Hibriyuhanen 12:23 - Manobo Western Bukidnon

²³ Iring te mid-uvayan tew en is pengenayan he menge anak te Megbevayà he inlista is menge ngazan dan diyà te langit. Ne mid-uvayan tew en is Megbevayà he iyan edsusi te menge ulaula te tivuuk he menusiyà. Mid-uvayan tew zaan is gimukud te langun he menge etew he menge metazeng he minatey en he netapus en is kedlibriya kandan te mezaat he ulaula.

Hibriyuhanen 12:23 Referans Kwoze

Santiago 1:18

Tenged te iyan egkesuatan din midhimu kiw zin he menge anak din pinaag̵i te kebpesevuta zin kenitew te tutuu he tuluuwen. Egkesuatan din he iyan kiw edhimuwen din he lavew te langun he menge linimbag.

Hibriyuhanen 11:40

Su zuen meupiya pa utew he paag̵i he mid-isip te Megbevayà su mid-isip din he wey zin edtumana haazà is menge penaad din kandan ke ebpekeragkes kiw zutun te menge etew he edawat te menge penaad din.

Lucas 10:20

Iyan, kenè niw iyan ikelipey is kebpemineg̵a keniyu te menge mezaat he mulin-ulin, kekenà, ikelipey niw is menge ngazan niw he impelista te Megbevayà diyà te langit.”

Impezayag 14:4

Iyan haazà he menge maama he wazè dan mekesalà pinaag̵i te kedhilavet te kenè dan esawa su utew lumpiyu is menge ulaula zan ne wazè dan suwayi sikan is nati he kerehidu te minsan hendei sikandin ebpevayà. Mibelukasan sikandan puun duen te perayan he iyan is tivuuk he menusiyà wey zan mehimu he iyan nepengilizan dutun wey ikeveg̵ey sikandan diyà te Megbevayà wey ziyà te nati he kerehidu.

Impezayag 20:15

Is minsan hentei zutun he wazà ilista is ngazan din diyà te libru te untung, in-agbur zaan sikandin diyà te ranew he egkeregreg.

Hibriyuhanen 9:27

Imbanglis te Megbevayà diyà te menusiyà is kebpatey te kesevaha, ne egkeipus dutun te kebpatey zin ne edsusiyen te Megbevayà is menge ulaula zin.

Impezayag 13:8

Ed-ezapen haazà is langgam te langun he menge etew zini te kelibutan he wazà ikesurat is ngazan dan diyà te libru he zutun ilista is menge etew he ebeg̵ayan te untung. Iyan haazà kes libru zuen te nati he kerehidu he zengan dà imbanglis is kebpehimatey zin te wazè pa tukuza is kelibutan.

1 Pedro 2:23

Hein edsumpeliten sikandin duen te kedrensanga kandin wazà sikandin medtavak te mezaat; wazà sikandin mebpenrawak. Is kebelesi zutun te edrasey kandin, insarig din diyà te Megbevayà he iyan kes metazeng is kedhukum din.

Hibriyuhanen 11:4

Si Abel zengan, tenged te kedtuu zin te Megbevayà ne nehimu zin is utew pa meupiya he pemuhat kenà te impemuhat te kakey zin he si Kain. Ne tenged kayi te kedtuu ni Abel mid-isip te Megbevayà sikandin he metazeng su midawat te Megbevayà is impemuhat din. Ne minsan pa te zengan dà minatey si Abel zuen ketudluanan din kenitew tenged te mezesen is kedtuu zin.

1 Timoteo 3:5

Su is maama he kenà metau he ed-uwit te esawa zin wey menge anak din, ebmenumenu sikandin he ed-uwit te menge etew he menge tumutuu te Megbevayà?

Pilipus 4:3

Ne sikew zaan is timbang ku ziyan, egkesuatan ku he tevangi nu heini is menge vahi wey zan heini metuman su mibpenigudu zan te kedtavang kedì te kedsengyawa ku te Meupiya he Tudtulanen. Ne elin daan si Clemente wey zuen pa menge zuma niw he midtavang kedì. Is menge ngazan dan te langun, ne nekesurat en diyà te libru te Megbevayà he zutun inlista zin is mibeg̵ayan te untung he wazè din pidtemanan.

