Mateu 5:3 - Sateré-Mawé

³ Mio tã toꞌe -Uhekatuwyria uwe uwe Tupana pe toꞌe -Uruto iꞌatuhakyꞌeꞌi rakaria wo pote urutukupteꞌen katupono yt uruikuap i ti En urumikyꞌesat oktan iꞌatuꞌe. Mio tã e haria ti uimipoity wo teꞌeropyhuꞌat. Iwepiit rakaria sese teꞌeropyhuꞌat.

Mateu 5:3 Referans Kwoze

Iruka 18:14

Pywo pe areꞌe ehepe mekewat paa e hat tominug saꞌag koꞌi ete yn taꞌaipok toꞌyat kape waku pe Tupana wanetup hawe katupono Tupana tiwaure yne iminug saꞌag koꞌi pote maꞌato mekewat -Uito poꞌog iraniaꞌin kai e hat yt toipuẽti hin i waku e hap Tupana wanetup hawe. Pywo miitꞌin mekewat paa e hat ewywuaria Tupana mimowato haria wo topyhuꞌat. Maꞌato mekewaria uito poꞌog iraniaꞌin kai e haria Tupana mimohit haria wo teꞌeropyhuꞌat e Iesui wuatꞌi miitꞌin me.

Tiaku 2:5

Pyno ewetum no ehewaure kaꞌa uhepe uimikyꞌe koꞌi. Yt eweikuap i te apo aikotã Tupana tiꞌairo kahato yt hekat i rakaria Iesui mohey kahato hanuaria wo hap. Poꞌog toiꞌairo ihakyꞌeꞌi rakaria temiit no tetama piatnuaria wo iraniaꞌin kai katupono saꞌawyꞌi toꞌe -Uhemiit sese wyti aru tukupteꞌen miit emiit haria wo karãpe arepyhuꞌat Wuatꞌi Miitꞌin Morekuat Koro mesuwarote e Tupana miwan me saꞌawyꞌi. Mio tã toꞌe hap ewy raꞌyn ti mesup te toiꞌairo temiitꞌin no miit yt uwe mikuap ewywuat koꞌi i yt uwe mikyꞌe ewywuat koꞌi i e. Miꞌiria pe ti -Worohoꞌoꞌairo eipe miitꞌin porekuaria wo uimohey sese haria eiperia pote e. Worohoꞌonug eipe morekuat no yne mesuwat yi tote e hatek takaria pe tokyꞌe sese haria pe. Worohoꞌomoesaika uimohey kahato hap wywo wuatꞌi nug hamo e Tupana tomohey haria pe.

Iruka 11:28

Mio tã e hawyi Iesui tiwesat tope -Mana waku uity wen maꞌato poꞌog waku miitꞌin iꞌatuewuare kaꞌa Tupana ehay kapiat hawyi taꞌatunug imienoi hap ewy.

Mateu 11:25

Mekewat eꞌat pe Iesui toꞌe -Uiꞌywot En wyti mesuwat yi totiaria iꞌewyte atipy piaria potypot ereineꞌen. Miꞌi pote arehum ewowi katupono tukupteꞌen iraniaꞌin uruto ti yt uruikuap hin i te En iꞌatuꞌe aikotã hirokaria ewywuaria miꞌiria uimohey sese haria. Maꞌato iraniaꞌin uruto ti uruikuap kahato e haria wyti yt uikuap hin i haria teꞌeropyhuꞌat.

Iruka 4:18

Miꞌi ti toimowẽpap mio tã e hap -Uipotypot wyti hum topaꞌãu uhepe miꞌi ti uiꞌairo tehay wakuat enoi ihakyꞌeꞌi rakaria piat hamo. Iꞌewyte uipoꞌoro tehay enoi mipyhik koꞌi piat hamo. Iꞌewyte yt ihapytig i rakaria piat henoi hamo. Iꞌewyte mekewat miitꞌin mimohit koꞌi ehehakyeraꞌat hamo e.

Maku 10:14

Miꞌi pote ipyꞌahak Iesui temiitꞌin ete hawyi toꞌe -Tero tõꞌẽ uhewowi hirokaria e. Yt eweipyhyp teiꞌo uhewowi hirokaria paĩ e. Katupono karãpe Tupana topyhuꞌat Wuatꞌi Ywania Miitꞌin Porekuat no miꞌi hap eꞌat pe hemiitꞌin imohey haria hirokaria ewy raꞌyn tukupteꞌen hetama pe.

