Mateu 16:27 - Sateré-Mawé

²⁷ Katupono ti aru Ihainia Saꞌyru taꞌaipok meremo toꞌywot esaika wywo iꞌewyte temiitꞌin atipy piaria nywo. Miꞌi hap eꞌat pe ti aru torannia imoherep taꞌatuminug koꞌi mekewat eꞌat pe.

Mateu 16:27 Referans Kwoze

2 Kuriniu 5:10

Waku aiweꞌeg wo kahato kat som watunug mesuwarote aipiit wywo hap ete. Katupono meiũran aru Aipotypot Iesui aikay kay yne tuwewawi haꞌup ium hamo. Wẽtup ok tuereto toikay kay yne aito. Itote toimoherep aiminug koꞌi wuatꞌi pe. Aiminug wakuat koꞌi iꞌewyte aiminug yt naku i hap koꞌi aiminug mesuwat totiat turan wuat koꞌi. Miꞌi hawyi toꞌe wẽtup ok wẽtup ok pe -En wakuat kahato e. Maꞌato wẽtup ok wẽtup ok pe -En yt naku i e. Miꞌi pote waku aiweꞌeg wo kahato aipiit wywo mesuwarote.

Humanu 2:6

Mekewat eꞌat pe aru Tupana tum naꞌyn tomotypot haria pe tomikyꞌesat nug haria pe saꞌup wakuat kahato. Maꞌato iraniaꞌin me yt naku i nug haria pe tutum naꞌyn saꞌup yt naku i iꞌatuminug saꞌag hap oktan naꞌyn e miwan me.

Humanu 14:12

Miꞌi pote torannia aito aru wahenoi Tupana pe yne yne ahetiat kat som watunug mesuwarotiat aikotã watoineꞌen mesuwarote watoꞌe aru Tupana pe.

Ewesu 6:8

Waku aiwatetup hap aipotpap saꞌup ium hap sese toineꞌen atipy pe hap kape. Yt naku i mesuwarotiat kape yn aheha katupono meiũran ti aru Tupana tum aipotpap wakuat saꞌup ahepe. Tutum aru wuatꞌi miitꞌin me sio miitꞌin akag sio miit emiit Tupana tum wakuat saꞌup watunug yne imotypot hap wywo pote.

Iuta 1:14

Nimo te ti mio tã e mekewat Tupana ehay moherep hat pot Enoki Atãu emiariru emiariru toꞌe -Tuut ti aru Tupana Aikaꞌiwat ahowawi typyꞌi kahato tesuraraꞌin atipy piaria wakuaria sese wywo e yt naku i nug haria moma hamo e.

Iesui Aru E Hap 20:12

Miꞌi hawyi Tupana toꞌe ikuꞌuro rakaria pe -Eiwenoꞌẽ ro eweikupteꞌen i ro yne eipe e. Miitꞌin mikuap koꞌi iꞌewyte yt miitꞌin mikuap koꞌi i eweikupteꞌen i ro e. Eweĩꞌẽ ro uhowowi e Tupana saꞌawyꞌi wuaria ikuꞌuro rakaria pe. Miꞌi hawyi teꞌeruwaꞌatunug heꞌamyꞌap kape. Miꞌi hawyi miwan koꞌi ahyt araꞌakasa itote. Miꞌi miwan myi Tupana timoherep aikotã aikotã tehamuat iꞌatuminug koꞌi toiꞌapypok miwan ahyt hawyi taꞌatuieineꞌen mytyyp tote te turanuat aikotã itotiat rẽ turan taꞌatunug waku sio yt hap toimoherep. Sio miꞌiria hap Tupana miꞌapiheg wo teꞌeropyhuꞌat sio yt. Iꞌewyte toineꞌen wẽtup miwan itote yt iraniaꞌin ewy hin i. Miꞌi ti toiꞌapypok hawyi Tupana mimoieineꞌen sese koꞌi toimoherep wuatꞌi eꞌat piat ieineꞌen haria.

Iesui Aru E Hap 2:23

Yt eweꞌeg i kahato i mana pote topap topap kahato aru hirokaria emepytꞌin koꞌi e. Woroꞌapiheg kahu hawyi uimohey haria teꞌeruwanetup kahato aikope aikope teꞌeruwaꞌatunug yi Asia totiaria teꞌeruwanetup kahato aru eꞌapiheg hap emimuꞌeria e -Tupana tikuap kahato aiminug wuatꞌi yt naku i rakat koꞌi iꞌatuꞌe aru are e. Meiẽ toikuap sewaire waire nug i wuatꞌi wywuat hap iꞌatuꞌe aru e. Pywo ti rat Tupana tikuap aiwanetup hap iꞌewyte aiminug koꞌi sio waku sio yt hap koꞌi iꞌatuꞌe aru. Are paĩ aipoepyk aiminug oktan ne sio waku sio yt iꞌatuꞌe aru uimohey haria yne 7 tawa koꞌi piaria e.

