Hibriyuhanen 9:15 - Manobo Western Bukidnon

¹⁵ Ne tenged kayi zaan nehimu en si Kristu he zatù tew su wey zin metukud is beg̵u en he paag̵i te kebpekidsevaha tew te Megbevayà. Ne pinaag̵i kayi, is langun he midhimu te Megbevayà he meketuu, egkezawat dan is langun he meupiya he wazè din pidtemanan he impenaad te Megbevayà. Umba egkehimu heini su pinaag̵i te kebpatey ni Kristu nengepalis is langun he menge mezaat he ulaula he nehimu te menge etew zutun te timpu he nengesakup sikandan te nehuna he paag̵i.

Hibriyuhanen 9:15 Referans Kwoze

Ruma 8:30

Ne zutun, sikitew is langun he mibpilì din wey mehimu he menge anak din, impetuu kiw zin daan. Ne kenà duen dà taman, su mid-isip kiw zin daan he metazeng he iring te wazè kiw mekesalà. Ne impenaad din daan he zuen timpu keuzemà he edtulusen kiw zin.

Ruma 8:28

Sikitew is langun he mahal is Megbevayà diyà te g̵ehinawa zin, sikitew is midhimu zin he meketuu sumalà is tuyù diyà te isip din, netuenan tew he pinaag̵i te minsan hengkey he egkehitavù kenitew, edtuvazan kiw zin gihapun te meupiya.

Hibriyuhanen 9:12

Ne kesevaha zà is kedseled din dutun te utew mahal he rug̵u te simbahan he ziyà te langit ne kenè en ed-uman. Ne wazà sikandin mekeseled dutun tenged te kebpelengesa zin te lengesa te menge ayam dà duen, iring te menge kambing wey menge nati he vaka, kekenà, nekeseled dutun tenged te impelengesa zin is kandin he lengesa. Ne tenged kayi te kebpemuhata te lawa zin, midhimu zin he wazà pidtemanan te kedlibriya zin kenita te silut.

Hibriyuhanen 10:36

Kinahanglan he meinentusen kew wey niw metuman is egkesuatan te Megbevayà ne human niw egkezawat is impenaad din keniyu.

1 Timoteo 2:5

Sebsevaha zà is Megbevayà, ne sebsevaha zà daan is datù diyà te teliwazà te Megbevayà wey menge etew, ne iyan datù tew is etew he si Jesu Kristu.

Hibriyuhanen 12:24

Mid-uvayan tew zaan si Jesus he iyan datù tew he midhimu te veg̵u en he paag̵i te kebpekidsevaha tew te Megbevayà. Pinaag̵i te lengesa zin nengepelisan is menge salè tew. Tuus is lengesa zin te g̵ag̵ew kenitew te Megbevayà he utew haazà meupiya kenà te lengesa ni Abel zengan su is lengesa ni Abel, iyan tuus te silut te Megbevayà.

Hibriyuhanen 7:22

Ne tenged kayi te penaad te Megbevayà, pinaag̵i ki Jesus egkesiguru tew he utew pa meupiya heini is beg̵u he paag̵i he midtukud te Megbevayà te kedlibriya zin kenitew kenà is daan.

1 Pedro 3:18

Kesevaha zà is kebpehimatey ni Kristu wey mepesaylu is menge salè tew. Mibpehimatey su wey mehimu sikandin is metazeng he elili tew te kenà memetazeng wey kiw mehimu he menge g̵aked te Megbevayà. Nepatey is lawa zin, iyan, nevanhew sikandin

Hibriyuhanen 13:20

Is Megbevayà, mibanhew zin is Nengazen tew he si Jesus. Midtig̵is is lengesa zin he iyan tuus te veg̵u wey wazà pidtemanan he paag̵i te kebpekidsevaha tew te Megbevayà. Ne tenged dutun nehimu si Jesus he mekeg̵eg̵ehem he ed-elima kenitew te menge kerehidu zin.

