Nengeulaula 11:3 - Manobo Western Bukidnon

³ Ne ke sikandan te, “Maan is sikew he Hudiyu, nenumbaley ka ziyà te menge etew he kenà menge Hudiyu he wazà mesirkunsidar ne mibpekidtug̵en ka zaan kandan?”

Nengeulaula 11:3 Referans Kwoze

Nengeulaula 10:28

Ne migkeg̵iyan din sikandan te, “Netuenan niw en he sikami is menge Hudiyu, indawey kenami te tuluuwen dey is kebpekiduma wey kebpenumbaley ziyà te iring keniyu te kenà menge Hudiyu. Iyan,” ke si Pedro, “impesavut kedì te Megbevayà he kenè din egkesuatan he isipa ku he meremerik is minsan hentei su edewaten din is langun.

Lucas 15:2

Ne utew heini ingkeepes te menge Perisiyu wey menge menunudlù te kesug̵uan he zutun daan, ne ke sikandan te, “Heini si Jesus, ne ebpemekiduma kayi te menge etew he utew mesinupaken te kesug̵uan tew ne egkaan daan sikandin duma kandan.”

2 Juan 1:10

Ke zuen ebpekeuma he minsan hentei he ebpenurù te tuluuwen ne kenè din iyan ibpenurù is tutuu he tuluuwen he impenurù ni Kristu, kenè niw ipepemenahik diyan te valey niw. Kenè niw zaan igalewg̵alew sikandin.

Nengeulaula 10:48

Ne insug̵ù ni Pedro he bewtismuwi sikandan wey metueni he nekidsevaha sikandan ki Jesu Kristu. Ne hein nepasad haazà, si Pedro, midhengyuan eni Cornelio he med-ubpè dè pa ziyà te kandan seled te egkepipira he andew.

Nengeulaula 10:23

Ne impeseled dan ni Pedro ne impehizeg̵è din sikandan te sengekezukileman. Ne te nepawà dutun, miduma si Pedro kandan. Ne zuen daan miduma he menge tumutuu he tigHupi.

Mateo 9:11

Duen menge Perisiyu he nekeahà dutun te menge etew. Ne migkeg̵iyan dan is menge sumusundan ni Jesus te, “Is egalen niw, maan is egkaan wey ed-inum duma te menge limbungan he menunukut te vuhis wey menge mesinupaken?”

Juan 18:28

Ne zutun mid-uwit dan en maan si Jesus puun dutun te valey ni Keyipas ne midhendiyè dan te turug̵an te gubirnedur he Rumanu. Ne meselem pa utew zutun. Ne ziyè dà is menge punuan he menge Hudiyu te g̵awas su wey kenè dan mekesupak te vetasan dan te kegkelumpiyuwi su ke edseled dan dutun wazà itug̵ut kandan is kedtampu te kegkaan te Idlavung te Kedlevayi.

Nengeulaula 10:32

Ne g̵untaan ipaangey nu te menge sulug̵uen nu ziyà te inged he Hupi is etew he egngezanan ki Simon Pedro. Diyà ed-ubpà te valey te etew he Simon daan is ngazan din he mememaal te g̵elemiten puun te lundis. Diyà te veyvey is baley zin.’