Wiripu 1:11 - Sateré-Mawé

¹¹ Tupana etunug o miꞌiria waku nug hanuaria wo are. Etunug miꞌiria iꞌatuieineꞌen hap tote wakuat eiam mo kahato are. Atikyꞌesat miꞌiria aikotã Esaꞌyru Iesui ewaku hap ewy tukupteꞌen. Ewaku hap ewywuat wo etiꞌatunug miꞌiria. Tupana miꞌi etunug mote emotypot haria wo kahato tukupteꞌen miꞌiria are. Waku kahato En iꞌatuꞌe aru ewowi iraniaꞌin areꞌe Tupana pe. Pyno mio tã ahẽtup mesuwe ehetiatno Tupana pe.

Wiripu 1:11 Referans Kwoze

Epereu 12:11

Karãpe Tupana ainapin hamo aiꞌapiheg turan yt he hin i maꞌato haty kahato yt aimowehum kuap i yt aimowepiit i aiꞌapiheg turan. Meiũran maꞌato aru tokosap haty hap hawyi ti satꞌe kahato ahete hewaku hap. Haꞌyruꞌin hakiꞌytꞌin hãpyk kahato rakaria wo watopyhuꞌat. Tupana tikyꞌesat aimoehãite tomohey hap etiat hap tomikyꞌesat etiat hap. Uiwyriaꞌin yt naku i aiperup Tupana potpap nug hap ete. Waku aipo hesaika ipotpap nug hap ete. Waku aipy hesaika ipotpap ereto hamuat hap ete. Toikyꞌesat aito toꞌypia aikotã hewo kahato rakat ewywuat tomowepiit haria wo.

Iuwãu 15:8

Karãpe hewo hewo haga ete pyi ywa he rakat pote Tupana motypot haria wo imowato haria wo eweikupteꞌen. Iꞌewyte iꞌyp kaipyi ywa iꞌatu rakaria he rakaria tukupteꞌen hawyi uimotypot hap eweimoherep iraniaꞌin me e.

Korosi 1:10

-Tupana uruikyꞌesat kahato tawa Korosi piaria Epaꞌãu eiam kahato wo eweꞌeg hamo iꞌewyte emikyꞌesat nug kuap hap urutoꞌe mesuwe uruhẽtup. Uruikyꞌesat miꞌiria aikotã iꞌyp iꞌywa kahato rakat ewy hewo hewo kahato hap ewy wyti uruikyꞌesat kahato miꞌiria Tupana urutoꞌe. Pyno uruikyꞌesat miꞌiria wakuap yn nug haria En ewy hap uruikyꞌesat. Iꞌewyte uruikyꞌesat ekuap hap ihatꞌok ewy ewy putꞌok e Esaꞌyru mohey haria ete urutoꞌe uruhẽtup Tupana pe.

Wiripu 4:17

Yt ahẽtup hin i eimiium wuat iꞌewyte yt atikyꞌesat i ehekareꞌen uiwanetup hawiat hap pykai eweipoꞌoro. Yt eimiium kape hin i arahaꞌat. Yt ehekat hin i uheha pe. Eikyꞌe hap yn uheha pe uhepiat hap wen maꞌato eimiium uimowepiit kahato katupono miꞌi kaipyi atikuap uikyꞌe ehepiat hap. Miꞌi kaipyi atikuap eipe Tupana kyꞌe kahato haria hap. Miꞌi eimiium koꞌi yne topyhuꞌat atipy pe rakanuat ehegyiꞌat hap toimoherep hamuat itote emipoꞌoro koꞌi.

Korosi 1:6

Koitywy mesuwat Iesui etiat ainapin hap aimoehapyhotꞌok kahato wuatꞌi miitꞌin me mesuwat yi totiaria pe. Tuwesytpok kahato ihay wakuat aikowo aikowo tuwat Tupana ehay wuatꞌi puo. Miꞌi hawyi miꞌiria wy waku pe raꞌyn tukupteꞌen. Tupana mipoityro wo raꞌyn tukupteꞌen. Miꞌi hap ewy raꞌyn eweikupteꞌen eweikuap taꞌyn sehay hawyi. Eipe ti eweikuap taꞌyn Tupana tum ehepiat wuatꞌi eꞌat piat eheineꞌen hamuat hap. Eweikuap taꞌyn yt kat saꞌup i tegyiꞌat hap tutum neran hap eweikuap taꞌyn.