Ruma 5:6

Isipa nu is gag̵ew kenita te Megbevayà. Su zutun te timpu he intelaan te Megbevayà, hein wazà minsan hengkey he egkeulaula ta he ebpekehimu he melibri ki te silut, mibpehimatey si Kristu he elili kenita te mesinupaken.

Hibriyuhanen 9:28

Ne si Kristu zaan, kesevaha zà is kebpehimatey zin he iyan kebpemuhata zin te lawa zin wey zin maawà is menge salà te utew mezakel he menge etew. Ne ed-uman pa ebulus si Jesus dini te kelibutan, kenà te ked-ewaa zin te menge salè tew, kekenà, edhimesazen din is kedlibriya zin te langun he utew zekelà is perateng dan kandin.

Hibriyuhanen 6:13

Isipa niw si Abraham. Dutun te kebpenaazi kandin te Megbevayà, is Megbevayà, ne wazà duma he ngazan he neg̵amit din te kedlig-eni zin te penaad din, kekenà, migamit din is kandin he keugelingen he ngazan su wazà lavew kandin.

Hibriyuhanen 3:1

Ne tenged kayi, menge suled ku te kedtuu, mid-umbita kew zaan te Megbevayà wey kew mekeubpà keuzemà diyà te langit. Purungi niw isipa si Jesus. Iyan sikandin kes midsug̵ù te Megbevayà dini te kelibutan wey sikandin mehimu he lavew he memumuhat he edtavang kenitew kayi te kebpesakup tew te Megbevayà.

Hibriyuhanen 2:14

Ne sikitew is menge anak te Megbevayà, menge etew kiw zà duen he zuen din kemetayen. Ne tenged kayi mibpeetew zaan si Jesus wey mehimu sikandin he iring tew. Umba mid-ulaula zin heini su wey mehimu he ebpehimatey sikandin ne wey pinaag̵i te kebpatey zin mezaag din si Setanas he iyan mibayàbayà te kemetayen,

Impezayag 5:9

Ne egkanta zan te veg̵u en he kentahan, ke sikandan te, “Dait ka he egkuwa te velesahan wey ed-awà te menge tiyap din su mibpehimatey ka ne imbelukas nu is lengesa nu te menge etew wey maangken sikandan te Megbevayà. Ebpemuun sikandan diyà te minsan hengkey he kepuun wey kineg̵iyan wey tribu wey g̵inhedian.

Hibriyuhanen 8:13

Ne g̵eina te migkag̵i te Megbevayà he zuen beg̵u en he paag̵i, egkesavut tew he kenè en ebpulus haazà is daan. Ne ke zuen minsan hengkey he zaan en he kenè en egkeg̵amit ne ed-engkezan en su ed-ilisan te veg̵u.

Tito 3:7

Umba mid-ulaula zin heini su wey tenged te g̵ag̵ew zin kenita meisip ki zin he metazeng ne maangken ta is untung he wazà pidtemanan he iyan ebperetengen ta.

2 Timoteo 2:10

Ne tenged kayi ed-entusen ku is minsan hengkey he merasey wey ku metevangi is menge etew he pinilì te Megbevayà. Egkesuatan ku he melibri sikandan te silut pinaag̵i te kebpekidsevaha zan ki Jesu Kristu ne mekezawat dan te ketulusan he wazà pidtemanan.

Juan 10:28

Ebeg̵ayan ku sikandan te untung he wazà pidtemanan, ne kenè en ebpatey is gimukud dan ne wazà minsan hentei he ebpekeag̵ew kandan dini te kedì.

Mateo 19:29

Ne is minsan hentei he mid-ewaan din is baley zin, menge suled din, amey zin, iney zin, anak din, wey tanè din su edsunud sikandin kediey, egkezawat din is kenenggatus egketakep haazà is mid-ewaan din ne liyu zutun ibeg̵ey kandin is untung he wazà pidtemanan.

