Ewesu 4:12 - Sateré-Mawé

¹² Wẽtup ok pe wẽtup ok pe tutum tesaika hap tomisepap koꞌi yt uwe minug kuap i nug hamuat hap tutum e. Pyno yt toꞌoꞌewyꞌewy hin i toimoꞌẽ tesaika hap tomisepap nug hamuat koꞌi tominug kuap hap ewywuat nug hamuat hap koꞌi are. Taꞌi toimoꞌẽ kahato ahepe tomiium koꞌi are. Yt toꞌoꞌewyꞌewy hin i tutum. Ewat emikuap uiat uimikuap Tupana miium koꞌi aimisepap koꞌi yt toꞌoꞌewy hin i are. Tomohey haria moweꞌeg hamo tutum tesaika hap ahepe topotpap nug kuap hamo tutum e. Tupana tikyꞌesat kahato aito tomipoꞌoro koꞌi Tosaꞌyru Iesui ewywuat e. Miꞌi pote aimoesaika Tosaꞌyru Paꞌãu wo topotpap nug hamuat.

Ewesu 4:12 Referans Kwoze

Ewesu 4:16

Saꞌawyꞌi aito wuꞌuka yne ywania wywuat haria aito wuatꞌi ewanikaptia wo watukupteꞌen. Pya kahato watukupteꞌen Tupana kai aito torannia. Aipiit ete ipoityꞌi ahaga koꞌi maꞌato wẽtup piit yn watoineꞌen aito wẽtup piit yn aito. Yt tuweran hin i maꞌato ahaga koꞌi. Toꞌosat kahato ahaga koꞌi. Miꞌi hawyi aipiit iheg aipiit wẽtup yn. Aipuꞌi aikag koꞌi ahaga toꞌosat toꞌoete kahato. Karãpe watunug Aiꞌakag Iesui mikyꞌesat ewy hawyi watopyhuꞌat aikotã haga koꞌi ewy ipiit ewy. Miꞌi hawyi wahewyry aikotã ihãite rakat ewy. Karãpe aito Iesui mohey haria watoꞌokyꞌe yne yne aiwoꞌope miꞌi hawyi watoꞌopowyro miꞌi hawyi watopyhuꞌat aito Iesui piit ihãite rakat ewy.

1 Kuriniu 12:27

Maꞌato ti hãꞌãkap wuo ahenoi ahaga koꞌi etiat Iesui piit etiat. Pyno aito Iesui piit aga koꞌi ewy Iesui mohey haria aito pote.

Humanu 15:14

Uiwanetup hawe waku kahato ti eiperia tawa Huma piaria. Uiwyriaꞌin uheinytꞌin kahato eiperia Iesui mohey haria eweikupteꞌen mote Aiꞌywot Tupana Wakuat eiam kahato eiperia. Taꞌi Tupana kuap hamo eipytꞌat ehehowapy kahato miꞌi pote worohoꞌomohey kahato eipe. Waku eweikupteꞌen eiwoꞌomuꞌe muꞌe hanuaria wo eimikuap Tupana etiat wo. Taꞌi waku kahato worohoꞌopuẽti eiperia wuatꞌi miitꞌin muꞌe hamuat.

1 Kuriniu 14:26

Uiwyriaꞌin uheinytꞌin koitywy worohoꞌomuꞌe teran aikotã aikotã waku watimotypot Tupana aiwoꞌoꞌatunug hap ete. Waku ikahu kahato watimotypot Tupana. Waku pe yn waku ahehay itote. Waku watikat Tupana mohey hat wẽtup ok aimuꞌe kahato hat itotiat Tupana motypot wepy hap ete. Miꞌi hawyi waku wẽtup ok aimuꞌe itote Tupana ehay miwan myi. Miꞌi hawyi wẽtup ok itote ihay kahato Tupana wẽ ewy Tupana ainapin hap sese moherep hamo Tupana toꞌe hap ewy. Miꞌi hawyi waku wẽtup ok aimuꞌe Tupana pusu puo sio toineꞌen itote wẽtup ok atipy piaria pusu kuap hat imoherep ahepe aipusu puo kat e kat e hap koꞌi ete. Miꞌi pote aimoesaika kahato Tupana mohey hap ete Tupana pusu puat. Atipy piaria pusu puo ihay rakat waku wẽtup ok yn hawyi waku wẽtup ok imoherep hat ihay iwywo kat toꞌe kat toꞌe e hap wuatꞌi pusu puo.

