Juan 6:70 - Manobo Western Bukidnon

⁷⁰ Ne migkag̵i kandan si Jesus te, “Siak, mibpilì ku sikiyu is sepulù wey zezuwa, iyan, sakup ni Setanas is sevaha keniyu.”

Juan 6:70 Referans Kwoze

Juan 13:27

Ne hein nezawat ni Hudas haazà is supas, ne mid-ehukan sikandin ni Setanas ne migkeg̵iyan ni Jesus te, “Gègaani nu is ebeelan nu!”

Juan 13:2

Si Jesus wey is menge sumusundan din, ne edlavung dan dutun. Ne si Hudas he tigKeriyuti he anak ni Simon, daan en he impeseled ni Setanas diyà te isip din is ked-ekali zin ki Jesus.

Juan 17:12

Te kemulu e pa zuma zan, is menge etew he imbeg̵ey nu kediey, midlig-enan ku sikandan pinaag̵i te g̵ehem te ngazan nu he iyan daan kes ngazan he imbeg̵ey nu kediey. Mibentayan ku sikandan ne wazà minsan sevaha he egketazin kandan. Sikan is etew he netagnà is kedsiluti kandin, egketazin sikandin su egketuman is tagnà diyà te insurat he Lalag te Megbevayà.

Juan 13:18

Kenè kew pudu is egkeg̵iyan ku kayi su netuenan ku ke hengkey is gehinawa te uman sevaha keniyu te menge pinilì ku. Duen sevaha keniyu he ed-ekalan e zin. Umba egkeulaula heini su wey metuman sikan is netagnà dengan diyà te insurat he Lalag te Megbevayà he edhenduen te, ‘Is duma ku he ebpekidtug̵en kediey, iyan nehimu he kuntada ku.’

Juan 6:64

Duen duma keniyu he wazà medtuu kediey,” ke si Jesus. (Umba migkag̵i zin haazà su netuenan din he zaan ke hentei is wazà medtuu, ne netuenan din daan ke hentei is ed-akal kandin.)

1 Juan 3:8

Ke zuen etew he layun ed-ulaula te mezaat ne sakup sikandin ni Setanas su layun daan si Setanas ed-ulaula te mezaat puun pa te kedlimbag̵a te kelibutan. Umba midhendini te kelibutan is Anak te Megbevayà su wey zin ikeawà is gehem te menge ulaula ni Setanas.

1 Timoteo 3:11

Iring din ded daan is bahi he esawa te diyekunu su kinahanglan he telehuzen sikandin. Kenà menge vereituk, kekenà, egketengkaan is ked-isipa zin te langun wey egkengeserig̵an te minsan hengkey he meupiya he ulaula.

Nengeulaula 1:17

Si Hudas, duma tew he epustul, su insarig daan diyà te kandin is ebpeveelan kenitew te Nengazen,” ke si Pedro.

Juan 15:19

Emun duma kew te menge kuntada te Megbevayà ebmahalen kew zan, iyan, geina te kenè kew zan duma ne egkuntedahan kew zan su mibpilì ku sikiyu wey kew mekesuwey ziyà te kandan.

Juan 15:16

Kenè kew iyan nekepilì kediey, kekenà, iyan a nekepilì keniyu. Intezù ku sikiyu wey kew mekepemeg̵as te menge meupiya he ulaula ne wey kenà daan mahanew is beg̵as niw. Ne is minsan hengkey he ebuyuen niw ziyà te Amey ku he Megbevayà tenged te kedtuu niw kediey, ibeg̵ey zin keniyu.

Juan 13:21

Ne te kegkeg̵iya zutun ni Jesus, utew mibmesakit is gehinawa zin ne migkeg̵iyan din is menge sumusundan din te, “Utew venar is egkeg̵iyen ku keniyu he ed-ekalan a te sevaha keniyu wey a mehimetayi.”

Juan 8:44

Iyan amey niw si Setanas, ne is egkesuatan te amey niw, iyan daan egkesuatan niw he meveeli niw. Puun pa te puunà ne memumunù en si Setanas. Ne wazè din kelavet te tutuu he tuluuwen su wazà diyà te kandin is minsan hengkey he tutuu. Emun egkag̵i sikandin, ne tarù is lalag din su tarù dà is egkeisip din. Teruen man sikandin wey ziyà te kandin ebpuun is minsan hengkey he tarù.

Tito 2:3

Ne iring ded daan dutun is penurù nu ziyà te menge meg̵urang en he vahi. Kinahanglan he layun igkesuat te Megbevayà is menge ulaula zan. Kenà sikandan pereituk, kenà sikandan pereinum te vinu. Kinahanglan he layun dan ipenurù is meupiya he ulaula

Nengeulaula 13:10

ne migkeg̵iyan din te, “Iring ka ki Setanas he ebpenlimbung. Utew ka lalung ne kuntada ka te minsan hengkey he meupiya. Su is Lalag te Nengazen he utew hustu, egkeg̵iyen nu he tarù.

Juan 2:2

Ne zutun daan si Jesus wey is menge sumusundan din, su neumbita zaan sikandan he medtelavuk dan.

Juan 6:67

Ne zutun migkeg̵iyan ni Jesus sikan is sepulù wey zezuwa he menge epustul, ke sikandin te, “Sikiyu zaan, edsuwey kew ve kedì?”

Juan 6:71

Iyan egkeg̵iyen din si Hudas he anak ni Simon he tigKeriyuti su sevaha sikandin dutun te sepulù wey zezuwa, ne iyan si Hudas ed-akal kandin.

Juan 20:24

Ne si Tomas, he migngezanan te Sereping, sevaha sikandin dutun te sepulù wey zezuwa he mibpilì ni Jesus. Wazà sikandin dutun te mibpaahà kandan si Jesus.