Ipisu 1:21 - Manobo Western Bukidnon

²¹ Ne zutun utew lavew si Kristu kenà is minsan hentei he hadì, wey egalen, wey minsan hentei he zuen din keg̵ehem wey kebayàbayà. Lavew pa is inggerar ki Kristu te minsan hengkey he g̵erar te minsan hentei g̵untaan wey te wazè din pidtemanan.

Ipisu 1:21 Referans Kwoze

Kulusas 2:10

Ne sikiyu zaan, pinaag̵i te kebpekidsevaha niw ki Kristu, nekepurung kew en mekeazen te untung he imbeg̵ey keniyu ni Kristu. Ne iyan si Kristu sikan is edhadì te minsan hentei he kedesenan he zuen din keg̵ehem wey kebayàbayà.

1 Pedro 3:22

Diyà si Jesus med-ulì te langit ne g̵untaan diyà sikandin ebpimpinuu te zapit te egkekewanan te Megbevayà tuus te utew lavew sikandin. Iyan sikandin ebayàbayà te langun he menge velinsug̵uen te Megbevayà wey te menge kedesenan wey te minsan hentei ziyà te langit he zuen din gehem.

Hibriyuhanen 1:4

Impaahà kenita te Megbevayà he utew lavew is Anak din, kenà is menge velinsug̵uen din diyà te langit, ne iring din ded daan, lavew is inggerar zin te Anak din, kenà is inggerar zin kandan.

Nengeulaula 4:12

Iyan dà si Jesus ebpekelibri te silut kenitew,” ke si Pedro, “su zini te tivuuk he kelibutan wazè en duma pa he ngazan he etew he ebpemeleveg he imbeg̵ey te Megbevayà.”

Kulusas 2:15

Ne haazà is menge kedesenan he mezaat he mulin-ulin he zuen dan keg̵ehem te kebayàbayà, in-awà te Megbevayà is keg̵ehem dan, ne pinaag̵i te kedsulituwa zin kandan pinaag̵i te kebpatey ni Kristu ziyà te krus, impeehè din he wazè dan en kebpekesukul.

Ipisu 3:10

Umba wazà heini zengan ipezayag su wey g̵untaan pinaag̵i zà te menge tumutuu ki Jesus, ibpaahà te Megbevayà diyà te menge kedesenan wey menge egalen diyà te langit ke hengkey kezekelà is ketau zin he wazè med-iring-iring.

Ipisu 6:12

Su kenà iyan edtebeken tew is menge etew zà duen, kekenà, iyan edtebeken tew is menge mezaat he kedesenan he ziyà ed-ubpà te langit wey is menge kenà egkeahà he hadì, wey menge egalen, wey menge ebayàbayà te langun he menge mezaat he etew he nesakup te kerusireman guntaan dini te kelibutan.

Hibriyuhanen 4:14

Ne tenged kayi, menge suled, edhemenan tew is kedtuu he impenurù kenitew. Su zuen utew lavew he memumuhat he iyan datù tew he nekid-etuvang en te Megbevayà. Iyan heini si Jesus he Anak te Megbevayà.

Mateo 12:32

Sikan is edsumpalit kedì te Kakey te Menusiyà, egkepesaylu pa; iyan, sikan is edsumpalit te Wag̵as he Mulin-ulin, kenè en egkepesaylu te wazè din pidtemanan.

Hibriyuhanen 2:5

Ne ibpesavut ku keniyu is kelibutan keuzemà he id-ilis te Megbevayà kayi te kelibutan tew g̵untaan. Ne wazà pilia te Megbevayà is menge velinsug̵uen din he ebayàbayà dutun keuzemà he kelibutan,

Ipisu 2:2

Dutun he timpu mid-ikul niw is mezaat he ibayà he iyan ed-ikulen te menge etew he kuntada te Megbevayà. Midtuman kew te menge sug̵ù ni Setanas. Iyan sikandin ebayàbayà te menge zuen din gehem diyà te hewhewanan. Iyan daan sikandin ebayàbayà te langun he kenà ebpemineg te menge sug̵ù te Megbevayà.