Humanu 14:19

Miꞌi pote waku watikat kahato muap aiwoꞌowese hap nug hamo. Waku watopyhuꞌat woꞌowese haria wo. Waku watikat kahato muap aiwoꞌomopoĩꞌam hamuat are. Waku watikat muap aiwoꞌope aiwoꞌomoesaika Iesui ehay wo imohey poꞌog hamuat hap ete.

1 Timoteu 1:12

Pyno uiwepiit kahato arehum kahato Aikaꞌiwat Iesui ete Wuatꞌi Porekuat ete katupono Miꞌi hum tesaika hap uhepe tehay moherep hamuat. Arehum kahato tuwete katupono uiꞌairo teꞌeropat hat miitꞌin muꞌe hamuat.

1 Kuriniu 14:12

Pyno waku wahẽtup Tupana pe haty wo -Etum no uhepe esaika hap emisepap ewywuat nug hamuat waku watoꞌe Tupana Paꞌãu me. Miꞌi ewetunug mote tutum ehepe hawyi waku Tupana misepap ewywuat hap wywo watuwepotpap kahato. Waku watikat muap aiwyriaꞌin Iesui mohey haria iꞌatuepiat imohey hap moesaika hamo.

Epereu 13:17

Waku watuwat Iesui mohey haria akagnia ehay upi aiꞌapykok haria upi. Katupono miꞌiria tikyꞌesat kahato ahehãite kahato Iesui mohey hap etiat hap. Waku watunug iꞌatumikyꞌesat ewy katupono miꞌiria hẽtup kahato Tupana kape ahupi. Miꞌi watunug mote iꞌatumowepiit hap topyhuꞌat aiwoꞌowese hap wywo. Maꞌato yt pote haty iꞌatuete hap wywo teꞌeropyhuꞌat. Miꞌi hawyi yt aiweꞌeg i hap taꞌatuhenoi raꞌyn Tupana pe hawyi aiꞌapiheg hap topyhuꞌat Tupana kaipyi. Eiweꞌeg wo o. Miꞌi hawyi aheineꞌen hap mesuwe poꞌog saꞌag topyhuꞌat yt watunug i raꞌyn iꞌatuehay upiat hawyi. Maꞌato watunug iꞌatuehay upi pote poꞌog ihãite rakaria wo watopyhuꞌat. Miꞌi hawyi iꞌewyte aiweꞌeg hap taꞌatuhenoi raꞌyn Tupana pe hawyi aipoityro aimowepiit hamo watopyhuꞌat.

Epereu 6:1

Saꞌawyꞌi kurin kurin watikuap Aipotypot Iesui etiat. Kurin kurin watikuap ihay etiat. Iꞌewyte saꞌawyꞌi aipotmuꞌeria Iuteuria aimuꞌe kurin kurin Tupana Mipoꞌoro Aiporekuat nuat ete. Miꞌi koꞌi toineꞌen ne aiwanetup hawe. Waku miꞌi koꞌi wen maꞌato poꞌog waku watikuap yne yne Iesui e hap yne yne iminug koꞌi e. Waku watuwemotag ikuap hap ete. Yt naku i watopyhuꞌat mekewat aimikuap hit hap ewy yn. Saꞌawyꞌi -Ewetoiat ro eiminug saꞌag koꞌi hawyi ewetomohey ro Tupana iꞌatuꞌe ahepe hawyi iꞌatuehay upi watuwat.

2 Kuriniu 6:3

Koitywy Aikaꞌiwat ehay moherep haria raꞌyn aito. Miꞌi pote waku aiweꞌeg wo kahato watoineꞌen. Kat pote karãpe watiꞌaparap pote miitꞌin teꞌeruwekyryꞌi kahato Aikaꞌiwat Iesui ete iꞌewyte ahete. Miꞌi hawyi yt uwe i tuwanetup teran ahehay kape.

2 Kuriniu 5:18

Pyno yne yne ipakup taꞌyn katupono Tupana aimopakup i raꞌyn. Aiwoꞌowyꞌinug Tupana wywuat hat Aikaꞌiwat Iesui. Aikaꞌiwat ewywuat koitywy watoineꞌen. Watoꞌowyꞌinug naꞌyn ahehay wo.

Iruka 22:32

Pyno ahẽtup kahato Uiꞌywot pe emoesaika hamo. Miꞌi hawyi karapeĩ eraꞌaipok uhowowi i raꞌyn aru miꞌi hawyi etiꞌatumoesaika o ewyriaꞌin uimohey haria iꞌatuiãꞌãg hap turan e Iesui Peteru pe.

