Nengeulaula 27:35 - Manobo Western Bukidnon

³⁵ Ne te nekag̵i ni Pablo haazà, migkuwa te supas ne mibpeselematan din te Megbevayà ne mibpenevìtevì din ne migkaan din.

Nengeulaula 27:35 Referans Kwoze

Mateo 15:36

Ne zutun migkuwa zin haazà is pitu he supas wey menge pait ne mibpeselamatan din te Megbevayà. Ne mibpenevìtevì din ne imbeg̵ey zin diyà te menge sumusundan din haazà ne intukid te menge sumusundan din ipemeg̵ey haazà diyà te menge etew.

2 Timoteo 1:12

ne tenged kayi egkeantus ku g̵untaan heini is kemeresayan. Ne minsan pa zutun, netuenan ku ke hentei sikandin is midserig̵an ku, ne netuenan ku zaan he taman te andew keuzemà he edsusiyen din is nengeulaula te menusiyà, metau sikandin he ebantey te langun he insarig din kediey.

2 Timoteo 1:8

Ne tenged dutun kenè nu ikeeled is kebpenurù nu mehitenged te Nengazen tew ne kenà a zaan kenikew ikeeled is gaked din wey nepirisu tenged te kedsengyawa kandin, kekenà, pinaag̵i te g̵ehem te Megbevayà he idtavang kenikew, ambit ka zaan kayi te ked-entusa ku te kemeresayan tenged te kedsengyawa te Meupiya he Tudtulanen.

1 Pedro 4:16

Iyan, ke iyan niw ibpekeantus te merasey is tenged te neketuu kew ki Kristu, kenè niw haazà ikeeled, kekenà, utew zekelà is kebpeselemati niw te Megbevayà su neg̵aked kew ni Kristu.

Ruma 14:6

Su is etew he egkeisip din he utew mahal is sevaha he andew, ne umba egkeisip din is iring dutun su wey mesuat is Megbevayà. Ne iring din ded daan is etew he egkaan te minsan hengkey, umba egkeenen din su egkeisip din he iyan haazà egkesuatan te Megbevayà ne egkepeselematan din haazà te Megbevayà. Ne is etew he menge lumbey zà is idsezè din, ne umba iyan dà haazà idsezè din su egkeisip din he iyan haazà egkesuatan te Megbevayà ne egkepeselematan din daan haazà te Megbevayà.

Ruma 1:16

Utew zekelà is kedsarig ku te Meupiya he Tudtulanen su emun edtuuwan heini te minsan hentei, puun te menge Hudiyu pehendiyà te kenà menge Hudiyu, edlibriyen sikandin te silut pinaag̵i te zekelà he g̵ehem te Megbevayà.

Juan 6:23

Ne zutun te uvey te lugar he zutun nemekekaan sikan is menge etew te supas he mibpeselematan te Nengazen he si Jesus, duen nemekezunggù he menge avang he ziyà ebpemuun te inged he Tibiryu.

Juan 6:11

Ne migkuwa ni Jesus haazà is menge supas ne mibpeselematan din te Megbevayà, ne impepenalad din dutun te impemepinuu he menge etew. Ne iring din ded daan sikan is menge pait, taman te nengehantey haazà is menge etew. Ne minsan pa zutun, wazà maamin haazà is supas wey pait.

Lucas 24:30

Ne hein diyè dan en te valey ne mibpinuu zan is egkaan. Ne si Jesus, migkuwa zin is egkeenen dan he supas. Ne mibpeselematan din te Megbevayà ne mibpenevì din ne human din ipemeg̵ey kandan.

Marcos 8:6

Ne migkeg̵iyan ni Jesus haazà is menge etew he mebpememinuu zan diyà te tanà, ne migkuwa zin haazà is pitu he vuuk he supas ne mibpeselematan din te Megbevayà, ne zutun mibpenevìtevì din. Ne minsan pa zutun kenà egkeamin haazà is edtevien din. Ne indata zin dutun te menge sumusundan din wey zan ikepemeg̵ey zutun te menge etew.

Mateo 14:19

Ne zutun migkeg̵iyan din is menge etew he mebpinuu zan diyà te tanà; ne migkuwa zin haazà is lelima he supas wey haazà is dezuwa he pait ne midlingahà diyà te langit ne mibpeselematan din te Megbevayà. Mibpenevìtevì din is menge supas, ne imbeg̵ey zin diyà te menge sumusundan din. Ne minsan pa zutun wazà maamin haazà is supas. Ne midtukid te menge sumusundan din pemeg̵ayi zutun is menge etew.