1 Juan 2:25

Su iyan impenaad kenitew ni Kristu is untung he wazà pidtemanan.

1 Pedro 5:10

Mevavè dà is ked-antus niw ne edheg̵eten te Megbevayà is kedsarig niw kandin. Ebig̵eran kew zin, edlig-enan kew zin wey ebeg̵ayan kew zin te zesen. Iyan sikandin puunà te minsan hengkey he tavang kenitew. Midhimu kiw zin he tumutuu su wey pinaag̵i te kebpekidsevaha tew ki Kristu mekeambit kiw te wazà pidtemanan he utew kegkelavew zin.

Santiago 1:12

Utew zeyzey is etew he ebpurung ed-antus te penggezam kandin su emun egkeahà he hustu is kedtuu zin, ebeg̵ayan sikandin te untung he wazà pidtemanan he iyan impenaad te Megbevayà diyà te langun he ebmahalen dan sikandin diyà te g̵ehinawa zan.

Hibriyuhanen 11:13

Ne heini sikandan he neketuu te Megbevayà, pudu zan minatey te wazè dan pa mezawat haazà is impenaad kandan te Megbevayà he egkeangken dan haazà is tanà. Ne minsan pa zutun te wazè dan pa mezawat haazà is impenaad te Megbevayà, wazè dan engkezi is kedtuu zan su netuenan dan he egkeug̵et pa zutun egkezawat dan is ebperetengen dan he impenaad te Megbevayà. Ne ingkepesavut dan he kenà sikandan hustu he meg̵inged dini te kelibutan su iyan hustu he inged dan is langit.

2 Tiselunika 2:14

Midhimu kew zin he menge tumutuu kandin pinaag̵i te kebpesevuta zey keniyu te Meupiya he Tudtulanen su wey kew mekeambit te utew kegkelavew te Nengazen tew he si Jesu Kristu.

Ruma 6:23

Ke zuen etew he ebpevayàbayà te suat te mekesesalà he lawa zin ne zuen silut kandin he iyan is kemetayen he wazè din pidtemanan. Iyan, is etew mulà he edtuuwan din si Jesu Kristu he Nengazen tew, duen ibeg̵ey kandin te Megbevayà he iyan is untung he wazè din pidtemanan.

Hibriyuhanen 9:16

Ne penenglitan, duen etew he mibaal te dukumintu ne migkag̵i zin dutun te dukumintu he emun ebpatey sikandin duen menge azen din he ibpepengevilin din te menge zuma zin. Ne zutun te kebpatey zin kinahanglan he zuen ebpeketistig̵us he tutuu iyan he minatey en haazà is etew, ne human ebpekezawat dutun te menge azen din haazà is migkag̵i zutun te dukumintu.

2 Kurintu 3:6

Su iyan sikandin ebeg̵ey kenami te ketau wey zey ikepenurù is beg̵u he paag̵i he midtukud din te kebpekidsevaha zin te menusiyà. Ne wazà heini is beg̵u he paag̵i iveg̵ey pinaag̵i te insurat he kesug̵uan, kekenà, imbeg̵ey zin heini kenitew pinaag̵i te Wag̵as he Mulin-ulin. Su emun iyan ta edserig̵an is kedtumana ta te kesug̵uan, ne kemetayen he wazà pidtemanan is ebperetengen ta. Iyan, ke ibeg̵ey kenitew is Wag̵as he Mulin-ulin ne untung he wazà pidtemanan is ebperetengen ta.

Ruma 9:24

Iyan ki impetuu zin, iyan, is menge etew he impetuu zin, ne kenà menge Hudiyu zà, kekenà, elin daan is menge etew he kenà menge Hudiyu.

Ruma 5:10

Su zutun te timpu zengan he kemulu ki kuntada te Megbevayà, tenged te kebpehimatey te Anak din, nehimu ki he emig̵u zin. Ne emun iyan haazà, guntaan te emig̵u ki zin en, wey ki pe be kenà mehimu he melibri keuzemà te silut tenged te nevanhew en sikandin.

