Titu 2:2 - Sateré-Mawé

² Pyno mio tã ereꞌe o iꞌatuepe. Etiꞌatunapin ihainiaꞌin nagnia pe -Waku etunug waku miitꞌin me hawyi miitꞌin mimotypot no eweikupteꞌen ereꞌe o. Ehehay hãpyk yn haria wo o eweikupteꞌen ereꞌe o. Eiwewaĩ o eiminug saꞌag ete hawyi Iesui mohey haria kahato wo o eweikupteꞌen ereꞌe o. Woꞌokyꞌe hap yn o ewetunug ereꞌe o. Imohey potꞌi haria wo o eweipyhuꞌat ereꞌe o nagnia pe Titu.

Titu 2:2 Referans Kwoze

Karasia 5:23

Yt wemowato haria wo i watoineꞌen. Wewaĩ kuap kahato haria wo watopyhuꞌat. Karãpe miꞌi tã e hap ewy watunug hawyi yt kat i ahewaĩ Muisei mienoi kaipywiat hap tuwẽtem aipiit pyi e. Miꞌi pote iperupꞌi rakatno watoineꞌen e. Watuwenapin kahu kahato pote miꞌi hap yn tuwẽtem Tupana Paꞌãu kaipyi aipiit pyi. Miꞌi tã e hap yne. Miꞌi waĩꞌe hap mopoꞌinik hap yt kat i toineꞌen e.

1 Peteru 4:7

Pywo ti rat yne mesuwarotiat mesuwat yi iꞌewyte ahekareꞌen aiꞌyat koꞌi aiko hawyi waikiru waty aat gaꞌapy yne mesuwarotiat ikahuro hamuat koꞌi eꞌat yt pya hin i. Pywo ti rat tuut irane uiwyriaꞌin yne mesuwat ikahuro hap eꞌat. Yt pya hin i are. Miꞌi pote waku weꞌeg haria wo watukupteꞌen mesuwarote. Waku wahẽtup aat kaꞌap Tupana kape mesuwarotiaria ehakyeraꞌat hamo. Waku wahekatup Iesui uut hap.

1 Timoteu 3:11

Iharyꞌi waku rakat yn waku. Iꞌewyte yt naku i iharyꞌi marakꞌa poityꞌi rakat neꞌi. Waku iharyꞌi iweꞌeg kahato rakat sehay pywuat piat yn ihay rakat.

1 Peteru 5:8

Pyno eiweꞌeg wo o ahiag mupi kurum iwasuria makuptiaria i are. Aikotã suraraꞌin ewy eweikupteꞌen. Eiweꞌeg wo kahato o ahiag mupi kat pote ehewanikap sese toineꞌen ahiag kurum iwasu koꞌi makuptiaria. Pyno eweikupteꞌen aikotã moryꞌa epo pe hap ewy. Kat pote ahiag awyato marakꞌa hap ewy toineꞌen kowoꞌi kowoꞌi hewyry rakat ewy hesyꞌat rakat ewy. Toikat kahato Tupana hũria ipakuptia u hamo are.

Titu 1:13

Pywo kahato toꞌe miꞌi miit katupono miꞌi tã ti tukupteꞌen yi Kereta piaria. Miꞌi tupono o etiꞌatunapin o Iesui mohey haria -Ewetoiat ro eiꞌywania yi Kereta eko saꞌag hawyi eweiꞌaipok to Iesui mohey hap kape ereꞌe o yi Kereta piaria pe. -Pywo ti iꞌatuꞌe hawyi mono iꞌatuhãite raꞌyn imohey hap ete.

1 Timoteu 3:2

Maꞌato eweꞌeg wo o miꞌi wuat airo hap ete Timoteu katupono yne miit mikuap hãpyk yn nakat waku etiꞌairo. Wẽtup ok wywo yn iharyꞌi rakat etiꞌairo. Yt naku i etiꞌairo kowoꞌi kowoꞌi wanetup haria. Waku -Yt uipo hep i Tupana potpap hap ete e hat etiꞌairo. Maꞌato waku wy emiꞌairoria paa e haria miitꞌin napin turanuat hanuaria teꞌeropyhuꞌat. Waku iraniaꞌin -Wakuat yn nug haria miꞌiria iꞌatuꞌe emiꞌairoria etiat. Iꞌewyte etikat o -Waku eweikupteꞌen uiꞌyat pe e hat waku etiꞌairo.

