Lucas 18:23 - Manobo Western Bukidnon

²³ Ne hein nezineg dutun te etew is sambag ni Jesus ne utew mibmesakit is gehinawa zin su zekelà is ketig̵eyunan din.

Lucas 18:23 Referans Kwoze

1 Juan 2:15

Kinahanglan he kenà iyan dekelà dini te g̵ehinawa ta is menge ulaula te menge etew zini te kelibutan he menge kuntada te Megbevayà, kinahanglan daan he wazà minsan hengkey zini te kelibutan he iyan dekelà dini te g̵ehinawa ta. Su ke zuen etew he iyan dekelà diyà te g̵ehinawa zin is iring dutun, kenà egkehimu he iyan mahal ziyà te g̵ehinawa zin is Amey tew he Megbevayà.

Lucas 21:34

Ne ke si Jesus te, “Uram kew wey kew kenà kayi zà egketaman te kegkebibu wey kebpemenginum wey te kedlag̵ud niw te menge kelibutanen he menge kinahanglan niw. Su emun kenè kew ed-uram ne egketik-awan kew egkesaut te andew te kedlimasa te Megbevayà te menusiyà. Ne egkeiring kew te egketelebpì he rumat.

Lucas 12:15

Ne migkag̵i si Jesus diyà te menge etew te, “Purungi niw ventayi is ulaula niw su wey wazà keleleg̵ed diyan te keniyu. Su is ibmeupiya te untung te etew, kenà ebpuun te mezakel he menge azen.”

Lucas 8:14

Ne haazà is benì he ziyà mengeulug te tanà he zug̵iyen is menge sagbet dutun, ne iyan is Lalag te Megbevayà he nezineg te menge etew, iyan, tenged te menge seeng dan wey is suat dan te selapì, wey is menge kelipey he kayi te kelibutan, egkelipatan dan is nezineg dan ne kenà ebpulus diyà te kandan is Lalag te Megbevayà.

Marcos 10:22

Ne hein nezineg dutun te etew haazà is migkag̵i ni Jesus, ne utew mibmesakit is gehinawa zin ne mid-awà dutun is utew neseeng su zekelà is ketig̵eyunan din.

Mateo 19:22

Ne hein nezineg heini zutun te menguhed he etew, ne mid-ulì he utew mibmesakit is gehinawa zin su utew zekelà is ketig̵eyunan din.

Kulusas 3:5

Umba, menge suled, kenè niw en itug̵ut he tumana niw is mezaat he kebayè niw; kenè niw ul-ulaha is mahawag wey meremerik he ulaula ne kenè niw mehimuwa he zuen suat niw te kenè niw esawa; engkezi niw is mezaat he ulaula wey is keleleg̵ed su emun leg̵ezen ki te menge azen, henduen be te egkeilisan dini te g̵ehinawa ta is tutuu he Megbevayà te menge azen.

Pilipus 3:8

Ne kenà dutun dà taman is mid-engkezan ku, kekenà, mid-eminan ku engkezi is minsan hengkey he zekelà dini te g̵ehinawa ku su wey ku mekuwa is utew pa lavew he mahal he iyan is kebpekidsevaha ku ki Jesu Kristu te Nengazen ku. Tenged kandin mid-engkezan ku is langun ne mid-isip ku heini he abper zà dini te kelibutan wey a mekepekidsevaha ki Kristu,

Ipisu 5:5

Su ibpesavut ku keniyu is utew tutuu. Is etew he meremerik is ulaula zin wey ke edhilavet te kenè din esawa, ne kenà sikandin egkehedian ni Kristu wey te Megbevayà. Ne iring din ded daan is leg̵ezen he etew su is menge vutang he igkeleg̵ezi zin, egkehimu he menge megbevayè din.

Lucas 19:8

Ne si Sekiyu, hein nekeuma zan engki Jesus diyà te valey zin ne midhitindeg sikandin is egkag̵i te, “Ibeg̵ey ku is ketengà kayi te ketig̵eyunan ku ziyà te menge ayuayu. Ne minsan hentei he etew he nelimbungan ku zengan, ne id-ulì ku ziyà te kandin is keheepat egketakep haazà is nekuwa ku.”

Lucas 18:22

Ne hein nezineg ni Jesus haazà, migkeg̵iyan din te, “Duen nu pa kurang; iyan is: ulì ka ne ivelegyè nu is langun he azen nu, ne is halin, ipemeg̵ey nu ziyà te egkengeayuayu ne edsepian ka ziyà te langit. Ne ke egkeipus nu heeyan, likù ka zini wey ka mekesundan kediey.”

Lucas 18:24

Ne zutun midtengtengan sikandin ni Jesus ne ke si Jesus te, “Utew mereg̵en te sepian he etew is kebpesakup din te Megbevayà wey mehedii sikandin te Megbevayà.