2 Kuriniu 13:7 - Sateré-Mawé

⁷ Tupana are -Etihep to tawa Kurintiu piaria iꞌatueko saꞌag myi iꞌatuminug saꞌag po pyi are. Yt urutuwat teran i iꞌatuewowi epiat iꞌatuꞌapiheg hap nug uruepiat hamo are. Yt uruimoherep teran i esaika hap iꞌatuꞌapiheg hamo neꞌi. Iraniaꞌin itote yt urumohey i emipoꞌoro uruto hap. Etunug miꞌiria taꞌatumohey uruto emipoꞌoro sese iꞌatuꞌe hamo. Yt naku i uruiꞌatuꞌapiheg miꞌiria esaika wo are Tupana pe mesuwe.

2 Kuriniu 13:7 Referans Kwoze

Tiaku 1:12

Maꞌato uwe uwe tepiat hoꞌopot turan te hakyꞌeꞌi turan yt iwaure i imohey hap miꞌi hat ti Tupana mimowaku wo toineꞌen iꞌewyte Tupana mimowepiit kahato wo topyhuꞌat wuatꞌi eꞌat pe katupono hoꞌopot hap sakpo gosap hat toineꞌen imohey hat. Miꞌi hat pe Tupana toꞌe aru -Uikyꞌe hat sese en e. Miꞌi pote woromoieineꞌen kahato wuatꞌi eꞌat pe e yt tewaure i haria pe.

2 Timoteu 4:18

Taꞌi Aikaꞌiwat uheroꞌok kuap kahato uiꞌauka teran haria po pyi uimaꞌat teran haria tok pyi. Miꞌi hawyi uiꞌãuka iꞌatu pupi. Tetama atipy piat pe uhereto. -Arehum aat kaꞌap ewowi Tupana. Ekahu kahato En are aru wuatꞌi eꞌat pe. Taꞌi miꞌi tã wyti pyno.

2 Timoteu 2:15

Eremuꞌe kahato aat kaꞌap Tupana ehay enoi hãpyk hamuat hap ete. Yt epohep hin i o Tupana mikyꞌesat nug hamuat. Miꞌi hawyi -Waku kahato epotpap uhepiat hap e Tupana epe. Miꞌi hawyi yt eremoti hin i Tupana pupi hãpyk kahato epotmuꞌe tehay sese wuat pote.

1 Timoteu 2:2

Iꞌewyte waku wahẽtup Tupana pe -Etiꞌatupowyro o uruporekuaria uruꞌakag koꞌi mesuwarotiaria. Urupowyro kahato urutukupteꞌen hap ete hamo meiũpe waku wahẽtup. Etiꞌatupowyro uruieineꞌen hap wẽtup ehay yn hamuat. Yt karãpe i saꞌag uruete hamuat yt wẽtup ok i urupyhyp pyhyp wakuat nug hap ete emikyꞌesat nug wuatꞌi puat hamo. Etiꞌatupowyro morekuaria tuꞌisaria waku kahato wahẽtup Tupana pe.

1 Tesaronika 5:23

-Tupana etiꞌatupowyro o uruwyriaꞌin itotiaria. Etiꞌatumoperupꞌi wakuap nug hamo are. Uruikyꞌesat tawa Tesaronika piaria emohey haria wuatꞌi kupteꞌen hap. Etiꞌatumopakupꞌi iꞌatuwanetup pakup i hamo are. Miꞌi hawyi yt kat i iꞌatuwanetup saꞌag hap kapiat hap uruikyꞌesat uruꞌywot urutoꞌe. Uruikyꞌesat miꞌiria ewatno yn hap urutoꞌe. Miꞌi tã etunug mote ti aru karãpe Esaꞌyru emipoꞌoro uut turan yt kat i iꞌatuminug saꞌag huut turan etipuẽti aru urutoꞌe yn Tupana pe.

Wiripu 4:8

Kurin poꞌog ahenoi hawyi waku. Uheꞌywytꞌin uheinytꞌin watipyhyp aiwanetup hap yt naku i hap. Miꞌi hawyi wẽtup kape yn aiwanetup hap. Wakuat kape yn watuwanetup aikotã miitꞌin miat wakuat rakat ewy aiwanetup hap aikotã pywuat wanetup hat ewy aikotã miitꞌin mimotypot kahato hap wanetup hap ewy aikotã hãpyk kahato rakat ewy waku watuwanetup. Waku ihainia haryporia weꞌeg nakaria ewy watuwanetup. Waku iwese kahato rakat ewy aiwanetup hap. Miꞌi hawyi -Meimuẽwaria wyti waku kahato rakaria iꞌatuꞌe hap ewy waku aiwanetup hap. Kat e hap kat e hap poꞌog poꞌog waku miꞌi ewywuat waku watuwanetup. Kat e hap kat e hap ete Tupana -Waku e pyno miꞌi hap ete waku watuwanetup aat kaꞌap.

