Hibriyuhanen 10:24 - Manobo Western Bukidnon

²⁴ Kenà tew ed-ewaan dini te g̵ehinawa tew is kebpepurpurungè tew su wey layun mahal zini te g̵ehinawa tew is minsan hentei, ne wey layun mehimu te uman sevaha kenitew is menge meupiya he ulaula.

Hibriyuhanen 10:24 Referans Kwoze

1 Tiselunika 5:11

Ne g̵eina te netuenan niw en heini peliplipayè kew ne lig-eni niw is kedtuu te uman sevaha keniyu, iring te neveelan niw en.

1 Juan 3:18

Menge mahal ku he anak, kinahanglan he kenà menge lalag dà is kebmahala ta te menge zuma ta, kekenà, kinahanglan he ibpeehè ta is kebmahala ta kandan pinaag̵i te menge ulaula ta.

Hibriyuhanen 13:1

Kinahanglan he peniguduwi niw is kebmahala niw ziyà te g̵ehinawa niw te menge zuma niw he tumutuu.

Gelasya 5:13

Na, menge suled, tutuu iyan he impetuu ki te Megbevayà wey ki zin melibri ne wazè en kinahanglan he ebpeuripen ki te kesug̵uan. Ne minsan pa zutun wazè ki melibri su wey iyan mebayàbayà kenita is mezaat he kebayà te lawa ta. Kinahanglan he tenged te zekelà is gag̵ew tew te menge zuma tew ne medtitinevangà is kada sevaha kenitew te menge tumutuu.

Kulusas 3:16

Menge suled, layun niw zewata is impesavut ni Kristu. Pepempenuruey kew wey mebpesemsembag̵è kew sumalà is ketau te kada sevaha. Kanta kew te menge idalig te Megbevayà, wey menge Salmo, wey elin daan is menge kentahan he ibpinted keniyu te Wag̵as he Mulin-ulin. Kentahi niw is Megbevayà he utew zekelà is kebpeselemati niw kandin.

Tito 3:8

Utew tutuu heini is impesavut ku kenikew. Egkesuatan ku he ipurung nu ipenurù heini ziyan su utew hustu wey zekelà is pulus kayi ziyà te minsan hentei. Ne emun nesavut en heini te menge tumutuu te Megbevayà iyan dekelà diyà te g̵ehinawa zan is ked-ul-ulaha zan te meupiya.

1 Timoteo 6:18

Keg̵iyi nu is menge sepian he tumutuu he hemeni zan ul-ulaha is meupiya su iyan heini hustu he ketig̵eyunan. Mebmetulanged dan wey mebmetinevangen.

Hibriyuhanen 13:3

Kenè niw lipati is kedtavang niw te menge tumutuu he pirisu. Purungi niw sikandan he iring te iyan kew nepirisu. Tevangi niw zaan is menge tumutuu he ebpesipelahan he iring te iyan is keugelingen niw he lawa nepesipelahan.

Gelasya 6:1

Menge suled, ke zuen duma niw he tumutuu he netuenan niw he nesupak din is Megbevayà, sikiyu is mid-ulinan te Wag̵as he Mulin-ulin, tevangi niw sikandin su wey zin kenà meengkezi is kedtumana zin te egkesuatan te Megbevayà. Asal, kinahanglan he utew kew mepelevayen is edtavang kandin. Mebpekevantey kew su kela ke mepenulayi kew zaan ni Setanas.

1 Kurintu 10:33

Siak, ebpen-ahaan ku layun is paag̵i su wey meketavang te minsan hentei is menge ulaula ku. Kenè ku iyan ebpen-ahaan is kediey he igkezeyzey, kekenà, iyan is igkezeyzey te langun he menge zuma he etew. Umba ebeelan ku heini su wey meketuu sikandan ne melibri sikandan te silut.

Gelasya 5:6

Su emun tumutuu ki en ki Jesu Kristu, neked-iiring kiw en diyà te Megbevayà is nengesirkunsidar wey is wazà mesirkunsidar. Iyan dà duen din pulus diyà te Megbevayà is kedtuu ta kandin he egketuusan heini pinaag̵i te g̵ag̵ew ta te zuma ta.

