Gelasya 5:13 - Manobo Western Bukidnon

¹³ Na, menge suled, tutuu iyan he impetuu ki te Megbevayà wey ki zin melibri ne wazè en kinahanglan he ebpeuripen ki te kesug̵uan. Ne minsan pa zutun wazè ki melibri su wey iyan mebayàbayà kenita is mezaat he kebayà te lawa ta. Kinahanglan he tenged te zekelà is gag̵ew tew te menge zuma tew ne medtitinevangà is kada sevaha kenitew te menge tumutuu.

Gelasya 5:13 Referans Kwoze

1 Pedro 2:16

Ne g̵eina te nelibri kiw en te Megbevayà, egkehimu he iyan kiw en ebayàbayà te ed-ul-ulahan tew, iyan, kinahanglan he kenè tew edhimuwen is kelibriyanan tew he pesangil wey kiw mekeulaula te mezaat. Su minsan pa te nelibri kiw en, kinahanglan he menge sulug̵uen kiw g̵ihapun te Megbevayà.

1 Kurintu 9:19

Ne kenà duen dà taman su minsan pa te kenà dait he edsugsug̵uen a te minsan hentei su kenè e man uripen te minsan hentei, egkesuatan ku he mehimu a he sulug̵uen te minsan hentei su wey mehimu he meketuu ki Jesus is utew mezakel he menge etew.

1 Kurintu 8:9

Ne minsan pa zutun kinahanglan he purungi niw isipa heini is intug̵ut en keniyu su kela ke tenged keniyu egkesanggen is kedtuu te sevaha he wazè pa sikandin mekesavut te hustu.

Gelasya 5:14

Is tivuuk he kesug̵uan he imbilinbilin ni Moises, ne egkepurung egketuman pinaag̵i te sevaha zà he sug̵ù he iyan heini: “Kinahanglan he purungi nu is duma nu. Isipa nu sikandin he iring te kenikew en he g̵ehinawa.”

Ipisu 5:21

Mebpetetehuzè kew te kada sevaha tenged te kedtahud niw ki Kristu.

Gelasya 6:2

Layun kew mebpetebtevangà te uman sevaha keniyu su emun ed-ul-ulahan niw heini egketuman niw is insug̵ù kenitew ni Kristu.

Hudas 1:4

Umba kinahanglan he egkeg̵iyen ku heini su zuen menge etew he nekeamur keniyu, iyan, id-eles dan he kenà hustu is edtuuwan dan. Wazè dan kedtahud te Megbevayà; edhelinen dan pezem is tutuu he tuluuwen su ibpenurù dan he egkehimu ke ed-ul-ulahan tew is meremerik su utew kun belig̵eg̵awen is Megbevayà ne ebpeseyluwen kiw zin gihapun. Kenè dan edtuu he si Jesu Kristu, iyan dà egalen tew wey Nengazen tew. Dengan dà isurat te menge ebpeneuven te Megbevayà ke hengkey is silut kandan.

2 Pedro 2:19

Egkeg̵iyen dutun te menge menunudlù he egkelibri ki pinaag̵i te kedsunuza kandan su idtug̵ut kun kenita is minsan hengkey he ulaula, iyan, nasì nengeuripen pa sikandan te menge ulaula he ebpekezezaat su netuenan ta he uripen is etew te minsan hengkey he ebpekevayàbayà kandin.

2 Kurintu 4:5

Kenà iyan dey ibpenurù su wey key mevantug te menge etew, kekenà, iyan dey ibpenurù su wey mevantug si Jesu Kristu he iyan Nengazen te langun. Sikami, edtevangan dey en sikiyu su wey zey metuman is sug̵ù ni Jesus.

Nengeulaula 20:35

Ne pinaag̵i kayi te langun, impeehè ku keniyu he kinahanglan he pinaag̵i te kebpenigudu tew egketevangan tew is egkengeayuayu su egketenuzan tew is menge lalag dengan te Nengazen tew he si Jesus su ke sikandin te, ‘Dekelà is kelipey ta ke ebeg̵ey ki, kenà ke iyan ki edawat.’ ”

Gelasya 5:22

Egketuusan ta zaan is menge ulaula he egkehimu pinaag̵i te g̵ehem te Wag̵as he Mulin-ulin. Su emun ed-uwiten ki te Wag̵as he Mulin-ulin, mahal zini te g̵ehinawa ta is menge zuma ta, layun ki egkelipey, melinawen layun is gehinawa ta, mepelevayen ki, belig̵eg̵awen ki, metulanged ki, metinumanen ki,

Lucas 4:18

“Mid-ulinan a te Wag̵as he Mulin-ulin he ebpuun te Megbevayà. Ne mibpilì a te Nengazen su wey ku ikepesavut te menge egkengeayuayu is Meupiya he Tudtulanen. Ne mibpeveyaan din kedì is menge etew wey ku sikandan metudtuli he egkengevelukasan is nengevihag ni Setanas, ne egkengeulian is nengelakap wey zan mekeahà ne egketevangan is egkengereg̵enan.

Gelasya 4:22

Su migug̵ud dutun te kesug̵uan he zuen dezuwa he anak he maama ni Abraham. In-anak haazà is sevaha ni Hagar, kes esawa zin he uripen, ne in-anak haazà is sevaha te esawa zin he kenà uripen he iyan si Sara.

1 Tiselunika 1:3

Su emun ed-ampù key te Megbevayà he Amey tew kenè dey egkelipatan is kedtuu niw, wey is kebmahala niw, wey is kebperateng niw te Nengazen tew he si Jesu Kristu. Su egketuusan is kedtuu niw kandin pinaag̵i te ulaula niw, ne pinaag̵i te kedhag̵ù niw egketuusan daan is kebmahala niw kandin diyà te g̵ehinawa niw. Ne egketuusan daan is kebperateng niw kandin pinaag̵i te kebmeinentusen niw.

2 Kurintu 12:15

Egkelipey a utew ke igkeveg̵ey ku is menge azen ku wey is desen ku wey ku sikiyu metevangi. Iyan, minsan pa te mahal kew zini te g̵ehinawa ku henduen be te kenà a mulà mahal ziyan te g̵ehinawa niw.

2 Kurintu 3:17

Ne heini is egkeg̵iyen he Nengazen, ne iyan kes Wag̵as he Mulin-ulin, ne emun ed-ulinan is etew te Wag̵as he Mulin-ulin nevelukasan en sikandin te kegkeuripena kandin te kesug̵uan.

Gelasya 2:4

Iyan, duen menge etew he kenà tutuu he menge tumutuu te tutuu he tuluuwen he midtampu kenami. Egkesuatan dan dutun he sirkunsidara si Tito. Umba midtampu zan he id-eles dan he kenè dan tutuu he tumutuu su wey zan maahà ke edtumanen tew is menge sug̵ù he imbilinbilin ni Moises. Su egkesuatan dan he meiring kiw te uripen pinaag̵i te kedtuman te kesug̵uan minsan te nelibri kiw en ni Jesu Kristu ne wazè en kinahanglan he ebenteyanan tew pa is kesug̵uan.

Gelasya 5:1

Pinaag̵i te kebelukasi kenitew ni Kristu, nelibri kiw en te kedtumana te kesug̵uan. Umba, kinahanglan he edsukul kiw is mibelukasan su wey kenè kiw en maan meuripen.

2 Kurintu 2:8

Edhengyuen ku keniyu he ipeehè niw kandin he tutuu iyan is gag̵ew niw kandin.