Mateu 13:16

Miꞌi hawyi poꞌog Iesui toꞌe temiitꞌin me -Maꞌato eiperia ti eiwepiit kahato rakaria wo eweikupteꞌen katupono eweiꞌakasa kuap kahato raꞌyn. Iꞌewyte ehewaure kaꞌa eweituwepypok kahato raꞌyn uimienoi hap kape.

Tiaku 1:12

Maꞌato uwe uwe tepiat hoꞌopot turan te hakyꞌeꞌi turan yt iwaure i imohey hap miꞌi hat ti Tupana mimowaku wo toineꞌen iꞌewyte Tupana mimowepiit kahato wo topyhuꞌat wuatꞌi eꞌat pe katupono hoꞌopot hap sakpo gosap hat toineꞌen imohey hat. Miꞌi hat pe Tupana toꞌe aru -Uikyꞌe hat sese en e. Miꞌi pote woromoieineꞌen kahato wuatꞌi eꞌat pe e yt tewaure i haria pe.

Iuwãu 20:29

-Tume eraꞌakasa potiat uimohey hat en e maꞌato poꞌog uimohey hat yt akasa i uhewowiat haria poꞌog poꞌog uimohey haria ekawiat e katupono miꞌiria uimohey haria tukupteꞌen yt karãpe i uhewowiat akasa sese pykawiat haria miꞌiria e. Miꞌiria ti aru poꞌog Tupana mowepiit hanuaria torannia kai e Iesui Tume pe.

Mateu 24:46

Miꞌi tã nug hat wyti aru iwepiit kahato tokaꞌiwat putꞌok e turan katupono wakuap nug turan ikaꞌiwat tipuẽti pote e. Miꞌi pote tokaꞌiwat wakuat tutunug wyti aru mekewat waku nug hat ete.

Tiaku 1:10

Hekat rakaria miitꞌin mimotypot koꞌi tukupteꞌen mesuwarote iꞌatuꞌe maꞌato Tupana wanetup hawe imohey haria hekat rakaria ewy tukupteꞌen katupono yne Tupana watnuat toineꞌen imohey haria po pe. Miꞌi tupono waku hekat rakaria mesuwarote aito pote waku watuwehum Tupana kape are maꞌato yt naku i watuwehum ahekat ete -Uito poꞌog uhekat watoꞌe aiwanetup hawe. Waku paa e haria wo watopyhuꞌat ahekareꞌen koꞌi ete katupono ikuꞌuro irane miꞌiria hekat rakaria pykai. Miꞌi hawyi aikuꞌuro hawyi yt kat i ahekat mesuwarote. Taꞌi aheineꞌen hap mesuwarote ipohyt koꞌi ewy kahato. Aat hakup kahato hawyi igag ipohyt hawyi iteneg naꞌyn hawyi ikuꞌuro.

Iesui Aru E Hap 22:14

Miꞌi hawyi toꞌe atipy piat -Uwe uwe inug mesuwat piat tonapin hap miꞌi Tupana mipoityro wo toineꞌen. Pywo ti rat uwe uwe Tupana mipoityro wo toineꞌen uwe uwe tunug Tupana mikyꞌesat miꞌi hat pe ti aru Tupana toꞌe -Waku etuꞌu kat kat ywa wuatꞌi eꞌat piat eimoieineꞌen hamuat uimikoi kaipyi e aru Tupana miꞌi hat pe. Ereke mehin ereke mana uhetawa pakup we e aru tomikyꞌesat nug haria pe e.

Iesui Aru E Hap 19:9

Miꞌi hawyi atipy piat toꞌe uhepe -Iuwãu e etiwan no kat som areꞌe epe hap koꞌi e katupono Tupana e hap ahenoi epe -Waku raꞌyn Uhaꞌyru eharyꞌi hap eꞌat e. Mesup atunug ienuk hap imotypot hamo e. Uhaꞌyru eharyꞌi hap motypot hap ienuk hap kape worohoꞌokay kay wen maꞌato yt ehewaku hap kaipyi i worohoꞌokay kay eipe e. Worohoꞌokay kay Uhaꞌyru eharyꞌi hap motypot hap ienuk hap kape worohoꞌokyꞌe kahato pote e. Worohoꞌoꞌairo uimipoityro koꞌi uhegyiꞌat pote e Tupana e.