1 Peteru 2:12

Iraniaꞌin teꞌerahaꞌat kahato ahowawi sio pywo pe watomohey sio yt hap kape. Miꞌi pote aheineꞌen hap mesuwarote aikotã Iesui ewy hãpyk kahato rakat ewy waku watopyhuꞌat are. Uiwyriaꞌin waku watunug hãpyk kahato iꞌatuehamo. Miꞌi pote meiũran hoꞌopot hap eꞌat putꞌok e iꞌatuete hawyi meremo taꞌatumohey aikotã aito hap ewy. Miꞌi hawyi Tupana motypot hap ete aikotã aiꞌewy tukupteꞌen hãpyk kahato watunug wakuat pote. Mesup iꞌatumikyryꞌi hamo watoineꞌen watomohey Iesui pote -Yt naku i nug haria iꞌatuꞌe maꞌato yt pywo pe i. Katupono aikotã wẽtup ywania miꞌiria tukupteꞌen yt Tupana ywania hin i yt aiꞌe hap ewywuat i miꞌiria.

2 Kuriniu 13:9

Uruikyꞌesat kahato eweikupteꞌen waku rakaria Tupana ewywuaria wo hap. Urumowepiit kahato karãpe eweikupteꞌen hesaika kahato rakaria wo imohey hap ete. Miꞌi hawyi poꞌog urunapin haria ewy. Miꞌi hap eꞌat pe urumowepiit kahato.

2 Kuriniu 10:18

Yt naku i watoꞌe -Uito poꞌog Tupana eropat hat sese paĩ yt naku i watoꞌe. Poꞌog waku wahekatup Tupana kaipyi -En uheropat hat sese e hap. Miꞌi hap eꞌat pe yne ikuap Tupana wẽ kaipyi Tupana emiit sese hap. Miꞌi hap eꞌat pe imimotypot no watoineꞌen are uito eimuꞌe hat Pauru.

2 Kuriniu 10:10

Iraniaꞌin eipyꞌasetpe yt uikyꞌe i haria -Pywo ti rat Pauru aiꞌapiheg kahato tomiwan me iꞌatuꞌe. Eweikuap kat pote iꞌatuꞌe. Tokenꞌẽ kahato aipyꞌasetpe toꞌe ahepiat hamo iꞌatuꞌe. Yt ipoityꞌi hin i iꞌewyte yt ihay se hin i aimuꞌe turan iꞌatuꞌe.

2 Kuriniu 8:21

Hãpyk kahato yn areineꞌen neran wuatꞌi miitꞌin wanetup hawe iꞌewyte Tupana wanetup hawe. Miꞌi pote yt atioto teran i mesuwat wuatꞌi miium wato koꞌi kat pote yt atikyꞌesat i miitꞌin teꞌeruwanetup saꞌag uhowowi sio tohoꞌosat sio yt iꞌatuꞌe hap ete.

2 Kuriniu 6:4

Uruwyriaꞌin waku kat koꞌi kat koꞌi watunug aiweꞌeg wo kahato Tupana mowepiit hap wywo -Meiẽ Tupana eropat hat sese iꞌatuꞌe hamo. Karãpe putꞌok e ahete ahatek hap ahoꞌopot hap koꞌi turan yt naku i iũteꞌen iũteꞌen aipyꞌahak miitꞌin ete iꞌewyte Tupana ete. Waku watimoherep Aipotypot eropat haria sese hap miꞌi hap eꞌat pe.

1 Kuriniu 11:19

-Waku watipatꞌok patꞌok eweiꞌe saꞌag eiwoꞌope. Waku iraniaꞌin aimuꞌe hat Peteru upiaria. Waku iraniaꞌin aimuꞌe Apauru upiaria. Waku iraniaꞌin aimuꞌe hat Pauru upiaria eweiꞌe saꞌag neꞌi eiwoꞌope. Miꞌi tã watunug hawyi meremo watikuap uwe hãpyk uwe yt hãpyk i eweiꞌe saꞌag maꞌato miꞌi tã ti yt Tupana mikyꞌesat ewy hin i.