1 Tesaronika 5:8

Maꞌato aito hẽtyhot puo ahewyry yt kat i aimopẽꞌã hap mywo. Waku watopyhuꞌat aikotã suraraꞌin ewy katupono suraraꞌin ipag taꞌatupotiꞌa tote iheg nakat moryꞌa pupi taꞌatuꞌauka hap. Miꞌi hap ewy waku watomohey Iesui hawyi iꞌewyte watoꞌopowyro waku aiwoꞌokyꞌe hap ete. Karãpe Iesui mohey hatno watoineꞌen iꞌewyte miitꞌin kyꞌe hatno pote ti surara ipotiꞌa tote iheg nakat ewy watoineꞌen. Iꞌewyte suraraꞌin ipag taꞌatuesapeu iheg nakat taꞌatuꞌahot hap pupi hap ewy waku watoineꞌen. Uheꞌywytꞌin uheinytꞌin waku watehaꞌat kahato Ahehakyeraꞌat hat yatypiat aheineꞌen hap kyewi. Miꞌi hap ewy ti waku watehaꞌat kahato surara akag sokpe iheg nakat ewy.

Humanu 12:3

Pyno uito Pauru Tupana uipoꞌoro einapin hamo. Tupana hegyiꞌat kahato hawyi uinug eimuꞌe hatno miꞌi pote worohoꞌonapin eipe. Yt naku i aiwanetup hawe -Uito poꞌog torannia kai aiꞌe hap kape. Waku -Uito en watoꞌoꞌewy kahato watoꞌe. Katupono aito wẽtup ok poꞌog imohey wẽtup ok yt maꞌato wẽtup sok yn aito pykai. Miꞌi pote yt ereꞌe kuap i -Uito poꞌog eikai hap ete.

1 Peteru 1:13

Uiwyriaꞌin meiũran ti aru Tupana tipoꞌoro Aiporekuat nuat. Tuwemoherep mesuwat yi tote i raꞌyn wuatꞌi ehamo. Miꞌi pote waku aiwanetup hap Ahehakyeraꞌat hat kape yn watuwanetup. Yt naku i aiwanetup hap kowoꞌi kowoꞌi neꞌi. Waku wahekatup kahato Aipotypot huut hap kape iwemoherep hap kape katupono mekewat eꞌat pe tuut irane Ahehakyeraꞌat hat. Miꞌi hawyi iwese kahato ahete hegyiꞌat kahato ahepe tomohey haria aito pote. Miꞌi pote waku aikotã watopag aiweꞌok kytyt hap aipiit ete ahesokpe moheg hamo miꞌi hap ewy waku watimoheg kahato aiwanetup hap Iesui kape yn hap ewy are ehepe uiwyriaꞌin. Uito ti Peteru are.

1 Kuriniu 15:34

Aikotã watoineꞌen pya hesoꞌok takaria pupi hap ewy waku watoineꞌen miꞌiria pupi. Eweiꞌaipok to eiwemoweꞌeg hamo. Ewetoiat ro saꞌag nug hap koꞌi katupono iꞌatu kahato aria kapiat wat hanuaria tawa Kurintiu piaria katupono yt karãpe i eweiꞌatumuꞌe miꞌiria Aipotypot Iesui ete. Waku eiwemoti aria kapiat ehehay pyi tuwat hap pupi.

2 Peteru 1:6

Waku hawyi iꞌewyte toikyꞌesat aiwewaĩ kuap hap toikyꞌesat. Miꞌi hap watikuap hawyi toikyꞌesat aiwoꞌokyꞌe hap. Iꞌewyte toikyꞌesat yt aipohep i tomohey hap etiat hap toikyꞌesat. Miꞌi watunug kuap hawyi toikyꞌesat aito toiãꞌãkap koꞌi ewy hap toikyꞌesat are.

Titu 2:7

Iꞌewyte en Titu poꞌog wakuap nug hamo ereineꞌen itotiaria kurum iwasuria kai hawyi ti aru -Pyno waku watunug Titu ewy iꞌatuꞌe kurum iwasuria. Tupana ewy ereineꞌen iꞌatumuꞌe haype yt kat i eso hap wywo. Epyꞌa hãpyk wywo etiꞌatumuꞌe Titu.

Titu 1:8

Waku hegyiꞌat miitꞌin miat -Ereke ro e hat iꞌatuꞌakag wo waku etiꞌairo. Wakuap yn nug neran hat waku etiꞌairo. Iweꞌeg kahato hat waku hãpyk kahato rakat waku Tupana ewywuat wakuat rakat etiꞌairo waku. Wewaĩkuap hat waku etiꞌairo iꞌatuꞌakag nuat.

