Juan 6:52 - Manobo Western Bukidnon

⁵² Ne zutun egkesumpakì is menge punuan he menge Hudiyu. Ke sikandan te, “Ebmenmenuwen kayi te etew is kebeg̵aya zin kenitew te lawa zin su wey tew mekaan?”

Juan 6:52 Referans Kwoze

Juan 10:19

Ne hein nezineg te menge Hudiyu heini he penurù ni Jesus, kenè dan en egkengeuyun.

Juan 9:16

Ne zutun migkag̵i is duma zutun te menge Perisiyu, ke sikandan te, “Heini si Jesus, kenà iyan sikandin sug̵ù te Megbevayà su edsupaken din layun is kesug̵uan mehitenged te Andew te Kedhimeley.” Iyan, migkag̵i zaan is duma pa he menge Perisiyu te, “Emun mesinupaken he etew, kenè din egkehimu is menge egkein-inuwan he iring kayi!” Ne zutun kenè dan egkengeuyun.

Juan 6:41

Ne zutun nengepauk ki Jesus haazà is menge punuan he menge Hudiyu tenged te migkag̵i zin he ke sikandin te, “Iyan a sikan is egkeenen he ebpuun diyà te langit.”

1 Kurintu 2:14

Ne is etew he wazà diyà te kandin is Wag̵as he Mulin-ulin, kenè din edewaten is ibpenurù te Wag̵as he Mulin-ulin su wazà pulus kayi ziyà te kandin, ne kenè din daan egkesavut su iyan dà ebpekeseysey kayi ziyà te kandin is Wag̵as he Mulin-ulin.

Nengeulaula 17:32

Ne hein nezineg dan haazà is kegkevanhew he nekag̵i ni Pablo, is duma zutun midsumpalit dan sikandin. Iyan, duen duma he egkag̵i te, “Likù ka kayi su egkesuat key pa he ebpemineg te kedseysaya nu kayi.”

Juan 4:11

Ne zutun migkag̵i haazà is bahi te, “Mama, wazè nu man sekilut ne mezalem heini is kalut. Hendei nu man egkekuwa heeyan is wahig he ebpekeveg̵ey te untung?

Juan 3:9

Ne zutun mid-insà si Nikudimu te, “Egkemenumenu heini?”

Juan 3:4

Ne mid-insà si Nikudimu ke, “Ebmenmenuwen te etew he meg̵urang en is kebpaanak kebpeuman su kenè en man sikandin ebpekelikù te g̵etek te iney zin wey iuman ianak.”

Juan 1:19

Duen menge memumuhat wey menge kevuwazan ni Levi he midhendiyà te ki Juan Megbebewtismu. Midsug̵ù sikandan te menge punuan te menge Hudiyu puun te Hiruselim wey zan meinsai si Juan ke hentei sikandin. Ne iyan heini migkag̵i ni Juan su wazè din ieles, ke sikandin te, “Siak, kenà a iyan kes mibpilì te Megbevayà wey mekehadì.”

Juan 6:60

Ne hein nezineg te menge sumusundan din haazà is kebpenurù din, mezakel kandan is migkag̵i te, “Mereg̵en egkezawat heini is penurù din, ne hentei zà buwa is ebpekepemineg kayi?”