Ipisu 3:5 - Manobo Western Bukidnon

⁵ Dengan wazà heini ipezayag diyà te minsan hentei he menusiyà, iyan, guntaan, pinaag̵i te Wag̵as he Mulin-ulin, impezayag en te Megbevayà diyà te menge epustul wey ebpemeneuven din.

Ipisu 3:5 Referans Kwoze

Hudas 1:17

Tentenuzi niw, menge suled, is netagnà dengan te menge epustul he midsug̵ù te Nengazen tew he si Jesu Kristu.

2 Pedro 3:2

Egkesuatan ku he meisip-isip niw is menge lalag he insurat dengan te ebpemeneuven te Megbevayà wey is sug̵ù te Nengazen tew he Menluluwas tew he imbeg̵ey zin kenitew pinaag̵i kenami te menge epustul.

Ipisu 2:20

Ne sikitew is menge tumutuu, iring kiw te valey he ibpehitindeg te Megbevayà diyà te vatu. Iyan si Kristu kes batu he edtukuzan kayi te valey. Is menge epustul wey ebpemeneuven te Megbevayà, ne iyan menge tukud. Ne iyan kew menge zuma he himan kayi te valey.

Ipisu 3:9

Ne elin daan insug̵ua zin kediey su wey ku ikepesavut diyà te minsan hentei he etew ke hengkey is kedtumana zin te zaan he mid-isip din he ebeelan. Ne wazà dengan heini ipezayag su in-eles te Megbevayà he nenlimbag te minsan hengkey.

Nengeulaula 10:28

Ne migkeg̵iyan din sikandan te, “Netuenan niw en he sikami is menge Hudiyu, indawey kenami te tuluuwen dey is kebpekiduma wey kebpenumbaley ziyà te iring keniyu te kenà menge Hudiyu. Iyan,” ke si Pedro, “impesavut kedì te Megbevayà he kenè din egkesuatan he isipa ku he meremerik is minsan hentei su edewaten din is langun.

Lucas 10:24

Su tutuu is egkeg̵iyen ku keniyu he kenà pira zà is menge ebpemeneuven te Megbevayà dengan wey menge hadì dengan he egkesuat pezem he mekeahà kayi te nengeehè niw g̵untaan, iyan, wazà ipaahà kandan. Ne egkesuatan dan daan he ebpemineg̵en heini is nengezineg niw g̵untaan, iyan, wazà ipepemineg kandan.”

Juan 14:26

Ne edsug̵uen te Amey ku zini te keniyu is Menenavang he ed-ilis kediey. Iyan sikandin sikan is Wag̵as he Mulin-ulin ne ibpenurù din keniyu is langun, ne ibpetenuzan din keniyu is langun he migkag̵i ku keniyu.

Mateo 13:17

Isipa niw heini he zengan mezakel is ebpeneuven wey menge tumutuu te Megbevayà he egkesuat pezem he meehè dan heini is egkeehè niw wey mezineg dan heini is egkezineg niw en, iyan, wazà itug̵ut kandan.”

Ruma 16:25

Edelig̵en tew is Megbevayà! Pinaag̵i te Meupiya he Tudtulanen he ibpenudtul ku he iyan is mehitenged ki Jesu Kristu, wey pinaag̵i te tuluuwen he neug̵et he timpu is ked-elesa zuen te Megbevayà, egkehimu he edheg̵eten din is kedtuu niw.

Juan 16:13

Ne sikan is Wag̵as he Mulin-ulin he ebpenurù te tutuu he tuluuwen, emun dini en sikandin te keniyu, ibpesavut din keniyu is langun he tutuu. Kenè din iyan ibpesavut is kandin dà he isip, kekenà, iyan ibpesavut din is nezineg din diyà te Amey ku. Ibpesavut din daan keniyu is egkeulaula keuzemà.

Mateo 23:34

Su egkeg̵iyen ku keniyu he ibpehendiyan ku pa te keniyu is ebpemeneuven te Megbevayà, wey menge etew he mibeg̵ayan te Megbevayà te ketau, wey menge menunudlù. Ne edhimetayan niw is duma kandan. Ne is duma, idransang niw ziyà te krus ne ebpemug̵elen niw is duma ziyà te seled te menge simbahan niw ne ed-elawen niw sikandan diyà te minsan hendei he inged he egkepeveyaan dan te ebpemelag̵uy.

Lucas 11:49

Is Megbevayà he utew metau, migkag̵i sikandin dengan te, ‘Ibpehendiyan ku pa te kandan is ebpemeneuven wey is menge epustul. Ne edhimetayan dan is duma ne is duma ebpesipelahan dan.’ Umba migkag̵i heini te Megbevayà su netuenan din he sikiyu is menge Hudiyu, nesevaha is gehinawa niw te g̵ehinawa te menge kepuun niw.

1 Kurintu 2:10

Ne heini is in-eles din dengan, impesavut din en kenitew pinaag̵i te Wag̵as he Mulin-ulin. Su is Wag̵as he Mulin-ulin, egketuenan din is minsan hengkey, minsan is utew mezalem he in-eles he menge isip te Megbevayà.

Mateo 20:7

Ne midtavak dan te, ‘Geina te wazà ebpeterebahu kenami.’ Ne migkag̵i haazà is etew te, ‘Terebahu kew ziyà te perasan ku.’