Are paĩ Tupana tikyꞌesat kahato watunug tomikyꞌesat ewywuat hap. Miꞌi pote ainapin aat kaꞌap aiwanetup hawe kat som kat som waku watunug hap. Karãpe aiwẽ pyi yt watunug neran i imikyꞌesat koꞌi miꞌi hawyi perupꞌi popuo aimuꞌe aiwanetup hawe -Etunug o etunug o e. Miꞌi hawyi meiũran -Waku Uhyt waku Mimi watoꞌe Tupana pe katupono toikyꞌesat kahato tehay upiat watuwat hap.
Ewesu 2:10 - Sateré-Mawé10 Saꞌawyꞌi Tupana topo wo ainug. Koitywy Haꞌyru mohey haria watopyhuꞌat wẽtup ywania ewy yn naꞌyn watopyhuꞌat. Ainug hap eꞌyian mete Tupana toꞌe -Meiũran aru atipowyro kahato uimikyꞌesat nug neran haria e. Wakuaria sok ewy aru atunug miꞌiria e saꞌawyꞌi tuwepe. Gade chapit la |
Ewesu 2:10
58 Referans Kwoze
-Tupana uruikyꞌesat kahato tawa Korosi piaria Epaꞌãu eiam kahato wo eweꞌeg hamo iꞌewyte emikyꞌesat nug kuap hap urutoꞌe mesuwe uruhẽtup. Uruikyꞌesat miꞌiria aikotã iꞌyp iꞌywa kahato rakat ewy hewo hewo kahato hap ewy wyti uruikyꞌesat kahato miꞌiria Tupana urutoꞌe. Pyno uruikyꞌesat miꞌiria wakuap yn nug haria En ewy hap uruikyꞌesat. Iꞌewyte uruikyꞌesat ekuap hap ihatꞌok ewy ewy putꞌok e Esaꞌyru mohey haria ete urutoꞌe uruhẽtup Tupana pe.
-Tupana etiꞌatumohãpyk aiwyriaꞌin wakuap nug haria are. Etunug miꞌiria Esaꞌyru mikyꞌesat ewy waku nug haria wo are. Etunug miꞌiria Esaꞌyru mohey hap etiat itag nakaria wo are. Atikyꞌesat etum iꞌatuepe esaika hap wakuap nug hamuat are. Atikyꞌesat iꞌatuminug emowepiit hap yne hawyi eha mowepiit hap topyhuꞌat are. Tupana uito ti emipoꞌoro Esaꞌyru mohey kahato hat. Esaꞌyru wywo ahẽtup mesup ewowi are. Atikyꞌesat Esaꞌyru mowato mesuwat yi totiat wuatꞌi eꞌat piat hap atikyꞌesat Tupana. Tupana waku kahato En aat kaꞌap are. Etiꞌatukawiatno meiũpepyi uiwyriaꞌin Iuteu ywania are. Iesui set upi ahẽtup Toran naꞌyn uiꞌe hap are.
Tupana hegyiꞌat sese ahepe. Tutum kuap ahepe poꞌog poꞌog watuwanetup hap kai aipoityro kuap kahato aikyꞌe haype. Yt ahewaku hap upi i tutum neꞌen neꞌi maꞌato aikyꞌe hap yn wywo. Miꞌi pote karãpe watunug neran wakuap imikyꞌesat turan aimoesaika kahato inug hamuat poꞌog poꞌog watunug kuap kai. Tupana tikuap kahato ahepiat kat sepap hap kuap hamuat aimoweꞌeg hamo. Tutum kuap poꞌog ahepiat hum hap tepiat hap kai.
Aikotã watopag ahesokpe aipiit pe ipakup takat hawyi aikahu hap ewy raꞌyn topyhuꞌat. Miꞌi hap ewy waku watopag ahete Tupana aimokahu hap ewywuat aipainug hap ewywuat. Tupana wanetup hap ewy waku watopag aiwanetup hawe. Tupana wanetup hap watopag aiwanetup hawe hawyi ipakup takaria ewywuat sokpe pakup we ahewyry hap ewy Tupana wanetup hawe. Waku watuwepainug Tupana ehay wo. Waku watunug yne Tupana tunug hãpyk hap ewy. Waku yt kat hin i miitꞌin maꞌat hap aikai. Waku hãpyk Tupana ewy wahewyry mesuwarotiaria pyꞌasetpe. Miꞌi watunug mote watopag ahesokpe pakup ewywuaria aipainug hap ewy watopyhuꞌat hap yt aipuꞌi ete i maꞌato aipyꞌa pe aipainug kahato hap toineꞌen hap ewy.
