2 Kuriniu 2:12 - Sateré-Mawé

¹² Saꞌawyꞌi areto tawa Turate kape mekewat sehay wakuat moherep hamo. Aikotã Tupana tipoꞌoro Tosaꞌyru Eiporekuat nuat sehay wakuat moherep hamuat. Taꞌi ahiag uipyhyp teran wen maꞌato Tupana tunug muap tehay wakuat moherep hamo. Weꞌokenhyp hap ewy itote maꞌato Tupana tiꞌokenhypꞌok taꞌyn uhepe tehay enoi hamo.

2 Kuriniu 2:12 Referans Kwoze

Iesui Potmuꞌeria 16:8

Miꞌi hawyi tawa Misia sakpo tokokaꞌat neꞌi. Miꞌi hawyi tuwat teran yi Turate kape maꞌato -Waĩꞌe i Iesui Paꞌãu.

Iesui Potmuꞌeria 14:27

Putꞌok taꞌatuꞌe itotiat hawyi taꞌatukay kay yne Iesui mohey haria. Miꞌi hawyi aikotã Tupana tunug muap upi iꞌatupo wo miꞌi hap ewy yne taꞌatumoherep itotiaria pe -Koitywy ti Tupana tomoherep taꞌyn Iesui yt aiꞌywania pe yn i raꞌyn iꞌatuꞌe Iuteuria pe. Taꞌi mio raꞌyn ti yt Iuteuria yn i raꞌyn imoherep iꞌatuꞌe.

Korosi 4:3

Karãpe ewehẽtup eimikyꞌesat koꞌi urupowyro hamuat waku ewehẽtup to -Tupana etum Pauruꞌin moesaika hamuat ehay etiat henoi hamo eweiꞌe. Etiꞌatupowyro o miꞌiria iraniaꞌin yt ekuap i te haria atumuꞌe hamo katupono typyꞌi kahato te Emipoꞌoro Esaꞌyru uruporekuat nuat yt kuap i te haria tukupteꞌen ehay ti migꞌi wo te topyhuꞌat iꞌatuepe waku eweiꞌe Tupana pe -Uruikyꞌesat kahato Pauruꞌin powyro hap katupono morekuaria tipyhyp teran ehay uruporekuat koro etiat waku eweiꞌe Tupana pe are. Iesui ehay pyhyp hamo morekuaria uipyhyp mesuwe woꞌopyhik hawe are.

1 Kuriniu 16:9

Iꞌatu kahato uipyhyp teran haria mesuwe maꞌato yt uipyhyp kuap i katupono Tupana uipowyro kahato. Miꞌi pote arepotpap kahato ipotpap nug hamuat ete. Waku kahato miꞌi hap uhete.

Humanu 1:1

Humanu ywania kuekatu sese atipoꞌoro ehewowi uimiwan me. Uito Pauru are. Uimiwan ni mesup sehay wakuat atipoꞌoro ehewowi. Uito ti Tupana mipoꞌoro sehay wakuat moherep wuatꞌi ywania puat hanuat. Iesui potmuꞌe sese ti uito. Uito ti Tupana mipoꞌoro Iesui Aiporekuat moherep hanuat. Saꞌawyꞌi te Tupana uiꞌairo hawyi mio tã e uhepe -Mehin Pauru e woropoꞌoro Uhaꞌyru Iesui etiat sehay wakuat moherep wuatꞌi puat miitꞌin miat hamo e. Atikyꞌesat sehay ewẽ pywiat Uhaꞌyru etiat yn e uhepe.

Iesui Potmuꞌeria 20:8

Miꞌi hawyi wãtym turan ariãty ipoityꞌi kahato meiẽwat akipy ywaiti rakat pe uruwaꞌatunug hap tote.

Iesui Potmuꞌeria 16:11

Miꞌi hawyi meiũpepyi uito Iruka areto raꞌyn Pauruꞌin wywo. Yara wato puo hãpyk pe urutuwat raꞌyn wasere upi yꞌy wato yi hit Samutasia kape. Miꞌi hawyi ihatꞌok hawyi wẽtup tawa Neapuri kape urutuwat yi Masetunia sese kape.

1 Kuriniu 9:12

Iraniaꞌin eimuꞌe haria eweipoi kahato. Maꞌato -Yt karãpe i urupoi ro urutoꞌe ehepe. Eweikuap kat pote pyno ahenoi ehepe. Yt uruikyꞌesat i eiꞌe hap eiwanetup hawe -Aimiꞌu kyewi neꞌi aimuꞌe ahekat kyewi neꞌi aimuꞌe sehay wakuat ete Pauru Panape eweiꞌe hap. Miꞌi pote urupotpap aat kaꞌap urupo wo urusaꞌup puẽti hamo. Uruhoꞌopot kahato yat sokpe kawiat nug hap ete urumiꞌu kyiꞌat hamo yt uruikyꞌesat i eiꞌokpe tote urutenuk haype pote.

1 Kuriniu 9:14

Miꞌi hap ewy Tupana ainapin mesup -Eweipoi ro eimuꞌe haria e. Eweimoꞌẽ emiꞌu uhehay wakuat moherep haria pe uimikyꞌesat oktan e Tupana.