Humanu 6:22

Saꞌawyꞌi aiminug saꞌag emiit no watopyhuꞌat. Miꞌi hawyi koitywy watopyhuꞌat Tupana emiit no raꞌyn. Koitywy Tupana po pe raꞌyn watopyhuꞌat. Waku kahato poꞌog Tupana po pe watopyhuꞌat katupono aheineꞌen mesuwarotiat hap Tupana motypot hap yn topyhuꞌat. Miꞌi hawyi aru toineꞌen aheineꞌen wuatꞌi eꞌat piat Tupana motypot hap.

1 Peteru 2:9

Maꞌato aito ti aikotã wẽtup ywania Tupana miꞌairo wẽtup ywania ewywuat koꞌi aito. Kat pote Tupana saꞌyruꞌin sakiꞌytꞌin aito. Miꞌi pote Tupana aiꞌairo tepaꞌi koꞌi wo maꞌato yt mesuwarotiat paꞌi koꞌi ewywuat i. Katupono aito morekuaria ewy watopyhuꞌat Tupana wanetup hawe. Aitoria aikotã wẽtup tama piaria ewywuat Tupana eꞌyi kaꞌiwaria aito. Aiwanetup hap koꞌi yt mesuwarotiaria minug koꞌi mesuwarotiaria wanetup hap koꞌi ewy hin i. Miꞌi pote -Eiperia yt miit ewy i iꞌatuꞌe ahepe. Miꞌi pote Tupana motypot hap yn watikyꞌesat mesuwarote. -Waku kahato uruetupana watoꞌe iraniaꞌin me. Saꞌawyꞌi urutukupteꞌen aikotã iꞌypyryp we hap ewy. Maꞌato mesup urutukupteꞌen hẽtyhot puo hap ewy. Saꞌawyꞌi Tupana yt heremo hin i uruepe. Koitywy heremo hap ewy urupyꞌa pe uruimohey pote.

2 Tesaronika 1:12

Miꞌi tã taꞌatunug itote pote iraniaꞌin itotiaria yt toꞌokyryꞌi hin i urukaꞌiwat Iesui set ete. Emotypot kahato itote iraniaꞌin Papai urutoꞌe. Iꞌewyte emiꞌatumotyporia wo tukupteꞌen emohey haria itotiaria Papai urutoꞌe. Miꞌi hap uruhẽtup ewowi etum neꞌen neꞌi hamuat hap urukaꞌiwat uruporekuat Iesui egyiꞌat hap kaipyi uruhẽtup Kahato wuatꞌi eꞌat pe ehupi uruto Pauruꞌin.

Ewesu 5:9

Aat ipotpap kahato aimikoi ete miꞌi pote aimikoi ihãite kahato. Miꞌi hawyi hewo kahato kat kat ywa. Aheꞌuꞌi raꞌyn aimiꞌu raꞌyn aat motpap hap kaipyi. Miꞌi hap ewywuat kahato karãpe Tupana Paꞌãu putꞌok e ahete turan ahehãite hap toineꞌen aipaꞌãu me. Miꞌi hawyi pywo e haria wo wotopyhuꞌat waku nug haria wo watopyhuꞌat hãpyk nug haria wo watopyhuꞌat aimikoi ihãite kahato hap ewy are.

Ewesu 1:14

Tupana tum naꞌyn Topaꞌãu ahepe. Miꞌi tutum mote mesup watikuap iꞌewyte tutum aru ahepe kat e hap kat e hap -Atum aru uimepytꞌin me e hap koꞌi ewy. Tutum naꞌyn yne saꞌup yne aiminug saꞌag hep hamuat Tosaꞌyru suu. Miꞌi pote watikuap taꞌyn mesup yt kat i saꞌag toipuẽti aikai. Watoineꞌen iwywo turan tuwehum ahowawi yt kat i aikai yt naku i pote yt kat i aipit pit hap. -Waku kahato En Tupana watoꞌe aru wuatꞌi eꞌat pe. Waku En waku En katupono uruhep ahiag po pywiat hat En urutoꞌe aru wuatꞌi eꞌat pe aru.

