Watikyꞌe sese Tupana pote iꞌewyte imikyꞌesat nug haria wo watoineꞌen. Miꞌi pote Tupana ipotpap kahato aikawiatno. Pywo ti rat aikotã aikotã topyhuꞌat ahete sio waku sio yt hap puo ipotpap kahato aikawiatno. Putꞌok e ahete aimowepiit hap sio ahatek hap toineꞌen aikawiatno kahato Tupana. Aito Tupana tokyꞌe haria iꞌewyte imikyꞌesat nug kahato haria wo pote ipotpap kahato aipowyro hamuat aipoityro hamuat waku nug hamuat.
Ewesu 1:11 - Sateré-Mawé11 Yne tomikyꞌesat ewy Tupana saꞌawyꞌi aiꞌairo raꞌyn tomikyꞌesat ewy. Miꞌi hawyi ainug tosakiꞌytꞌin no tosaꞌyruꞌin no Aheykeꞌet Aikywyt Iesui ewywuat ainug wẽtup miit mepytꞌin koꞌi ewywuat ainug naꞌyn aito watimohey Iesui hawyi. Tomikyꞌesat ewy tutum aru ahepe topowatꞌyp yne yne. Hekat kahato rakaria wo watopyhuꞌat wuatꞌi eꞌat pe aikotã toꞌe saꞌawyꞌi wuat hap ewy raꞌyn tutum ahepe. Gade chapit la |
Ewesu 1:11
40 Referans Kwoze
Waku kahato En Tupana katupono koitywy urutukupteꞌen esaꞌyruꞌin esakiꞌytꞌin. Miꞌi pote ewywo irane urutukupteꞌen wuatꞌi eꞌat pe aru atipy pe eꞌyat pe. Miꞌi tote urutukupteꞌen kat pote esaꞌyruꞌin esakiꞌytꞌin uruto pote. Uruekat atipy piat yt tuweityk kuap i. Yt tuwepik pik kuap i. Yt ikahuro kuap i katupono iheg me toineꞌen aiꞌyat pe atipy piat Tupana urutoꞌe.
Tupana tum naꞌyn Topaꞌãu ahepe. Miꞌi tutum mote mesup watikuap iꞌewyte tutum aru ahepe kat e hap kat e hap -Atum aru uimepytꞌin me e hap koꞌi ewy. Tutum naꞌyn yne saꞌup yne aiminug saꞌag hep hamuat Tosaꞌyru suu. Miꞌi pote watikuap taꞌyn mesup yt kat i saꞌag toipuẽti aikai. Watoineꞌen iwywo turan tuwehum ahowawi yt kat i aikai yt naku i pote yt kat i aipit pit hap. -Waku kahato En Tupana watoꞌe aru wuatꞌi eꞌat pe. Waku En waku En katupono uruhep ahiag po pywiat hat En urutoꞌe aru wuatꞌi eꞌat pe aru.
Wuatꞌi eꞌyian mete Tupana tunug toweꞌeg hap upi yne tomikyꞌesat upi. Mio tã e -Atiꞌatuehakyeraꞌat yne ywania yne miitꞌin e. Uimipoꞌoro Iꞌatuporekuat nuat po wo Uhaꞌyru minug upi atiꞌatuehakyeraꞌat wuatꞌi ywania e Tupana saꞌawyꞌi yt kat i te mesuwat yi turan yian mete mio tã e tuwepe migꞌi wo. Miꞌi hap toimoherep taꞌyn uhepe mesuwe uipyhik hawe.
-Watunug Muisei pywiat torannia Tupana woꞌonapin hap pote aipoityro hap ahehakyeraꞌat hap topyhuꞌat maꞌato yt pywo pykai i eweiꞌe are katupono 430 anu turan aseꞌi Muisei eꞌyian mete toineꞌen kahu raꞌyn Tupana aipoityro hap. Saꞌawyꞌi pyi te Tupana toꞌe Aparãu me -Wẽtup esaꞌyru kaipyi aru wuatꞌi atipoityro e. Miꞌi hap tutunug mesup.
Maꞌato Tupana toꞌe tuwehamo yn -Atunug aru emepytꞌin iꞌatu waikiru ewy e Aparãu me. -Areineꞌen hegyiꞌat kahato rakatno aru emiariruꞌin koꞌi pe e. Yt uheso hin i e. Atunug aru uiꞌe hap oktan e. Meiũran aru atiꞌatupoityro esaipepiaria e. Yt atiwaure hin i kat uiꞌe hap e. Maꞌato atunug aru uiꞌe hap ewy e. Uito Tupana pote atunug uiꞌe hap ewy e Aparãu me haty wo. Yt karãpe i kue wẽtup sehay atunug aru maꞌato atipytꞌatnug uhehay Uito Tupana pote e nimo te Aparãu me. Iꞌewyte yne esaipepiaria pe pywuat uiꞌe hap kuap hanuaria tukupteꞌen aru e.