1 Kuriniu 9:16

Atiꞌatumuꞌe kahato miitꞌin Iesui etiat maꞌato yt uimimuꞌeria ekat kyewi i atiꞌatumuꞌe miꞌiria iꞌewyte yt uimotypot hap kyewi i atiꞌatumuꞌe miitꞌin. Eweikuap apo kat pote atiꞌatumuꞌe miitꞌin Iesui ete hap. Pyno ahenoi ehepe Iesui uipoꞌoro miitꞌin muꞌe hamo miꞌi pote atiꞌatumuꞌe wuatꞌi ywania Iesui uipoꞌoro hap ewy. Iesui ehay ikahu rakat ete yt atiꞌatumuꞌe i miitꞌin mote Tupana miꞌapiheg wo areineꞌen aru.

2 Kuriniu 4:3

Maꞌato yt watimoherep Iesui etiat muap Tupana kapiat pote yt taꞌatukuap hin i. Miꞌi hawyi aimimuꞌeria yt ikuap takaria i wo tukupteꞌen. Yt naku i yt wahenoi i katupono yt wahenoi i hawyi tuwat aria kape yt taꞌatukuap i Tupana etiat pote.

2 Kuriniu 4:4

Pyno yt imohey i haria mesuwarotiaria hoꞌowasat rakaria wo teꞌeropyhuꞌat. Ahiag topyhuꞌat iꞌatuetupana wo. Miꞌi hawyi karãpe wahenoi sehay wakuat aikotã Tupana tipoꞌoro Tosaꞌyru Aiporekuat no hap etiat iꞌewyte karãpe watimoherep yne Iesui etiat Tupana moherep hat sese etiat Tupana ewywuat rakat miꞌi hap etiat wahenoi turan -Yt eweimohey teiꞌo miꞌi. Yt eweimohey teiꞌo miꞌi e ahiag iꞌatuwanetup hawe yt toikyꞌesat i miꞌiria teꞌeropyhuꞌat Iesui haria pote. Ahiag iꞌatuewa hik hap ewy iꞌatuete yt toikyꞌesat i Iesui kapiat iꞌatuꞌakasa hap pote.

2 Kuriniu 8:18

Miꞌi hawyi wẽtup ok uruipoꞌoro mehin Titu wywo. Miꞌi ti aimuꞌe kuap kahato Tupana ehay wakuat etiat rakat. Wuatꞌi puat mikuap Iesui mohey haria mikuap kahato miꞌi are. Miꞌi pe ti -Wakuat kahato miꞌi iꞌatuꞌe.

2 Kuriniu 9:13

-Tupana iꞌatuꞌe Esaꞌyru ehay upiaria emohey haria tawa Kurintiu piaria iꞌatuꞌe aru. Emipoꞌoro Aiporekuat nuat ehay wakuat nug haria miꞌiria iꞌatuꞌe aru Tupana pe. Taꞌatumoꞌẽ uruepe hãpyk kahato iꞌatuꞌe. Yt uwe pe i poꞌog toꞌokupitu kupitu kahato hegyiꞌat sese rakaria ewy iꞌatuꞌe aru Tupana pe.

2 Kuriniu 10:14

Saꞌawyꞌi Tupana urupoꞌoro ehewowi. Tomipoꞌoro Tosaꞌyru Aiporekuat nuat ehay wakuat moherep hamo. Miꞌi hawyi urutoꞌe ehewowi iꞌe hap ewy. Yt uruiwaure hin i eipe pykai urutuwat wẽtup ywania kape.

2 Kuriniu 11:4

Uimogyt kahato eipe katupono eweimohey yne miitꞌin mienoi koꞌi. Putꞌok e wẽtup ok itote hawyi wẽtup Iesui etiat eimuꞌe yt uruepiat eimuꞌe hap ewy hin i. Miꞌi hawyi -Pywo eweiꞌe kahato. Eꞌe hap ewy eweiꞌe tope. Miꞌi hawyi putꞌok e wẽtup i raꞌyn hawyi toꞌe ehepe -Atum neran wẽtup paꞌãu ehepe. Miꞌi hawyi -Waku mehin waku mimi eweiꞌe tope yt eiweꞌeg hin i. Miꞌi hawyi putꞌok e wẽtup ok wẽtup ehay enoi hat yt Aikaꞌiwat Iesui wakuat ewy hin i. Miꞌi hawyi -Pywo eweiꞌe miꞌi pote uimogyt sese eipe katupono -Pywo eweiꞌe yne eimuꞌe haria pe. Miꞌi pote eiweꞌeg wo o are ehepe.

2 Kuriniu 11:7

Haꞌawytepyi te mesup te worohoꞌomuꞌe eipe sehay wakuat Iesui etiat. Yt wẽtup mo i worohoꞌomuꞌe haꞌup ete. Miꞌi hawyi -Pauru piat aimuꞌe hap yt kat hamo i atum haꞌup kat pote yt ihay se i pote eweiꞌe. Taꞌi uimohit kahato uhegyiꞌat hap ete. Yt kat hamo i aremohit eipyꞌasetpe. Poꞌog waku haꞌup ete aru worohoꞌomuꞌe miꞌi hawyi uimotypot haria wo eweikupteꞌen.

1 Tesaronika 3:2

Miꞌi hawyi uruekatuwy Timoteu uruipoꞌoro ehewowi Iesui ehay etiat urupotpap hap moherep ehepiat hamo katupono Tupana eropat hat kahato Timoteu aiꞌewywuat sese. Miꞌi uruipoꞌoro pote eimoehãite kahato ehepiat imohey hap upi. Yt uruikyꞌesat i eihep imohey hap kaipyi hoꞌopot hap.