Hibriyuhanen 12:22 - Manobo Western Bukidnon

²² Iyan, sikitew mulà, kenà iring dutun is ked-uvey tew te Megbevayà su iring te ed-uvayan tew is buntud he Siyun he zutun is inged te Megbevayà he wazè din kemetayen. Iyan haazà kes inged he Hiruselim diyà te langit he zutun nengetig̵um is egkengelipey he edliblibuwen he menge velinsug̵uen te Megbevayà.

Hibriyuhanen 12:22 Referans Kwoze

Pilipus 3:20

Ne sikitew mulà, ne iyan hustu he inged tew is diyà te langit ne utew zekelà is perateng tew te kedlikù te Menluluwas tew he ebpuun diyà te langit he iyan is Nengazen tew he si Jesu Kristu.

Gelasya 4:26

Ne si Sara, haazà is esawa ni Abraham he kenà uripen, ne iyan kiw alung te kandin he menge anak su kenè kiw menge uripen te kesug̵uan.

Impezayag 14:1

Ne zutun neehè ku is buntud he Siyun ne zutun edhithitindeg sikan is nati he kerehidu ne zuma zin daan dutun is nenggatus wey kepatan wey heepat he libu he menge etew. Ne haazà is menge etew, insurat diyà te menge vuked dan is ngazan dutun te nati wey is ngazan daan te Amey zin he Megbevayà.

Impezayag 21:2

Ne zutun neehè ku is inged te Megbevayà he Veg̵u he Hiruselim he idlugtanà he ebpuun te Megbevayà diyà te langit. Utew mekempet haazà is inged su is kekempet din ne iring te kekempet te vahi he ed-esewaan he nepurungan mebistiyi.

Impezayag 22:19

Ne ke zuen minsan hentei he id-awè din kayi te ibpesavut he impezayag kediey is minsan hengkey, id-awà daan te Megbevayà is kandin he vahin dutun te veg̵as duen te kayu he ebpekeveg̵ey te untung he nekag̵i kayi. Ne id-awà daan diyà te kandin is ketenged din te ked-ubpà dutun te inged te Megbevayà he nekag̵i kayi te libru.

Impezayag 3:12

Is minsan hentei he ebpekezaag ki Setanas, edhimuwen ku sikandin he metahud su edhimuwen ku sikandin he iring te tukud diyà te valey ziyà te langit he zutun ed-ezapa is Megbevayè ku ne kenà haazà is tukud igkeawà dutun. Ne idsurat ku ziyà te kandin is ngazan te Megbevayè ku wey is ngazan te inged te Megbevayà he iyan sikan is inged he veg̵u he Hiruselim he ebpenaug he ebpuun te Megbevayà diyà te langit wey elin daan idsurat ku ziyà te kandin is beg̵u he ngazan ku.

Hibriyuhanen 13:14

Su kenà ebpedayun is kebpekeubpè tew kayi te kelibutan, kekenà, ebperetengen tew pa is tutuu he inged tew keuzemà he iyan ed-ubpaan tew te wazè din pidtemanan.

Hibriyuhanen 11:10

Su si Abraham, ne iyan hustu he ebperetengen din he inged sikan is inged diyà te langit he kenà egkezeetan te wazè din pidtemanan. Ne iyan mibpelanu wey mibaal kayi is Megbevayà.

Impezayag 21:10

Ne zutun, pinaag̵i te g̵ehem te Wag̵as he Mulin-ulin mid-ag̵ak a te velinsug̵uen pehendiyà te utew metikang he vuntud. Ne impeehè din kediey is inged te Megbevayà he iyan sikan is inged he Hiruselim he idlugtanà he ebpuun te Megbevayà diyà te langit.

Impezayag 7:2

Ne zutun neehè ku zaan is sevaha pa he velinsug̵uen he ziyà ebpuun te zapit te edsilaan ne igkulang din is tiyap te wazè din kemetayen he Megbevayà. Ne haazà is heepat he velinsug̵uen he insarig kandan is kedèdeeti te tanà wey zag̵at, migkeg̵iyan din sikandan.