Koitywy ti Iesui tum naꞌyn ahepe Topaꞌãu aikyꞌe haype. Yt aiwaku hap upi i tutum neꞌen neꞌi. Miꞌi pote Tupana toꞌe ahepe watimohey Haꞌyru hawyi -Koitywy waku rakaria wo eweikupteꞌen uipyꞌa pe e Tupana ahepe e. Eipo pe raꞌyn ti atum yne uipowatꞌyp e. Uhekat yne atum ehepe e ahepe. Miꞌi tupono wuatꞌi eꞌat piat ieineꞌen hap kape yn naꞌyn aiwatetup.
Pyno mesup Tupana mepytꞌin koꞌi aito pote Tupana mimopyhuꞌat wuatꞌi eꞌat pe katupono Aiꞌywot Tupana pote Iesui Aheykeꞌet pote aito iꞌywytꞌin inytꞌin wẽtup sok yn aitoria pote. Tupana ekat yne aiwatnuat koꞌi imepytꞌin aito pote. Aheykeꞌet motypot hap eꞌat pe aito iꞌewyte aimotypot hap toineꞌen imohey haria aito pote. Aheykeꞌet Aikywyt hoꞌopot kahato ahehakyeraꞌat hamo miꞌi pote waku kahato wahoꞌopot Aheykeꞌet Aikywyt ehay moherep hamo katupono wẽtup sok yn Tupana mipoityro koꞌi aito. Aheykeꞌet Aikywyt motypot hap eꞌat pe aimotypot iwywo hap topyhuꞌat.
Miꞌi hawyi watuwehum aiwepiit kahato hap wywo Aiꞌywot Tupana kape katupono Aiꞌywot atipy piat aimohãpyk aiwanetup hap. Miꞌi hawyi -Wakuaria wo raꞌyn miꞌiria e ahepiat pe. Uhemiitꞌin sese miꞌiria e. Uhekareꞌen aru atum yne iꞌatuepe. Uhetawa hẽtyhot rakat atum aru iꞌatuepe e. Iꞌatueowakai waku pe yne raꞌyn e ahepiat Topaꞌãu eiam koꞌi pe.
Woropoꞌoro en wuatꞌi miitꞌin kape e. Miꞌiria tukupteꞌen aikotã yt ihapytig i rakaria ewy katupono yt karãpe i teꞌeraꞌakasa te Tupana taꞌatupyꞌa pe yt taꞌatumohey i pote. Miꞌi pote woropoꞌoro en iꞌatumoehapytig hamo mekewat iꞌypyrywiat hap kaipyi uheꞌariãty hot kapiat iꞌatumoꞌakasa hamo e. Mesuwarotiaria yt uimohey i te haria yne ahiag po pywiaria tukupteꞌen e. Miꞌi pote woropoꞌoro en ahiag pohari hamo e. Miꞌi hawyi ti aru uipo piaria wo raꞌyn miꞌiria tukupteꞌen uhyt e uhepe itote e. Miꞌi hawyi ti aru wakuaria uimepytꞌin no raꞌyn teꞌeropyhuꞌat e. Uimohey haria ti aru uhaꞌyruꞌin uhakiꞌytꞌin sem koꞌi myꞌasetpe ahytmoi wuatꞌi eꞌat pe etiꞌatumuꞌe uhetiatno hawyi e uhepe. Miꞌi tã ti aru atunug uhyt e uhepe mekewat muap upi tawa Tamaku kapiat uhewyry turan e Pauru.
Uiwyriaꞌin e koitywy areto raꞌyn eipyꞌasetpyi. Maꞌato ti worohoꞌoꞌatoiat eipe Tupana po pe. Tupana ti eikyꞌe hap hum kahato ehepe. Tutum ahepe tehay wakuat aimoesaika hamo aimohãpyk yt nakuap i kaipywiat hamo. Miꞌi pote watoineꞌen hemiitꞌin no iraniaꞌin imimoewaku koꞌi saipepiaria wo mesup e Pauru tawa Ewesu piaria pe.