Mateu 25:31

Meiũran ti aru putꞌok e Eheykeꞌet Morekuat koro torannia atipy piaria wywo mesuwat yi tote woꞌomotypot kahato hawe. Miꞌi turan taꞌapyk morekuat eiam note hẽtyhot kahato rakatno e.

Iruka 21:27

-Miꞌi hawyi tuut raꞌyn Uito Eheykeꞌet Eikywyt ywyhig muo uhesaika hawuo uimotypot hawe putꞌok are raꞌyn e Iesui.

Maku 14:62

Miꞌi hawyi ti Iesui tiwesat -Taꞌi Uito Miꞌi Miit eꞌe hap ewy e. Meiũran ti aru eweiꞌakasa Uito Miitꞌin Ykeꞌet Tupana hesaika poꞌog nakat po sese kai apyk pe e. Taꞌi eweiꞌakasa ti aru uhuut turan atipy kaipyi ywyhig kytsig me e.

Maku 8:38

Pywo pe ti uwe uwe mesuwat yt naku i hap eꞌat koꞌi turan uhehay pupi tuwemoti yt uimohey haria i. Miꞌi haria pupi ti aru uito iꞌewyte aremoti wy mekewat eꞌat pe karãpe uito eheykeꞌetno ariot i raꞌyn Morekuatno atipy piaria wywo Tupana wat hẽtyhot rakat pe imehit rakat piat turan. Miꞌi hap eꞌat pe ti aru uito Eheykeꞌet aremoti uipupiat wemoti haria pupi e Iesui muap upiaria pe.

Mateu 24:30

Miꞌi hawyi ti aru yne ywania miitꞌin toꞌokakꞌi katupono Eheykeꞌet uut hap eꞌat pe heremo kahato ywyhig muo meremo tuut e. Yne ti aru teꞌeraꞌakasa miꞌi tesaika hap wuat ẽtyhot hap wuat huut hap kape e.

Iesui Aru E Hap 1:7

Uiwyriaꞌin Iesui mohey haria meiẽ ewehehaꞌat ro Aikaꞌiwat Iesui tuut raꞌyn teiam ywyhig me. Taꞌi yne yne teꞌeraꞌakasa. Iꞌewyte ipiit suk haria iꞌauka haria teꞌeraꞌakasa kahato howawi. Ewehehaꞌat ro teꞌeruwak kahato wuatꞌi ywania yt imohey i haria teꞌerokenꞌẽ haype kak iꞌatuꞌe. Maꞌato aito imohey haria wahekatup kahato. Waku eriot Mehin waku eriot Mimi watoꞌe. Iꞌewyte aitoria 7 tawa piat Tupana motypot yat piaria pe yi Asia totiaria pe Iesui tuwemoherep wy.

Iesui Potmuꞌeria 1:11

Miꞌiria teꞌeroꞌe Iesui saipepiaria pe -Kat poteĩ ewehaꞌat atipy kape eipe yi Karireia piaria iꞌatuꞌe katupono toto raꞌyn Iesui atipy kape iꞌatuꞌe maꞌato aikotã toto hap ewy te ti aru taꞌaipok i iꞌatuꞌe ipotpoꞌororia pe ahepe.

Mateu 26:64

Miꞌi hawyi toꞌe Iesui paꞌi koro pe -Mio tã eweiꞌe mehin e. Taꞌi meiũran ti aru eiwaꞌakasa Miitꞌin Ykeꞌet Tupana po sese kai mekewat poꞌog hesaika rakat po sese kai hawyi tuut atipy kaipyi ywyhig me e.

