Pilipus 3:9 - Manobo Western Bukidnon

⁹ su wey a zaan meisip te Megbevayà he metazeng tenged ki Kristu. Wazà a meisip he metazeng pinaag̵i te kediey zà he ulaula te kedtumana te kesug̵uan, su mibpeketazeng a te Megbevayà pinaag̵i te kedtuu ku ki Kristu. Heini is kebmetazeng, ne idtuvad kenita te Megbevayà emun edtuu ki ki Kristu.

Pilipus 3:9 Referans Kwoze

2 Kurintu 5:21

Wazà minsan hengkey he mezaat he ulaula ni Kristu, iyan, midhimu te Megbevayà he iyan sikandin midsilutan tenged te salè tew su wey pinaag̵i te kebpekidsevaha tew kandin, egkehimu he ed-isipen kiw he metazeng te Megbevayà.

1 Kurintu 1:30

Ne minsan pa zutun, midhimu te Megbevayà he mesevaha si Jesu Kristu wey sikitew ne midhimu zin daan he zuen ketau tew he ebpuun te ki Kristu. Ne pinaag̵i ki Kristu mid-isip kiw en he metazeng te Megbevayà ne nehimu kiw en daan he menge g̵aked te Megbevayà, ne nevelukasan kiw zin te kegkeuripen tew te mezaat he ulaula.

Gelasya 2:16

Ne minsan pa zutun, netuenan ta he kenè ki egkeisip he metazeng te Megbevayà pinaag̵i te kedtumana ta te kesug̵uan he imbilinbilin ni Moises, kekenà, pinaag̵i zà te kedsarig ta ki Jesu Kristu. Sikita is Hudiyu, nekesarig ki zaan ki Jesu Kristu su wey pinaag̵i te kedtuu ki Jesu Kristu meisip ki zaan te Megbevayà he metazeng. Netuenan ta he kenà heini egkehimu pinaag̵i te kedtumana te kesug̵uan. Su wazà minsan hentei he ed-isipen he metazeng te Megbevayà tenged te kedtumana zin te kesug̵uan.

Ruma 8:1

Ne sikita is nekidsevaha ki Jesu Kristu, kenè ki en egkehukuman te silut.

Ruma 1:17

Su pinaag̵i te Meupiya he Tudtulanen ibpetuenan kenitew te Megbevayà is paag̵i wey kiw zin meisip he metazeng. Ne heini is paag̵i, ne pinaag̵i te kedtuu zà. Su zuen insurat he Lalag te Megbevayà he edhenduen te, “Is etew he nehimu he metazeng pinaag̵i te kedtuu zin, ne iyan ebeg̵ayan te untung he wazè din pidtemanan.”

Tito 3:5

midlibri ki zin te silut. Iyan ingkelibriya zin kenita is: kenà tenged te menge metazeng he ulaula he nehimu ta, kekenà, tenged dà te hizu zin kenita. Midlibri ki zin pinaag̵i te kedlumpiyuwi kenita he iyan is kebpeuman ta kebpaanak pinaag̵i te g̵ehem te Wag̵as he Mulin-ulin he nekeveg̵ey kenita te veg̵u he untung.

2 Timoteo 1:9

Is Megbevayà, ne iyan midlibri kenita te silut ne midhimu ki zin he g̵aked din. Umba mid-ulaula zin heini, kenà tenged te meupiya is menge ulaula ta, kekenà, tenged dà te iyan tuyù din wey tenged te utew zekelà is gag̵ew zin kenita. Dengan te wazè pa limbag̵a is minsan hengkey mid-isip din he ibpeehè din is gag̵ew zin kenita pinaag̵i te kebeg̵aya zin kenita ki Jesu Kristu.

2 Kurintu 5:17

Ne sikan is etew he nekidsevaha en ki Kristu, beg̵u en sikandin he linimbag. Nahanew en diyà te kandin is daan he netag̵ù te isip din ne mid-ilisan en heini te veg̵u.

