Hibriyuhanen 9:9 - Manobo Western Bukidnon

⁹ Ne alung heini he ibpesavut kenita he is menge ibpemuhat dutun he menge langgam wey is menge halad, kenà heini ebpekeawà te menge salà te menge etew he ed-azap dutun su nesavut dan he pinaag̵i kayi wazè dan pa himuwa he metazeng.

Hibriyuhanen 9:9 Referans Kwoze

1 Pedro 3:21

Ne iyan teg̵ialung kayi te wahig is kebewtismu he ebpekelibri kenitew te silut. Ne haazà is kebewtismu, ne kenà iyan is kedlumpiyuwi te lawa tew ziyà te wahig, kekenà, iyan is kedhengyui tew te Megbevayà he maawè din is menge salè tew. Egkehimu heini tenged te mibanhew zin si Jesu Kristu.

Hibriyuhanen 5:1

Su ke zuen etew he ebpilien he lavew he memumuhat, idsarig kandin is ked-etuvang te Megbevayà ne iyan sikandin datù te menge etew. Ne idsarig daan kandin is menge ibeg̵ey ziyà te Megbevayà wey is kebpemuhat wey mepelisi is menge etew te menge mezaat he ulaula.

Ruma 5:14

Ne minsan pa zutun, puun pa te timpu ni Adan taman te timpu he zutun imbeg̵ey en is kesug̵uan diyà te ki Moises, egketuusan he zuen mezaat he ulaula te menge etew su mibpematey g̵ihapun is langun he menge etew. Is ulaula zan he mezaat, ne kenà iring dutun te mid-ulaula ni Adan su midsupak din is sug̵ù te Megbevayà, iyan, sikandan mulà, wazè pa kesug̵uan he egkesupak dan. Ne si Adan, nehimu sikandin he alung te etew he ebpekeuma he iyan si Kristu.

Hibriyuhanen 11:19

Su neisip ni Abraham he ke ebpatey si Isaak, egkehimu he ebenhawen te Megbevayà. Ne henduen be te nevanhew iyan si Isaak dutun su neisip ni Abraham he kenè en ebperis he ebpatey sikandin.

Hibriyuhanen 10:11

Ne zutun te zaan he paag̵i te ked-azap, is menge memumuhat he Hudiyu, ne andew-andew ziyè dan te simbahan edhithitindeg is edterebahu su edtumanen dan is baal zan te kebpemuhat. Ne heini is menge kebpemuhat dan, ne kenà gihapun ebpekeawà te menge salà te menge etew.

Hibriyuhanen 9:24

Dutun te kebpemuhat ni Kristu, wazè sikandin medseled diyà te utew mahal he rug̵u te simbahan he zini te kelibutan su alung dà heini te tutuu he simbahan he ziyà te langit. Iyan midselezan din kes tutuu he simbahan he ziyà te langit ne g̵untaan iyan sikandin datù tew he edtavang kenitew ziyà te etuvangan te Megbevayà.

Hibriyuhanen 7:11

Ne netuenan ta he zutun te kebeg̵aya te Megbevayà te kesug̵uan diyà te menge Hudiyu, midtendek din is menge memumuhat he iyan is menge kevuwazan ni Levi he iyan ed-uwit te kesug̵uan. Ne emun egkehimu he ebmetazeng is menusiyà pinaag̵i te kandan he menge vaal, wazè en kinahanglan he zuen pa maan memumuhat he iring ki Milkisidik. Iyan, duen en mibpilì te Megbevayà he selakew en he memumuhat. Ne heini, ne kenà iring ki Arun he kevuwazan ni Levi, kekenà, iring sikandin ki Milkisidik.

Gelasya 3:21

Ne kunaan niw vuwa ke kenà egkeuyun is kesug̵uan wey is menge penaad dengan te Megbevayà, iyan, kenà egkehimu he kenà heini egkeuyun. Su ke zuen kesug̵uan he pinaag̵i kayi egkeveg̵ayan kiw te untung he wazè din pidtemanan ne siguradu egkehimu kiw he metazeng pinaag̵i zaan kayi te kesug̵uan.

Hibriyuhanen 8:4

Iyan, dutun te kemulu pa sikandin dini te kelibutan, kenà egkehimu he memumuhat sikandin su puun pa te zengan dà taman guntaan duen menge memumuhat he ebpemuhat sumalà is insug̵ù kandan dutun te kesug̵uan he imbilinbilin ni Moises.