Nengeulaula 11:26 - Manobo Western Bukidnon

²⁶ Ne hein neturedu zin, miduma zin diyà te Entiyukya. Ne seled te sengetuig, diyè dan is dezuwa med-amur te menge tumutuu ziyà te Entiyukya ne mezakel is mibpemenurù dan. Ne ziyà te Entiyukya, sikan is menge sumusundan, aney en gerari he menge Kristiyanus.

Nengeulaula 11:26 Referans Kwoze

1 Pedro 4:16

Iyan, ke iyan niw ibpekeantus te merasey is tenged te neketuu kew ki Kristu, kenè niw haazà ikeeled, kekenà, utew zekelà is kebpeselemati niw te Megbevayà su neg̵aked kew ni Kristu.

Nengeulaula 26:28

Ne zutun midtavak si Egripa te, “Kela ke kunaan nu ke egkeg̵aanggaan a kenikew egkehimu he tumutuu ki Kristu!”

1 Juan 2:27

Iyan, sikiyu, wazà kinahanglan he zuen selakew pa he ebpenurù keniyu su mibpeulinan kew en ni Kristu te Wag̵as he Mulin-ulin. Pinaag̵i zutun egkesavut niw is langun he ibpesavut keniyu ni Kristu. Tutuu mulà ne kenà tarù haazà is ibpesavut din keniyu umba kinahanglan he hemeni niw is kebpekidsevaha niw kandin sumalà is impenurù en keniyu.

1 Pedro 4:14

Utew kew zeyzey ke edsudien kew tenged te menge sumusundan kew ni Kristu su tuus heini he mid-ulinan kew te mekeg̵eg̵ehem he Mulin-ulin he iyan is Megbevayà.

Ipisu 3:15

Is langun he menge tumutuu he zini pa te lumpad wey ke ziyè en be te langit, ne migngezanan din sikandan he pemilya zin.

1 Kurintu 14:23

Umba, ke nengetig̵um is menge tumutuu wey egemiten te langun dutun is ketau te kegkag̵i te kineg̵iyan he kenè dan egketuenan wey ke penenglitan duen edseled dutun he menge bisita he sikan pa meketuu wey ke kenè be tumutuu ne kunaan dan ke ebuneg̵en kew.

1 Kurintu 12:12

Ne minsan pa te kenà ed-iiring-iring is ketau he imbeg̵ey kenitew te kada sevaha, nesevaha kiw g̵ihapun su iring kiw te sevaha zà he lawa ni Kristu he mezakel is menge parti zin.

1 Kurintu 11:18

Nezineg ku he emun edtig̵um kew egkengevahinbahin kew ziyan ne ebpekunkuntedehè kew. Ne malu a kayi ebpeketuu.

1 Kurintu 4:17

Umba, edsug̵uen ku ziyan te keniyu si Timoteo. Minahal ku sikandin he anak he utew metinumanen te menge sug̵ù te Nengazen. Ibpenurù din keniyu is menge ulaula ku, ne iyan heini meupiya he ed-ul-ulahan te tumutuu ki Kristu, ne iyan daan ibpenurù ku te menge tumutuu ziyà te minsan hendei he inged.

Nengeulaula 14:27

Ne hein nekeuma zan diyà te Entiyukya, midtig̵um dan is menge tumutuu ne midtudtul zan is langun he nehimu te Megbevayà pinaag̵i kandan wey is kedhimuwa zin te paag̵i wey meketuu is menge etew he kenà Hudiyu.

Mateo 28:19

Umba, penhipanew kew en diyà te minsan hendei wey niw metukid te ebpesavut is langun he menge etew ziyà te langun he menge inged. Ne penurua niw he medsundan dan kedì. Pemewtismuwi niw sikandan wey metueni he nekidsevaha zan te Amey tew he Megbevayà, wey siak is Anak din, wey is Wag̵as he Mulin-ulin.

Impezayag 3:18

Umba, edsembag̵an ku sikiyu he pemesaha niw zini te kediey is wag̵as he vulawan he migezaman diyà te hapuy, he ke và dà egkeg̵iya, hustu he kedtuu, ne tutuu en human he sepian kew. Ne pemasa kew zaan diyà te kediey te meputì he bisti wey maawà is kegkeeled niw tenged te kegkelevasi keniyu. Ne pemasa kew zaan te ibawì te kegkelakap niw su wey mehustu is ked-ehè niw.

Nengeulaula 14:23

Diyà te kada iglisya, he ke và dà egkeg̵iya, gurupu te menge tumutuu, midtezù ensi Pablo te menge ebmeg̵urangen. Midsalang dan egkaan is ed-ampù; ne is menge sumusundan dutun, insarig ni Pablo wey si Bernabe ziyà te Nengazen he midtuuwan dan.

Nengeulaula 11:27

Ne zutun he timpu, duen ebpuun diyà te Hiruselim he menge ebpeneuven te Megbevayà he midtupang su edhendiyè dan te inged he Entiyukya.

Nengeulaula 11:22

Heini is neulaula, nezineg te menge tumutuu he ziyà te Hiruselim ne midsug̵ù dan si Bernabe ziyà te Entiyukya.

Nengeulaula 11:20

Ne tigSipru wey tigSirini is duma zutun te nemelag̵uy. Ne hein nekeuma zan diyà te Entiyukya, mibpenudtulan dan daan is menge kenà Hudiyu; ne impesavut dan is keag̵i te Nengazen tew he si Jesus.