2 Timoteu 4:5

Maꞌato en Timoteu eweꞌeg wo o mio tã iꞌatuꞌe hap kai. Yt eremoehamanaꞌi teiꞌo maꞌato Tupana ehay pywuat sese po pe ereineꞌen o. Epiat hoꞌopot pykai yt ewẽpohep teiꞌo. Maꞌato en worokyꞌesat wuatꞌi puat Tupana ehay wakuat sytpok hamo. Etimoehãite yne o epotpap Tupana miium epiat uhaꞌyru.

Korosi 4:17

Miꞌi hawyi atipoꞌoro i sehay uhyt Akipu kape. Pyno koitywy atoiat eipo pe raꞌyn Aikaꞌiwat potpap koꞌi. Miꞌi hap ti koitywy tutum eipo pe raꞌyn. Pyno koitywy eweꞌeg wo o. Eweimoma o ipotpap hap imikyꞌesat oktan are.

Korosi 1:28

Miꞌi tupono koitywy wuatꞌi ywania pe -Ewetunug no Iesui Eiporekuat no urutoꞌe wuatꞌi miitꞌin me. Eiweꞌeg wo o watoꞌe. Eweikuap o mesuwat sehay wakuat watoꞌe wuatꞌi pe. Miꞌi hawyi yne Tupana esaika hap wywo waku watoineꞌen weꞌeg haria wo iraniaꞌin pyꞌasetpe katupono watikyꞌesat kahato miꞌiria yne yne Tupana wywuat ieineꞌen haria wo. Watekyi teran kahato miitꞌin aiweꞌeg hap wywo Tupana kape. Watikyꞌesat miꞌiria Tupana kuap haria. Watikyꞌesat miꞌiria Haꞌyru mohey sese haria. Watikyꞌesat miꞌiria wẽtup wanetup hap ewy yn Aipotypot Iesui wywo.

Korosi 1:24

Koitywy hoꞌopot hat ewy areineꞌen mesuwe. Uipiit satyꞌi kahato areineꞌen katupono woꞌopyhik hawe areineꞌen hatek takat ewy. Miꞌi pykai uiwepiit yn katupono eikawiatno ahoꞌopot. Saꞌawyꞌi Aipotypot Iesui hoꞌopot kahato aikawiatno tomohey haria etiatno. Koitywy watoineꞌen wẽtup mepyt sok ewy Iesui upi katupono tohoꞌopot aikawiatno. Miꞌi hap ewy kahato ahoꞌopot Iesui mohey haria kawiatno.

Ewesu 1:23

Pyno yne aito Iesui mohey haria watopyhuꞌat Iesui wywo wẽtup piit ewy yn. Iwywo watoineꞌen wẽtup ok miit ewy. Iesui piit no watoineꞌen mesup mesuwat yi tote are. Atipy pe iꞌewyte watoineꞌen iraniaꞌin imohey haria wẽtup piit ewy yn watoineꞌen aito. Imohey haria ipiit ewywuat watopyhuꞌat. Aikope Aikope Atipy pe mesuwat yi tote yne tote Aipotypot Iesui toineꞌen Morekuat Koro wo.

2 Kuriniu 12:19

Yt karãpe i eipyꞌasetpe urutukupteꞌen turan paa urutoꞌe -Watiꞌatumaꞌat miꞌiria yt urutoꞌe i. Yt urueso i rat iꞌewyte Tupana tikuap yt urueso i hap. Iꞌewyte Aikaꞌiwat Iesui tikuap yt urueso i hap. Katupono yne uruminug koꞌi eimoesaika imohey hap etiat hamo. Miꞌi pote yt urueso i.

2 Kuriniu 7:1

Eiꞌywot areineꞌen e Tupana ahepe. Worohoꞌomuꞌe eipe uimepytꞌin wo aheTupana Koro e. Miꞌi pote uimikyꞌe koꞌi eweipyhuꞌat e Tupana ahepe. Pyno waku watuwehik kahato Tupana ete imepytꞌin aito pote. Waku watimotypot kahato Aiꞌywot Koro yt kat i aiminug saꞌag wywo. Waku watokenꞌẽ ahepiat inug saꞌag hap pupi kat pote Tupana ehamo watoineꞌen pote. Yt naku i watuwat aipiit mikyꞌesat saꞌag upi neꞌi iꞌewyte aiwanetup saꞌag hap upi neꞌi. Yt naku i watuwanetup poꞌog ahetupanaria saꞌawyꞌi wuat kape neꞌi. Waku watoꞌe Tupana pe -Uiminug saꞌag koꞌi aikotã uipiit ipit pit sese hap ewy. Miꞌi hap ewy uiwanetup hap ipit pit kahato. Uipiit pit ok hap pote aremoti kahato uiminug saꞌag pupi waku watoꞌe Tupana pe.

