Juan 3:2 - Manobo Western Bukidnon

² Midhendiyà sikandin te ki Jesus dutun te mezukilem ne migkeg̵iyan din si Jesus te, “Datù, netuenan dey he menunudlù ka he sug̵ù te Megbevayà su is menge egkein-inuwan he ebeelan nu, iyan dà ebpekehimu te iring kayi is etew he ebeg̵ayan te g̵ehem te Megbevayà.”

Juan 3:2 Referans Kwoze

Juan 5:36

Iyan, duen kebpenistig̵us he lavew pa kenà is ki Juan, su is langun he mibpeveelan kediey te Amey ku he Megbevayà he ed-ul-ulahan ku, iyan edtistig̵us he midsug̵ù a te Amey ku he Megbevayà.

Nengeulaula 10:38

Si Jesus he tigNeserit, mibpeulinan sikandin te Megbevayà te Wag̵as he Mulin-ulin ne mibeg̵ayan sikandin te zekelà he g̵ehem. Ne mid-eneb din is menge inged ne meupiya is baal zin diyà te menge etew ne nengeulian din is langun he edlelungen ni Setanas. Neveelan din heini su kenà edsuwey kandin is Megbevayà.

Nengeulaula 2:22

Ne mid-uman megkag̵i si Pedro te, “Sikiyu is menge zuma ku he kevuwazan ni Israyil, pemineg̵a niw is egkeg̵iyen ku. Si Jesus, kes tigNeserit, sug̵ù sikandin te Megbevayà. Impesavut kenitew te Megbevayà he sug̵ù din si Jesus pinaag̵i te g̵ehem din wey menge egkein-inuwan wey menge singyal he mibpeveelan kandin te Megbevayà. Netuenan niw en heini is egkeg̵iyen ku su neulaula heini is langun dini te inged niw.

Juan 9:16

Ne zutun migkag̵i is duma zutun te menge Perisiyu, ke sikandan te, “Heini si Jesus, kenà iyan sikandin sug̵ù te Megbevayà su edsupaken din layun is kesug̵uan mehitenged te Andew te Kedhimeley.” Iyan, migkag̵i zaan is duma pa he menge Perisiyu te, “Emun mesinupaken he etew, kenè din egkehimu is menge egkein-inuwan he iring kayi!” Ne zutun kenè dan egkengeuyun.

Juan 12:37

Minsan pa te mezakel is nengeehè dan he menge egkein-inuwan he mibeelan din, wazè dan sikandin tuuwi.

Juan 1:38

Midteren si Jesus ne midlilingey ne neehè din he eduma sikandan ne ke sikandin te, “Hengkey is tuyù niw?” Ne ke sikandan te, “Rabi,” he ke và dà egkeg̵iya, Menunudlù, “hendei ka ed-ubpà?”

Mateo 22:16

Ne midsug̵ù dan diyà te ki Jesus is menge sumusundan dan wey menge sakup te upakat he midtukud ni Hirudis. Ne haazà is midsug̵ù dan, migkag̵i ziyà te ki Jesus te, “Menunudlù, netuenan dey he metazeng ka he etew; su ibpenurù nu is tutuu he ebpeveelan kenitew te Megbevayà, ne is lalag te menge etew, kenà ebpekehalin te ibpenurù nu tenged te wazè nu ibpelavi he minsan hentei.

Juan 7:31

Duen mezakel he menge etew he nemeketuu he iyan si Jesus kes netagnà he hadì he mibpilì te Megbevayà. Ke sikandan te, “Iyan si Jesus sikan is hadì su wazà duma he ebpekevaal te lavew pa he menge egkein-inuwan duen te mibeelan din.”

Juan 20:16

Ne zutun migkag̵i si Jesus te, “Maria!” Ne mid-etuvang si Maria ne te kineg̵iyan he Hibriyuhanen migkeg̵iyan din si Jesus te, “Rebuni!” he ke và dà kenitew, “Menunudlù.”

Juan 15:24

Duen mibeelan ku he neehè dan he menge egkein-inuwan he kenà egkeveelan te minsan hentei he menusiyà. Angin ke wazè dan maahà heini su kenà sikandan egkevesulan tenged te mezaat he mid-ulaula zan kedì. Iyan, neehè dan en ne minsan pa zutun, siak wey is Amey ku, egkuntedahan key zan.

Juan 3:26

Ne midhendiyè dan te ki Juan ne ke sikandan te, “Menunudlù, sikan is etew he zuma nu hein diyè ka layun te wahig he Hurdan, sikan is migkag̵i nu, ebpemewtismu zaan sikandin ne mezakel he etew is edsundan kandin.”

Marcos 12:14

Ne hein nekeuma haazà is menge sug̵ù, migkag̵i zan diyà te ki Jesus te, “Menunudlù, netuenan dey he metazeng ka he etew. Is lalag te menge etew, kenà ebpekehalin te ibpenurù nu tenged te wazè nu ibpelavi he minsan hentei, kekenà, tutuu is ibpenurù nu he ibpeveelan kenitew te Megbevayà. Umba, keg̵iyi key kenikew, ebpekesupak ki ve te kesug̵uan tew ke ebayad ki te vuhis diyà te hadì tew he ziyà te inged he Ruma?”

Pilipus 1:14

Ne kenà duen dà taman su is kezekelan te menge zuma tew he tumutuu, ingkeheg̵et te kedsarig dan te Nengazen heini is kebpirisuwa kedì. Ne tenged kayi ed-iseg is sigudu zan te kedsengyawa te Lalag te Megbevayà ne kenè dan en egkehandek.

Mateo 23:7

Utew ibmeupiya te g̵ehinawa zan ke edtehuzen sikandan te menge etew ziyà te tiyenggiyan wey ke ed-umawen sikandan he ‘menunudlù.’

Mateo 23:8

Kenè niw itug̵ut he iyan id-umew keniyu is ‘menunudlù’ su teltelesuled kew is langun ne sebsevaha zà is menunudlù niw he iyan a.

Juan 2:11

Iyan haazà nehuna he egkein-inuwan he mibeelan ni Jesus; midhimu zin diyà te inged he Kana ziyà te prubinsya he Geliliya, ne pinaag̵i zutun impeehè din is dekelà he g̵ehem din ne midtuu kandin is menge sumusundan din.

Juan 4:31

Ne zutun te kemulu pa haazà is bahi ziyà te inged, migkeg̵iyan si Jesus te menge sumusundan din te, “Datù, kaan ka.”

Juan 6:2

Ne zuen utew mezakel he menge etew he ebpemenduma kandin su nengeehè dan is menge egkein-inuwan he mibeelan din te kebewii zin te menge egkengezeruwan.

Juan 10:38

Ne emun iyan ebeelan ku is ebeelan daan te Amey ku, minsan ke kenè kew edtuu te menge lalag ku, tuu kew te ibpesavut te menge vaal ku su wey niw metueni he sevaha key zà, siak wey is Amey ku, su zini sikandin te kedì ne ziyà a zaan te kandin.”

Juan 14:10

Wazè ke ves medtuu he zini te kedì is Amey ku, ne ziyà a zaan te kandin su sevaha key zà? Minsan is menge lalag ku keniyu, kenè ku egkeg̵iyen te kediey zà he isip su is Amey ku he zini ed-ubpà te kediey, kandin he vaal heini.