1 Kurintu 1:10 - Manobo Western Bukidnon

¹⁰ Menge suled ku tenged te kedtuu, duen idhangyù ku keniyu pinaag̵i te kebayàbayà kenitew te Nengazen tew he si Jesus; iyan is: kinahanglan he kenè kew mevahinbahin, kekenà, uyun-uyun kew su wey mesevaha is isip niw wey g̵ehinawa niw.

1 Kurintu 1:10 Referans Kwoze

1 Kurintu 12:25

Midhimu te Megbevayà is menge parti te lawa ta su wey zan mesevaha ne pinaag̵i zutun ebpekedtetevangè dan.

Ruma 12:16

Kinahanglan he mesevaha is gehinawa niw te menge tumutuu. Kenè kew mebmepelevawen, kekenà, mebpekiduma kew te menge etew he minus is pid-etawan dan. Ne kenè niw isipa he uluwanen kew kenà sikandan.

2 Kurintu 13:11

Menge suled, iyan dà heini menge lalag ku keniyu; berakat he mebmelipayen kew. Purungi niw is menge ulaula niw; tumana niw is menge sambag ku keniyu. Kinahanglan he mesevaha is gehinawa niw ne mebmelinawen is ked-ubpè niw. Su emun ebeelan niw heini, is Megbevayà he iyan puunà te g̵ag̵ew wey kelinew, layun eduma keniyu.

1 Kurintu 11:18

Nezineg ku he emun edtig̵um kew egkengevahinbahin kew ziyan ne ebpekunkuntedehè kew. Ne malu a kayi ebpeketuu.

Pilipus 1:27

Menge suled, ke minsan hengkey is egkehitavù kediey, utew kinahanglan he is menge ulaula niw, ne kenà ebpekesuwey te impenurù ni Kristu pinaag̵i te Meupiya he Tudtulanen. Su emun kenè kew edsuwey kayi, minsan ke kenà a ebpekelikù diyan, egketudtulan a he nesevaha is gehinawa niw wey tuyù niw te kedhag̵ù su wey metuuwi te mezakel he menge etew is Meupiya he Tudtulanen.

Ruma 16:17

Menge suled, edhengyuen ku keniyu he mebantey kew, ne likayi niw is menge etew he edsamuk te kebpekidsevaha niw wey kedtuu niw te menge tumutuu su edsupaken dan is tutuu he tuluuwen he impenurù keniyu.

2 Kurintu 5:20

Umba midsug̵ù key ni Kristu su wey pinaag̵i kenami ebpekehangyù keniyu is Megbevayà. Ne tenged ki Kristu edhengyuan dey zaan sikiyu he itug̵ut niw he himuwa kew te Megbevayà he menge emig̵u zin.

1 Kurintu 4:16

Ne g̵eina te amey a keniyu, edhengyuan ku sikiyu he med-iring kew kediey.

Nengeulaula 4:32

Mezesen is kebpekid-upakat te menge tumutuu su nesevaha zà is isip dan wey g̵ehinawa zan. Wazà minsan sevaha kandan he mid-isip din is menge azen din he iyan dà sikandin ebpehimulus, kekenà, mid-isip dan he sevaha zan dà te azen.

Juan 17:23

Su ziyà a te kandan ne zini ka zaan te kedì wey mehustu is kegkesevaha te isip dan su wey metueni te tivuuk he menusiyà he midsug̵ù a kenikew, ne wey metueni zaan te menusiyà he mahal sikandan diyan te g̵ehinawa nu iring daan te mahal a ziyan te g̵ehinawa nu.

1 Tiselunika 5:13

Kinahanglan he utew niw sikandan tehuza wey mahala tenged te menge vaal zan diyan te keniyu. Ne kinahanglan he melinew is kedepitè niw te kada sevaha.

Ruma 12:1

Na, menge suled, tenged te utew zekelà he hizu kenitew te Megbevayà, edhengyuan ku sikiyu he ipeveyveyai niw kandin is lawa niw wey g̵ehinawa niw. Iyan heini ibpemuhat he kenà edhimetayan, ne kinahanglan he wazà igkesawey zuen su wey mesuati te Megbevayà. Ne iyan heini hustu he ked-ezapa niw kandin.

Juan 10:19

Ne hein nezineg te menge Hudiyu heini he penurù ni Jesus, kenè dan en egkengeuyun.

1 Pedro 2:11

Menge minahal ku he suled, kenè en hustu he inged tew heini is kelibutan su menge humuhulevungà kiw zà dini. Ne tenged dutun edhengyuan ku sikiyu he kenè niw pezumdumahi is menge mezaat he kebayè niw su ebpekesanggen heini te kedsundan niw te Megbevayà.

2 Timoteo 4:1

Duen idtelaan ku kenikew, ne is Megbevayà wey si Jesu Kristu, iyan ebpeketistig̵us kayi te menge lalag ku. Netuenan ta he edlikù si Jesus su iyan sikandin hadì ne iyan sikandin edsusi keuzemà te nengeulaula te minsan hentei, se uuyag pa wey is nemematey en.

Pilipus 3:16

Iyan, kinahanglan guntaan he edtumanen tew is daan he impenurù kenitew te Megbevayà.

2 Kurintu 10:1

Duen egkag̵i he siak, si Pablo, telawen a emun diyan a te keniyu, iyan, memeg̵arang kun is menge lalag ku keniyu emun edlelag̵an ku sikiyu pinaag̵i te surat. Iyan, guntaan, kenà meg̵arang is menge lalag ku, kekenà, edhangyù a keniyu pinaag̵i te menayù he menge lalag iring te menayù wey velig̵eg̵awen si Kristu.

