Lucas 3:3 - Manobo Western Bukidnon

³ Si Juan, mibeyaan din is langun he menge inged dutun te uvey te wahig he Hurdan ne mibpenurù din is menge etew zutun. Ke sikandin te, “Iniyug̵i niw is memezaat he menge ulaula ne mebpebewtismu kew ne ebpeseyluwen te Megbevayà is menge salè niw.”

Lucas 3:3 Referans Kwoze

Lucas 1:77

Ibpesavut nu kandan he egkeveg̵ayan sikandan te untung he wazà pidtemanan emun ebuyù dan te pesaylu ziyà te Megbevayà.

Nengeulaula 22:16

Ne kenè ka medlanganlangan, kuwa ke en wey ka mebewtismuwi. Pengumew-umew ka te Nengazen wey ka mepesaylu te menge salè nu.’

Nengeulaula 19:4

Ne ke si Pablo maan te, “Sikan is kebewtismu he impenurù ni Juan, ne tuus dà te ked-iniyug̵i te mezaat he ulaula, asal impenurù daan ni Juan te menge tig-Israyil he kinahanglan daan he medtuu zan te ed-ilis kandin he iyan si Jesus.”

Nengeulaula 13:24

Ne zutun te wazè pa mebpuun mebpenurù si Jesus, impesavut ni Juan Megbebewtismu ziyà te langun he menge kevuwazan ni Israyil he kinahanglan he mebpebewtismu zan he tuus te mid-iniyug̵an dan is memezaat he ulaula.

Juan 3:26

Ne midhendiyè dan te ki Juan ne ke sikandan te, “Menunudlù, sikan is etew he zuma nu hein diyè ka layun te wahig he Hurdan, sikan is migkag̵i nu, ebpemewtismu zaan sikandin ne mezakel he etew is edsundan kandin.”

Mateo 3:11

Wahig is ibewtismu ku keniyu,” ke si Juan, “he tuus te mid-iniyug̵an niw is mezaat he ulaula, iyan, duen etew he ed-ilis kediey ne iyan ibewtismu zin keniyu is Wag̵as he Mulin-ulin, ne emun kenà, ne hapuy. Lavew sikandin kedì, ne minsan is ked-uwit dà te sepatus din, kenè e pa zait he sulug̵uen din.

Juan 1:28

Ne nehitavù heini is langun diyà te inged he Bitanya he ziyà layun te wahig he Hurdan he zutun ebpemewtismu si Juan.

Lucas 1:16

Ne pinaag̵i te kebpenurù din,” egkag̵i haazà is belinsug̵uen, “mezakel is menge kevuwazan ni Israyil he edlikù edtuu te Megbevayà he iyan ed-ezapen te menge g̵inikanan dan dengan.

Lucas 4:1

Ne hein nebewtismuwan en si Jesus, mid-awà sikandin dutun te wahig he Hurdan. Nepurung sikandin meulini te Wag̵as he Mulin-ulin ne mid-uwit sikandin te Wag̵as he Mulin-ulin pehendiyà te tanà he wazà duen ed-ubpà he etew.