1 Timoteu 3:4

Waku watiꞌairo toꞌyat piaria poꞌoro perupꞌi tuwat hat. Waku imepytꞌin mimotypot imepytꞌin miehay mohey kahato. Miꞌi haria yn waku etiꞌairo eiꞌapykok hanuaria wo.

1 Timoteu 1:5

Yt naku i ti watuꞌuka sehay potꞌi ete ereꞌe o itotiaria pe katupono Tupana tikyꞌesat aiwoꞌowese ahehay wuat hap ereꞌe o iꞌatuepe. Wẽtup wanetup hap wywo yn waku watoꞌokyꞌe ereꞌe o. Yt iꞌatuekat kyewi i ti watopotkyꞌe ereꞌe o. Waku watoꞌokyꞌe wẽtup sok yn aito Iesui mohey haria aito pote.

1 Tesaronika 5:6

Taꞌi aito Iesui uut hap kape watehaꞌat kahato. Yt naku i get haria ewy neꞌi watoineꞌen huut hap owakai iraniaꞌin ewy.

Wiripu 4:8

Kurin poꞌog ahenoi hawyi waku. Uheꞌywytꞌin uheinytꞌin watipyhyp aiwanetup hap yt naku i hap. Miꞌi hawyi wẽtup kape yn aiwanetup hap. Wakuat kape yn watuwanetup aikotã miitꞌin miat wakuat rakat ewy aiwanetup hap aikotã pywuat wanetup hat ewy aikotã miitꞌin mimotypot kahato hap wanetup hap ewy aikotã hãpyk kahato rakat ewy waku watuwanetup. Waku ihainia haryporia weꞌeg nakaria ewy watuwanetup. Waku iwese kahato rakat ewy aiwanetup hap. Miꞌi hawyi -Meimuẽwaria wyti waku kahato rakaria iꞌatuꞌe hap ewy waku aiwanetup hap. Kat e hap kat e hap poꞌog poꞌog waku miꞌi ewywuat waku watuwanetup. Kat e hap kat e hap ete Tupana -Waku e pyno miꞌi hap ete waku watuwanetup aat kaꞌap.

2 Kuriniu 5:13

-Pyno uruto poꞌog waku eimuꞌe hamo Pauruꞌin kai iꞌatuꞌe itote. Pauruꞌin yt taꞌatukuap i kat e teꞌeropat muꞌe hap koꞌi hesoꞌok takaria pote iꞌatuꞌe. Maꞌato Tupana wanetup hawe yt uruesoꞌok hin i katupono imikyꞌesat ewy urutunug. Maꞌato iꞌatuwanetup hawe uwe uwe inug Tupana mikyꞌesat miꞌi haria iꞌatuwanetup hawe hesoꞌok takaria wo. Iraniaꞌin teꞌeroꞌe -Pauruꞌin iꞌatuweꞌeg kahato miitꞌin maꞌat hap ete iꞌatuꞌe. Mio tã iꞌatuꞌe yt taꞌatukuap hin i kat hamo urupotpap kahato eipowyro hamo hap yt kat i eikyꞌe hap iꞌatuekai pote. Uruto uruikyꞌe kahato eipe miꞌi pote urupotpap kahato eipowyro hamuat ete. Aikotã ywot hoꞌopot tomepytꞌin powyro hamo hap ewy. Yt urutuwekyꞌe i eipowyro hamuat hap ete urupotpap kahato.

1 Kuriniu 9:25

Woꞌoiãꞌãg haria seput haria saꞌawyꞌi taꞌatupiitmoesaika kahato. Yne eꞌat pe teput aat iꞌatuhyha hamo. Miꞌi hawyi wẽtup topyhuꞌat poꞌog torannia kai hawyi miꞌi hat pe morekuat tum toꞌakag painug hap ewywuat -Miꞌi seput hat poꞌog e hamo. Ahetama puo morekuat tum toꞌakag painug hap mohyt kawiat poꞌog seput kuap hat pe. Wẽtup eꞌat hawyi igag naꞌyn. Miꞌi hap ewy Tupana tum aru ahepe aipainug hap aiꞌakag totiat maꞌato miꞌi ti yt igag i rakat toineꞌen. Wuatꞌi eꞌat piat ikahu rakat sese.