Juan 7:43

Ne zutun kenà egkengeuyun is ked-isipa te menge etew mehitenged ki Jesus.

Marcos 2:21

Ne zutun insempità ni Jesus is kenà kebpeked-amur te veg̵u he penurù din wey te zaan he tuluuwen. Ke sikandin te, “Is beg̵u he manggad he wazè pa megkenseng, kenà meupiya he idapi ziyà te kumbalà he merunut en he manggad su emun ebpìpian, egkenseng haazà is beg̵u ne egkevindas is merunut en he manggad ne tuwas pa he meluag is kegkevindas din.

Mateo 9:16

Ne zutun insempità ni Jesus is kenà kebpeked-amur te veg̵u he penurù din wey te zaan he tuluuwen. Ke sikandin te, “Is beg̵u he manggad he wazè pa megkenseng, kenà meupiya he idapi te kumbalà he merunut en, su emun ebpìpian, ne egkenseng ne egkevindas haazà is daan tenged dutun te veg̵u ne tuwas pa he meluag is kegkevindas dutun te kumbalà.

1 Timoteo 5:21

Edteleenan ku sikew he purungi nu tumana heini is insug̵ù ku kenikew. Iyan ebpeketistig̵us kayi is Megbevayà, si Jesu Kristu, wey is menge pinilì din he velinsug̵uen. Kinahanglan he te minsan hengkey he ed-ul-ulahan nu wazè nu zepig̵i he minsan hentei. Ke edhusey ka kinahanglan he iyan nu pemineg̵a kes ebpekevenar.

2 Tiselunika 2:1

Ne g̵untaan, menge suled, ibpesavut dey keniyu is kedlikù keuzemà te Nengazen tew he si Jesu Kristu wey is kedtulusa zin kenitew.

Gelasya 4:12

Menge suled, edhengyuan ku sikiyu he ul-ulaha niw is mid-ulaula ku su siak is Hudiyu, mid-engkezan ku en is kedserig̵i te kesug̵uan te menge Hudiyu. Nehimu a he iring keniyu zengan te kenà menge Hudiyu. Tutuu iyan he wazà a keniyu meselai, kekenà, mibpurungan a keniyu.

2 Kurintu 6:1

Ne g̵eina te nehimu key en he menge timbang te Megbevayà, edhengyuan dey sikiyu he himuwa niw he mebpulus is gag̵ew zin keniyu.

Ruma 15:30

Menge suled, tenged te mahal ziyà te g̵ehinawa niw is Nengazen tew he si Jesu Kristu wey tenged te kebpekedhihizuwè tew he ibeg̵ey kenitew te Wag̵as he Mulin-ulin, edhengyuan ku sikiyu he peniguduwi a keniyu iampù diyà te Megbevayà.

Juan 9:16

Ne zutun migkag̵i is duma zutun te menge Perisiyu, ke sikandan te, “Heini si Jesus, kenà iyan sikandin sug̵ù te Megbevayà su edsupaken din layun is kesug̵uan mehitenged te Andew te Kedhimeley.” Iyan, migkag̵i zaan is duma pa he menge Perisiyu te, “Emun mesinupaken he etew, kenè din egkehimu is menge egkein-inuwan he iring kayi!” Ne zutun kenè dan egkengeuyun.

Ruma 1:13

Egkesuatan ku, menge suled, he metueni niw he kenà egkeawà dini te isip ku is kegkesuat ku te edhendiyan, iyan, kenè e pa g̵untaan ebpekehendiyan su zuen edsanggen kedì. Egkesuat a he edhendiyan su pinaag̵i te kebpenurù ku, kela ke zuen menge etew ziyan he ebpeketuu ki Jesus, iring te pinaag̵i te kebpenurù ku, duen menge kenà Hudiyu zaan diyà te zuma he menge inged he nemeketuu kandin.

1 Kurintu 1:11

Umba egkeg̵iyen ku heini, menge suled, su zuen menge zuma ni Keluwi he midtudtul kedì he egkengetebektebek kew ziyan.

1 Kurintu 3:3

su kemulu kew pa ebeyveyaan te keniyu zà he suat. Su zuen kun duma keniyu he egkesina ne zuen duma pa he ebpekidtebek, ne tenged kayi henduen be te ebeyveyaan kew pa te suat niw iring te menge etew he wazè pa medtuu ki Jesus.

2 Kurintu 13:9

Egkelipey ad emun wazè niw supak, minsan ke henduen te wazè dey keg̵ehem. Ne kenà duen dà taman su id-ampù dey he mepurung meheg̵et is ked-ul-ulaha niw te hustu.

1 Pedro 5:10

Mevavè dà is ked-antus niw ne edheg̵eten te Megbevayà is kedsarig niw kandin. Ebig̵eran kew zin, edlig-enan kew zin wey ebeg̵ayan kew zin te zesen. Iyan sikandin puunà te minsan hengkey he tavang kenitew. Midhimu kiw zin he tumutuu su wey pinaag̵i te kebpekidsevaha tew ki Kristu mekeambit kiw te wazà pidtemanan he utew kegkelavew zin.

Marcos 3:24

Penenglitan ke zuen hadì ne ebpetebtebekà is menge sakup din, meg̵aan egkeawà is gehem din te kedhadì.