Iuwãu 1:1 - Sateré-Mawé

¹ Uito Iuwãu ti ahenoi teran Aikaꞌiwat saꞌawyꞌi ieineꞌen hap etiat. Saꞌawyꞌi sese turan mesuwat wuatꞌi nug hap eꞌyian mete ti Aikaꞌiwat Iesui toineꞌen Tupana kai te. Saꞌawyꞌi sese wuatꞌi owakai te Aikaꞌiwat set Tupana Ehay Moherep Hat toineꞌen are. Tupana kai toineꞌen saꞌawyꞌi iꞌewyte Tupana wo toineꞌen mekewat Tupana Ehay Moherep Hat are.

Iuwãu 1:1 Referans Kwoze

Iuwãu 17:5

Miꞌi hawyi eꞌyatype emimotypotno areineꞌen neran aikotã saꞌawyꞌi yian me tewat mesuwat mytyyp nug hap owakai te hap ewy areineꞌen neran e.

Iesui Aru E Hap 19:13

Miꞌi ti araꞌakasa huu ewy kahato yne hesokpe ete. Maꞌato het aipusu puo Tupana Ehay Yne e hap.

Korosi 1:17

Haꞌyru toineꞌen yne iminug koꞌi eꞌyian mete. Wẽtup ok yn naꞌyn topyhuꞌat Tosaꞌyru wywo. Haꞌyru esaika hap wywo toiꞌatumopyhuꞌat yne yne aat waikiru waty yi yne yne. Tosaꞌyru ehay wo toiꞌatumowoꞌosat yne. Toiꞌatumoheg yne Tosaꞌyru ehay wo yne tominug koꞌi.

Iuwãu 1:14

Mekewat Sehay e hap het rakat Iesui aiꞌewywuat tuwemoherep miitno aipiit ewywuat tuwemoherep. Miꞌi hawyi watehaꞌat kuap i hẽtyhot atipy kaipywiat Tupana saꞌyru wẽtup yn kape. Miꞌi hawyi toineꞌen aipyꞌasetpe. Putꞌok e mesuwe hegyiꞌat hap moherep hamo. Miꞌi ti Wakuat Sese toineꞌen. Hãpyk hap yn tuete. Pywuat rakat toineꞌen.

Iesui Aru E Hap 22:13

Yne saꞌawyꞌi watnuat nug hat sese Uito aikotã miwan toineꞌen saꞌawyꞌi pyi ikahuro hap kape aikotã aru toineꞌen hap atunug yne aru iꞌe hap ewy e. Miꞌi hap ewy ahaꞌawynug aikotã woꞌomuꞌe hap ete toineꞌen miwan me saꞌawyꞌi hap ewy atunug aru e. Miꞌi e hap ewy areineꞌen yne eꞌyian mete e. Miꞌi hap ewy areineꞌen yne wyro hamo e. Aikotã miwan toineꞌen moꞌywopo wuat hawyi yt kat i raꞌyn miwan toineꞌen poꞌog kat pote toran hap taꞌyn hap ewy atunug yne raꞌyn Tupana e hap atunug aru e hap ahaipe piat nug hat areineꞌen ne e Iesui ahepe.

Iuwãu 1:2

Mesuwat wuatꞌi nug hap eꞌyian me te mekepe te toineꞌen Tupana kai te Aikaꞌiwat.

Iesui Aru E Hap 1:8

-Taꞌi uito ti rat Iesui e ahepe tuut hawyi. Ahaꞌawynug yne uito hawyi areineꞌen ni hat uito. Uhepiat inug yne hap eꞌyian me areineꞌen ni e. Uimisaꞌawynug saꞌawynug atimoputꞌok yne. Maꞌato wuatꞌi mesuwarotiat eꞌyian me areineꞌen ne wuatꞌi eꞌat pe e. Uito ti rat Eikaꞌiwat Wuatꞌi Esaika Hap Eiam uito e Iesui ahepe.

