utew is tavang kenita te Megbevayà.” Ne tenged dutun duen insurat he lalag din he edhenduen te, “Egkuntedahan te Megbevayà is mepelevawen, iyan, edtevangan din mulà is ebpesakup kandin.”

1 Pedro 4:11

Sikita is edwali, kinahanglan he is kedwali ta, ne utew hustu he iring te iyan en edwali is Megbevayà. Sikita is edtavang, ne kinahanglan he kenè ta edlipatan he is idtavang ta, ne ziyà ebpuun te Megbevayà su wey pinaag̵i te g̵ehem ni Jesu Kristu iyan mevantug is Megbevayà te minsan keenu su iyan dait he edelig̵en wey zait he ebayàbayà te wazà pidtemanan.

1 Kurintu 7:17

Ne minsan hengkey is kebpekesavuk te kada sevaha kenitew zini te kelibutan, kinahanglan he edtumanen te kada sevaha is ebpeveelan kandin te Megbevayà sumalà ke hengkey is kebpekesavuk din dutun te kebpetuuwa kandin te Nengazen tew. Ibpenurù ku heini te menge tumutuu ziyà te minsan hendei he inged.

Tito 2:12

Ne pinaag̵i zutun te g̵ag̵ew egkesavut ta he kinahanglan he meengkezi ta is menge ulaula he kenà igkesuat te Megbevayà wey is kedtumana ta te menge suat te lawa ta zini te kelibutan. Kinahanglan he ed-eg̵enen ta is menge kebayà ta he mezaat. Kinahanglan daan he metazeng wey igkesuat te Megbevayà is menge ulaula ta te zini ki pa ed-ubpà te kelibutan.

Tito 2:2

Is menge meg̵urang en he maama, ne iyan ipenurù nu kandan is: kinahanglan he metau sikandan he ed-eg̵en te menge suat te lawa zan; kinahanglan he zait sikandan he edtehuzen tenged te menge ulaula zan he meupiya; kinahanglan he metau zan he ed-isip te hustu. Meheg̵et is kedtuu zan te Megbevayà, ebmahalen dan diyà te g̵ehinawa zan is menge zuma zan, wey meinentusen sikandan.

2 Kurintu 12:7

Mibeg̵ayan a te Megbevayà te utew merasey he zaru su wey ku kenà ikezantal is utew meupiya he nengeehè ku ziyà te langit. Ne heini is daru, ne egemiten ni Setanas he idrasey kedì, ne pinaag̵i kayi kenà a ebpekepelavew.

Ruma 11:20

Ne venar iyan he iyan kew in-ilis, iyan, umba in-awà is menge Hudiyu te Megbevayà su wazè dan medtuu. Ne umba in-ilis kew kandan su midtuu kew mulà. Ne minsan pa te iyan heini, kenè niw isipa he iyan kew lavew, kekenà, tegteg̵ami niw is menge ulaula niw.

Ruma 1:5

Pinaag̵i ki Jesu Kristu midtuvazan a te Megbevayà su midhimu e zin he epustul, he ke và dà egkeg̵iya, sug̵ù, su wey mevantug si Jesus. Umba mid-ulaula zin heini su wey ku mepenurù is menge etew he kenà menge Hudiyu ziyà te minsan hendei he inged wey zan mekepemineg ne wey zan meketuu ki Jesu Kristu.

1 Pedro 1:13

Ne g̵eina te iyan haazà, kinahanglan he ed-andam ki wey ki mekepurung mekeisip-isip su wey ta layun mepurungi is kedsunud ta te Nengazen. Kinahanglan he iyan dekelà diyà te g̵ehinawa ta is kebperateng ta te utew meupiya he ibeg̵ey te Megbevayà kenita keuzemà dutun te andew te kebpeg̵awag̵awa ni Jesu Kristu.

Tito 2:4

su wey zan ikepenurù diyà te menge menguhed he vahi is kebmahala zan te menge esawa zan wey menge anak dan,

1 Kurintu 15:10

Iyan, utew zekelà is hizu kediey te Megbevayà. Umba nehimu a he epustul su zuen pulus te kegkehizuwi zin kediey. Tenged kayi, dekelà is nehimu ku kenà te nehimu te langun he menge zuma ku he epustul, asal, kenà a iyan is nekehimu kayi, kekenà, nehimu heini is langun pinaag̵i te tavang te Megbevayà.

Juan 3:34

Ne is midsug̵ù te Megbevayà, egkeg̵iyen din is ibpekag̵i kandin te Megbevayà su is Megbevayà, mibpepurungan din sikandin peulini te Wag̵as he Mulin-ulin.

Ipisu 4:16

Su iring kiw te lawa, ne sikandin iyan ulu. Ne sikitew is lawa, ne ebpekesarig kiw kandin te ulu. Ne is minsan hengkey he parti kayi te lawa, ne ebpekesarig daan te menge zuma zin he parti. Ne emun hustu is baal zutun te kada sevaha he parti, edtulin haazà is tivuuk he lawa pinaag̵i te kebpekedtetevangà te minsan hendei he parti zin. Ne sikitew zaan, ebpekeiseg is kebpekeiring tew te ulaula ni Kristu pinaag̵i te kebpurungi te kada sevaha te zuma zin.