2 Kurintu 8:8

Kenà heini kesug̵uan ku keniyu, kekenà, ibpesayud ku keniyu is dekelà he g̵ustu te zuma he menge tumutuu te kedtavang te menge zuma zan. Umba ibpesayud ku heini su wey niw meiringi. Ne pinaag̵i kayi egketuenan ku ke tutuu ve is keniyu he g̵ag̵ew.

Nengeulaula 11:29

Ne tenged dutun neuyun is menge sumusundan diyà te Entiyukya he ed-emutè dan te selapì. Ne mebeg̵ey is kada sevaha sumalà is egkehimu zin wey zan metevangi is menge egkengeayuayu he menge zuma zan he menge tumutuu ziyà te prubinsya he Hudiya.

2 Tiselunika 3:9

Duen dey ketenged te kebpesuhul keniyu, iyan, wazè key mebpesuhul, kekenà, midterebahu key su wey zuen ulaula zey he egkeiringan niw.

Gelasya 5:22

Egketuusan ta zaan is menge ulaula he egkehimu pinaag̵i te g̵ehem te Wag̵as he Mulin-ulin. Su emun ed-uwiten ki te Wag̵as he Mulin-ulin, mahal zini te g̵ehinawa ta is menge zuma ta, layun ki egkelipey, melinawen layun is gehinawa ta, mepelevayen ki, belig̵eg̵awen ki, metulanged ki, metinumanen ki,

2 Kurintu 9:2

su netuenan ku he zekelà is gustu niw te kedtavang. Migkeg̵iyan ku is menge tumutuu he tigMesidunya he layun dekelà is gustu niw te kedtavang. Migkag̵i ku kandan he puun pa zutun te nehuna he tuig daan naandam is gehinawa niw te menge tigGerisya te kebeg̵ey. Ne is kezekelan kandan, hein nezineg dan heini, mid-iseg is gustu zan te kedtavang daan.

Ruma 12:15

Ke zuen etew he zuen din igkelipey, melipey kew zaan tenged dutun te kelipey zin. Ne ke zuen etew he zuen igkeseeng din, keseeng kew zaan tenged dutun te igkeseeng din.

Tito 2:4

su wey zan ikepenurù diyà te menge menguhed he vahi is kebmahala zan te menge esawa zan wey menge anak dan,

1 Kurintu 9:22

Ne haazà is menge tumutuu he wazà sikandan mekesavut te hustu, egkehimu a he iring kandan ne kenè ku idteg̵el is kediey he egkesuatan su wey pinaag̵i kedì meheg̵et is kedtuu zan. Ne zuen te kada sevaha he ebpenudtulan ku te Lalag te Megbevayà, ebpen-ahaan ku is paag̵i he engayan kandin su wey ku maag̵ak sikandin ne ebpeketuu sikandin ki Jesus.

1 Tiselunika 1:3

Su emun ed-ampù key te Megbevayà he Amey tew kenè dey egkelipatan is kedtuu niw, wey is kebmahala niw, wey is kebperateng niw te Nengazen tew he si Jesu Kristu. Su egketuusan is kedtuu niw kandin pinaag̵i te ulaula niw, ne pinaag̵i te kedhag̵ù niw egketuusan daan is kebmahala niw kandin diyà te g̵ehinawa niw. Ne egketuusan daan is kebperateng niw kandin pinaag̵i te kebmeinentusen niw.

Ruma 11:4

Ne midtavak kandin is Megbevayà te, “Duen pitu pa he libu he menge etew he zuma nu he kevuwazan ni Israyil he wazè dan ezapa si Baal, is kenà tutuu he megbevayà.” Iyan heini Lalag te Megbevayà ki Elias.

Hibriyuhanen 3:13

Ne g̵untaan te kemulu pa egkehimu he egkekuwa is keluwasan he imbeg̵ey kenitew te Megbevayà, kinahanglan he ebpesemsembag̵è kiw su wey kiw kenà melimbungi pinaag̵i te salà he iyan is kenà kedtuu ne wey kenà mebmezesen is gehinawa tew.