1 Pedro 2:8 - Manobo Western Bukidnon

⁸ Ne zuen daan tagnà he netuman he edhenduen te, “Iyan haazà sikan is batu he nesipà te menge etew; iyan haazà nekeseligkat kandan.” Wazè dan medtuu te Lalag te Megbevayà ne tenged dutun, sumalà is netagnà, nekeurambak sikandan su iyan imbanglis te Megbevayà dutun te kenà edtuu.

1 Pedro 2:8 Referans Kwoze

1 Kurintu 1:23

Ne sikitew mulà, ibpenurù tew is mehitenged ki Kristu he inransang te krus. Is menge Hudiyu, igkeepes dan utew heini ne is menge Gerisyahanen ne kunaan dan ke tarù ne wazè din pulus.

1 Pedro 2:7

Ne heini is hadì he iring te vatu, mahal utew sikandin dini te kenita te nekesarig en kandin, iyan, is langun he kenà edtuu, netuman pinaag̵i kandan is insurat he tagnà he edhenduen te, “Sikan is batu he himan te valey, mid-engkezan te menge pandey. Ne heini, nehimu en guntaan he vatu he iyan dà ebpekepurung te valey.”

Ruma 9:22

Ne iring din ded daan is mid-ulaula te Megbevayà su zutun te ibpelepew zin en is rerangit din wey is mekeg̵eg̵ehem he silut din, mid-isip din he edtigkeren din dè pà is pauk din dutun te menge etew he kinahanglan he edsilutan din.

Hudas 1:4

Umba kinahanglan he egkeg̵iyen ku heini su zuen menge etew he nekeamur keniyu, iyan, id-eles dan he kenà hustu is edtuuwan dan. Wazè dan kedtahud te Megbevayà; edhelinen dan pezem is tutuu he tuluuwen su ibpenurù dan he egkehimu ke ed-ul-ulahan tew is meremerik su utew kun belig̵eg̵awen is Megbevayà ne ebpeseyluwen kiw zin gihapun. Kenè dan edtuu he si Jesu Kristu, iyan dà egalen tew wey Nengazen tew. Dengan dà isurat te menge ebpeneuven te Megbevayà ke hengkey is silut kandan.

2 Pedro 2:3

Tenged te suat dan te selapì, ebpenepian kew zan pinaag̵i te penurù dan he tarù. Daan en he midteg̵ana is silut kandan; andam en is Megbevayà te kedsilut kandan.

1 Tiselunika 5:9

Su is Megbevayà, wazè din ivanglis kenitew is silut, kekenà, midluwas kiw zin pinaag̵i te Nengazen tew he si Jesu Kristu.

Lucas 2:34

Ne in-ampù daan sikandan ni Simeon he tuvazi sikandan te Megbevayà ne migkeg̵iyan din si Maria, sikan is iney zuen te vatà te, “Heini is anak nu, nepilì sikandin te Megbevayà su wey pinaag̵i kandin mevahinbahin kiw is menge kevuwazan ni Israyil. Ne is edsundan kandin ne egkelibri, ne sikan is kenà edsundan, ne edsilutan te Megbevayà. Egketuusan he sugù sikandin te Megbevayà, iyan, edsumpeliten sikandin te mezakel he menge etew,

2 Kurintu 2:16

Ne haazà is menge etew he kenà ebpelibri, is ibpesavut dey kandan ne henduen be te utew memahù su nesavut dan he neangken dan en is kemetayen. Ne haazà mulà is menge etew he ebpelibri ki Kristu, is ibpesavut dey kandan, ne henduen be te utew mehemut su nesavut dan he neangken dan en is untung he wazà pidtemanan. Hentei vuwa is dait te kedsengyawa kayi te tudtul?

Gelasya 5:11

Menge suled, duen egkag̵i he wazè ku pa engkezi is penurù he kinahanglan he ebpesirkunsidar ki, iyan, emun tutuu heini, maan is kenà a ed-engkezan te ebpesipala te menge zuma ku he Hudiyu? Su emun ibpenurù ku he kinahanglan is kebpesirkunsidar, ne kenè dan egkepauk kediey minsan ke elin ku pa ibpenurù is kebpehimatey ni Jesus he elili kenitew.

1 Pedro 2:6

Su zuen insurat he Lalag te Megbevayà he edhenduen te, “Duen mibpilì ku he hadì he iring sikandin te vatu he mahal utew. Idsavuk ku sikandin diyà te inged he Siyun. Iring sikandin te melig-en he vatu he ebpeuntuzan te valey. Is minsan hentei he edsarig kandin, kenè en egkeanggà, su iyan sikandin sikan is tutuu he edserig̵an.” Iyan heini insurat he Lalag te Megbevayà.