1 Tiselunika 1:7 - Manobo Western Bukidnon

⁷ Tenged kayi iyan kew ed-iringan te langun he menge zuma he tumutuu ziyan te prubinsya he Mesidunya wey ziyà daan te prubinsya he Gerisya.

1 Tiselunika 1:7 Referans Kwoze

Tito 2:7

Sikew zaan, kinahanglan he layun meupiya is kenikew he ulaula su wey iyan ka meiringi te menge zuma nu. Ne emun ebpenurù ka, kinahanglan he hustu is tuyù nu wey sungkad te Lalag te Megbevayà is paag̵i nu te kebpenurù.

1 Pedro 5:3

Kenè kew medhadìhadì kandan te insarig keniyu, kekenà, eg̵aka niw sikandan su wey iyan kew zan edsunuzen te menge meupiya he ulaula.

1 Timoteo 4:12

Minsan pa te menguhed ke pa, kinahanglan he mezait ka he edtehuzen te minsan hentei; kinahanglan he iyan ka ed-iringan te menge tumutuu ki Kristu, ne tenged kayi kinahanglan he tegteg̵ami nu is kegkag̵ikag̵i nu, is ulaula nu, is kebmahala nu te langun, is kedsarig nu te Megbevayà, wey is kedlikayi nu te meremerik he ulaula.

1 Tiselunika 1:8

Ebpuun diyan nekeeneb is Lalag te Nengazen, kenà diyan dà te prubinsya he Mesidunya wey ziyà te prubinsya he Gerisya, kekenà, is menge etew ziyà te minsan hendei, nezineg dan is tudtul mehitenged te kedtuu niw te Megbevayà. Wazè en kinahanglan he ibpenudtul zey pa ziyà te menge etew is kedtuu niw.

Nengeulaula 16:12

Ne midrenè key zutun ne mid-uzahik key ne nekeuma key ziyà te inged he Pilipus he ziyà te aney en he distritu te prubinsya he Mesidunya. Ne zutun te inged he Pilipus, ne mezakel is menge Rumanu he umuuliey. Ne nepipira key he andew zutun te inged he Pilipus.

2 Kurintu 1:1

Siak si Pablo. Migeraran a he epustul ni Jesu Kristu tenged te iyan egkesuatan te Megbevayà. Siak wey si Timoteo he suled tew, ebpesuratan dey sikiyu is langun he menge tumutuu te Megbevayà diyan te inged he Kurintu wey is langun daan he menge etew he neg̵aked te Megbevayà seled te tivuuk he prubinsya he Gerisya.

Nengeulaula 1:13

Ne hein nekeuma zan diyà te Hiruselim, mid-ulì dan diyà te rug̵u he zivavew ziyà te valey he dus endanas he ubpeey zan. Iyan heini ensi Pedro, si Juan, si Santiago, si Andres, si Felipe, si Tomas, si Bartolome, si Mateo, si Santiago he anak ni Alfeo, si Simon Siluti, wey si Hudas he anak ni Santiago.

1 Tiselunika 4:10

Netuenan ku he ebmahalen niw en is menge tumutuu ziyà te tivuuk he prubinsya he Mesidunya. Ne edhengyuan dey pa sikiyu, menge suled, he ipeiseg niw pa is kebmahala niw ziyà te g̵ehinawa niw te langun.

2 Kurintu 9:2

su netuenan ku he zekelà is gustu niw te kedtavang. Migkeg̵iyan ku is menge tumutuu he tigMesidunya he layun dekelà is gustu niw te kedtavang. Migkag̵i ku kandan he puun pa zutun te nehuna he tuig daan naandam is gehinawa niw te menge tigGerisya te kebeg̵ey. Ne is kezekelan kandan, hein nezineg dan heini, mid-iseg is gustu zan te kedtavang daan.

Nengeulaula 18:1

Wazà meug̵et ne mid-awà si Pablo zutun te Etinas ne midlaus diyà te Kurintu.

Nengeulaula 18:12

Ne hein iyan midhimu si Galyu he gubirnedur te prubinsya he Gerisya, midtig̵um is menge Hudiyu ne midakep dan si Pablo ne impeetuvang dan ki Galyu.

Nengeulaula 19:21

Ne zutun, neisip ni Pablo is edhipanew he ziyà ebayà te menge prubinsya he Mesidunya wey Gerisya pehendiyà te Hiruselim. Ke sikandin te, “Emun ebpekehendiyà a te Hiruselim, ebpekelaus e pa ziyà te inged he Ruma.”

Ruma 15:26

Su is menge tumutuu zini te prubinsya he Mesidunya, wey te prubinsya he Gerisya, neisip dan he meupiya ke ebeg̵ey zan te tavang diyà te menge tumutuu he egkengeayuayu ziyà te inged he Hiruselim.