Juan 14:10 - Manobo Western Bukidnon

¹⁰ Wazè ke ves medtuu he zini te kedì is Amey ku, ne ziyà a zaan te kandin su sevaha key zà? Minsan is menge lalag ku keniyu, kenè ku egkeg̵iyen te kediey zà he isip su is Amey ku he zini ed-ubpà te kediey, kandin he vaal heini.

Juan 14:10 Referans Kwoze

Juan 5:19

Ne zutun midtavak si Jesus te, “Utew venar is egkeg̵iyen ku keniyu he siak is Anak te Megbevayà, wazà egkehimu ku te kediey zà duen he g̵ehem; iyan dà edhimuwen ku is egkeehè ku he edhimuwen te Amey ku. Is ebeelan din, iyan daan ebeelan ku.

Juan 10:38

Ne emun iyan ebeelan ku is ebeelan daan te Amey ku, minsan ke kenè kew edtuu te menge lalag ku, tuu kew te ibpesavut te menge vaal ku su wey niw metueni he sevaha key zà, siak wey is Amey ku, su zini sikandin te kedì ne ziyà a zaan te kandin.”

Nengeulaula 10:38

Si Jesus he tigNeserit, mibpeulinan sikandin te Megbevayà te Wag̵as he Mulin-ulin ne mibeg̵ayan sikandin te zekelà he g̵ehem. Ne mid-eneb din is menge inged ne meupiya is baal zin diyà te menge etew ne nengeulian din is langun he edlelungen ni Setanas. Neveelan din heini su kenà edsuwey kandin is Megbevayà.

Juan 12:49

Su is menge penurù ku, kenà dini zà ebpuun te kediey zà he isip, su midsug̵ù a te Amey ku he Megbevayà ne insug̵ù din kediey is ibpenurù ku.

Juan 10:30

Sevaha key zà, siak wey is Amey ku he Megbevayà.”

Juan 8:28

Ne tenged dutun migkag̵i en maan si Jesus te, “Siak is Kakey te Menusiyà, dutun te kedrensanga niw kedì keuzemà diyà te kayu he ibpehitindeg, egketuenan niw human he iyan a sikan is mibpilì te Megbevayà he ibpahadì. Egketuenan niw zutun he is langun he mibeelan ku, impeveelan kedì te Amey ku he Megbevayà wey is ibpekag̵i zin kedì, iyan nekag̵i ku.

Kulusas 2:9

Umba egkeg̵iyen ku heini su si Kristu, nehimu sikandin he etew. Duen din lawa, iyan, minsan pa kayi is minsan hengkey he ziyà te Megbevayà ne ziyà te kandin.

Juan 17:8

su is impepenurù nu kediey, impenurù ku en kandan ne netuenan dan he tutuu iyan he ziyan a ebpuun te kenikew. Ne midtuu zan he midsug̵ù a kenikew.

Juan 5:17

Iyan, duen ketezengan ni Jesus, ke sikandin te, “Is Amey ku he Megbevayà, kenà sikandin edhimeley he ebaal, ne siak, ebpenigudu a zaan ebaal.”

1 Juan 5:7

Tetelu is ebpenistig̵us mehitenged ki Jesu Kristu.

2 Kurintu 5:19

Iyan ibpesavut dey is: pinaag̵i ki Kristu egkehimu he edhimuwen te Megbevayà is tivuuk he menusiyà he menge emig̵u zin. Ne id-awè din diyà te isip din is menge mezaat he ulaula zan. Ne sikami, insarig din kenami is kedtudtula he egkehimu en he ebpekid-emig̵u te Megbevayà is menusiyà.

Juan 8:38

Is impaahà kedì te Amey ku, iyan egkeg̵iyen ku, ne sikiyu, ebeelan niw mulà is nezineg niw ziyà te keniyu he amey.”

Kulusas 1:19

Ne egkesuatan te Amey tew he Megbevayà he ke hengkey sikandin, iyan ded daan sikan is Anak din.

Juan 14:20

Ne zutun te andew te kedlikui ku keniyu, egketuenan niw he siak, diyà a te Amey ku wey is Amey ku, dini zaan te kediey, ne sikiyu, dini kew te kediey ne ziyà a zaan te keniyu.

Juan 7:16

Ne midtavak kandan si Jesus te, “Kenà kediey zà he ketau is ibpenurù ku, kekenà, diyà ebpuun te Megbevayà he iyan midsug̵ù kediey.

Juan 8:40

Siak, impenurù ku keniyu is tutuu he tuluuwen he impesavut kediey te Megbevayà, ne nasì a edhimetayi keniyu, iyan, wazà mid-ulaula ni Abraham he iring dutun!

Juan 11:26

Su is etew he edtuu kedì, duen din untung he wazà pidtemanan ne kenè en ebpatey is gimukud din. Bayi, edtuu ke ve kayi?”

Juan 3:2

Midhendiyà sikandin te ki Jesus dutun te mezukilem ne migkeg̵iyan din si Jesus te, “Datù, netuenan dey he menunudlù ka he sug̵ù te Megbevayà su is menge egkein-inuwan he ebeelan nu, iyan dà ebpekehimu te iring kayi is etew he ebeg̵ayan te g̵ehem te Megbevayà.”

Juan 14:11

Tuu kew te egkeg̵iyen ku he ziyà a te Amey ku ne zini sikandin te kediey. Ne emun kenè kew ebpeketuu kayi tenged dà te migkag̵i ku, tuu kew tenged te menge vaal ku su is menge vaal ku, egkeehè niw zutun he tutuu is egkeg̵iyen ku keniyu.

Juan 14:24

Ke zuen etew he kenà a mahal ziyà te g̵ehinawa zin, kenè din edtumanen is menge sugù ku. Heini is menge lalag ku, kenà dini zà te isip ku ebpuun, kekenà, diyà ebpuun te Amey ku he iyan midsug̵ù kediey.