Lucas 22:53 - Manobo Western Bukidnon

⁵³ Ne hein duma a keniyu kada andew ziyà te Valey te Megbevayà is ebpenurù ne wazà a keniyu zutun dà dekepa. Iyan, iyan heini g̵untaan kes timpu he imbanglis keniyu wey niw meveeli is egkesuatan ni Setanas.”

Lucas 22:53 Referans Kwoze

Ipisu 6:12

Su kenà iyan edtebeken tew is menge etew zà duen, kekenà, iyan edtebeken tew is menge mezaat he kedesenan he ziyà ed-ubpà te langit wey is menge kenà egkeahà he hadì, wey menge egalen, wey menge ebayàbayà te langun he menge mezaat he etew he nesakup te kerusireman guntaan dini te kelibutan.

Juan 12:27

Utew mesakit is gehinawa ku g̵untaan. Hengkey vuwa is egkeg̵iyen ku? Kenà egkehimu he edhengyuen ku ziyà te Amey ku he kenè din ipaantus kediey heini is ebpeebuten ku he utew merasey, su umba midhendini a te kelibutan su wey ku meseg̵azi heini is ibpaantus kedì.”

Kulusas 1:13

Midtevangan kiw te Amey tew he Megbevayà ne tenged kayi wazè kiw en maan meveyveyai te kerusireman, he ke và dà egkeg̵iya, si Setanas. Ne g̵untaan iyan en ebayàbayà kenitew is Anak te Megbevayà he si Jesus he utew mahal ziyà te g̵ehinawa te Megbevayà.

Nengeulaula 26:18

Ne is ibpesavut nu kandan, egkehimu he iyan igkeawà te kegkelakap dan te kedtuu wey zan daan meewai is merusirem ne medhalin dan diyà te merayag. Ne pinaag̵i kayi egkepeleg̵uyan dan is kebeyveyai kandan ni Setanas ne ebpekepesakup dan te Megbevayà. Ne egkepesaylu is menge salè dan tenged te kedtuu zan kedì ne egkehimu zan daan he menge tumutuu he pinilì te Megbevayà.’

Juan 7:45

Ne is menge Perisiyu wey menge punuan he menge memumuhat, hein midlikù is menge guwardya he midsug̵ù dan, mid-insaan dan ke maan is wazè dan mezakep si Jesus.

Juan 14:30

Mevavè dà utew is menge lalag ku keniyu su meg̵aan en ebpekeuma si Setanas is egalen te menge etew zini te kelibutan he kuntada ku. Wazè din keg̵ehem kediey,

Juan 7:30

Ne edekepen dan pezem si Jesus dutun, iyan, wazà nekeaku he egawed kandin su wazè pa itug̵ut te Megbevayà.

Mateo 21:23

Midlikù si Jesus diyà te simbahan he Valey te Megbevayà ne mibpenurù din is menge etew zutun. Ne nemekeuma is menge lavew he memumuhat wey menge ebmeg̵urangen te menge Hudiyu zutun ne mid-insè dan ki Jesus te, “Heini is langun he ed-ul-ulahan nu zini te simbahan, duen nu ve ketenged te ked-ulaula kayi, wey hentei is mibeg̵ey kenikew te ketenged wey nu meulaula heini?”

Lucas 22:52

Ne elin daan dutun te nemenhendutun te kedakep ki Jesus is menge punuan te memumuhat wey is menge kepitan te ebantey zutun te zekelà he simbahan wey is menge ebmeg̵urangen te menge Hudiyu. Ne migkeg̵iyan sikandan ni Jesus te, “Tulisan e ve? Su maan is neg̵umeenan kew te ubpit wey lagkut is edakep kedì?

Lucas 22:54

Ne zutun midakep dan si Jesus ne mid-uwit dan diyà te valey te lavew he memumuhat. Ne si Pedro, midtinundug daan asal kenà utew ed-uvey.

Juan 13:30

Ne hein nekaan ni Hudas haazà is supas, midlawang ne mezukilem en dutun.