Tupana Mipoꞌoro eweiꞌauka raꞌyn ariaꞌyp posak saꞌag ete yt kat i saꞌag tutunug pykai e. Yt naku i kahato ewetunug tope maꞌato Tupana tum naꞌyn Tosaꞌyru ehepe iꞌauka hamo katupono iꞌauka hap toikuap yian mete e. Taꞌi ariaꞌyp posak ete neꞌi eweiꞌauka Haꞌyru. Yt nakuaria i ehay upi eweiꞌauka Imipoꞌoro Aiporekuat nuat maꞌato ikuꞌuro hawyi Tupana tihep i raꞌyn guꞌuro pyi. Totiõtem i raꞌyn Iesui e Peteru Iuteuria pe.
Tupana iꞌatuꞌe uruikuap wen maꞌato yt kat i saꞌag taꞌatunug kuap Esaꞌyru ete uruete waĩꞌere pote iꞌatuꞌe. Pywo ti rat yne porekuaria mesuwarotiaria epo piaria tukupteꞌen hap uruikuap iꞌatuꞌe. Uruikuap taꞌyn morekuaria yne emiꞌairo tukupteꞌen sio waku sio yt hap uruikuap iꞌatuꞌe. Tupana epo pe urutukupteꞌen miꞌi pote yt kat i saꞌag taꞌatunug kuap uruete sio waĩꞌere iꞌatuepe pote iꞌatuꞌe. Tupana etunug o emikyꞌesat ewy morekuaria po wo uruete emotypot hamuat iꞌatuꞌe katupono uruikuap taꞌyn morekuaria tunug ehay etiatno aikotã yianme emienoi iꞌatuepiat hap ewy yn taꞌatunug kuap iꞌatuꞌe.
Karãpe Iesui mohey haria iraniaꞌin yt iꞌatuwese i ehete hawyi waku eweikupteꞌen iwese rakaria wo. Yt eweipoepyk teiꞌo iraniaꞌin tunug saꞌag ehetiat pote. Taꞌatunug saꞌag hawyi -Waku eweiꞌe emohit miꞌiria pote. Etiꞌatumotypot miꞌiria uhytꞌiꞌin manaꞌin. Miꞌi tã ewetunug mote Tupana mipoityro koꞌi wo eweikupteꞌen. Yne Tupana ekat topyhuꞌat eiwatnuat atipy pe. Miꞌi tã ewetunug mote -Worohoꞌopoityro eipe e Tupana ahepe.
Pyno ewetum no ehewaure kaꞌa uhepe uimikyꞌe koꞌi. Yt eweikuap i te apo aikotã Tupana tiꞌairo kahato yt hekat i rakaria Iesui mohey kahato hanuaria wo hap. Poꞌog toiꞌairo ihakyꞌeꞌi rakaria temiit no tetama piatnuaria wo iraniaꞌin kai katupono saꞌawyꞌi toꞌe -Uhemiit sese wyti aru tukupteꞌen miit emiit haria wo karãpe arepyhuꞌat Wuatꞌi Miitꞌin Morekuat Koro mesuwarote e Tupana miwan me saꞌawyꞌi. Mio tã toꞌe hap ewy raꞌyn ti mesup te toiꞌairo temiitꞌin no miit yt uwe mikuap ewywuat koꞌi i yt uwe mikyꞌe ewywuat koꞌi i e. Miꞌiria pe ti -Worohoꞌoꞌairo eipe miitꞌin porekuaria wo uimohey sese haria eiperia pote e. Worohoꞌonug eipe morekuat no yne mesuwat yi tote e hatek takaria pe tokyꞌe sese haria pe. Worohoꞌomoesaika uimohey kahato hap wywo wuatꞌi nug hamo e Tupana tomohey haria pe.
Etum neꞌen neꞌi yne yne iwato kahato sakpo emiium etum yne yne. Waku kahato En urutoꞌe. Ewese kahato uruto yt uruwese i pykai urutoꞌe. Eweꞌeg hap oktan egyiꞌat hap oktan urukyꞌe hap urutoꞌe. Urutuwehum kahato ewowi Tupana katupono koitywy etunug naꞌyn ereꞌe saꞌawyꞌi wuat hap emikyꞌesat oktan urutoꞌe ewowi.