1 Peteru 1:17

Pyno eipe wyti Tupana sakiꞌytꞌin Tupana saꞌyruꞌin eipe miꞌi pote iꞌewyte Tupana wywuat ihay rakaria wo eipe pote pyno waku eiweꞌeg kahato mesuwarote eiminug saꞌag koꞌi pupi iꞌaparap ehepiat hap koꞌi pupi are. Kat pote meiũran Aiꞌywot Tupana tiꞌatuꞌapiheg kahato yt naku i nug haria sio aitoria hekat rakaria sio yt sio aitoria miitꞌin akag koꞌi sio yt sio aitoria ikuap kahato rakaria sio yt are. Mekewat eꞌat pe Tupana tiꞌatuꞌapiheg miitꞌin iꞌatuminug saꞌag upi. Toimoherep yne aiminug saꞌag koꞌi. Yt toimotypot hin i aiminug saꞌag miitꞌin akag aito pykai. Miꞌi pote ti waku aiweꞌeg wo kahato ahepiat iꞌaparap hap pupi are.

Iruka 22:69

Miꞌi hawyi Iesui tuwemoherep tehay wo uwe sese toineꞌen hap mio tã e -Uito araꞌapyk aru Tupana Koro po sese kai araꞌapyk aru Wuatꞌi Miitꞌin Ykeꞌet no e.

Iruka 9:26

Uwe uwe uipupi tuwemoti iꞌewyte uhehay tomuꞌe hap pupi tuwemoti pote ti aru uito miitꞌin ykeꞌet aremoti miꞌiria pupi wy karãpe ariot uhesaika hap hẽtyhot puo uiꞌywot piat uipoꞌoro hap eꞌat pe.

Mateu 13:49

Pyno miꞌi hap ewy ti aru ikahuro raꞌyn hap eꞌat pe Tupana emiitꞌin tõꞌẽ hawyi taꞌatuꞌairo raꞌyn miitꞌin wakuaria iꞌewyte yt nakuaria i.

1 Tesaronika 1:10

Koitywy taꞌatuhekatup taꞌyn Aikaꞌiwat Iesui Tupana Saꞌyru iꞌewyte Tupana mihep guꞌuro pywiat mohey haria wo raꞌyn tukupteꞌen iꞌatuꞌe ahepe. Taꞌi saꞌawyꞌi wyti ipyꞌahak kahato Tupana aiminug saꞌag ete. Saꞌawyꞌi wyti aiꞌapiheg hap yn topyhuꞌat ahepe yt kat i Tupana wywo aiwoꞌowese nug hanuat pote saꞌawyꞌi. Maꞌato Ahehakyeraꞌat hat putꞌok e aiꞌapiheg hap u hamuat hawyi Tupana aihep taꞌyn aiꞌapiheg hap kaipyi. Miꞌi hawyi iraniaꞌin yt kat iꞌatuꞌe kuap i raꞌyn ahete katupono -Waku eipe e yn naꞌyn ahepe. Miꞌi hap areꞌe ehepe Iesui mohey haria tawa Tesaronika piaria. Maꞌato yt uito yn i katupono torannia mesuwat yi tote waku iꞌatuꞌe ehepe. Yt kat areꞌe kuap i raꞌyn miitꞌin me eimohey kahato hap etiat uruewyry tipytpe katupono taꞌatukuap yne raꞌyn ehepiat imohey waku kahato hap. Miꞌi tupono urutuwehum kahato ehepiat imohey hap ete uruto Pauruꞌin.

1 Tesaronika 4:16

Pyno Aikaꞌiwat sese ti aru taꞌapyk atipy kaipyi miꞌi hawyi atipy piaria esurara akag ti aru ihay pirik kahato. Miꞌi turan ti aru hu huꞌe akuara wato pyi mekewat huut hap enoi hamo. Miꞌi turan ti aru mekewat Iesui mohey haria ikuꞌuro rakaria Tupana tiꞌatuporenoꞌẽ yne yne aiꞌam hap eꞌyian mete.

Mateu 13:41

Pyno ti aru Ihainia Saꞌyru tipoꞌoro ti aru temiitꞌin atipy piaria iꞌatunug hamo hawyi ti aru toipuruk taꞌyn yt nakuaria i yt naku i nug haria iꞌewyte kat koꞌi kat koꞌi saꞌag nug haria.

1 Kuriniu 8:8

Maꞌato yt aimiꞌu kaipyi i aimohun hap topyhuꞌat e Iesui. Yt watuꞌu i pote waku watopyhuꞌat Tupana wanetup hawe. Watuꞌu teran mote waku Tupana wanetup hawe. Tupana yt tuwehum i aheko miꞌu u hap kape. Yt aiꞌapiheg hin i sio watuꞌu sio yt. Watuwehum Tupana kape aimiꞌu watuꞌu turan mote waku pe watoineꞌen Tupana wanetup hawe.