1 Kuriniu 10:31

Pyno kat koꞌi kat koꞌi watunug waku watunug miꞌi torannia Tupana motypot hamo sio watenuk sio wateꞌyꞌu sio watuwepotpap Tupana motypot hap yn waku aiwanetup hawe. Taꞌi kat koꞌi kat koꞌi watunug turan waku watuwehum Tupana kape.

Mateu 5:16

Pyno ti aikotã ariãty hẽtyhot kahato hap ewy eipe uimohey haria miitꞌin puꞌap Tupana kapiat moẽtyhot hamo eweikupteꞌen e. Atikyꞌesat yne eiminug wakuap koꞌi heremo wuatꞌi akasa hamo iꞌewyte Aiꞌywot Tupana atipy piat motypot hamuat atikyꞌesat e Iesui temiitꞌin me yityꞌok tote.

1 Peteru 4:14

Pywo ti rat uiwyriaꞌin karãpe miitꞌin ihay saꞌag kahato ahetiat pote watomohey Aiporekuat nuat pote miꞌi hap eꞌat pe waku watuwemowepiit kahato. Eweikuap kat pote. Aimowepiit hap sese topyhuꞌat aru ahete wuatꞌi eꞌat pe katupono watopyhuꞌat Tupana mimotypot koꞌi sese. Tupana Paꞌãu eiam kahato watopyhuꞌat. Katupono Tupana yt aiꞌatoiat hin i wahoꞌopot turan. Katupono mesuwarotiaria iꞌatuehay saꞌag Aikaꞌiwat Iesui ete maꞌato aitoria watimotypot kahato Aikaꞌiwat. Miꞌi hap kaipyi Tupana aikuap. Miꞌi pote tutum ahepe Topaꞌãu pywuat imotypot koꞌi watopyhuꞌat pote.

1 Peteru 2:12

Iraniaꞌin teꞌerahaꞌat kahato ahowawi sio pywo pe watomohey sio yt hap kape. Miꞌi pote aheineꞌen hap mesuwarote aikotã Iesui ewy hãpyk kahato rakat ewy waku watopyhuꞌat are. Uiwyriaꞌin waku watunug hãpyk kahato iꞌatuehamo. Miꞌi pote meiũran hoꞌopot hap eꞌat putꞌok e iꞌatuete hawyi meremo taꞌatumohey aikotã aito hap ewy. Miꞌi hawyi Tupana motypot hap ete aikotã aiꞌewy tukupteꞌen hãpyk kahato watunug wakuat pote. Mesup iꞌatumikyryꞌi hamo watoineꞌen watomohey Iesui pote -Yt naku i nug haria iꞌatuꞌe maꞌato yt pywo pe i. Katupono aikotã wẽtup ywania miꞌiria tukupteꞌen yt Tupana ywania hin i yt aiꞌe hap ewywuat i miꞌiria.

1 Peteru 2:5

Iꞌewyte aitoria Iesui mohey haria watopyhuꞌat nu koꞌi ewy Tupana yat nug hamuat hap ewy. Pyno iꞌatu kahato nu Tupana yat nug hap wẽtup nu uito wẽtup nu en wẽtup nu eipe hap ewy. Tupana yat nu koꞌi aito hap ewy watopyhuꞌat. Iꞌewyte ti aito Tupana epaꞌi koꞌi ewywuat watoineꞌen katupono ahehay kuap Tupana wywo aikotã saꞌawyꞌi wuaria taꞌatuꞌatuꞌuka taꞌatuhũria hawyi taꞌatuwuk Tupana mowepiit hamo. Miꞌi hap ewy watunug mesup. Watimohey Iesui Aipotypot hawyi Tupana mowepiit haria wo watopyhuꞌat Tupana hũ Aikaꞌiwat pote. Miꞌi aihũ watum Tupana pe imowese hamuat imowepiit hamo aikotã paꞌi koꞌi ewy aito.

