Pilipus 2:2 - Manobo Western Bukidnon

² Ne tenged kayi te langun edhengyuan ku sikiyu he tug̵uti niw he mepurung mesevaha is isip niw wey g̵ehinawa niw, ne heg̵eta niw is kebmahala niw ziyà te g̵ehinawa niw te menge zuma niw. Ne emun ed-ul-ulahan niw heini human egkeheg̵et is kelipey ku tenged keniyu.

Pilipus 2:2 Referans Kwoze

Ruma 12:16

Kinahanglan he mesevaha is gehinawa niw te menge tumutuu. Kenè kew mebmepelevawen, kekenà, mebpekiduma kew te menge etew he minus is pid-etawan dan. Ne kenè niw isipa he uluwanen kew kenà sikandan.

1 Kurintu 1:10

Menge suled ku tenged te kedtuu, duen idhangyù ku keniyu pinaag̵i te kebayàbayà kenitew te Nengazen tew he si Jesus; iyan is: kinahanglan he kenè kew mevahinbahin, kekenà, uyun-uyun kew su wey mesevaha is isip niw wey g̵ehinawa niw.

2 Kurintu 13:11

Menge suled, iyan dà heini menge lalag ku keniyu; berakat he mebmelipayen kew. Purungi niw is menge ulaula niw; tumana niw is menge sambag ku keniyu. Kinahanglan he mesevaha is gehinawa niw ne mebmelinawen is ked-ubpè niw. Su emun ebeelan niw heini, is Megbevayà he iyan puunà te g̵ag̵ew wey kelinew, layun eduma keniyu.

3 Juan 1:4

Iyan utew ku igkelipey is kegkezineg ku te tudtul he edtuman en te tutuu he tuluuwen is menge anak ku te kedtuu.

Pilipus 2:16

he edtayew kandan su ibpesavut niw kandan is lalag he ebpekeveg̵ey kandan te untung he wazà pidtemanan. Ne emun iyan heini ed-ul-ulahan niw, utew ebmeupiya is g̵ehinawa ku keuzemà dutun te andew te kedlikù ni Kristu su egketuenan ku zutun he zekelà is pulus te kedhag̵ù ku ziyan te keniyu.

Nengeulaula 2:46

Ne kada andew edtig̵um is langun he menge tumutuu zuen te zekelà he simbahan he egngezanan te Valey te Megbevayà. Ne egkesevaha zan daan he utew melipayen te kegkaan dan dutun te menge valey zan wey kebpevegbeg̵ayè dan.

2 Juan 1:4

Nelipey ad utew su zuen menge anak nu he edtuman te tutuu he tuluuwen sumalà is insug̵ù kenitew te Amey tew he Megbevayà.

2 Tiselunika 2:13

Menge suled he minahal te Nengazen, kenà egkehimu he kenà dekelà layun is kebpeselemati zey te Megbevayà tenged keniyu. Su zengan hein midlimbag din is langun, mibpilì kew zin wey kew zin melibri te silut pinaag̵i te g̵ehem te Wag̵as he Mulin-ulin he iyan ingkehimu niw he menge g̵aked din, wey pinaag̵i te kedtuu niw te tutuu he tuluuwen.

Kulusas 2:5

Su minsan te wazà a g̵untaan diyan te keniyu, layun ku sikiyu ed-isipa. Igkelipey ku sikiyu su netuenan ku he mibpurungan niw te ed-ulaula is meupiya he ulaula wey melig-en daan is kedtuu niw ki Kristu.

Pilipus 4:2

Edhengyuan ku sikiyu, Ibudya wey Sintiki, he melinew is kebpekid-upakat niw su telesuled kew tenged te upakat niw te Nengazen.

Pilipus 2:20

Iyan dà sikandin duma ku kayi he utew zekelà is gehinawa zin keniyu.

2 Kurintu 7:7

Ne kenà iyan dà ingkelipey zey is keg̵alew zey ki Tito, kekenà, elin daan is tudtul zin he utew sikandin nelipey mehitenged keniyu. Netudtul zin he egkesuatan niw utew he mekepenumbaley a ziyan. Netudtul zin daan he ebuyù kew te pesaylu zini te kediey. Ne elin daan tudtul zin is: dekelà te g̵ehinawa niw is kedtumana niw te egkesuatan ku. Ne tenged kayi utew zekelà is kelipey ku.

2 Kurintu 2:3

Umba, menge suled, iyan mibeelan ku zutun is mibpeuwitan ku zà sikiyu te surat. Su kenè ku zutun egkesuatan he ebpenumbaley a ziyan su netuenan ku he sikiyu is menge etew he kinahanglan pezem he iyan igkelipey ku, ne igkeseeng ku zutun. Ne netuenan ku zaan he emun egkelipey a, egkelipey kew zaan.

Nengeulaula 5:12

Ne is menge epustul, mezakel is menge singyal wey egkein-inuwan he impeehè dan te menge etew. Ne is langun he menge tumutuu, diyè dan layun egketig̵um te egngezanan te Helungà ni Hadì Sulumun.

Nengeulaula 1:14

Is langun kandan, nesevaha is gehinawa zan te ked-ampù diyà te Megbevayà ne midtampu zaan is menge vahi. Elin dutun si Maria sikan is iney ni Jesus wey is menge hazi ni Jesus.

Pilipus 1:4

Ne emun id-ampù ku sikiyu utew a egkelipey

Juan 3:29

Penenglitan ke zuen mibpengesawa, ne naangken din en haazà is mid-esawa zin. Sikan is kumekag̵un dutun, utew meupiya is gehinawa zin emun egkezineg din haazà is mibpengesawa he ebpekidlalag en dutun te mid-esawa zin. Ne iring din ded daan su utew ibmeupiya te g̵ehinawa ku zaan ke mezakel is edsundan ki Jesus. Kinahanglan he ed-iseg is bentug̵an ni Jesus, iyan, is kedì, kinahanglan he egkeawà,” ke si Juan.

2 Timoteo 1:4

Ne emun egketenuzan ku is kedtig̵is te luhè nu zutun te ked-ewai ku kenikew, utew a kenikew ebulunga ne utew a egkesuat he meked-uman ki meked-uma wey a utew melipey.

Nengeulaula 2:1

Ne hein andew en te pista he egngezanan te Pintikusti nevurun kes langun he menge tumutuu ziyà te sevaha he valey.

Pilimun 1:20

Ne tenged kayi, Geli, edhengyuan ku sikew he ikehizu a kenikew su telesuled ki pinaag̵i te kedtuu ta te Nengazen. Himuwa nu heini wey a melipey su telesuled ki pinaag̵i ki Kristu.