Saꞌawyꞌi watomohey Iesui hawyi Tupana miehakyeraꞌat hanuaria watopyhuꞌat. Tohaꞌawynug ahehakyeraꞌat hap hawyi yt aiꞌatoiat hin i e. Yne eꞌat pe haꞌawytepyi mesup te mukiꞌite ahehakyeraꞌat kuap hat Iesui topyhuꞌat. Poꞌog poꞌog yne eꞌat pe aimoesaika kahato tewaku hap nug hamo. Ahehakyeraꞌat kahato haꞌawyte mesup te Haꞌyru taꞌaipok Aipotypot no hap kape mesuwat yi kape taꞌaipok hap kape ahehakyeraꞌat hamuat wuatꞌi eꞌat piat hap kape. Yt uheso hin i are. Topyhuꞌat kahato aipyꞌa pe Iesui wuatꞌi eꞌat pe. Ipotpap kahato aiwanetup hawe aimoewaku kahato hamo. Yne eꞌat pe miꞌi hap koꞌi wyti waku watomohey e.
-Uimimuꞌeria tawa Ewesu piaria mesup uito Pauru areineꞌen meiũpe woꞌopyhik hawe. Wanikaptia uipyhyp taꞌyn Aikaꞌiwat potpap nug hap pyhyp hamo uipyhik wen maꞌato miꞌi pykai worohoꞌomuꞌe te uimiwan myi uiwyriaꞌin. Saꞌawyꞌi Tupana aiꞌairo temiitꞌin no tomotypot hamo. Miꞌi pote areꞌe ehepe -Toꞌiro watimotypot Aiꞌairo hat haty wo are. Aikotã aimepytꞌin hãpyk takaria ewy aimowepiit taꞌatupotpap wakuat nug hap ete aimikyꞌesat nug hap ete miꞌi hap ewy waku watimowepiit Aiꞌywot atipy piat wakuat nug hap kaipyi.
Ahehakyeraꞌat hat Iesui ikuꞌuro raꞌyn ariaꞌyp posak ete aikawiatno. Yne yt nakuap i nug saꞌag po pyi aihep hamo ikuꞌuro. Tupana watnuaria wo ainug neran pote wakuaria wo aito hap toikyꞌesat. Miꞌi pote aihep taꞌyn saꞌag nug hap po pyi aimowaku hamo raꞌyn. Koitywy Ahehakyeraꞌat hat iwepiit kahato raꞌyn.
Taꞌi saꞌawyꞌi mesuwat yi nug hap eꞌyian mete Tupana aiꞌairo Tosaꞌyru emiit no. Taꞌi aheꞌyian mete aiꞌairo temiitꞌin no are. Miꞌi hawyi toꞌe -Uhaꞌyru mohey haria wo aru miꞌiria hap atiꞌatukuap e. Miꞌi pote ti atunug aru hãpyk miꞌiria uiꞌewywuaria wo raꞌyn e. Yt kat i saꞌag nug haria wo atiꞌatunug miꞌiria e. Pyno yt uwe i te aito turan aiꞌairo Tosaꞌyru emiit no. Aikyꞌe haype yn aiꞌairo mesuwat yi yt kat i te hap eꞌat pe turan aiꞌairo.
Pyno Titu koitywy waku watoꞌe aipotmuꞌeria pe Iesui mohey haria pe -Eweiꞌatumuꞌe ro hoꞌopot haria powyro hamuat ete. Iꞌewyte aikotã waku hatek sese rakaria powyro hamo eweikupteꞌen hap ete waku watoꞌe aipotmuꞌeria pe katupono yt naku i kahato ti watoineꞌen neꞌen neꞌi ahowawi yn wanetup hatno neꞌi. Waku watiꞌatunapin Iesui mohey haria.
