Juan 11:25 - Manobo Western Bukidnon

²⁵ Ne migkag̵i si Jesus te, “Iyan a sikan is ebpemanhew; iyan a kes ebeg̵ey te untung. Ke zuen etew he edtuu kedì, minsan ke ebpatey, uuyag gihapun is gimukud din.

Juan 11:25 Referans Kwoze

1 Tiselunika 4:14

Midtuu kiw he mibpatey si Jesus ne nevanhew ne edlikù keuzemà. Iring din daan kes menge tumutuu he minatey en su ebenhawen ne ibpezuma sikandan te Megbevayà ki Jesus keuzemà te kedlikù din.

Juan 3:36

Is minsan hentei he edtuu te Anak te Megbevayà, ebeg̵ayan sikandin te untung he wazà pidtemanan; is minsan hentei he kenà ebpemineg te menge sug̵ù te Anak te Megbevayà, kenà egkeveg̵ayan te untung he wazà pidtemanan, kekenà, wazà pidtemanan te kegkepeuki kandin te Megbevayà.

Juan 1:4

Ne heini is Lalag te Megbevayà, iyan daan sikandin sikan is puunà te untung he wazà pidtemanan, ne heini is untung, iring te kerayag su ebpeketayew te kerusireman te isip te tivuuk he menusiyà.

Juan 5:21

Is Amey ku, ebenhawen din is menge minatey ne ibeg̵ey zin kandan is untung. Ne siak is anak din, untung daan is ibeg̵ey ku ziyà te minsan hentei he ebpilien ku.

Juan 6:44

Wazà minsan hentei he ebpekesundan kediey emun wazà sikandin ulini te Amey ku he iyan midsug̵ù kediey. Ne ke zuen edsundan kediey, ebenhawen ku sikandin keuzemà dutun te ketepusan he andew.

Ruma 8:2

Su pinaag̵i te kebpekidsevaha ta ki Jesu Kristu imbeg̵ey kenita te Wag̵as he Mulin-ulin is beg̵u en he untung ne tenged kayi nelibri ki en te kebpekesalè ta he iyan edungguan din is kemetayen he wazè din pidtemanan.

Juan 6:35

Ne midtavak si Jesus te, “Iyan a egkeenen he ebpekeveg̵ey te untung he wazà pidtemanan. Sikan is edsundan kediey, kenè en egkevitil wey sikan is edtuu kediey, kenè en maan egkemezahan.

Impezayag 21:4

Ebpemunasen din en is menge luhà diyà te menge mata zan ne zutun wazè en maan ebpatey, ne wazè en maan ebpekesineg̵ew wey ebpekelelendag. Ne wazè en maan minsan hengkey he ibpekeantus su nahanew en man is nehuna he kelibutan.”

Pilipus 3:10

Iyan dà guntaan ibmeupiya te g̵ehinawa ku is kegketueni ku te menge ulaula ni Kristu wey is kebulusi kedì te g̵ehem he iyan sikan is gehem he ingkevanhew zin. Egkesuatan ku he mekeambit a zaan duen te kemeresayan he mid-antus din he iyan is ked-engkezi ku te kediey he egkesuatan iring te kandin he kebelevag̵a te untung din.

Impezayag 20:5

Ne haazà is kegkevenhawa kandan ne iyan sikan is egkehuna he kegkevanhew te menge minatey. (Ne haazà is samà te menge etew he minatey, kenè dan pa egkevanhew taman te kenè pa egketapus is nengkelibu he tuig.)

Nengeulaula 3:15

Ne sikan is puunà te untung he wazà pidtemanan, midhimetayan niw, iyan, mibanhew sikandin te Megbevayà. Ebpeketistig̵us key he nevanhew en si Jesus su neehè dey.

Juan 14:6

Ne midtavak si Jesus te, “Iyan a sikan is ibayà; iyan a kes tutuu he edtuuwan; iyan a kes ebpuunan te untung he wazà pidtemanan. Wazà ebpekehendiyà te ed-ubpaan te Amey ku emun kenà a iyan ibayè din.

