Hibriyuhanen 12:25 - Manobo Western Bukidnon

²⁵ Umba, purung kew pemineg te Lalag te Megbevayà ne kenè kew sukul. Su is menge etew zengan he wazè dan pemineg̵a is Lalag te Megbevayà he insug̵ù kandan ni Moises dini te kelibutan, emun wazà sikandan mekelikey te silut te Megbevayà, iyan kew pe be mekelikey te silut emun kenè niw ebpemineg̵en is egkeg̵iyen din te ebpuun te langit.

Hibriyuhanen 12:25 Referans Kwoze

Hibriyuhanen 8:5

Alung dà is kandan he vaal su ed-iringan dan dà haazà is tutuu he ebpeiringan kandan he ziyà te langit. Netuenan ta heini su zutun te kebeeli ni Moises te simbahan he terapal he iyan dengan baley te Megbevayà dini te kelibutan, migkeg̵iyan sikandin te Megbevayà te, “Purungi nu te ed-iring is simbahan diyà te langit he impeehè ku kenikew ziyà te vuntud.

Hibriyuhanen 11:7

Ne zuen daan kedtuu ni Noe su hein midleg̵uyan sikandin te Megbevayà te limas he egkehitavù, midtuuwan din, minsan te wazè din pa maahà haazà is limas. Ne mibeelan din is dekelà he avang he egngezanan te arka ne hein midlapey is dag̵at, nelibri sikandin wey is pemilya zin ne wazè dan melened. Ne pinaag̵i zutun te kedtuu zin, impesavut din he zait he edlimasen te Megbevayà is tivuuk he mekesesalà he menusiyà. Ne zutun mid-isip sikandin te Megbevayà he metazeng tenged te midtuuwan din is migkag̵i te Megbevayà.

Mateo 8:4

Ne migkeg̵iyan ni Jesus te, “Pemineg ka, Mama, kenè nu tudtula ziyà te minsan hentei, kekenà, pehendiyè ka g̵untaan te memumuhat he midhimu te Megbevayà wey zin maahà he neulian ka; ne tumana nu sikan is pemuhat he insug̵ù dengan ni Moises te it-iten, su wey metueni te langun he neulian ka iyan.”

2 Timoteo 4:4

Kenè dan ebpemineg̵en is tutuu, kekenà, iyan dan edtuuwan is menge tarù he g̵ug̵ud.

1 Tiselunika 5:15

Kenè niw itug̵ut he zuen minsan hentei keniyu he ebales te mezaat, kekenà, mebpepurpurungè kew layun. Purungi niw zaan is minsan hentei he etew.

Nengeulaula 7:35

Ne heini si Moises,” ke si Esteban diyà te menge punuan, “daan he wazè dan dewata te menge Hudiyu is penavang din, kekenà, migkeg̵iyan dan dà te, ‘Hentei is mibeg̵ey kenikew te keg̵ehem te kedatùdatù kenami?’” Ne ke si Esteban en maan te, “Ne pinaag̵i zutun te velinsug̵uen he mibpaahà kandin dutun te egkeregreg he sagbet, midsug̵ù si Moises te Megbevayà. Ne midhimu zin si Moises he pengulu he iyan edlibri te menge Hudiyu.

Hibriyuhanen 3:17

Ne hentei is menge etew he nepeukan dengan te Megbevayà seled te kepatan he tuig? Iyan ded heini is menge zuma te kevuwazan ni Israyil he mibaal te salà diyà te Megbevayà ne tenged kayi midsilutan din sikandan ne minatey sikandan dutun te tanà he wazà meubpai te etew.

Mateo 17:5

Ne te kemulu pa heini is lalag ni Pedro, neselikuvungan sikandan te ebpenganlag he g̵apun. Ne ebpuun dutun te g̵apun nezineg dan is midtik-ew megkag̵i te, “Iyan heini sikan is Anak ku he utew ku minahal; ingkesuat ku utew sikandin. Pemineg̵a niw sikandin.”

Impezayag 22:9

Iyan, mibensag̵an e zin, ke sikandin te, “Kenà a kenikew ezapa su siak wey sikew, wey is menge zuma nu he ebpeneuven te Megbevayà wey is langun he edtuman te menge lalag kayi te libru, neked-iiring kiw zà he menge sulug̵uen te Megbevayà. Iyan nu zà ezapa is Megbevayà,” ke sikandin.

Impezayag 19:10

Ne zutun midlangkeb a ziyà te etuvangan din su ed-ezapen ku pezem, iyan, mibensag̵an e zin te, “Kenà a kenikew ezapa su siak wey sikew wey is langun he menge zuma nu he edtuu te tuluuwen he impenurù ni Jesus, neked-iiring kiw zà he menge sulug̵uen te Megbevayà. Iyan nu zà ezapa is Megbevayà!” Umba migkag̵i zin haazà su sikan is ibpekag̵i te Megbevayà dutun te menge ebpeneuven te Megbevayà, ne iyan sikan is tuluuwen he impenurù ni Jesus.

1 Pedro 1:22

Ne g̵eina te nemeketuu kew en te tutuu he tuluuwen nengelumpiyuwan kew en te mezaat he ulaula ne kenà tarù is kebmahala niw te menge zuma niw he tumutuu. Minsan pa zutun, heg̵eta niw pa is kebmahala niw ziyan te g̵ehinawa niw te kada sevaha te menge zuma niw.

Hibriyuhanen 1:1

Dengan duen impesavut te Megbevayà diyà te menge g̵in-epuan tew pinaag̵i te menge etew he ebpeneuven din. Mezakel is menge paag̵i te kebpeneuva kandan ne mezakel zaan is impesavut din pinaag̵i kandan.

Hibriyuhanen 3:12

Umba, menge suled, susiya niw is gehinawa niw. Kinahanglan he wazà minsan sevaha keniyu he mezaat is ed-isipen din nè wazè din kedtuu, su pinaag̵i kayi egkeengkezan din is wazè din kemetayen he Megbevayà.

Hibriyuhanen 12:19

Egkezineg dan is budyung wey is mezag̵ing he lag̵eng te Megbevayà. Ne hein nezineg te menge etew haazà is lag̵eng, midhangyù dan he med-engked haazà is egkag̵i su utew mekehandekhandek.