Pywo kahato ti mesuwat uimienoi paĩ. Miꞌi tupono Titu etiꞌatunapin kahato epotmuꞌeria -Waku watuwanetup kahato aikotã aru watunug waku hap ete ereꞌe o iꞌatuepe katupono waku nug haria wo watoineꞌen mote Tupana mowepiit kahato haria wo watopyhuꞌat. Iꞌewyte waku miitꞌin powyro kahato rakaria wo watopyhuꞌat ereꞌe o Iesui mohey haria pe Titu.
Watimohey hawyi Tupana aimopakup i miit pakup mo watopyhuꞌat toiãꞌãkap sese ewy ainug. Miꞌi pote waku mekewat yt naku i nug hap aipiit piat aiwanetup hawiat ikuꞌuro rakat ewy topyhuꞌat. Yne eꞌat pe Tupana ainug kahu aiwanetup hawe poꞌog poꞌog saꞌawyꞌi wuat kai. Yne eꞌat pe Tupana kuap haria wo watopyhuꞌat poꞌog poꞌog. Koitywy Tupana tikyꞌesat tokuap hap kaipyi towy ok sese wo aito hap. Miꞌi hawyi toikyꞌesat aiwanetup hap towanetup hap ewy.
Iraniaꞌin teꞌerahaꞌat kahato ahowawi sio pywo pe watomohey sio yt hap kape. Miꞌi pote aheineꞌen hap mesuwarote aikotã Iesui ewy hãpyk kahato rakat ewy waku watopyhuꞌat are. Uiwyriaꞌin waku watunug hãpyk kahato iꞌatuehamo. Miꞌi pote meiũran hoꞌopot hap eꞌat putꞌok e iꞌatuete hawyi meremo taꞌatumohey aikotã aito hap ewy. Miꞌi hawyi Tupana motypot hap ete aikotã aiꞌewy tukupteꞌen hãpyk kahato watunug wakuat pote. Mesup iꞌatumikyryꞌi hamo watoineꞌen watomohey Iesui pote -Yt naku i nug haria iꞌatuꞌe maꞌato yt pywo pe i. Katupono aikotã wẽtup ywania miꞌiria tukupteꞌen yt Tupana ywania hin i yt aiꞌe hap ewywuat i miꞌiria.
Etiꞌatumuꞌe epotmuꞌeria mio tã ereꞌe o Titu -Eweiꞌatuehay upi ehetuꞌisaria eiꞌakagnia iꞌewyte ehesuraraꞌin eweiꞌatuehay upi eweikupteꞌen ereꞌe o. Miꞌi hap etiat iꞌatumuꞌe hap ete yt waure wo eweikupteꞌen ereꞌe o. Karapeĩ eiꞌakagnia eipoꞌoro motpap wakuap nug hap miꞌi pote -Hẽ eweiꞌe kahato ereꞌe o epotmuꞌeria pe.
Yt aheineꞌen i te hap eꞌat turan Tupana aikuap taꞌyn. Taꞌi ainug hap eꞌat eꞌyian mete Tupana aikuap. -Taꞌi miꞌiria wyti aru Uhaꞌyru mohey hanuaria tukupteꞌen e tuwepe nimo te yt uwe i aito hap eꞌat pe. Uhaꞌyru mohey haria wo aru atiꞌatunug Uhaꞌyru ewywuaria Taꞌatueykeꞌet ewywuaria Taꞌatukywyt ewy atunug miꞌiria Uhaꞌyru watꞌypꞌi wo hap atiꞌatunug miꞌiria e tuwepe nimo te yt uwe i aito hap eꞌat pe. Uhaꞌyru mohey haria wyti aru atiꞌatuꞌairo uhemiitꞌin sese wo e Tupana topyꞌa pe nimo te yt uwe i te toineꞌen mesuwarote turan.
Miꞌi hawyi Iesui mohey haria waku pe i raꞌyn tukupteꞌen tawa Iuteia Karireia hawyi Samaria pe katupono iꞌatusatyꞌi satyꞌi haria iꞌatuꞌuka teran haria iꞌatupohep porapꞌi pote. Waku iꞌatuꞌe toꞌope. Miꞌi hawyi teꞌeruwemoesaika kahato raꞌyn Iesui mohey hawe. Iꞌatuwepiit raꞌyn. Miꞌi hawyi yt uwe pupi i teꞌerokenꞌẽ.