Nengeulaula 6:5

Ne hein nezineg haazà te menge tumutuu, nengesuat dan dutun te sambag te menge epustul. Ne mibpilì dan si Esteban. Ne si Esteban, utew mezesen is kedtuu zin wey nepurung sikandin ulini te Wag̵as he Mulin-ulin. Ne elin dutun te nepilì dan si Felipe, si Pukuru, si Nikenur, si Timen, si Perminas, wey si Nikulas he tig-Entiyukya. Ne haazà si Nikulas, kenà Hudiyu, iyan, neketuu zengan te tinuuwan te menge Hudiyu.

Juan 2:2

Ne zutun daan si Jesus wey is menge sumusundan din, su neumbita zaan sikandan he medtelavuk dan.

Nengeulaula 1:15

Ne nekepira zutun, nengetig̵um is menge tumutuu, menge nenggatus wey keluwaan sikandan is mibpetemtempuwà dutun; ne midhitindeg si Pedro is egkag̵i te,

Nengeulaula 6:1

Ne zutun he timpu ed-iseg ebmezakel is menge tumutuu ki Jesus. Is menge tumutuu he Hudiyu he Gerisyahanen is kineg̵iyan dan, duen ibmezaat te g̵ehinawa zan te zuma he menge tumutuu he Hudiyu. Egkag̵i haazà is menge Gerisyahanen he kenà pudu egkeveg̵ayan is kandan he menge valu he vahi ke ebpeneltelazen te kada andew is idtavang dutun te menge valu he vahi.

Nengeulaula 9:19

Ne migkaan ne nekeulì is desen din. Ne seled te nepipira he andew zutun, mibpekiduma si Seulu te menge sumusundan ni Jesus diyà te Demasku.

Nengeulaula 9:38

Ne is inged he Hupi, uvey te inged he Lida, ne is menge sumusundan diyà te Hupi, hein nezineg dan he ziyà si Pedro te Lida, midsug̵ù dan diyà te kandin is dezuwa he maama he impepenudtul kandin te, “Hendini ka g̵aanggaan.”

Nengeulaula 11:29

Ne tenged dutun neuyun is menge sumusundan diyà te Entiyukya he ed-emutè dan te selapì. Ne mebeg̵ey is kada sevaha sumalà is egkehimu zin wey zan metevangi is menge egkengeayuayu he menge zuma zan he menge tumutuu ziyà te prubinsya he Hudiya.

Nengeulaula 14:20

Iyan, hein midlingutan sikandin te menge tumutuu, mid-enew ne midlikù dutun te inged. Ne zutun te mid-ilis he andew, midhendiyà si Pablo wey si Bernabe te inged he Dirbi.

Nengeulaula 14:22

Ne impesavut dan te menge tumutuu zutun is ibmezesen te kedtuu zan. Migkag̵i zan kandan he kinahanglan he kenè dan engkezi is kedtuu zan ki Jesus. Ke sikandan te, “Sikita is tumutuu, wey ki zà egkehedii te Megbevayà ke egkeantus ta is mezakel he kemereg̵enan.”

Nengeulaula 14:28

Ne neug̵et is ked-ubpè dan te zezuwa zuma te menge tumutuu zutun te Entiyukya.

Nengeulaula 18:27

Ne zutun neisip ni Epulus is edhendiyà te prubinsya he Gerisya. Ne midtevangan sikandin te menge tumutuu ziyà te Ipisu su mibpesuratan dan is menge tumutuu ziyà te Gerisya ne midhangyù dan he zewata zan sikandin. Ne hein nekeuma si Epulus diyà te Gerisya, is langun he nemeketuu ki Jesus pinaag̵i te g̵ag̵ew te Megbevayà, dekelà he tavang haazà is penurù din kandan.

Nengeulaula 19:9

Ne is duma, mezesen is gehinawa zan ne wazè dan medtuu. Utew mezaat is menge lalag dan diyà te simbahan he idsumpalit dan te tuluuwen he imbeg̵ey te Nengazen tew. Ne tenged dutun, mid-awà si Pablo zutun ne miduma zin is nengehimu en he sumusundan ni Jesus. Ne kada andew edtig̵umen sikandan ni Pablo ziyà te valey ni Tiranu he nehimu he tulunghaan wey zan meistudyuwi is Lalag te Megbevayà.

Nengeulaula 20:1

Ne si Pablo, hein mid-engked is menge etew he edsinamuk, midtig̵um din is menge sumusundan. Midweliyan din sikandan su wey meheg̵et is kedtuu zan ne impesavut din he edhipanew en sikandin. Ne migenat ne midlikù diyà te prubinsya he Mesidunya.

Nengeulaula 20:30

Ne egkeulaula keuzemà he ebpengag̵i te tarù is minsan menge zuma niw su wey zan meuwit is menge tumutuu su wey mekesundan kandan.

Nengeulaula 21:4

Neturedu zey zutun is menge tumutuu ne midhulavung key ziyà te kandan taman te sengesimana. Ne g̵eina te zuen impezayag kandan te Wag̵as he Mulin-ulin midleg̵uyan dan si Pablo he kenà ibpelaus diyà te Hiruselim.

Santiago 2:7

Hentei is edsumpalit te mahal he ngazan ni Jesus he iyan teg̵ig̵aked kenitew? Iyan is menge sepian.