Humanu 16:10

Iꞌewyte atipoꞌoro kuekatu kahato aiwy Apere kape. Miꞌi ti tokuꞌuro hap kapiat Aikaꞌiwat mohey hap -Yt atoiat i e hat. Saꞌawyꞌi taꞌatuhãꞌãg ihep imohey hap kaipywiat hap maꞌato yt taꞌatuhep kuap i. Kuekatu mehin Aritũpuru yat piaria kape atiꞌatuewaku.

Humanu 13:13

Wuatꞌi ehamo eꞌat pe turan yt uwe i inug saꞌag. Aiminug wakuap wen yne heremo. Waku yt watuwemoti hin i aiminug waku hap upi. Waku watiꞌatoiat yne yt naku i nug hap kat koꞌi mekewat wãtym muat hairu saꞌag nug haria woꞌopytyk pytyk hap ewywuat. Waku watiꞌatuꞌatoiat yne kat som mekewat mahy wemopẽꞌã hap aikotã wãtym muaria tunug hap ewywuat. Waku watiꞌatoiat yne kat som mekewat aiwary wary aheꞌaito heꞌaito hap. Waku miitꞌin hãpyk takaria ewywuaria watopyhuꞌat mesuwat yi tote are aikotã wakuap nug haria ewy. Waku watiꞌatoiat yne kat som aiwuꞌuka hap woꞌoꞌahyk hap koꞌi. Waku watiꞌatoiat yne kat som mekewat woꞌoꞌehayꞌywyi hap.

Humanu 12:17

Karãpe wẽtup ok tunug saꞌag kahato ehete yt eweipoepyk teiꞌo. Yt etunug neiꞌo miꞌi hat ete aikotã tutunug saꞌag hap ewy te maꞌato etipoepyk waku puo wakuap mo. Waku watunug yne yne yt kat i miitꞌin maꞌat hap aikai yt kat i aheso hap wywo. Miꞌi hawyi miitꞌin tikuap taꞌyn yt kat i taꞌatumaꞌat hap aikai.

Iuwãu 17:15

Papai etiꞌatuꞌywyk o uhemiitꞌin yt aimohey i haria pyꞌasetpyi yt are i ahẽtup epe. Maꞌato etiꞌatuꞌywyk o uimohey reꞌym haria porekuat ahiag po pyi uhemiitꞌin are ahẽtup Papai.

Mateu 6:13

Yt uruwaure teiꞌo En uruiꞌiãꞌãg hap tet pupi maꞌato urukawiatno to En yt naku i hap kaipyi. Katupono En wyti uruporekuat koro. Ewat esaika hap wyti wuatꞌi eꞌat piatnuat waku.

Humanu 1:28

Miꞌiria pe wahenoi sehay wakuat Tupana etiat pote waĩꞌiꞌatuꞌe ahepe katupono yt taꞌatukyꞌesat i. Miꞌi sehay kape yt teꞌeruwanetup teran i. Yt taꞌatukyꞌesat iꞌatuewaure kaꞌa pe iꞌatuwanetup hawe -Yt kat i Tupana sese iꞌatuꞌe toꞌope pote toineꞌen pykai. Miꞌi pote Tupana toꞌe miꞌiria ewywuaria pe -Hẽto eiwewanetup eiminug saꞌag kape yn aat kaꞌap eimikyꞌesat ewy e. Miꞌi hawyi poꞌog yt ihainia ewy i yt haryporia ewy i teꞌeropyhuꞌat taꞌatupyꞌa pe taꞌatuwanetup hawe taꞌatuminug. Yt naku i hap koꞌi yn neꞌi taꞌatunug taꞌatuwẽpyi hap ewy. Teꞌeruwepyi Tupana wanetup hap ikahu rakat kaipyi iꞌatuehamanaꞌi.

2 Kuriniu 13:6

Atikyꞌesat kahato eweikuap uruto Tupana Saꞌyru mipoꞌoro koꞌi sese hap. -Yt heso rakaria i waku eweiꞌe kuap uruetiat.

2 Kuriniu 13:8

Uruto Tupana miꞌairo sese tehay pywo piat moherep ehepiat hamo. Yt uheso i rat. Pywo rat uruꞌe hap. Maꞌato -Yt pywo rakat i rat eweiꞌe pote yt eweimohit kuap i urumienoi kat pote Tupana mipoꞌoro koꞌi sese uruto. Poꞌog waku eweiꞌe -Pywo kahato eiꞌe hap waku eweiꞌe. Pywo eweiꞌe hawyi poꞌog esaika hap topyhuꞌat katupono pywo e haria sok wo watukupteꞌen.