-Wakuap yn nug hat meiẽ hiwu iꞌatuꞌe iraniaꞌin hap upi watikuap wakuat hiwu. -Saꞌawyꞌi tomepytꞌin erohik kahato hat iꞌatuꞌe. Meiẽ -Ereke ro uiꞌyat pe e hat wuatꞌi piat hat meiẽ iꞌatuꞌe hap upi watikuap wakuat hiwu. -Tupana emiit hoꞌopot haria powyro kahato hat meiũ iꞌatuꞌe ihakyꞌeꞌi rakaria eropat hat meiũ wuatꞌi eꞌat piat waku yn hap nug hat meiũ iꞌatuꞌe hap upi watikuap uwe wakuat hiwu. Miꞌi wahetpehik kuap Tupana mohey haria miium kaipywiat ieineꞌen hamo.
Maꞌato watopyhuꞌat hẽtyhot pe Aikaꞌiwat ewy pote pywo pe watoineꞌen. Miꞌi pote ti iwywuat aiwoꞌowese hap topyhuꞌat kahato are. Miꞌi hap kaipyi ti Tosaꞌyru Iesui suu wo Tupana tikoho yne aiminug saꞌag koꞌi. Mekewat kat koꞌi kat koꞌi aiminug saꞌag koꞌi toiꞌatukoho aat kaꞌap ahewyry Iesui wywo imikyꞌesat ewywuat pote. Miꞌi hawyi tomikyꞌesat nug haria watopyhuꞌat.
Miꞌi hawyi tawa Iope pe wẽtup ok haryporia Iesui mikyꞌesat nug hat toineꞌen. Miꞌi ti mana Turaka e hap het rakat. Miꞌi haryporia inug waku kahato aat kaꞌap. Toiꞌatupowyro kahato miitꞌin miwaure koꞌi. Toiꞌatupoi hesyꞌat rakaria. Iwese kahato hap toimoherep yne ihakyꞌeꞌi rakaria pe. Toiꞌatupowyro hatek takaria. Tekareꞌen ahyt toimoꞌẽ yt hekat i rakaria pe. Wẽtup het Tapita iꞌatuꞌe Kereku pusu kuap haria.
Mekewat hemusin ãpy sokpe sio yt rakaria kape sio Iuteuria eko nug yne haria sio yt hap kape teꞌeruwanetup. Miꞌi haria ti yt kat no i Iesui pe. Maꞌato ti tokaipywiat miit ipakup sio yt hap kape yn ni ihaꞌat Iesui. Imopakup hap toineꞌen sio yt hap kape yn tehaꞌat. Yt kat i imopakup hap toipuẽti pote toimopakup i.
Miꞌi hawyi mekewat eꞌat pe yt ewetunug hin i yne yne Tupana waĩꞌe hap koꞌi e hap. Saꞌawyꞌi imohey hap eꞌyian mete ti ewetunug miitꞌin minug saꞌag koꞌi yne yne mekewat eꞌat pe. Mekewat eꞌat pe wẽtup eikaꞌiwat toineꞌen miꞌi ti ahiag. Miꞌi heso rakat kape -Uruetupana en eweiꞌe ahiag me. Emikyꞌesat ewy atunug neran eweiꞌe mekewat maꞌãu saꞌag me. Uruetupana uruetupana eweiꞌe aat kaꞌap mekewat yt nakuaria i nug haria porekuat kape mekewat ahiag me.
Uiwyriaꞌin tawa Ewesu piaria koitywy atipoꞌoro uimiwan ehewowi. Mesuwat miwan nug hat ti uito Pauru. Eipe ti Tupana saꞌyruꞌin Tupana sakiꞌytꞌin koitywy eipe Aikaꞌiwat Iesui mohey potꞌi haria ti eipe. Saꞌawyꞌi Tupana uiꞌairo hawyi uinug tosaꞌyru wo Aipotypot Iesui potpoꞌoro wo tomikyꞌesat ewy uiꞌairo.
Piblisite