Yt aheineꞌen i te hap eꞌat turan Tupana aikuap taꞌyn. Taꞌi ainug hap eꞌat eꞌyian mete Tupana aikuap. -Taꞌi miꞌiria wyti aru Uhaꞌyru mohey hanuaria tukupteꞌen e tuwepe nimo te yt uwe i aito hap eꞌat pe. Uhaꞌyru mohey haria wo aru atiꞌatunug Uhaꞌyru ewywuaria Taꞌatueykeꞌet ewywuaria Taꞌatukywyt ewy atunug miꞌiria Uhaꞌyru watꞌypꞌi wo hap atiꞌatunug miꞌiria e tuwepe nimo te yt uwe i aito hap eꞌat pe. Uhaꞌyru mohey haria wyti aru atiꞌatuꞌairo uhemiitꞌin sese wo e Tupana topyꞌa pe nimo te yt uwe i te toineꞌen mesuwarote turan.
Pyno saꞌawyꞌi sese Tupana aiꞌairo atipy pe. Miꞌi hawyi putꞌok watoꞌe aiꞌywãꞌĩ hap hawyi watoineꞌen mesuwat yi tote hawyi watomohey Haꞌyru hawyi Tupana aikay kay tuwewawi towatnuaria sese wo. Miꞌi hawyi -Waku kahato uipyꞌa pe uiwanetup hawe eweikupteꞌen e ahepe. Pywo ti rat worohoꞌonug eiperia uhaꞌyruꞌin uhakiꞌytꞌin sese wo e. Karãpe putꞌok e uimotypot hap eꞌat sese mesuwarote hap eꞌat pe uimimotypot haria wo aru eweikupteꞌen e. Mekewat eꞌat pe aikotã miitꞌin uimotypot hap ewywuat miitꞌin mimotypot wo eweikupteꞌen are e Tupana ahetiat yt kat i te aheineꞌen turan.
Maꞌato saꞌawyꞌi Isaki saꞌyruꞌin wemoherep hap eꞌyian mete Tupana toꞌe mana Hepeka pe -Emepyt ipat rakat saꞌawyꞌi wuat wẽtem yianmiat hat ti aru topyhuꞌat eropat hanuat e Hepeka pe. Miꞌi hawyi iykeꞌet topyhuꞌat toꞌywyt eropat hatno Tupana e hap ewy imikyꞌesat ewy tutunug. Miꞌi hawyi imepyt Iako topyhuꞌat Isaki saipepiat sese. -Atiꞌairo ipat ok watꞌypꞌi Iako e Tupana iꞌatuꞌywaĩꞌĩ hap eꞌyian mete.
Saꞌawyꞌi emikyꞌesat ewy ereꞌe ewepe -Atum aru Uhaꞌyru pe wuatꞌi ywania ere. Atum neꞌen neꞌi aru Uhaꞌyru wuatꞌi miitꞌin me Iꞌatuporekuat no. Uimowepiit hap ewy atum aru ereꞌe saꞌawyꞌi ewepe ewanetup hawe yt kat i miitꞌin te turan. Tupana uruikuap teran kat pote urukyꞌe kahato hap. Miꞌi tã yt uruikuap hin i te wen maꞌato urukyꞌe hap miꞌi uruikuap taꞌyn. Waku kahato En urutoꞌe epe Tupana.
Tupana areꞌe etum no Esaꞌyru mohey haria tapyiꞌa Ewesu piaria pe ewanetup hap kuap hamo hap are. Etum no iꞌatuepe ewanetup kuap hap kat hamo etiꞌatuꞌairo miꞌiria emiitꞌin no are. Etimoherep to iꞌatuepe emikyꞌesat koꞌi nug neran hap koꞌi are. Etimoherep iꞌatuepe aikotã aru tukupteꞌen atipy pe esaꞌyruꞌin wo esakiꞌytꞌin wo hap are. Etimoherep iꞌatuepe kat som atipy pe are. Etimoherep iꞌatuepe aikotã aru atipy pe emotypot haria tukupteꞌen hap are. Etimoherep iꞌatuepe aikotã aru ewaku hap ewywuaria tukupteꞌen hap are. Tupana ewaku hap ekahu hap ewato hap etimoherep emiitꞌin me tawa Ewesu piaria pe are aat kaꞌap ehetiatno uiwyriaꞌin.
Ahehakyeraꞌat hat Iesui ikuꞌuro raꞌyn ariaꞌyp posak ete aikawiatno. Yne yt nakuap i nug saꞌag po pyi aihep hamo ikuꞌuro. Tupana watnuaria wo ainug neran pote wakuaria wo aito hap toikyꞌesat. Miꞌi pote aihep taꞌyn saꞌag nug hap po pyi aimowaku hamo raꞌyn. Koitywy Ahehakyeraꞌat hat iwepiit kahato raꞌyn.
Piblisite