Wiripu 2:6

Tupana wo toineꞌen Iesui pykai tuwemohit. Saꞌawyꞌi wuat eꞌyian mete toineꞌen Tupana wo. Miꞌi pykai tuwemohit. Tuut ahowawi hawyi yt toꞌe i -Arenug Uito mesuwe Tupana wo yt e i Tupana raꞌyn pykai.

Mateu 1:23

Mio tã e ti Tupana saꞌawyꞌi miitꞌin me. -Meiũran ti aru wẽtup ok haryporia wakuat makuptia te yt heꞌaito i te rakat pykai imepytꞌa rakatno topyhuꞌat hawyi ti aru imepyt ihainia hit. Miꞌi kape ti aru eiwẽpo wat Emanueu katupono Emanueu e wyti Tupana toineꞌen aiwywo e. Topiat yianmiat Tupana ehay enoi hat Isaia tomiwan 7.14 pe e.

Iesui Aru E Hap 21:6

Koitywy atunug i raꞌyn waku pe yne i raꞌyn uiꞌe hap ewy e. Waku pe i raꞌyn uimikyꞌesat ewy atunug e. Pyno haꞌawynug saꞌawyꞌi hat Uito iꞌewyte yne saipepiat nug hat Uito e. Yne wyro hat Uito e. Waku pe yne atunug uimikyꞌesat ewy e Iesui uhepe. Uwe uwe tikuap sese teran Tupana miꞌi hat pe atimoherep Tupana yt kat saꞌup i uhegyiꞌat hap oktan e. Atum tope Uiꞌywot kuap hap e. Aikotã etipuẽti yꞌy hitꞌi ihy kahu rakat ereꞌyꞌutui kahato turan hawyi ereꞌyꞌu yt kat saꞌup ete i hap ewy atum Tupana kuap hap wuatꞌi eꞌat piat eimoieineꞌen hamuat e. Atunug uiꞌe hap ewy e.

Epereu 13:8

Iesui ti Aiꞌakag Akag toineꞌen tuweꞌewy wuatꞌi eꞌat pe. Aikotã saꞌawyꞌi Iesui toineꞌen koitywy iꞌewyte toineꞌen tuweꞌewy te mukiꞌite tuweꞌewy te toineꞌen eꞌihatꞌok tuweꞌewy te wuatꞌi eꞌat pe tuweꞌewy te yn toineꞌen. Tewaku hap ewy yn topyhuꞌat wuatꞌi eꞌat pe.

1 Iuwãu 5:20

Koitywy watikuap kahato Tupana saꞌyruꞌin sakiꞌytꞌin aito hap. Taꞌi watikuap Tupana Saꞌyru hawyi Tupana moherep hat sese topyhuꞌat poꞌog poꞌog mekewat pywuat etiat kuap hamo. Miꞌi tupono mekewat Tupana Mipoꞌoro Aiporekuat nuat hat watikuap hawyi topoꞌoro hat Tupana watikuap iꞌewyte. Saꞌawyꞌi watikuap teran uwe Tupana hap maꞌato yt heremo hin i Tupana ahepe. Maꞌato mesup heremo raꞌyn aheTupana katupono Haꞌyru imoherep ahepe. Tupana Haꞌyru ti Toꞌywot ewywuat wẽtup miit ewy. Karãpe wataꞌakasa Haꞌyru kape pote Iꞌywot kape ti raꞌyn wataꞌakasa wy are. Miꞌi pote mesup -Worokuap kahato En watoꞌe yn Tupana pe. Koitywy uiwyriaꞌin watoineꞌen Tupana pe aikotã Tupana eiam ewy miꞌi pe watopyhuꞌat. Saꞌawyꞌi watomohey Iesui ti Tupana Saꞌyru e hap hawyi Iesui po pe watopyhuꞌat. Ipyꞌa pe kahato watoineꞌen. Aikaꞌiwat yat piaria ewywuaria watopyhuꞌat. Iesui ti Tupana sese miꞌi pote Tupana pe watoineꞌen Iesui pe watoineꞌen pote. Iesui ti wuatꞌi eꞌat piat ieineꞌen hat iꞌewyte aito wuatꞌi eꞌat piat watoineꞌen Iesui wywo wẽtup miit piit ewywuat pote are.