2 Kuriniu 4:1

Miꞌi pote watiꞌatumuꞌe kahato wuatꞌi ywania sehay wakuat Iesui etiat. Katupono Tupana Paꞌãu hegyiꞌat hap kaipyi aiꞌairo towẽ wo. Yt ahewaku hap kaipyi i aiꞌairo miꞌi nug hamo. Ahehakyꞌeꞌi pote aikyꞌe. Miꞌi pote aiꞌairo tehay sytpok hamo. Miꞌi pote yt karãpe i waure watoꞌe ihay sytpok hap ete. Tupana Paꞌãu aimoesaika miꞌi nug hamo.

2 Kuriniu 3:8

Koitywy Tupana Paꞌãu toꞌe ehepe -Eweimohey Uhaꞌyru pote worohoꞌoehakyeraꞌat e. Miꞌi e hap poꞌog ikahu saꞌawyꞌi wuat nu totiat hap kai.

1 Kuriniu 14:14

Karãpe ahehay Tupana wywo ipusu puo yt aiwanetup hap kaipyi i ahehay maꞌato aipyꞌa pyi ahehay tuwẽtem Tupana Paꞌãu ihay hap ewy. Aipyꞌa ihay haty wo sese Tupana wywo pote ahehay pywo pe.

Humanu 15:29

Putꞌok are eipyꞌasetpiat hawyi atikyꞌesat kahato Aikaꞌiwat Iesui aipoityro kahato hap. Atikuap taꞌyn uipyꞌa pe meiũran wuatꞌi aiꞌatupoityro itotiat hamuat tegyiꞌat hap wato hap oktan hawyi waku kahato raꞌyn.

Humanu 15:2

Poꞌog waku iraniaꞌin Iesui mohey haria mowepiit hatno watopyhuꞌat. Waku watikat iraniaꞌin Iesui mohey haria waku piat hap are. Waku watiꞌatumotag neran Iesui mohey hap ete iraniaꞌin.

Humanu 12:7

Maꞌato tutum ahepe tesaika hap teropat hap miitꞌin powyro hamo pote waku watuwepotpap kahato heropat nug hap ete. Maꞌato tutum ahepe miitꞌin muꞌe kuap hap miꞌi pote waku watiꞌatumuꞌe miitꞌin hesaika hap wywo.

Iesui Potmuꞌeria 20:28

Pyno eiweꞌeg wo o. Eweiꞌapykok Tupana hũria Tupana Paꞌãu miium eipo puat koꞌi. Eweiꞌatupoi o Tupana hũria Iesui mikyiꞌat tosuu wuat koꞌi ihay wo Tupana emiitꞌin e.

Iesui Potmuꞌeria 20:24

Maꞌato yt arekenꞌẽ hin i uikuꞌuro hap pupi katupono atunug yne teran kat kat som motpap Aikaꞌiwat Iesui miium uhepiat uipoꞌoro hap koꞌi. Miꞌi ti tutum sehay wakuap aikyꞌe Tupana piat hap uimienoi wuat. Miꞌi pote ti atunug yne teran e Pauru.

Iesui Potmuꞌeria 11:23

Putꞌok toꞌe hawyi iwepiit kahato topyhuꞌat -Taꞌi Tupana tiꞌatukyꞌe kahato mesuwat ywania aikotã toiꞌatukyꞌe uruꞌywania hap ewy kahato e Panape tuwepe -Taꞌi tutum neꞌen neꞌi Topaꞌãu mesuwat wẽtup ywania pe aikotã tutum uruꞌywania piat pe hap ewy te e toꞌywania Iuteu pe. Miꞌi hawyi toꞌe Tupana pe haty wo -Waku kahato ti rat En Tupana e. Pywo ti rat yt uwe i poꞌog hegyiꞌat rakat ekai Tupana e Panape. Miꞌi hawyi Panape topyhuꞌat potꞌi tawa Antiokia pe hawyi toiꞌatunapin kahato Iesui mohey haria ipakup takaria -Mehinꞌin manaꞌin e eweimohey ro eikuꞌuro hap kape Aipotypot Iesui eipyꞌa pe e. Yt eiwemoti teiꞌo Aikaꞌiwat ehay pupi e Kereku pusu kuap haria pe.