Pilipus 3:6

Ne tuus te utew meheg̵et dini te g̵ehinawa ku is kedtumana ku te menge tulumanen dey te menge Hudiyu, su mibpemesipelahan ku is menge tumutuu ki Jesus. Ne sumalà te kedtumana ku te kesug̵uan he imbilinbilin ni Moises wazè ku netuenan he supak ku te Megbevayà.

Ruma 10:10

Su pinaag̵i te isip ta ke edtuu ki ed-isipen ki te Megbevayà he metazeng, ne zutun ebpenudtulen ta ziyà te zuma is kedtuu ta ne human egkeheg̵et is kedlibriya kenita te silut.

Ruma 8:3

Wazà tavang he egkekuwà ta pinaag̵i te kedtumana ta te kesug̵uan geina te wazè ta mehimu te edtuman, iyan, is Megbevayà mulà, ne iyan neketavang kenita. Su midsug̵ù din sikan is Anak din he si Jesus he nehimu he etew. Ne si Jesus, duen lawa zin he iring te lawa ta su wey zin meseg̵azi ziyà te lawa zin is silut te Megbevayà tenged te menge salè tew. Ne pinaag̵i te kedsiluti zin ki Jesus, in-awè din is gehem te mezaat he kebayè ta.

Mateo 9:13

Susiya niw ke hengkey is kehulug̵an duen te insurat he Lalag te Megbevayà he egkag̵i te, ‘Kenè ku iyan egkesuatan is kebpemuhat niw, kekenà, iyan egkesuatan ku is kebpekedhihizuwè niw.’ ” Ne mid-uman megkag̵i si Jesus te, “Siak, wazà a medhendini wey ku ikepeengked te ed-ulaula te mezaat is menge metazeng, kekenà, iyan is menge mesinupaken te Megbevayà.”

1 Juan 3:4

Ke zuen nekesalà, nesupak din is kesug̵uan te Megbevayà su is ulaula he egngezanan te salà ne iyan is minsan hengkey he ulaula he supak te kesug̵uan te Megbevayà.

2 Pedro 1:1

Iyan a si Simon Pedro is teg̵isurat kayi. Sulug̵uen a ni Jesu Kristu wey epustul zin, he ke và dà egkeg̵iya, midsug̵ù e zin. Ebpesuratan ku sikiyu is langun he neketuu ki Jesu Kristu. Megbevayà he Menluluwas tew sikandin. Geina te wazè din ibpelavi he minsan hentei, midhimu kew zin he tumutuu kandin iring te midhimu key zin daan he tumutuu.

Santiago 3:2

Sikitew is menusiyà, layun kiw egkesayep te mezakel he paag̵i. Ne ke zuen etew he kenà egkesayep pinaag̵i te kegkag̵i zin, wazè en igkesewayi kandin. Egkeveyveyaan din is tivuuk he lawa zin wey kenà mekeulaula te mezaat.

Hibriyuhanen 6:18

Ne zuen dezuwa he ulaula te Megbevayà he kenà egkehalin te minsan hentei. Is sevaha, ne iyan is penaad din, ne is sevaha, ne iyan is kedlig-eni zin te penaad din. Ne pinaag̵i kayi te zezuwa egkesavut ta he kenà egkehimu he kenè din edtumanen is penaad din. Ne tenged kayi, sikitew is nemekeaput diyà te kandin, utew meheg̵et is kedsarig tew kandin ne tenged kayi edhemenan tew is kebpeebuta tew te langun he meupiya he impenaad din kenitew.

Ruma 16:7

Ipengemusta a zaan ki Andruniku wey si Hunias. Menge zuma ku sikandan he Hudiyu he mibpirisu zuma kedì. Telehuzen sikandan te menge epustul, ne nehuna sikandan neketuu ki Kristu, ne human a.

Ruma 5:21

Ne hein aney, sikitew is menusiyà, kenà egkehimu he kenè ki ebpekesalà, ne tenged kayi ebpatey ki, iyan, guntaan pinaag̵i te ked-isipa te Megbevayà kenitew he metazeng, impeehè kenitew te Megbevayà is gag̵ew zin su wey kiw zin meveg̵ayi te untung he wazè din pidtemanan pinaag̵i ki Jesu Kristu he iyan Nengazen tew.