1 Timoteu 3:16

Tupana mienoi Iesui etiat watikuap kahato maꞌato yt karãpe i watikuap yne yne. Tupana yn ikuap sese hat. Miꞌi hawyi ikuap hat sese tuwemoherep taꞌyn ahowawi. Mio tã toꞌe ahepe Iesui etiat -Meiũ ti pywuat sese e. Miꞌi Miit kape atipy piaria teꞌeraꞌakasa yne. Miꞌi ti imoherep taꞌyn kat ywania puo kat ywania puo miꞌi hap tuwemoherep taꞌyn tehay wo. Miꞌi hawyi ti iꞌatu kahato raꞌyn imohey haria mesuwat yi tote. Miꞌi hawyi Tupana tioto i raꞌyn atipy kape i are.

Iuwãu 16:28

Pywo kahato Uiꞌywot kaipywiat Uito ariot raꞌyn miitꞌin kape. Miꞌi rẽ araꞌaipok hamuat i raꞌyn Uiꞌywot kape mesuwat yi totepyi e.

Iesui Aru E Hap 1:17

Araꞌakasa howawi hawyi araꞌat yi tote uhowa yi kape hap ewy ipoityꞌi uhetiat hawyi ipy yatype genꞌẽ pono ikuꞌuro rakat ewy areineꞌen. Miꞌi pote tuweponug uipiit ete topo sese kai haype toꞌe -Uimikyꞌe Iuwãu e yt erekenꞌẽ teiꞌo uipupi e uhepe. Pywo ti rat uito wuatꞌi eꞌyian mete wuat eꞌat piat ieineꞌen hat Uito e iꞌewyte yt kat i raꞌyn topyhuꞌat rẽ mesuwarotiat pykai aru areineꞌen ne Uito e uhepe.

Iuwãu 20:28

-Uikaꞌiwat e koitywy woromohey kahato raꞌyn Uhetupana kahato raꞌyn En e Tume.

Titu 2:13

Miꞌi hawyi Iesui putꞌok e hap eꞌat yn naꞌyn wahekatup Tupana motypot eꞌat sese raꞌyn. Taꞌi Uhetupana iꞌewyte Iesui Ahehakyeraꞌat hat poꞌog wuatꞌi kai putꞌok e irane. Putꞌok e hawyi ikahu hap sese watikuap taꞌyn. Mekewat eꞌat pe ti wahekatup kahato turan tuut.

Epereu 7:3

Maꞌato Mekeseteki uwe iꞌywot kuap hat yt toꞌe i miwan miat pote. Uwe ity kuap hat yt toꞌe i iwan miat pote. Iꞌewyte uwe imepytꞌin kat ywania hap yt uwe i ikuap yt toꞌe i iwan me pote. Sio iꞌywaĩꞌĩ hap toĩ sio yt hap yt watikuap i yt toꞌe i pote. Sio ikuꞌuro sio yt hap yt toꞌe i pote yt watikuap i. Yt uwe i ikuap miꞌi pote wuatꞌi eꞌat piat miit ewy topyhuꞌat morekuat Mekeseteki. Miꞌi pote wuatꞌi eꞌat piat miitꞌin epaꞌi koro ewywuat topyhuꞌat. Miꞌi pote Tupana Saꞌyru ewywuat kahato topyhuꞌat. Miꞌi Ahepaꞌi wuatꞌi eꞌat piat iãꞌãkap kahato.