Iesui Potmuꞌeria 24:25

Miꞌi hawyi itote Pauru henoi iꞌatuepe aikotã miꞌiria Tupana wywuat iꞌatupyhuꞌat hãpyk hamuat hap iꞌewyte aikotã waku waĩ watoꞌe aiwanetup saꞌag hawe hap katupono meiũran aru Tupana tomoherep uwe uwe temiitꞌin sese hap koꞌi uwe uwe yt temiitꞌin i hap ete Pauru henoi kahato iꞌatuepe. Miꞌi hawyi morekuat Werisi tokenꞌẽ imienoi pupiat haype toꞌe -Apuete Pauru yt uipohepap i te rat eꞌe hap kuap hamo e. Miꞌi pote meiũran aru worokay kay i raꞌyn miꞌi eꞌe hap kuap sese hamo e tokenꞌẽ toꞌapiheg aru Tupana piat hap pupi.

Iruka 8:35

Pyno iꞌatuepiat henoi hawyi tõꞌẽ kahato Iesui kape. Putꞌok iꞌatuꞌe turan mekewat saꞌawyꞌi wuat ahiag ipiit piat rakat waku raꞌyn taꞌatupuẽti sokpe pe raꞌyn toineꞌen Iesui yatype. Iwanetup hap hãpyk iraꞌyn.

Maku 5:15

Miꞌi hawyi teꞌeraꞌakasa mekewat miit Iesui yatype apyk pe raꞌyn waku i raꞌyn tuwepainug me raꞌyn toineꞌen yt kat i raꞌyn ahiagnia ipiit pe.

1 Timoteu 3:8

Timoteu waku etiꞌairo aipyꞌasetpiaria waku rakaria aipowyro hanuaria. Miitꞌin mimotypot kahato yn waku etiꞌairo. Mahy u poityꞌi rakaria neꞌi yt naku i etiꞌairo. Ahekat nuat kyꞌesat hap kape yn wanetup hat yt naku i maꞌato hegyiꞌat rakat yn waku.

1 Timoteu 1:2

Timoteu uhaꞌyru sese ewy kahato ereineꞌen katupono saꞌawyꞌi ereineꞌen Iesui mohey hatno uimienoi kaipyi pote are. Miꞌi tupono ahẽtup kahato Tupana pe eupi -Uiꞌywot erahaꞌat Timoteu kape ihakyꞌeꞌi hap wywo are. Etum o tope yt kat saꞌup i egyiꞌat hap. Iwanetup hap wẽtup yn etum iwepiit hamuat are Tupana pe eupi.

1 Timoteu 1:10

Wuatꞌi haryporia wywuat wuatꞌi ihainia wywuat ieineꞌen haria napin hamuat tutum waĩ toꞌe hap. Iꞌewyte woꞌopiat woꞌopytyk piat ewaĩ hamuat ihainia toꞌope iꞌewyte haryporia toꞌope miꞌi e haria ewaĩ hanuat. Iꞌewyte miitꞌin eroꞌok haria piatnuat heso rakaria napin hanuat tutum. Woꞌokuasa i kuasa i haria napin hanuat tutum waĩ toꞌe hap. Toĩ poꞌog meimewat kai saꞌag nug hap koꞌi. Yt ahenoi kuap yne i. Miꞌi tupono miꞌi hap nug haria waĩꞌe hamo Tupana tum naꞌyn iꞌatunapin hap hãpyk kahato rakat.

1 Timoteu 1:14

Sakpoꞌe hegyiꞌat kahato rat uhepe paĩ Uikaꞌiwat uheineꞌen ne wanikap nuat turan. Miꞌi hawyi tutum tomohey hamuat hap uhepe. Koitywy iwywo wẽtup piit hap ewy yn naꞌyn urutukupteꞌen.

1 Timoteu 5:1

Karãpe wẽtup ok eꞌyian tiꞌaparap Tupana pe pote yt ehoiroꞌi hoiroꞌi teiꞌo miꞌi miit ete. Yt naku i watimohit aseꞌiꞌin koꞌi hary koꞌi e. Maꞌato waku perupꞌi puo watinapin aimimotypot koꞌi waku -Papai Mamai yt naku i miꞌi tã watunug aito waku watoꞌe perupꞌi puo iꞌatukyꞌe hap wywo iporo pote.

Wiremu 1:9

Uito ti meiũ Iesui mohey haria apykok hanuaria akag wuat Tupana miꞌairo kahato. Miꞌi pykai yt woropoꞌoro i haty wo maꞌato perupꞌi puo yn ahẽtup epe uimikyꞌesat ekyꞌe popuo Iesui poꞌypywiat uipyhik pyi ahẽtup epe perupꞌi puo.