Hibriyuhanen 9:19 - Manobo Western Bukidnon

¹⁹ Ne tenged kayi, hein aney ipenurù ni Moises diyà te langun he menge etew is langun he ibpetuman kandan te Megbevayà dutun te kesug̵uan, migkuwa zin is lengesa te menge nati he vaka he impemuhat, ne mid-emutan din te wahig. Midhames din dutun is bulvul te kerehidu he midtinà te merig̵à wey is subpang te kayu he egngezanan te hisup. Ne mibpirikan din dutun is libru he zutun isurat is kesug̵uan wey mibpirikan din daan is langun he menge etew.

Hibriyuhanen 9:19 Referans Kwoze

Hibriyuhanen 9:12

Ne kesevaha zà is kedseled din dutun te utew mahal he rug̵u te simbahan he ziyà te langit ne kenè en ed-uman. Ne wazà sikandin mekeseled dutun tenged te kebpelengesa zin te lengesa te menge ayam dà duen, iring te menge kambing wey menge nati he vaka, kekenà, nekeseled dutun tenged te impelengesa zin is kandin he lengesa. Ne tenged kayi te kebpemuhata te lawa zin, midhimu zin he wazà pidtemanan te kedlibriya zin kenita te silut.

Hibriyuhanen 10:4

Su kenà egkehimu te minsan hengkey he paag̵i he igkeawà te menge salè tew is lengesa te menge vaka wey menge kambing.

1 Pedro 1:2

Nengaaram kew te Megbevayà he Amey tew sumalà is kebayè din dengan he iyan is: edhimuwen kew zin he metazeng pinaag̵i te Wag̵as he Mulin-ulin wey kew mehimu he menge sakup ni Jesu Kristu ne wey kew zaan mepesaylu tenged te kebpelisi keniyu te lengesa ni Jesus. Berakat he ikeg̵ag̵ew kew zin wey mebmelinawen kew utew.

Juan 19:5

Ne zutun midlawang si Jesus he kemulu midsuupan is ulu zin te zug̵iyen wey midsun-uzan te merig̵à he kumbalà. Ne migkag̵i si Pilatu te, “Tengtengi niw sikandin!”

Juan 19:2

Ne hein netapus te menge sundaru haazà is kebug̵ela zan kandin, mibengkulè dan is dug̵iyen he g̵awed ne insuup dan diyà te ulu zin. Ne zutun impekukumbalè dan kandin is merig̵à he kumbalà su uvag hadì.

Marcos 15:20

Ne hein nepezè dan en he ebaleyvaley kandin, midluwasan dan duen te kumbalà he merig̵à ne insun-ud dan kandin is daan he kumbalè din. Ne zutun mid-uwit dan sikandin pehendiyà te g̵awas dutun te inged su idransang dan te krus.

Marcos 15:17

Ne migkumbelaan dan sikandin te merig̵à he kumbalà su ebelvelayen dan sikandin he uvag kun hadì. Ne zutun mibengkulè dan te zug̵iyen he g̵awed ne insuup dan diyà te ulu zin.

Mateo 27:28

Midlevasan dan si Jesus ne migkumbelaan dan sikandin te merig̵à he kumbalà su uvag kun hadì.

Hibriyuhanen 12:24

Mid-uvayan tew zaan si Jesus he iyan datù tew he midhimu te veg̵u en he paag̵i te kebpekidsevaha tew te Megbevayà. Pinaag̵i te lengesa zin nengepelisan is menge salè tew. Tuus is lengesa zin te g̵ag̵ew kenitew te Megbevayà he utew haazà meupiya kenà te lengesa ni Abel zengan su is lengesa ni Abel, iyan tuus te silut te Megbevayà.

Hibriyuhanen 1:1

Dengan duen impesavut te Megbevayà diyà te menge g̵in-epuan tew pinaag̵i te menge etew he ebpeneuven din. Mezakel is menge paag̵i te kebpeneuva kandan ne mezakel zaan is impesavut din pinaag̵i kandan.

Hibriyuhanen 9:13

Dengan, sumalà is impenurù te kesug̵uan, ke zuen etew he mibmeremerik tenged te mid-uvayan din is minatey, kinahanglan he ebpetig̵isan sikandin te lengesa te ibpemuhat he vaka wey kambing, wey igmuk te edtutungen he nati he vaka. Ne pinaag̵i kayi egkepelisan sikandin dutun te kegkeremeriki te lawa zin.

Hibriyuhanen 9:18

Ne iring din ded daan haazà is nehuna he paag̵i he midtukud te Megbevayà su kinahanglan dutun he zuen lengesa he tuus te edhimetayan he langgam ne human egketuman haazà is paag̵i.

Hibriyuhanen 10:22

Ne tenged kayi, ed-etuvang ki en te Megbevayà, ne kenà tarù is ked-ezapa ta kandin. Edheg̵eten ta is kedtuu ta ne kenè ki eduwazuwa. Su netuenan ta he nepelisan ki en te lengesa ni Jesus ne netuenan ta zaan he in-awà kayi is menge salè ta. Nengebewtismuwan kiw en he tuus te kedlumpiyuwi kenitew te Megbevayà.