Iesui Aru E Hap 3:14

Pyno miꞌi hawyi poꞌog toꞌe uhepe -Iuwãu e etiwan no tawa Irautiseia piaria kape e. Uhet Iesui. Taꞌi yt uipo hep hin i pywuat sehay enoi hamuat ete e. Taꞌi saꞌawyꞌi mesuwat mytyyp nug hap eꞌyian mete areineꞌen itote wuatꞌi Tupana Mikyꞌesat Nug Hatno yi atipy aat waty waikiru koꞌi ahaꞌawynug yne Uito e Iesui uhepe.

Ewesu 3:9

Saꞌawyꞌi te wuat migꞌi wuat Tupana mimoherep aikotã toikyꞌesat yne ywania towatnuat hap toimoherep mesup uiwẽ pyi. Tupana ti wuatꞌi wuatꞌi nug hat maꞌato kat hamo ainug saꞌawyꞌi yt tohenoi i. Miꞌi kape miitꞌin saꞌawyꞌi wuat teꞌeruwanetup kahato maꞌato yt taꞌatukuap kuap i. Maꞌato koitywy toimoherep taꞌyn miꞌi e hap ahepe.

Iesui Aru E Hap 1:2

Etimoherep to mesuwat uhehay yne yne uheropat haria pe areꞌe. Mesuwat sehay yne Tupana e hap uhetiat e. Mesuwat uhehay wakuat yne areꞌe yne eimikuap oktan ehewaure kaꞌa mikuap oktan uiꞌe hap. Iꞌewyte aikotã emuꞌetu eraꞌakasa uimimoherep epiat hap ewy topyhuꞌat areꞌe epe uiwy Iuwãu e.

1 Iuwãu 5:7

Toineꞌen myẽꞌym aimuꞌe haria mesuwat yi totiaria pywo Iesui Tupana Mipoꞌoro Eiporekuat nuat e haria.

Humanu 9:5

Urueꞌaseꞌi sese ti mekewat Aparãu e hap het rakat iꞌewyte urueꞌaseꞌiꞌin koꞌi ti mekewat aseꞌi Isaki iꞌewyte mekewat aseꞌi Isareu e hap het rakat. Miꞌiria ti saꞌawyꞌi hewyry kahato Tupana wywuat rakaria. Pywo ti Tupana kuap haria akag koꞌi uruꞌywania saꞌawyꞌi tukupteꞌen. Saꞌawyꞌi iraniaꞌin ywania eiperia Humanu ywania ewywuaria yt tikuap hin i Tupana sese maꞌato miꞌi hap eꞌat pe uruꞌywania tikuap sakpo Tupana sese. Uruꞌywania saipepiat sese Iesui tuwemoherep. Urupiit ewywuat kahato Iesui tuwemoherep. Taꞌi uruꞌywania piit ewywuat kahato Iesui piit toineꞌen. Tupana Mipoꞌoro Aiporekuat nuat ty ti Iuteu kawiat. Miꞌi pote waku watuwehum kahato Tupana ete -Tupana watuwehum kahato ewowi katupono erepuꞌi nug hawyi ereineꞌen kahato aipyꞌasetpe Aiꞌakag wo. Watomotypot En ni wuatꞌi eꞌat pe. Waku raꞌyn waku raꞌyn waku watoꞌe Tupana pe.

Iuwãu 1:18

Taꞌi yt karamuo i ti miitꞌin teꞌeraꞌakasa kuap Tupana sese kape. Maꞌato Tupana Saꞌyru taꞌakasa kahato Tupana kape. Haꞌyru ti putꞌok e hawyi Tupana moherep ahepiat hamo toineꞌen. Katupono miꞌi toꞌywot yatypepywiat suut hat e.

Iesui Aru E Hap 2:8

Miꞌi hawyi toꞌe i raꞌyn uhepe mekewat 7 waikiru ipo piat rakat -Iuwãu e wẽtup uhehay etiwan hawyi etipoꞌoro wẽtup Tupana motypot yat piaria kape e. Etipoꞌoro uhehay iꞌatuꞌapykok hat kape. Uimohey haria tawa Simina piaria kape e. Mio tã etiwan -Tawa Simina piaria uimohey haria Uito ti areineꞌen wuatꞌi eꞌyian miat ieineꞌen hat e. Iꞌewyte areineꞌen aru yi waikiru koꞌi kahuro pykai hap eꞌat e. Mesuwe saꞌawyꞌi uikuꞌuro maꞌato mesup areineꞌen i raꞌyn e.