Ruma 5:8

Iyan, is Megbevayà mulà, impeehè din is gag̵ew zin kenitew su mibpehimatey si Kristu he elili kenitew zutun te timpu zengan te kemulu kiw pa ed-ulaula te mezaat.

Lucas 18:18

Ne zuen timpu he zuen sevaha he punuan he Hudiyu he mid-insà ki Jesus te, “He Zatù, utew meupiya is menge ulaula nu. Hengkey is ed-ul-ulahan ku wey a meveg̵ayi te untung he wazà pidtemanan?”

Marcos 10:17

Ne zutun te edlaus en edhipanew ensi Jesus, nekesaut kandan is sevaha he maama ne midluhud haazà diyà te etuvangan ni Jesus. Ne ke sikandin te, “He Menunudlù, utew meupiya is menge ulaula nu. Hengkey is ed-ul-ulahan ku wey a meveg̵ayi te untung he wazà pidtemanan?”

Mateo 25:36

Hein wazè ku ugelingen mibeg̵ayan a keniyu; hein nezeruwan a, mid-elimahan a keniyu. Hein nepirisu a, midlauy a keniyu.’

Mateo 25:34

Ne zutun, siak is hadì, ekeg̵iyan ku is menge etew ziyà te zapit te egkekewanan ku te, ‘Sikiyu is midtuvazan te Amey ku he Megbevayà, kayi kew su iyan kew edhedian ku. Su is kedhadì ku keniyu, integ̵ana en dengan puun pa te kedlimbag̵a te kelibutan.

Ipisu 1:7

Su tenged te utew zekelà is gag̵ew zin kenitew, midlibri kiw zin te silut pinaag̵i te kedtig̵is te lengesa zutun te kebpehimatey ni Kristu, ne mibpesaylu zin is menge salè tew.

Mateo 22:3

Midsug̵ù din is menge sulug̵uen din he ibpetukew sikan is menge etew he migkeg̵iyan he zaan he ipetelavuk dan en dutun te keemuran. Iyan, is menge etew, wazè dan itetepian haazà is menge sulug̵uen.

Lucas 22:20

Ne hein neipus dan dutun is egkaan ne migkuwa en maan ni Jesus is tasa ne migkag̵i te, “Heini ve is inumen, ne tuus te veg̵u en he paag̵i te kegkelibri he midtukud te Megbevayà ne egkehimu heini pinaag̵i te lengesa ku he ibpaag̵as tenged keniyu.

Nengeulaula 20:32

Ne g̵untaan idsarig ku sikiyu ziyà te Megbevayà he iyan ebpeketavang keniyu. Ebpeketavang daan is impenurù ku keniyu he g̵ag̵ew zin kenitew. Is Megbevayà, iyan ebpekeveg̵ey kenitew te kezesen te kedtuu. Diyà te kandin egkekuwa ta zaan is kenita he vahin te menge tuvad he ibeg̵ey zin diyà te langun he menge tumutuu zin.

Gelasya 3:20

Iyan, dutun te kebpenaazi te Megbevayà ki Abraham wazà kinahanglan he zuen datù te pid-elangan su sebsevaha zà dutun is nekepenaad he iyan is Megbevayà.

Hibriyuhanen 6:15

Ne si Abraham, utew sikandin meinentusen he edsarig te Megbevayà taman te netuman te Megbevayà is penaad din kandin.

Hibriyuhanen 10:34

Ne nehizuwan niw, ne midtevangan niw is menge tumutuu he nengepirisu. Ne minsan pa te mibpen-ileg te menge etew is langun he menge azen niw, midlipey kew gihapun su netuenan niw he zuen azen niw he utew pa meupiya ziyà te langit he kenà egkeileg diyà te keniyu te wazè din pidtemanan.