Juan 5:36 - Manobo Western Bukidnon

³⁶ Iyan, duen kebpenistig̵us he lavew pa kenà is ki Juan, su is langun he mibpeveelan kediey te Amey ku he Megbevayà he ed-ul-ulahan ku, iyan edtistig̵us he midsug̵ù a te Amey ku he Megbevayà.

Juan 5:36 Referans Kwoze

Juan 10:25

Ne midtavak si Jesus te, “Migkag̵ì ku en keniyu ne wazè niw tuuwi. Is menge egkein-inuwan he midhimu ku he iyan insug̵ù te Amey ku he Megbevayà, iyan tuus ke hentei a.

Juan 15:24

Duen mibeelan ku he neehè dan he menge egkein-inuwan he kenà egkeveelan te minsan hentei he menusiyà. Angin ke wazè dan maahà heini su kenà sikandan egkevesulan tenged te mezaat he mid-ulaula zan kedì. Iyan, neehè dan en ne minsan pa zutun, siak wey is Amey ku, egkuntedahan key zan.

Juan 2:23

Ne zutun te timpu te Pista te Kedlevayi hein diyè pa ensi Jesus te inged he Hiruselim, mezakel is nemeketuu kandin su neehè dan is menge egkein-inuwan he midhimu zin.

1 Juan 5:9

Egkevenaran ki te kebpenistig̵us te menge etew zà duen, iyan, lavew pa he mezesen is kebpenistig̵us te Megbevayà ne midtistig̵usan din he Anak din si Jesus.

Juan 3:2

Midhendiyà sikandin te ki Jesus dutun te mezukilem ne migkeg̵iyan din si Jesus te, “Datù, netuenan dey he menunudlù ka he sug̵ù te Megbevayà su is menge egkein-inuwan he ebeelan nu, iyan dà ebpekehimu te iring kayi is etew he ebeg̵ayan te g̵ehem te Megbevayà.”

Juan 3:17

Is Megbevayà, wazè e zin is Anak din sug̵ua zini te kelibutan te kedsilut te menusiyà, kekenà, su wey pinaag̵i kedì melibri is menusiyà.

Mateo 11:4

Ne midtavak si Jesus te, “Likù kew en ziyà te ki Juan ne tudtula niw ziyà te kandin is nengeehè niw he mid-ulaula ku wey is nengezineg niw he egkeg̵iyen te menge etew. Iyan niw tudtula kandin he tenged kedì ebpemekeehè en is menge lakap, ne ebpemekehipanew en is menge piang, nengeulian en is menge it-iten wey ebpemekezineg en is menge vengel. Mibanhew ku is nemematey wey impesavut ku ziyà te menge egkengeayuayu is Meupiya he Tudtulanen. Utew deyzey is etew he kenà eduwazuwa he iyan a sikan is midsug̵ù te Megbevayà.”

Nengeulaula 2:22

Ne mid-uman megkag̵i si Pedro te, “Sikiyu is menge zuma ku he kevuwazan ni Israyil, pemineg̵a niw is egkeg̵iyen ku. Si Jesus, kes tigNeserit, sug̵ù sikandin te Megbevayà. Impesavut kenitew te Megbevayà he sug̵ù din si Jesus pinaag̵i te g̵ehem din wey menge egkein-inuwan wey menge singyal he mibpeveelan kandin te Megbevayà. Netuenan niw en heini is egkeg̵iyen ku su neulaula heini is langun dini te inged niw.

Juan 5:32

Iyan, selakew is ebpenistig̵us te menge vaal ku. Iyan is Amey ku ebpenistig̵us kediey, ne netuenan ku he egkeserig̵an is kebpenistig̵us din.

Juan 4:34

“Iring te egkekaan ku,” ke si Jesus, “is kedtumana ku te egkesuatan te Megbevayà he midsug̵ù kediey wey is kedhimesaza ku te impeveelan din kediey su iyan ibmezesen ku.

Juan 17:4

Dini te kelibutan, impeehè ku is utew zekelà he bentug̵an nu su is menge vaal he insug̵ù nu kediey, nepasad ku en.

Juan 11:37

Iyan, duen dutun menge etew he migkag̵i te, “Maan is wazè din bewii si Lazaro wey kenà mebpatey? Su emun nevewian din is mata te lakap siguradu egkehimu zin daan heini.”

Lucas 2:49

Ne midtavak si Jesus te, “Maan is ebpen-ahaan a keniyu? Wazè niw ve metueni he kinahanglan he zini a te valey te Amey ku?”