Ipisu 1:22

Ne is Megbevayà, midhimu zin he sakup ni Kristu is minsan hengkey he linimbag. Umba midhimu zin si Kristu he egalen te minsan hengkey su wey kiw metevangi is langun he menge tumutuu.

Nengeulaula 20:28

Bentayi niw is ulaula niw wey ventayi niw zaan is langun he tumutuu he insarig keniyu te Wag̵as he Mulin-ulin; kinahanglan he iyan kew edlig-en te kedtuu te menge tumutuu te Megbevayà. Nehimu kiw zin he sakup pinaag̵i te kebpehimatey te anak din.

Juan 5:27

Ne siak, tenged te migeraran a he Kakey te Menusiyà, mibeg̵ayan a te Amey ku te ketenged wey ku keuzemà mesusi is nengeveelan te tivuuk he menusiyà.

Kulusas 1:24

Maambe ke ebpekeantus a g̵untaan te merasey su iyan igkezeyzey niw. Igkelipey ku heini su iring te kegkerasey ni Kristu edhimesazan ku en is langun he mereg̵en he ibpaantus din kediey su wey mezeyzey is lawa ni Kristu, he ke và dà egkeg̵iya, is menge tumutuu kandin.

Kulusas 1:12

Ne kenà duen dà taman su zekelà dutun is kebpeselemat niw te Amey tew he Megbevayà tenged te kedhimuwa zin keniyu he zait he mekeambit kew zutun te langun he ibeg̵ey zin diyà te keniyu te menge g̵aked din he midteyawan is isip dan.

2 Kurintu 5:8

Layun mezesen is kedsarig ta te Nengazen ne egkesuatan ta pezem he meewai ta heini is kelibutanen he lawa su wey ki mekeulì diyà te Nengazen.

1 Kurintu 15:54

Ne zutun, sikitew is duen din kemetayen, ne kenè kiw en human ebpatey ne egketuman en haazà is insurat he Lalag te Megbevayà he edhenduen te, “Nepurung en maawà is gehem te kemetayen.”

1 Kurintu 13:12

Ne iring din ded daan, sikita, su g̵untaan iyan dà egketuenan ta is iring te alung he egepunen he egkeehè ta ziyà te peg̵elungan. Kenè te pa egkesavut is hustu. Iyan, keuzemà, kenà alung dà is egkeehè ta, kekenà, iyan en si Jesu Kristu is egkeehè ta. Ne zutun hustu mulà is kegkesevuta ta te langun iring te is Megbevayà, hustu is kegkesevuta zin kenita.

1 Kurintu 15:49

Su g̵eina te nekeiring is lawa tew te lawa te nehuna he etew he tanà is limbag̵an din, kinahanglan he ebpekeiring is lawa tew zaan te lawa ni Kristu he iyan sikan is etew he ebpuun diyà te langit.

Hibriyuhanen 2:12

Su zuen insurat he lalag din he edhenduen te, “Sikew is Megbevayà, edtudtulan ku is menge hazi ku mehitenged kenikew. Egkentahan ku is kedalig ku kenikew ziyà te etuvangan te langun he ed-azap kenikew.”

Impezayag 6:9

Ne in-awà dutun te nati he kerehidu haazà is ikelima en he tiyap dutun te velesahan. Ne neehè ku zutun te zizalem te vangkù he pemuhatà is menge g̵imukud te menge etew he midhimetayan tenged te kedtuu zan te Lalag te Megbevayà wey tenged daan te kedsengyawa zan dutun te lalag.

Impezayag 6:11

Ne zutun impemeg̵ey ziyà te uman sevaha kandan is meputì he kumbalà. Ne migkeg̵iyan sikandan te Nengazen he medhimeley zan dè pa taman te egkeamin egkevunù is menge zuma zan daan he sulug̵uen te Megbevayà he edhimetayan daan iring kandan.