1 Kurintu 15:2 - Manobo Western Bukidnon

² Ne pinaag̵i kayi te Meupiya he Tudtulanen he impenurù ku keniyu, egkelibri kew te silut te Megbevayà emun kenè niw ed-engkezan. Su emun ed-engkezan niw kenè bes hustu is kedtuu niw.

1 Kurintu 15:2 Referans Kwoze

Hibriyuhanen 3:6

Ne si Jesus mulà, Anak sikandin te Megbevayà he metinumanen is kebayàbayè din te valey. Ne iyan kiw valey zin emun edhemenan tew is kedsundan tew kandin wey is melipayen he kedteg̵azi tew te langun he impenaad kenitew ni Kristu.

Hibriyuhanen 2:1

Ne tenged kayi, kinahanglan he edhemenan tew ebpurungi is tutuu he tuluuwen he impenurù kenitew wey tew kenà melekai su kela ke mekesuwey kiw te tutuu he ibayà.

Hibriyuhanen 3:14

Su sikitew, emun edhemenan tew is daan he kedsarig tew ki Kristu, duen tew pudu upakat kandin.

2 Timoteo 1:9

Is Megbevayà, ne iyan midlibri kenita te silut ne midhimu ki zin he g̵aked din. Umba mid-ulaula zin heini, kenà tenged te meupiya is menge ulaula ta, kekenà, tenged dà te iyan tuyù din wey tenged te utew zekelà is gag̵ew zin kenita. Dengan te wazè pa limbag̵a is minsan hengkey mid-isip din he ibpeehè din is gag̵ew zin kenita pinaag̵i te kebeg̵aya zin kenita ki Jesu Kristu.

Kulusas 1:23

Iyan, kinahanglan he kenè niw engkezi is kedtuu te tutuu he tuluuwen, kekenà, lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen. Heini is nekag̵i he Meupiya he Tudtulanen, ne insangyew ziyà te menge etew ziyà te minsan hendei. Siak si Pablo, midsug̵ù a wey ku ikesangyew is Meupiya he Tudtulanen.

Ipisu 2:8

Su tenged dà te g̵ag̵ew zin kenita, midlibri ki zin te silut dutun te kebpeketuu ta. Wazè ki melibri pinaag̵i te kenita he vaal,

1 Kurintu 1:18

Ne emun ibpesavut ta ziyà te menge etew is kebpatey ni Kristu zuen te krus, sikan is menge etew he kenà egkelibri te silut, kunaan dan ke wazà pulus te ibpesavut ta. Iyan, sikita is nelibri en te silut, netuenan ta he pinaag̵i te kebpesevuta te kebpatey ni Kristu, ibpaahà te Megbevayà is gehem din te kedlibriya te menusiyà.

Santiago 2:26

Is lawa te etew, emun wazè din en gehinawa, egketuusan ta he minatey en ne wazè din en pulus. Ne iring din ded daan is kedtuu te minsan hentei su emun kenè egkezumahan haazà is kedtuu te menge ulaula he meupiya, wazà daan pulus dutun te kedtuu zin.

Santiago 2:14

Menge suled, wazà pulus te kedtuu te minsan hentei ziyà te Megbevayà emun kenà egketuusan is kedtuu zin pinaag̵i te menge ulaula he meupiya. Is kedtuu he iring dutun, ne kenà tutuu, ne kenà din igkelibri te silut.

Hibriyuhanen 10:23

Edhemenan tew is meheg̵et he kebperateng te kedtulusa kenitew keuzemà te wazà duwazuwa su netuenan tew he metinumanen is Megbevayà ne edhimuwen din is impenaad din kenitew.

Lucas 8:13

Ne haazà is benì he ziyà mengeulug te menipis he tanà he zivavew te vatu, ne iyan is Lalag te Megbevayà he is nemekezineg duen, ne utew zan egkesuati te ebpemineg ne edtuuwan dan. Iyan, kenà egkeheg̵et is kedtuu zan ne kenè en utew egkeug̵et dutun emun egezaman ni Setanas is kedtuu zan, ne edlikù dan diyà te zaan he ulaula zan.

Santiago 2:17

Iring din ded daan is etew he egkeg̵iyen din he edtuu sikandin, iyan, kenà meupiya is menge ulaula zin. Egkesavut ta zutun he kenè bes tutuu is kedtuu zin.

Hibriyuhanen 4:14

Ne tenged kayi, menge suled, edhemenan tew is kedtuu he impenurù kenitew. Su zuen utew lavew he memumuhat he iyan datù tew he nekid-etuvang en te Megbevayà. Iyan heini si Jesus he Anak te Megbevayà.

2 Tiselunika 2:15

Ne tenged kayi, menge suled, pekezesen kew te kedtuu niw, ne hemeni niw is langun he impenurù dey keniyu pinaag̵i te kedwali zey hein diyan key wey pinaag̵i zaan te kebpesurati zey keniyu.

Gelasya 3:4

Wazè bes pulus te menge meupiya he tuvad keniyu tenged te kebpeketuu niw! Kenà egkehimu he wazà pulus.

2 Kurintu 6:1

Ne g̵eina te nehimu key en he menge timbang te Megbevayà, edhengyuan dey sikiyu he himuwa niw he mebpulus is gag̵ew zin keniyu.

Ruma 1:16

Utew zekelà is kedsarig ku te Meupiya he Tudtulanen su emun edtuuwan heini te minsan hentei, puun te menge Hudiyu pehendiyà te kenà menge Hudiyu, edlibriyen sikandin te silut pinaag̵i te zekelà he g̵ehem te Megbevayà.

2 Kurintu 2:15

Ne g̵eina te nehimu key he menge sug̵ù ni Kristu, iring key te veyawà he ibegey ni Kristu ziyà te Megbevayà. Is ngazeg kayi, ne ziyà mekeeneb te menge etew he egkelibri te silut wey ziyà daan te kenà egkengelibri.

1 Kurintu 15:14

Ne emun wazà mevanhew si Kristu ne wazè en tuluuwen he igkepesavut dey ne wazè niw zaan egketuuwan.

1 Kurintu 1:21

Utew metau is Megbevayà; midhimu zin he kenà egketuenan te menge etew ke hentei sikandin pinaag̵i te kandan dà he ketau su midhimu zin he egkelibri sikandan pinaag̵i zà te kedtuu zan te Meupiya he Tudtulanen he ibpenurù ta he kunaan dan ke tarù he wazè din pulus.

Ruma 11:22

Ne pinaag̵i kayi egkesavut ta is gag̵ew te Megbevayà wey ke maan is edsilut sikandin. Midsilutan din is wazà mebpemineg, iyan, igkehizu kew zin ke edhemenan niw is gag̵ew zin, su emun kenà, ne id-awè kew zin daan.

Nengeulaula 8:13

Ne hein nebewtismuwan si Simon, mibpekiduma sikandin ki Felipe ne neinuinu sikandin utew zutun te kegkeehaa zin te menge singyal wey menge egkengein-inuwan he edhimuwen ni Felipe.

Nengeulaula 2:47

Ne nekezalig dan te Megbevayà ne egkengetahud sikandan te minsan hentei. Ne te kada andew zutun duen menge etew he ebpeketuu. Ne is langun dutun, edlibriyen te Megbevayà wey kenè din en sikandan mesiluti ne haazà nemekeuman te menge tumutuu.

1 Kurintu 11:2

Duen ed-ul-ulahan niw he layun ku egkeg̵iya he utew meupiya he iyan is: wazè a keniyu melipati ne is impenurù ku keniyu ne edtumanen niw layun.