Mateu 8:20

Maꞌato Iesui tiwesat -Pyno ereto teran uhupi pote waku saꞌawyꞌi erewanetup kahato katupono ti Awahuru koꞌi ti tukupteꞌen taꞌatukaꞌa puo iꞌewyte weitaria ti tukupteꞌen taꞌatusok puo maꞌato Uito Miitꞌin Ykeꞌet pykai yt kat i uiꞌyat uiwemohy hamuat.

Iuwãu 21:22

Miꞌi hawyi toiwesat -Kat aru aiꞌokpe kawiat tunug yt ereꞌe teiꞌo. Atikyꞌesat ahaipe piat toineꞌen motꞌi teran mesuwarote pote taꞌi toineꞌen motꞌi kuap karamuo uiꞌaipok hap kape hap ewy atikyꞌesat pote atunug kuap i e Iesui Peteru pe uhepiat.

Iuwãu 21:23

Mio tã e Iesui pote iraniaꞌin Iesui mohey haria teꞌeroꞌe toꞌope -Pyno ti sio yt ikuꞌuro rakat nuat i meiẽwat ipotmuꞌe iꞌatuꞌe uhepiat maꞌato Iesui yt mio tã e pykai i mio tã iꞌatuꞌe. Maꞌato kat som hap ete Iesui henoi neꞌi -Atikyꞌesat pote ten toineꞌen uiꞌaipok hap kape atunug kuap e. Maꞌato yt erewanetup teiꞌo aikotã hap atunug kuap hap ete e Simau me.

1 Kuriniu 3:13

Karãpe putꞌok e Aipotypot Iesui hawyi toimoherep aru wuatꞌi miitꞌin me iꞌatuminug sio waku sio yt hap. Sio watunug iheg nakat sio yt e. Tohãꞌãg yne aiminug koꞌi mekewat eꞌat pe sio iheg nakat nu ewy sio ariaꞌyp kawiat neꞌi hap kuap hamo.

1 Kuriniu 15:23

Nimo te ti Aikaꞌiwat Iesui tuwẽtem guꞌuro pyi wuatꞌi miitꞌin eꞌyian mete. Meiũran aito imohey haria hewatꞌypmo watuwẽtem iwywo e. Karãpe Iesui tuut turan watoineꞌen hewatꞌypmo.

Korosi 3:25

Aiminug waku pote haꞌup toineꞌen Tupana miium muat. Maꞌato waku aiweꞌeg wo katupono aiminug saꞌag saꞌup iꞌewyte Tupana tum. Waku aiweꞌeg wo katupono Tupana tikyꞌe kahato torannia aitoria toꞌoewyꞌewy. Yt naku i watunug mote aiꞌapiheg sio aito miitꞌin akag sio aito miitꞌin mimotypot sio aito yt uwe mikuap i e. Miꞌi pote toꞌoewyꞌewy toiꞌatuꞌapiheg yt naku i nug tipyt. Wẽtup eꞌat pe ti aru toimoherep wuatꞌi pe aiminug saꞌag koꞌi yt heremo i rakat koꞌi -Waku kahato eipe torannia iraniaꞌin toꞌe ahepiat pykai toiꞌatuꞌapiheg yt naku i nug haria.

Tiaku 5:7

Uiwyriaꞌin waku aiperupꞌi poꞌog poꞌog watoineꞌen Iesui ekatup haype miitꞌin aimoweukaꞌi pykai. Aikotã aikopiat aimikoi wahekatup hepama hap ewy. Saꞌawyꞌi watikoi hawyi iꞌaman hap wahekatup imoẽtyt hamo. Miꞌi hawyi wahekatup i iꞌaman tuereto hap imotag hamo. Perupꞌi popuo wahekatup haat hap kape imoꞌapuhup hamuat kape. Miꞌi hap ewy waku wahekatup Iesui uut hap.

1 Iuwãu 2:28

Uimepytꞌin waku kahato ti aipap Aikaꞌiwat upi. Miꞌi pote ti aru karamuo Aikaꞌiwat taꞌaipok i raꞌyn meikowo miꞌi hawyi yt kat i aiwemoti hap toineꞌen ipupiat hap. Yt watuwemig hin i ipupi maꞌato watuwehum yn huut turan. Yt kat i aheha yi kape huut turan. Aipotypot ewywuat hap wahekatup kahato pote yt kat i aiꞌapiheg hap Tupana kaipyi. -Waku yn e ahepe. Miꞌi pote aito iꞌewyte waku pe yn watoineꞌen iꞌewy aito pote.