Mateu 25:34

Miꞌi hawyi ti aru itote uipo sese kawiaria pe Morekuat koro toꞌe ipo ran koꞌi kape -Eweĩꞌẽ ro meikowo Uiꞌywot miꞌatukyꞌe koꞌi e. Atum neran ti Tupana etama ehepe e. Katupono yi nug hawyi te ti mekewat atum teran kahato ehepe are e.

Mateu 11:6

Iꞌewyte uwe uwe tepiat hoꞌopot pykai yt uiwaure i. Miꞌi hat wyti uimowepiit kahato hat topyhuꞌat wuatꞌi eꞌat pe e Iesui Iuwãu potpoꞌororia pe.

Mateu 8:11

Putꞌok iꞌatuꞌe ti aru iraniaꞌin ywania aat wẽtem hap kaipyi iꞌewyte aat minꞌe hap kaipyi. Miꞌiria ti aru teꞌeroꞌapyk mekewat yparakai wuatꞌi eꞌat piat rote Aparãu Isaki hawyi Iakoꞌin wywo.

Mateu 3:2

Mio tã e toiꞌatumuꞌe -Eweiꞌatoiat ro yne eiminug saꞌag koꞌi e katupono mio tuut ti aru raꞌyn aikaꞌiwat e.

Mateu 19:14

Miꞌi hawyi Iesui toꞌe -Yt eweiꞌatupyhyp teiꞌo hirokaria uhewowi paĩ e topotmuꞌeria pe. Katupono karãpe Tupana topyhuꞌat morekuatno mesuwe miꞌi hap eꞌat pe hirokaria ewywuaria yn teꞌeropyhuꞌat itote iꞌatuieineꞌen hap sese wo e Iesui temiitꞌin me.

Iruka 22:29

Saꞌawyꞌi Uiꞌywot Tupana uiminug morekuatno wuatꞌi ywania uimipoꞌoro hanuat e. Koitywy Uiꞌywot ewy atunug eiperia morekuaria wo uiꞌewywuaria e.

Iruka 22:30

Pywo pe ti areꞌe ehepe aikope aikope areineꞌen morekuatno hap tote wyti aru uimiꞌu nug hap tote uiwywo eweiꞌapyk aru e. Taꞌi morekuaria wo uiwywo eweikupteꞌen e. Taꞌi uiwywo eweiꞌapyk uimiꞌu u hamo uhesapo hy u hamo itote uimotypot sese hap eꞌat e. Iꞌewyte eiꞌapyk hap koꞌi sese iwato rakat tote eweiꞌapyk morekuaria kororia wo 12 ywania Isareu ywania morekuaria wo eweikupteꞌen aru itote uwe waku uwe yt e hamo e Iesui temiitꞌin me.

Iesui Aru E Hap 3:17

Miꞌi hap ewy arewanetup ehewowi tawa Irautiseia piaria. Maꞌato -Waku kahato rakaria uruto eweiꞌe iraniaꞌin me. Waku kahato uruto eweiꞌe eiwoꞌope. Waku pe kahato uruto eweiꞌe. Ahekat kahato rakaria aito eweiꞌe eiwoꞌope. Aimikyꞌesat oktan topyhuꞌat raꞌyn mesup aipo pe eweiꞌe eiwoꞌope. Maꞌato yt miꞌi tã hin i eweikupteꞌen uiwanetup hawe areꞌe e. Yt naku i pe eweikupteꞌen uikyꞌe ran haria e. Pywo ti rat aikotã satek takaria ewy ti rat eweikupteꞌen e. Aikotã sẽtup i sẽtup i e haria ewy eweikupteꞌen e. Aikotã yt ihapytig i rakaria ewy eweikupteꞌen e. Aikotã yt hesokpe i rakaria ewywuat eweikupteꞌen e. Miꞌi ewywuat eweikupteꞌen mytkai -Waku pe watoineꞌen eweiꞌe eiwoꞌope. Maꞌato yt iꞌatuwepiit hin i rakaria ewy eipe e.