Hudas 1:14

Si Inuk, sikan is ikepitu he lapis he kevuwazan ni Adan, netagnè din dengan haazà is menge etew su migkag̵i sikandin te, “Keuzemà ebpekeuma is Nengazen he edumahan te liblibuwen he menge velinsug̵uen din

Hibriyuhanen 10:31

Ne emun iyan edsilut is Megbevayà he wazè din kemetayen, ne utew mekehandekhandek haazà is idsilut din!

Hibriyuhanen 9:14

Ne emun egkehimu he egkelumpiyuwan haazà pinaag̵i zà te lengesa te menge vaka wey kambing, iyan pe be kenà utew pa lavew is egkelumpiyuwan pinaag̵i te lengesa ni Kristu. Su pinaag̵i te tavang te Wag̵as he Mulin-ulin he wazè din pidtemanan, impemuhat ni Kristu ziyà te Megbevayà is kandin he lawa; ne wazà igkesewayi kandin. Ne pinaag̵i te kebpelisi kenita te lengesa zin, in-awè din is menge salè ta wey is kebpekesarig ta te menge ulaula he wazè dan pulus. Ne tenged kayi ebpekeazap ki en te wazè din kemetayen he Megbevayà.

Hibriyuhanen 3:12

Umba, menge suled, susiya niw is gehinawa niw. Kinahanglan he wazà minsan sevaha keniyu he mezaat is ed-isipen din nè wazè din kedtuu, su pinaag̵i kayi egkeengkezan din is wazè din kemetayen he Megbevayà.

1 Tiselunika 1:9

Nezineg dan en ne iyan sikandan ebpenudtul mehitenged te kegelg̵elawa niw kenami. Ebpenudtul zan he mid-engkezan niw kes ked-azap te menge kenà tutuu he ed-ezapen. Mid-engkezan niw kun wey kew mekeazap te tutuu he Megbevayà he wazè din kemetayen.

Ruma 11:26

Ne zutun egkeamin egkelibri te silut is langun he menge kevuwazan ni Israyil su zuen insurat he Lalag te Megbevayà he edhenduen te, “Duen Menluluwas he ziyà ebpuun te menge Hudiyu ne pinaag̵i kandin ed-engkezan te langun he menge kevuwazan ni Hakub is kenè dan ked-azap kediey te Megbevayà.

Ruma 9:26

Ne zuen daan Lalag te Megbevayà, he edhenduen te, “Ne heini is menge etew he kenà Hudiyu, egkehimu he zutun te inged he migkeg̵iyan ku sikandan he kenè dan menge sakup ku, egngezanan ku sikandan gihapun he menge anak ku te wazè din kemetayen he Megbevayà.”

Mateo 5:35

ne is tanà, iyan nesevukan te paa zin. Ne kenè niw zaan ipengeluambit he mezeeti is inged he Hiruselim ke kenè niw egketuman is lalag niw su iyan ed-ubpaan te lavew he hadì.

Mateo 16:16

Ne zutun midtavak si Simon Pedro te, “Iyan ka sikan is mibpilì te Megbevayà he ibpahadì din te menusiyà; iyan ka sikan is Anak te wazè din kemetayen he Megbevayà.”

Ipisu 2:19

Ne sikiyu is menge tumutuu he kenà menge Hudiyu, minsan pa te zengan wazè kew isipa he menge sakup te Megbevayà, iyan, guntaan nehimu kew en he zuma te menge pinilì din he etew. Nehimu kew en he menge anak te Megbevayà iring te minsan hentei he tumutuu kandin.

2 Timoteo 4:18

Ne kenà dutun dà taman su edlibriyen e pa te Nengazen te minsan hengkey he ebpekekaid kedì ne edlig-enan e zin taman te ed-uwiten e zin dutun te g̵inhedian din diyà te langit. Berakat he zelig̵a sikandin te wazà pidtemanan.

Hibriyuhanen 11:16

Su ebpen-ahaan dan is inged he utew pa meupiya, kenà haazà is mid-ewaan dan su iyan ebperetengen dan is egkeubpaan dan he inged diyà te langit. Ne g̵eina te iyan haazà, ne mid-angken sikandan te Megbevayà ne netuenan ta he kenè din igkeeled is kegngezani zan kandin he Megbevayà dan su mid-andam din en is inged he egkeubpaan dan.