Lucas 18:11

Ne midhitindeg haazà is Perisiyu ne mid-ampù pinaag̵i te g̵ehinawa zin, ke sikandin te, ‘Megbevayà, ebpeselamat a kenikew su kenà a iring te zuma. Kenà a leg̵ezen; kenà a ebpenlimbung; kenè ku edselselaan is esawa ku. Ebpeselamat a zaan kenikew su kenà a iring keniyà te limbungan he menunukut te vuhis.

Tito 2:6

Ne iring din daan dutun is penurù nu ziyà te menge menguhed he maama. Kinahanglan he ipenurù nu kandan he purungi zan tengkai is menge ulaula zan.

1 Timoteo 2:15

Ne minsan pa te iyan haazà, egkelibri g̵ihapun is menge vahi te silut pinaag̵i te ked-anak te vatà ke kenè dan edlekaan is kedtuu zan, wey is kebmahala zan te menge zuma zan wey is menge ulaula zan he igkesuat te Megbevayà wey is ked-erengana zan te langun he ed-ul-ulahan dan.

1 Timoteo 2:9

Ne is menge vahi zaan, kinahanglan he hustu is kegemita zan te ugelingen dan. Kenè dan ipezalig, kekenà, kinahanglan he metau sikandan he egkeeled. Kenà utew subra is kebmekempeta zan te ulu zan pinaag̵i te vulvul zan. Kenè dan megamit te menge mahal iring te vulawan wey menge velieg he pirlas wey menge mahal he ugelingen,

1 Timoteo 1:14

Ne kenà dutun dà taman su utew ad ingkeg̵ag̵ew te Megbevayà ne g̵untaan neketuu ad ki Jesu Kristu ne utew en sikandin mahal zini te g̵ehinawa ku.

Ipisu 3:4

Ne emun ebesahan niw heini, egketuenan niw is nesavut ku mehitenged te in-eles dengan mehitenged ki Kristu.

2 Kurintu 12:13

Is kedtavang ku keniyu ne iring ded te kedtavang ku te menge tumutuu ziyà te zuma he menge inged. Asal kela ke kunaan niw ke kenè ku idtavang keniyu is kenè ku keniyu kebuyui te selapì. Emun nekesalà a keniyu pinaag̵i kayi peseyluwa a keniyu.

1 Kurintu 3:10

Ne siak, henduen a te pandey te Megbevayà su imbeg̵ey zin kediey is gehem su wey mehimu he iyan a edsavuk diyan te keniyu te vatu he edtukuzan te valey ne selakew en is ebevaley zuen, he ke và dà egkeg̵iya, selakew en is ebpenurù keniyu g̵untaan. Ne kinahanglan he is kada sevaha he ebevaley ne purungi zin is baal zin.

Ruma 11:25

Egkesuatan ku, menge suled, he mesavut niw is ed-ul-ulahan te Megbevayà he zengan wazà mesavut te menusiyà. Umba ibpesavut ku heini keniyu su wey kenè niw isipa he iyan kew lavew kenà is menge Hudiyu. Ne minsan pa te intug̵ut te Megbevayà te zuma he menge Hudiyu is kenè dan kedtuu, duen timpu keuzemà he ed-engkezan dan is kenè dan kedtuu te Megbevayà su taman dà heini zutun te timpu he egkeamin ebpeketuu is langun he kenà menge Hudiyu he imbanglis te Megbevayà kandan is kebpeketuu zan.

3 Juan 1:9

Mibpesuratan ku is menge tumutuu ziyan, iyan, si Diyutripis, kenè din ebpemineg̵en is menge sug̵ù ku. Iyan egkesuatan din is: iyan dà sikandin ebayàbayà.

Kulusas 2:13

Ne sikiyu, wazè niw pa zengan untung he wazè din pidtemanan tenged te memezaat is menge ulaula niw te kenà menge Hudiyu wey tenged te midtuman niw is memezaat he kebayà te lawa niw. Ne minsan pa zutun, mibeg̵ayan kew te Megbevayà te untung he wazè din pidtemanan ne nevanhew kew en duma ki Kristu. Mibpesaylu kiw te Megbevayà te langun he menge salè tew.

Kulusas 1:29

Siak, ebpenigudu a ebaal he edlig-enan te zekelà he zesen ni Kristu su wey metuman heini.

Ipisu 3:2

Is Megbevayà, tenged te g̵ag̵ew zin keniyu, duen insarig din kediey he terebahu he iyan igkezeyzey niw. Netuenan ku he nezineg niw heini.

2 Kurintu 10:13

Ne sikami, kenà subra is kedantal zey su iyan dey zà idantal haazà is nehimu zey te edtuman he insug̵ù kenami te Megbevayà. Ne ragkes kayi is menge vaal zey hein diyan key te keniyu.

Pilipus 2:13

Su layun edtavang keniyu is Megbevayà wey niw mesuati ne wey niw mehimu is kedtumana te tuyù din diyan te keniyu.