Lucas 9:26 - Manobo Western Bukidnon

²⁶ Is minsan hentei he igkeeled e zin wey igkeeled din is ibpenurù ku, siak is Kakey te Menusiyà, igkeeled ku zaan sikandin keuzemà ke edlikù a he zekelà is gehem te ked-anlag ku wey edsun-uzan ad te mekeg̵eg̵ehem he anlag te Amey ku he Megbevayà wey te anlag te menge velinsug̵uen te Megbevayà.

Lucas 9:26 Referans Kwoze

2 Timoteo 2:12

Ke ed-antus ki te kemeresayan ebpekehadì ki keuzemà duma kandin. Iyan, ke egkag̵i ki he kenè ki g̵aked din egkag̵i zaan sikandin keuzemà he kenè ki iyan gaked din.

Ruma 1:16

Utew zekelà is kedsarig ku te Meupiya he Tudtulanen su emun edtuuwan heini te minsan hentei, puun te menge Hudiyu pehendiyà te kenà menge Hudiyu, edlibriyen sikandin te silut pinaag̵i te zekelà he g̵ehem te Megbevayà.

Marcos 8:38

Is minsan hentei he igkeeled e zin wey igkeeled din is ibpenurù ku kayi te timpu he mezakel is menge etew he lalung wey edsumpalit te Megbevayà, siak is Kakey te Menusiyà, igkeeled ku zaan sikandin keuzemà ke edlikù a he edumahan a te menge velinsug̵uen ku wey edsun-uzan ad te mekeg̵eg̵ehem he anlag te Amey ku he Megbevayà.”

Impezayag 21:8

Iyan, sikan is egkehandek he edsundan kedì wey is menge kenà metinumanen, is menge etew he memahawag is ulaula, is menge memumunù, wey is menge meremerik is betasan, is menge keteuwan he etew, wey menge ed-azap te kenà tutuu he Megbevayà wey is langun he teruen he menge etew, iyan egketemanan dan is id-agbur sikandan diyà te ranew he nepenù te egkeregreg he esupri he iyan ikezuwa he kemetayen,” ke sikandin.

Mateo 16:27

Su Siak is Kakey te Menusiyà, imbanglis kedì he mekelikù a keuzemà he edumahan te menge velinsug̵uen ku wey edsun-uzan ad te mekeg̵eg̵ehem he anlag te Amey ku he Megbevayà. Ne zutun edsuhulan ku is langun he menge etew sumalà is mid-ulaula te uman sevaha.

Mateo 25:31

Siak is Kakey te Menusiyà, dutun te kedlikù ku he utew zekelà is gehem te ked-anlag ku wey edumahan ad te langun he menge velinsug̵uen ku, ebpinuu ad is edhadì.

Juan 12:43

Umba wazè dan keg̵iya su iyan dan impelavi is kedelig̵a kandan te menge etew, kenà is kedelig̵a kandan te Megbevayà.

Impezayag 20:11

Ne zutun neehè ku is dekelà he meputì he pinuuwà te edhadì ne neehè ku zaan is ebpimpinuu zutun. Naawà is langit wey tanà diyà te etuvangan din ne nahanew ne kenè en maan sikandan egkeahà.

Hudas 1:14

Si Inuk, sikan is ikepitu he lapis he kevuwazan ni Adan, netagnè din dengan haazà is menge etew su migkag̵i sikandin te, “Keuzemà ebpekeuma is Nengazen he edumahan te liblibuwen he menge velinsug̵uen din

2 Timoteo 1:12

ne tenged kayi egkeantus ku g̵untaan heini is kemeresayan. Ne minsan pa zutun, netuenan ku ke hentei sikandin is midserig̵an ku, ne netuenan ku zaan he taman te andew keuzemà he edsusiyen din is nengeulaula te menusiyà, metau sikandin he ebantey te langun he insarig din kediey.

