Marcos 12:14 - Manobo Western Bukidnon

¹⁴ Ne hein nekeuma haazà is menge sug̵ù, migkag̵i zan diyà te ki Jesus te, “Menunudlù, netuenan dey he metazeng ka he etew. Is lalag te menge etew, kenà ebpekehalin te ibpenurù nu tenged te wazè nu ibpelavi he minsan hentei, kekenà, tutuu is ibpenurù nu he ibpeveelan kenitew te Megbevayà. Umba, keg̵iyi key kenikew, ebpekesupak ki ve te kesug̵uan tew ke ebayad ki te vuhis diyà te hadì tew he ziyà te inged he Ruma?”

Marcos 12:14 Referans Kwoze

1 Tiselunika 2:4

Nezawat key te Megbevayà ne insarig din kenami is kebpesavut te Meupiya he Tudtulanen, ne tenged kayi ebpenudtul key. Kenè dey iyan tuyù is kebpenunuata te menge etew su iyan tuyù dey is kebpenunuata te Megbevayà. Iyan sikandin metau he ebpenggezam kenitew wey metueni he hustu is tuyù dey.

Gelasya 2:6

Ne zutun, minsan sikan is menge etew ziyà te Hiruselim he henduen be te menge egalen te tumutuu, wazè dan ingkepenurù kediey he idheg̵et te ibpenurù ku. Umba egkeg̵iyen ku he henduen dan te menge egalen su wazà bali ziyà te Megbevayà te igerar kenita te menge etew. Wazà id-uman dan te kediey he ibpenurù, kekenà, nesavut dan dutun he insarig kediey te Megbevayà is kedsengyawa te Meupiya he Tudtulanen diyà te menge etew he kenà Hudiyu iring te insarig din daan ki Pedro is kedsengyawa kayi ziyà te menge Hudiyu.

Gelasya 1:10

Kunaan niw vuwa ke iyan netag̵ù te g̵ehinawa ku is: egkesuat a he zelig̵a a te menge etew. Iyan, kenà iyan heini netag̵ù te g̵ehinawa ku, kekenà, iyan is kebpenunuata ku te Megbevayà. Kunaan niw vuwa zaan ke egkesuatan ku he ibmeupiya te g̵ehinawa te menge etew is menge ulaula ku, iyan, kenà daan iyan egkesuatan ku su emun iyan egkesuatan ku, kenà egkehimu he sulug̵uen a ni Kristu.

2 Kurintu 5:16

Is paag̵i zey te ked-isipa te minsan hentei he etew, ne kenà iyan is paag̵i he egemiten te menge etew he wazà medtuu. Dengan, iyan heini migamit dey he paag̵i su mid-isip dey he etew zà duen si Kristu, iyan, guntaan netuenan dey he kenà etew zà duen sikandin.

2 Kurintu 5:11

Ne g̵eina te netuenan dey he utew mekehandekhandek keuzemà haazà is kedsusiya te Nengazen te menge ulaula te menusiyà, edhimuwen dey pezem is taman te egkehimu zey wey meketuu is menge etew. Netuenan te Megbavayà he kenà mezaat is tuyù dey, ne egkesuatan ku he metueni niw zaan heini.

2 Kurintu 2:17

Iyan, sikami, kenè dey ed-iringan is ulaula te mezakel he ebpenurù su ziyà te kandan henduen be te ibpenapì dan is Lalag te Megbevayà. Ne tenged te midsugù key te Megbevayà, ne tenged daan te edsusiyen key layun te Megbevayà, tutuu is tuyù dey wey egkeg̵iyen dey su nekidsevaha key ki Kristu.

2 Kurintu 2:2

Su emun igkeseeng a keniyu ne hentei is edlipey kedì? Wazà, su egkeseeng kew man kediey.

Juan 7:18

Su ke zuen etew he ibpenurù din is kandin dà he isip, ebpevantug dà te menge etew, iyan, is etew he ibpenurù din is kegkevantug te midsug̵ù kandin, egkeserig̵an is lalag din su kenà tarù is ibpenurù din.

Ruma 13:6

Ne iyan daan heini ketezengan ke maan is ebayad ki te vuhis, su is menge upisyal, ne iring te iyan egalen dan is Megbevayà ke hustu is kedtumana zan te ebpeveelan kandan.

Lucas 23:2

Ne hein nekeuma zan dutun ne impezineg dan ki Pilatu is menge sumbung dan. Ke sikandan te, “Midsusi zey heini is etew ne netuenan dey he edsinamuk kayi te inged tew su ibpeengked din is menge etew he ebayad te vuhis diyà te lavew he hadì tew ziyà te inged he Ruma. Ne kenà duen dà taman su egkeg̵iyen din he iyan sikandin si Kristu, he ke và dà egkeg̵iya, hadì.”

Lucas 20:22

Hengkey is isip nu? Ebpekesupak ki ve te kesug̵uan tew ke ebayad ki te vuhis diyà te hadì tew ziyà te inged he Ruma?”

Marcos 14:45

Ne zutun te kebpekeuma ni Hudas, segugunè din mid-uvayi si Jesus ne migkag̵i te, “Na! Menunudlù!” Ne midhezekan din.

Mateo 22:17

Umba, keg̵iyi key kenikew, ke ebpekesupak ki ve te kesug̵uan tew ke ebayad ki te vuhis diyà te hadì tew he ziyà te inged he Ruma?”

2 Kurintu 4:1

Nehizuwan key te Megbevayà ne midtezù key zin wey zey metuman is ebpeveelan din kenami mehitenged te kedsengyawa te veg̵u he paag̵i ne tenged dutun kenà egkeawà is gustu zey te kedtumana kayi.

Mateo 22:16

Ne midsug̵ù dan diyà te ki Jesus is menge sumusundan dan wey menge sakup te upakat he midtukud ni Hirudis. Ne haazà is midsug̵ù dan, migkag̵i ziyà te ki Jesus te, “Menunudlù, netuenan dey he metazeng ka he etew; su ibpenurù nu is tutuu he ebpeveelan kenitew te Megbevayà, ne is lalag te menge etew, kenà ebpekehalin te ibpenurù nu tenged te wazè nu ibpelavi he minsan hentei.

Marcos 12:13

Ne midsug̵ù dan is duma zutun te menge Perisiyu wey te menge sakup te upakat he midtukud ni Hirudis su wey zan mepulutikahi si Jesus he meveeli zan te sumbung.

Marcos 12:15

Ne netuenan ni Jesus he akal haazà is netag̵ù diyà te g̵ehinawa zan, ne ke sikandin te, “Maan is egezaman a keniyu? Ipeehè niw kediey ke memenumenu is selapì he ibayad niw te vuhis diyà te hadì he ziyà te Ruma.”