29 Miꞌi hawyi Iesui timig naꞌyn iꞌatueha koꞌi hawyi toꞌe -Pyno uimohey ehepiat hap ewy ti topyhuꞌat waku raꞌyn eheha koꞌi e.
Miꞌi hawyi Iesui toꞌe -Taꞌi uimohey kahato hat en haryporia. Pyno mio waku raꞌyn atunug kat som emikyꞌesat ewy. Mio tã e turan imepyt waku iraꞌyn.
Miꞌi hawyi Iesui toꞌe tope -Pyno koitywy waku raꞌyn eha ete katupono uimohey hap emoehãite raꞌyn e. Miꞌi hawyi meremo waku raꞌyn tuete taꞌakasa i raꞌyn. Miꞌi hawyi Patimeu toto muap upi Iesui upi saꞌawyꞌi wuat yt iha pytig i rakat.
Temig hawyi Iesui tuwemorem hawyi taꞌakasa raꞌyn haryporia kape hawyi toꞌe -Pyno eremowepiit ro uhakiꞌyt katupono ti ehãite iraꞌyn. Kat pote ti uimohey epiat hap kaipyi wyti ehãite iraꞌyn. Mio tã e turan meremo ihãite iraꞌyn haryporia.
Mio tã e hawyi Iesui toꞌe -Mekewat Humanu ywania esurara akag me -Pyno mio waku eraꞌaipok i ro eꞌyat kape katupono emiit iꞌahuu rakat ihãite iraꞌyn mio epiat uimohey hap kaipyi mehin e. Mio tã e Iesui turan Humanu emiit ihãite iraꞌyn.
Miꞌi hawyi Iesui tiꞌatukyꞌe kahato hawyi tuweponug naꞌyn iꞌatueha ete hawyi meremo iꞌatuehapytig teꞌeraꞌakasa pakup i iraꞌyn. Miꞌi hawyi tuwat raꞌyn Iesui upi.
Miꞌi hawyi Iesui teke wẽtup netap we raꞌyn hawyi ti meimuẽwat yt ihapytig i rakaria tokokaꞌat raꞌyn hewowi. Miꞌi hawyi apo e Iesui iꞌatuepe -Eweimohey apo uhepiat eimoehãite kuap hap e hawyi taꞌatuwesat -Taꞌi uruimohey kahato epiat urumoehãite kuap hap urukaꞌiwat iꞌatuꞌe.