Iesui Potmuꞌeria 9:31

Miꞌi hawyi Iesui mohey haria waku pe i raꞌyn tukupteꞌen tawa Iuteia Karireia hawyi Samaria pe katupono iꞌatusatyꞌi satyꞌi haria iꞌatuꞌuka teran haria iꞌatupohep porapꞌi pote. Waku iꞌatuꞌe toꞌope. Miꞌi hawyi teꞌeruwemoesaika kahato raꞌyn Iesui mohey hawe. Iꞌatuwepiit raꞌyn. Miꞌi hawyi yt uwe pupi i teꞌerokenꞌẽ.

Iesui Potmuꞌeria 1:25

Katupono yt uwe i Iuta potpap nug hat mesup iꞌatuꞌe. Toto raꞌyn Iuta teiam aria woꞌomosoꞌopot hap kape iꞌatuꞌe. Pyno waku etiꞌairo wẽtup ok Iuta saipepiatnuat sio Iuse sio Matia iꞌatuꞌe Tupana pe.

Iesui Potmuꞌeria 1:17

Gaꞌatpo Iuta wywo watoineꞌen 12 ok te. Taꞌi ipotpap kahato miꞌi aiwywo e.

2 Timoteu 4:11

Maꞌato aiwy Iruka yn ti topyhuꞌat uiwywo. Timoteu atikyꞌesat etikat o aiwy Maku miꞌi hawyi eterut ewywo eꞌuut turan katupono miꞌi waku raꞌyn aipowyro aipotpap etiat hamo.

Ewesu 4:29

Waku ahehay hẽꞌẽ rakat ewy are. Waku iwese kahato rakat ewy watoineꞌen. Waku iraniaꞌin mowepiit ahehay kuap hanuaria watikuap are. Miꞌi tã watunug mote pywo iꞌatuꞌe hamo ahehay kuap haria. Miꞌi hawyi ahehay kuap haria poityro hat ewy watopyhuꞌat. Yt naku i watopotkuasa ahehay wo. Yt naku i watipoepyk ahehay wo are.

Ewesu 4:4

Katupono aito Aikaꞌiwat piit aga koꞌi ewywuat are. Iꞌewyte aipaꞌãu Tupana miium Aikaꞌiwat Iesui watnuat e. Miꞌi pote aito imohey haria wẽtup paꞌãu wẽtup piit ewywuat watopyhuꞌat mesuwe aito imohey haria. Aito ti wẽtup piit imohey haria aito pote aiwoꞌoꞌewy ewy katupono Iesui wywo watukupteꞌen. -Mukiꞌite ti aru watoineꞌen wuatꞌi eꞌat pe e haria sok aito watoꞌe.

2 Kuriniu 13:9

Uruikyꞌesat kahato eweikupteꞌen waku rakaria Tupana ewywuaria wo hap. Urumowepiit kahato karãpe eweikupteꞌen hesaika kahato rakaria wo imohey hap ete. Miꞌi hawyi poꞌog urunapin haria ewy. Miꞌi hap eꞌat pe urumowepiit kahato.

1 Kuriniu 12:7

Tupana Paꞌãu toineꞌen aipiit pe. Miꞌi hawyi aiwoꞌope aiwoꞌopoityro hap ahewaku hap toineꞌen.

Humanu 12:5

Miꞌi hap ewy kahato Iesui mohey haria koꞌi. Iꞌatu kahato aitoria yt aiwoꞌoꞌewy i maꞌato wẽtup piit ewywuat yn watopyhuꞌat. Iesui Tupana Mipoꞌoro Aiporekuat nuat piit ewywuat watopyhuꞌat mesuwe aikotã aipiit ahaga wywo toꞌosat toꞌosat hap yt toꞌoꞌewy hin i pykai. Miꞌi hap ewy watoꞌosat kahato Iesui mohey haria koꞌi Iesui piit ewy wẽtup piit ewy watoineꞌen.

2 Kuriniu 13:11

Uiwyriaꞌin uhekatuwyria kuekatu atipoꞌoro ehewowi. Toran naꞌyn uimiwan mesuwe. Waku pe eweikupteꞌen. Yt kat i iꞌaparap ehepiat hap eheineꞌen hap ete hap wywo eweikupteꞌen. Wẽtup ok miit ewywuat eweikupteꞌen imohey hap ete. Eiwoꞌomowepiit ro eiwoꞌopowyro hap ete woꞌowese hap ete. Miꞌi ewy ewetunug pote eiwepiit kahato katupono Tupana wuatꞌi kyꞌe hat toineꞌen eipyꞌasetpe eimowepiit sese hamo.