Lucas 22:19 - Manobo Western Bukidnon

¹⁹ Ne zutun mid-amì si Jesus dutun te egkeenen dan he supas ne mibpeselematan din daan haazà te Megbevayà. Ne mibpenevìtevì din ne impenduwal zin kandan, ke sikandin te, “Iyan heini lawa ku he ibelukas keniyu. Emun egkeenen niw heini isipa a keniyu.”

Lucas 22:19 Referans Kwoze

1 Kurintu 10:16

Sikitew is menge tumutuu, emun edtig̵um kiw su edtumanen tew is kedtenuzi te kebpatey ni Kristu, duen ed-inumen tew he ebpeselematan tew te Megbevayà. Tuus heini he mibpelisan kiw en te lengesa ni Kristu. Ne is supas he ebpenebtevien tew ne egkeenen tew, kebpekeambit tew heini te lawa ni Kristu.

Lucas 22:20

Ne hein neipus dan dutun is egkaan ne migkuwa en maan ni Jesus is tasa ne migkag̵i te, “Heini ve is inumen, ne tuus te veg̵u en he paag̵i te kegkelibri he midtukud te Megbevayà ne egkehimu heini pinaag̵i te lengesa ku he ibpaag̵as tenged keniyu.

1 Kurintu 10:4

ne nekeinum dan te inumen he imbeg̵ey zin daan su is langun te sikandan, ne nekeinum te wahig he ebpuun diyà te vatu he impaahà kandan te Megbevayà. Ne haazà is batu, ne iyan si Kristu he kenà edsuwey kandan.

Tito 2:14

Mibpehimatey sikandin he elili kenitew wey kiw zin melibri te kebpekeulaula tew te mezaat ne wey kiw zin daan mehimu he menge g̵aked din he etew he nelumpiyuwan he utew en egkengesuat he ed-ulaula te meupiya.

1 Pedro 2:24

Iyan si Kristu midsilutan tenged te menge salè tew zutun te kedrensanga kandin diyà te krus. Umba iyan sikandin midsilutan su wey tew meengkezi is menge mezaat he ulaula ne wey tew iyan meulaula is metazeng. Is menge palì din dutun, ne iyan nekevawì kenitew.

Ipisu 5:2

Kinahanglan he ipeehè niw layun he mahal ziyà te g̵ehinawa niw is menge zuma niw iring te mahal kiw ziyà te g̵ehinawa ni Kristu. Mibpehimatey sikandin he elili kenitew wey kiw zin melibri. Nehimu heini he pemuhat he utew mehemut, he ke và dà egkeg̵iya, utew egkesuati te Megbevayà.

Gelasya 1:4

Si Kristu, imbelavag din is untung din su wey mepalis is menge salè tew su wey kiw melibri, ne kenè tew meiringi is menge etew he ed-ulaula te mezaat te g̵untaan he timpu kayi te kelibutan. Umba mibeelan heini ni Kristu su edtumanen din is egkesuatan te Amey tew he Megbevayà.

Juan 6:51

Iyan a egkeenen he ebpuun te langit wey ebpekeveg̵ey te untung; ne ke zuen egkaan kediey kenè en ebpatey is gimukud din. Is egkeenen he ibeg̵ey ku, iyan is lawa ku. Ibeg̵ey ku heini su wey maangken te tivuk he menusiyà is untung he wazà pidtemanan,” ke si Jesus.

Lucas 24:30

Ne hein diyè dan en te valey ne mibpinuu zan is egkaan. Ne si Jesus, migkuwa zin is egkeenen dan he supas. Ne mibpeselematan din te Megbevayà ne mibpenevì din ne human din ipemeg̵ey kandan.

Mateo 14:19

Ne zutun migkeg̵iyan din is menge etew he mebpinuu zan diyà te tanà; ne migkuwa zin haazà is lelima he supas wey haazà is dezuwa he pait ne midlingahà diyà te langit ne mibpeselematan din te Megbevayà. Mibpenevìtevì din is menge supas, ne imbeg̵ey zin diyà te menge sumusundan din. Ne minsan pa zutun wazà maamin haazà is supas. Ne midtukid te menge sumusundan din pemeg̵ayi zutun is menge etew.

Juan 6:23

Ne zutun te uvey te lugar he zutun nemekekaan sikan is menge etew te supas he mibpeselematan te Nengazen he si Jesus, duen nemekezunggù he menge avang he ziyà ebpemuun te inged he Tibiryu.

Lucas 22:17

Ne zutun ne migkuwa ni Jesus is tasa he midteg̵uan te vinu ne mibpeselematan din te Megbevayà ne migkag̵i sikandin diyà te menge sumusundan din te, “Med-inum is kada sevaha keniyu.

Gelasya 4:25

Diyà haazà is buntud he Siney te tanà he egngezanan te Erabya. Ne alung heini is buntud he Siney ki Hagar. Ne iyan kehulug̵an ni Hagar is inged he Hiruselim su neuripen is langun he meg̵inged dutun te kedtumana te kesug̵uan.

Mateo 15:36

Ne zutun migkuwa zin haazà is pitu he supas wey menge pait ne mibpeselamatan din te Megbevayà. Ne mibpenevìtevì din ne imbeg̵ey zin diyà te menge sumusundan din haazà ne intukid te menge sumusundan din ipemeg̵ey haazà diyà te menge etew.