Ewesu 2:10

Saꞌawyꞌi Tupana topo wo ainug. Koitywy Haꞌyru mohey haria watopyhuꞌat wẽtup ywania ewy yn naꞌyn watopyhuꞌat. Ainug hap eꞌyian mete Tupana toꞌe -Meiũran aru atipowyro kahato uimikyꞌesat nug neran haria e. Wakuaria sok ewy aru atunug miꞌiria e saꞌawyꞌi tuwepe.

Ewesu 1:12

Pyno toꞌiro watuwehum Tupana kape katupono aito ti iraniaꞌin eꞌyian miat imohey haria iraniaꞌin eꞌyian miat watunug Iesui Aiporekuat no. Waku kahato watoꞌe aiwoꞌope miꞌi hap ete maꞌato meiũran aru iꞌatu kahato ahaipepiaria Iesui mohey haria tukupteꞌen kahato Tupana motypot wuatꞌi eꞌat piaria. Waku kahato are.

2 Kuriniu 9:10

Pywo ti rat aipoi kahato hat Tupana. Yne aimikoi nug hat saꞌawyꞌi kat koꞌi kat koꞌi watikoi Tupana inug hap kaipyi. Miꞌi pote yne miꞌi tuut Tupana po pyi. Tupana timowato yne aimikoi koꞌi aiko moehãite hat. Tupana tikuap kahato aikotã mowato hap aito hegyiꞌat rakaria watoineꞌen pote. Watimoꞌẽ hap oktan tutum ahepe.

Iuwãu 15:16

Taꞌi uiwyriaꞌin eipe ti yt uiꞌairo i maꞌato Eikaꞌiwatno maꞌato Uito worohoꞌoꞌairo eipe uhemiitꞌinno. Miꞌi hawyi worohoꞌopoꞌoro uhehay moherep miitꞌin miat hamo iꞌewyte wakuap sese nug hamo yt ikahuro i rakat motpap nug hamo worohoꞌopoꞌoro uiwyriaꞌin e. Waku eikaipyi tuwemoherep kahato ywa koꞌi ewy wuatꞌi eꞌat piat ieineꞌen hanuaria wo e. Miꞌi tã hap ewy pote kat koꞌi kat koꞌi eweikyꞌesat hawyi ewehẽtup o Uiꞌywot pe hawyi tutum ehepe eimikyꞌesat oktan uhet upiat ewehẽtup pote uhytꞌiꞌin e.

Iuwãu 15:2

Miꞌi hawyi eipe mikoi yp iaga ewy eweikupteꞌen e. Haga yt haat i rakat tohywytip iꞌywytꞌokpy hawyi haga yt naku i rakat toiterek yt imosat i hat miꞌi hawyi iraniaꞌin haga koꞌi haat kahato i raꞌyn e.

Humanu 15:28

Miꞌi hawyi aikope aikope iꞌatuwaꞌatunug hap tote tuereto taꞌatuꞌatunug taꞌatumiium koꞌi miꞌi hawyi taꞌatuium uruepe -Etioto ro Ierusarẽi kape iꞌatuꞌe miꞌi pote areto iꞌatumiium koꞌi wywo. Putꞌok are itote hawyi atimoꞌẽ yne ihakyꞌeꞌi rakaria pe. Miꞌi hawyi iꞌatumiium oktan atum yne Iuteuria Iesui mohey haria itotiaria pe. Miꞌi atimoꞌẽ yne hawyi atoiat yne itotiaria pe hawyi areto Ierusarẽi myi tawa Epania kape eitok puo eikuap hamo.

Titu 3:14

Pyno Titu koitywy waku watoꞌe aipotmuꞌeria pe Iesui mohey haria pe -Eweiꞌatumuꞌe ro hoꞌopot haria powyro hamuat ete. Iꞌewyte aikotã waku hatek sese rakaria powyro hamo eweikupteꞌen hap ete waku watoꞌe aipotmuꞌeria pe katupono yt naku i kahato ti watoineꞌen neꞌen neꞌi ahowawi yn wanetup hatno neꞌi. Waku watiꞌatunapin Iesui mohey haria.