Juan 5:3 - Manobo Western Bukidnon

³ Mezakel is egkengezeruwan he zutun dan en ebpemen-ubpàubpà te menge helungà. Menge lakap, menge piang, wey menge minatey is divaluy he lawa, ne zutun edteg̵azan dan is kegurig̵awa zutun te wahig

Juan 5:3 Referans Kwoze

Lucas 7:22

Ne migkeg̵iyan ni Jesus haazà is menge sug̵ù ni Juan te, “Likù kew en diyà te ki Juan ne tudtula niw ziyà te kandin is nengeehè niw he mid-ulaula ku wey ke hengkey is nezineg niw he migkag̵i ku. Iyan niw tudtula kandin he tenged kedì ne ebpemekeehè en is menge lakap ne ebpemekehipanew en is menge piang; nengeulian en is menge it-iten wey ebpemekezineg en is menge vengel. Mibanhew ku is nemematey wey impesavut ku ziyà te menge egkengeayuayu is Meupiya he Tudtulanen.

Mateo 15:30

Ne mibpenhendiyà te kandin is utew mezakel he menge etew. Mibpenduma zan is menge piang, menge pungkul, menge lakap, menge emew. Ne miduma zan is mezakel pa he egkengezeruwan. Ne insavuk dan haazà diyà te etuvangan ni Jesus ne nengeulian din is langun dutun te mibpevawì kandin.

Santiago 5:7

Ne sikiyu is menge zuma ku he tumutuu, kinahanglan he meinentusen kew taman te kedlikù te Nengazen. Su is ebasuk, ebpekeantus te kedtag̵ad din taman te edsebpet en is impemula zin diyà te tanè din. Edteg̵azan din is uzan he ebpetuvù te pinemula zin wey is ebpeketesan te pinemula zin.

Ruma 8:25

Iyan, emun wazè pa meulaula haazà is edteg̵azan ta, kinahanglan he edtigker ki is edtag̵ad.

Mateo 4:24

Ne nevantug si Jesus diyà te tivuuk he nasyun he Sirya. Ne tenged kayi mibpen-uwit dan diyà te kandin is langun he egkengezeruwan wey is egkengesekitan te ebarangbarang en he egezamen, iring te menge edlelungen te mezaat he mulin-ulin, menge ebevuyen, wey menge etew he minatey is divaluy he lawa, ne nengeulian ni Jesus heini is langun.

Juan 5:2

Ne ziyà te Hiruselim duen linew uvey te idselang te kutà he egngezanan te Idselang te Menge Ayam he Kerehidu. Ne ziyà te kilid dutun te linew, duen lelima he helungà. Ne haazà is linew, egngezanan te Bitsata te kineg̵iyan he Hibriyuhanen.

Juan 5:4

su zuen timpu he zuen kun belinsug̵uen te Megbevayà he ebpenaug dutun te linew ne egurig̵awen din haazà is wahig. Ne zutun, is egkehuna he etew he ebpekeagbur zutun te wahig, egkeulian sikandin te minsan hengkey he zaru zin.