2 Peteru 1:1

Uito ti Peteru Aipotypot Iesui eropat hat sese uito. Uito Iesui mipoꞌoro miitꞌin muꞌe hanuat ihay moherep hat uito. Uito ti 12 ok hap Iesui emiit uito. Iꞌewyte imohey haria napin hat uito. Aimimohey ikahu rakat moherep hat uito. Hekat kahato rakaria ewywuaria watukupteꞌen katupono imohey hap saꞌup iwato kahato hap ewy topyhuꞌat imohey hap kaipyi. -Uhaꞌyru mohey haria ti eipe uiwanetup hawe uipyꞌa pe e Tupana ahepe. Miꞌi pote atum yne wakuat ehepe e Tupana.

Iesui Aru E Hap 1:11

-Uito ti yne saꞌawynug hat maꞌato uhepiat inug hap yian mete areineꞌen wuatꞌi eꞌat pe e. Uiminug koꞌi yne ikahuro hap sakpo areineꞌen ne wuatꞌi eꞌat pe e uhepe. Miꞌi hawyi toꞌe i uhepe -Iuwãu e atomoherep aru epe emiꞌakasa koꞌi emuꞌetu wuat ewywuat koꞌi e. Etiwan o uimimoherep emuꞌetu hap koꞌi e. Miꞌi hawyi emiwan o etipoꞌoro uimohey haria pe 7 Tupana motypot yat kape yi Asia tote. Tawa Ewesu piaria weꞌatunug haria kape. Iꞌewyte Tupana motypot yat tawa Simina piaria waꞌatunug haria kape etipoꞌoro uiꞌe hap emiwan. Iꞌewyte Tupana motypot yat tawa Pekamu piaria weꞌatunug haria kape etipoꞌoro emiwan. Iꞌewyte Tupana motypot yat tawa Satu piaria kape etipoꞌoro. Iꞌewyte Tupana motypot yat tawa Tiatira kape etipoꞌoro wy. Iꞌewyte Tupana motypot yat tawa Wiratewia piaria kape etipoꞌoro hawyi Tupana motypot yat Irautiseia piaria kape etipoꞌoro emiwan ipe pewiu tote e Iesui uhepe.

Iruka 24:53

Putꞌok iꞌatuꞌe hawyi teꞌeropyhuꞌat Tupana motypot yat hawe hawyi -Waku kahato En Tupana taꞌatuꞌe itote aat kaꞌap.

Iuwãu 8:58

-Pywo pe ti Uito ti ahaꞌaseꞌi Aparãu ywãꞌĩ hap eꞌyian mete wuat ieineꞌen hat e Iesui.

Korosi 1:15

Tupana sese ti yt heremo i ahowawi. Miꞌi hawyi toipoꞌoro ahowawi Tosaꞌyru wẽtup ok tuwemoherep hamo Aiporekuat nuat. Imipoꞌoro Haꞌyru ti iꞌewywuat sese topyhuꞌat. Iꞌywot yt heremo pykai i maꞌato Haꞌyru wataꞌakasa hawyi watikuap taꞌyn Haꞌyru hawyi watikuap taꞌyn Toꞌywot ewy raꞌyn hap. Miꞌi hawyi yt heremo i rakat heremo raꞌyn. Haꞌyru ti poꞌog naꞌyn torannia iraniaꞌin kai ipotputꞌok e. Torannia Tupana minug kai ipotputꞌok e. Poꞌog naꞌyn yne ieineꞌen haria hewyry rakaria yi totiat atipy piat kai poꞌog Haꞌyru.