Juan 5:26

Mekeg̵eg̵ehem is Amey ku ne ebpekeveg̵ey te untung, ne siak daan is anak din, tenged te mibeg̵ayan e zin te g̵ehem, ebpekeveg̵ey ad daan te untung he wazà pidtemanan.

Impezayag 22:17

Ne kes Wag̵as he Mulin-ulin wey kes egkeesawa te nati he kerehidu, ed-umew zan is egkag̵i te, “Tuu kew en.” Ne sikan is nekezineg kayi, ne kinahanglan he med-umew zaan he egkag̵i te, “Tuu kew en.” Is minsan hentei keniyu he egkemezahan, wey is minsan hentei he egkesuat, dewata zin en he wazà bayad is wahig he ebpekeveg̵ey te untung he wazà pidtemanan.

Juan 14:19

Kenè en egketegteg̵aad ne kenà ad maan egkeahà te menge kuntada ku he etew zini te kelibutan, iyan, sikiyu mulà, egkeehè e pa egkeuman keniyu. Kenà egkeawà is untung ku te minsan keenu, umba zuen niw en daan untung he kenà egkeawà te minsan keenu.

Impezayag 22:1

Ne, impaahà kediey zutun te velinsug̵uen is wahig he egngezanan te Wahig he Ebpekeveg̵ey te Untung. Ne haazà is wahig ne utew metingew iring te ispihu. Ne ziyà ebpuun haazà te pinuuwà te Megbevayà he iyan sikan is pinuuwà te nati he kerehidu.

2 Kurintu 4:14

Su netuenan dey he is Megbevayà he mibanhew te Nengazen tew he si Jesus, ebenhawen key zin daan keuzemà tenged te kebpekidsevaha zey ki Jesus ne edtulusen key zin wey key meketampu keniyu ne egkehimu kiw pudu he menge zuma zin diyà te langit.

Ruma 4:17

Ne zuen insurat he Lalag te Megbevayà diyà te ki Abraham, ke sikandin te, “Ibpenaad ku kenikew he edhimuwen ku sikew he kepuun te utew mezakel he menge kelasi te menge etew.” Ne zutun mid-isip din si Abraham he kepuun tew te langun he midtuu he iring kandin. Ne is Megbevayà he iyan edtuuwan tew, ne utew sikandin mekeg̵eg̵ehem su iyan ebpekevanhew te menge minatey, ne is minsan hengkey he wazè pa meulaula, netuenan din en he zaan iring te neulaula en.

Lucas 23:43

Ne migkag̵i si Jesus diyà te kandin te, “Benar heini is egkeg̵iyen ku kenikew he g̵untaan dà ebpezumehè ki zutun te inged te edtulusen.”

1 Kurintu 15:29

Ne heini pa zaan su emun kenà egkengevanhew is menge minatey, hengkey is pulus dutun te ulaula te menge etew he ebpebewtismu he elili te menge zuma zan he minatey en? Maan is ebpebewtismu zan ke kenà ebenhawen te Megbevayà is menge minatey?

1 Kurintu 15:18

Ne haazà is menge zuma tew he tumutuu he nemematey en, wazè en daan paag̵i he melibri pa sikandan, kekenà, egkesilutan sikandan gihapun.

Juan 3:16

Utew mahal ziyà te g̵ehinawa te Megbevayà is tivuuk he menusiyà, ne tenged kayi minsan sikan is budtung he Anak din wazè din menug̵uni, kekenà, impehendini zin su wey is langun he edtuu kandin, kenà mesiluti is gimukud dan, kekenà, meveg̵ayi sikandan te untung he wazà pidtemanan.

Impezayag 1:18

Iyan a kes Megbevayà he wazè din kemetayen. Mibpehimatey a ne g̵untaan kenà ad maan ebpatey te minsan keenu. Iyan a ebayàbayà te menge minatey, ne zuen ku zaan keg̵ehem diyà te Iveyaan.