Impezayag 3:5

Is minsan hentei he ebpekezaag ki Setanas, edsun-uzan sikandin te meputì ne kenè ku ebpenasen is ngazan din diyà te libru he zutun isurat is menge ngazan te ebeg̵ayan te untung he wazà pidtemanan. Ne ziyà te etuvangan te Amey ku he Megbevayà wey is menge velinsug̵uen din, ed-engkenen ku sikandin he g̵aked ku.

Impezayag 1:7

Ebpekeuma si Jesu Kristu he ziyà egkeahà te menge g̵apun. Egkeahà sikandin te tivuuk he menusiyà ragkes is menge etew he mibpilak kandin dengan. Ne is langun he kelasi te menusiyà dini te kelibutan, ebpekesineg̵ew zan tenged kandin su egkehandek dan te silut. Metuman heini is langun.

Gelasya 6:14

Siak mulà, iyan ku zà ibpezalig is Nengazen tew he si Jesu Kristu he mibpehimatey he elili kenitew. Ne tenged te kebpehimatey zin, wazè e en meuripen te menge kelibutanen he kebayà, ne wazè en kayi g̵ehem te kebayàbayà kediey.

Mateo 26:64

Ne midtavak si Jesus te, “Iyan heeyan sumalà is migkag̵i nu ne ekeg̵iyan ku sikiyu is langun he siak is Kakey te Menusiyà, keuzemà egkeahà a keniyu is diyà ebpinuu te zapit te egkekewanan te Megbevayà. Ne egkeahà a zaan keniyu ziyà te menge g̵apun is ebulus he ebpuun diyà te langit,” ke sikandin.

Hibriyuhanen 13:13

Umba, menge suled, egawas kiw zaan te inged ne edhendiyè kiw en te kandin, he ke và dà egkeg̵iya, kenè tew en edserig̵an is kedtumana te menge tuluuwen te menge Hudiyu, kekenà, iyan dà edserig̵an tew si Jesus. Edsundanan tew sikandin ne kenè tew igkehandek is ked-entusa tew te kedsudia kenitew tenged te kedtuu tew kandin.

Hibriyuhanen 11:26

Neisip din he tuwas pa he meupiya is ked-entusa zin te kedlupig̵i kandin tenged te kedsarig din te mibpilì he hadì he ibpevulus te Megbevayà keuzemà, kenà is dekelà he ketig̵eyunan he egkekuwa zin diyà te Ihiptu. Su iyan hustu he edteg̵azan din is langun he meupiya he ibeg̵ey kandin te Megbevayà keuzemà.

2 Kurintu 12:10

Ne meupiya en utew te g̵ehinawa ku is kurang ku te ketau, is kedsumpelita wey is pesipala kediey te menge etew, wey is menge kemereg̵enan wey is kemeresayan tenged te kedtuu ku ki Kristu. Su netuenan ku he emun wazè en kediey he ketau, dekelà is ibeg̵ey kediey ni Kristu he ketau.

Juan 5:44

Egkemenumenu is hustu he kebpeketuu niw emun ebpengahaan niw te kada sevaha is kegkezelig̵i keniyu te menge zuma niw, ne is kegkezelig̵i pezem keniyu te sebsevaha zà he Megbevayà, kenè niw egkesuatan?

Nengeulaula 10:22

Ne migkag̵i zan te, “Impehendini key ni Kepitan Cornelio. Metazeng sikandin he etew. Ed-azap sikandin te Megbevayà, ne telehuzen daan sikandin te langun he menge Hudiyu. Migkeg̵iyan sikandin te velinsug̵uen te Megbevayà te, ‘Ipaangey nu si Simon Pedro wey nu mezineg is ibpesavut din,’ ” ke sikandan.

1 Timoteo 5:21

Edteleenan ku sikew he purungi nu tumana heini is insug̵ù ku kenikew. Iyan ebpeketistig̵us kayi is Megbevayà, si Jesu Kristu, wey is menge pinilì din he velinsug̵uen. Kinahanglan he te minsan hengkey he ed-ul-ulahan nu wazè nu zepig̵i he minsan hentei. Ke edhusey ka kinahanglan he iyan nu pemineg̵a kes ebpekevenar.