1 Timoteu 4:16 - Sateré-Mawé

¹⁶ Eweꞌeg wo o Timoteu koran tiꞌitu eremaꞌat neꞌi. Iꞌewyte eweꞌeg wo o emienoi Tupana ehay mienoi aparap hap pupi. Miꞌi tã etunug aat kaꞌap pote ti aru ehakyeraꞌat Tupana emimuꞌeria wywo are.

1 Timoteu 4:16 Referans Kwoze

Titu 1:9

Etiꞌairo aimimohey wuatꞌi eꞌat piat moherep hat Iesui mimuꞌe ewywuat etiꞌairo. Miꞌi hat ewywuat etiꞌairo pote hesaika rakaria watukupteꞌen ipotmuꞌeria pywo piat taꞌatumuꞌe pote.

Titu 2:7

Iꞌewyte en Titu poꞌog wakuap nug hamo ereineꞌen itotiaria kurum iwasuria kai hawyi ti aru -Pyno waku watunug Titu ewy iꞌatuꞌe kurum iwasuria. Tupana ewy ereineꞌen iꞌatumuꞌe haype yt kat i eso hap wywo. Epyꞌa hãpyk wywo etiꞌatumuꞌe Titu.

2 Timoteu 4:2

Yt etoiat reiꞌo ihay moherep hap. Waĩ ere o miitꞌin minug saꞌag koꞌi ete. Yt eweipun neiꞌo ehepiat imohey hap ere o wuatꞌi pe. Eiwepiit ro ere o epotmuꞌeria pe. Yt kat i iꞌatumopyꞌahak hap wywo maꞌato hepama perupꞌi wo etiꞌatuekyi kahato ro emienoi wo Tupana kape katupono tuut irane wuatꞌi Porekuat no emienoi wo.

Ewesu 4:14

Yt toikyꞌesat i wẽtup ok wẽtup ok mienoi saꞌag upi watopyhuꞌat hap kat pote toikyꞌesat Tosaꞌyru mienoi upi yn watopyhuꞌat hap. Imohey haty wuat hap toikyꞌesat. Iꞌatu kahato aimuꞌe iweꞌeg kahato rakaria aimuꞌe kuap kahato haria maꞌato yt pywo pe i yt Iesui mienoi upi i haria aimuꞌe maꞌato ahekat kyewi yn aimuꞌe haria e. Miꞌiria ehay upi watopyhuꞌat hawyi iꞌatuewamiri pe watopyhuꞌat hap ewy aikotã wasere owa kape wato teran ihyemyiꞌa wato sakpo teran maꞌato yt wato kuap i ipoityꞌi pote hap ewy katupono miꞌiria teꞌeruwanetup aat kaꞌap aimaꞌatꞌi maꞌatꞌi hap ete iꞌatuehay wẽtup upi. Yt eweimohey teiꞌo miꞌiria yne miitꞌin miat aimuꞌe hap are. Yt naku i watopyhuꞌat hirokaria ewy aimikuap ete are. Hirokaria imohey yne yne miitꞌin ehay sio pywo sio yt hap taꞌatumohey. Waku watomohey aimuꞌe hat Iesui e hap ewy aimuꞌe pote. Waku watimoheg aimimohey Iesui aipyꞌa pe aiwanetup hawe e. Tupana wywo wẽtup piit ewy watukupteꞌen. Miꞌi hawyi aiꞌywania uruꞌywania wẽtup ywania ewy yn naꞌyn ainug e. Koitywy Tupana ywania raꞌyn aito. Saꞌawyꞌi Iuteu ywania eiꞌywania tukupteꞌen toꞌope toꞌope toꞌoewanikap mo teꞌeropyhuꞌat. Mekewat eꞌat pe toineꞌen eipyhyp hap ewywuat Iuteu etawa kapiat eweiwat hamo. Maꞌato mekewat eipyhyp hap Tupana kapiat hap Iesui tiꞌaporok yne raꞌyn topy wo.

Epereu 13:9

Waku watopyhuꞌat imohey hap ete Iesui kape yn watuwanetup wuatꞌi eꞌat. Yt naku i watuwat iraniaꞌin miat aimuꞌe hap upi yt Iesui yt etiat i raꞌyn hap upi. Katupono iꞌatu kahato aimuꞌe hap koꞌi yt pywuat i raꞌyn koꞌi. Iꞌewyte iꞌatu kahato aimuꞌe yt Iesui etiat i. Iꞌatu aimuꞌe Iesui etiat rakaria maꞌato yt hãpyk i rakaria. Yt naku i watuwat heso rakaria aimuꞌe wẽtup sehay yt Iesui etiat i hap upi. Waku watomohey Iesui hap yn sehay pywuat Iesui etiat. Miꞌi ti waku watunug. Waku watuwanetup aat kaꞌap aikotã Tupana aikyꞌe yt kat saꞌup i pykai aikyꞌe hap upi. Aikotã ahewaku hap yt putꞌok e i aikyꞌe hamuat saꞌup ete hap upi waku watuwanetup. Miꞌi watunug mote aipyꞌa iheg me Iesui mohey hap ete. Yt naku i watuwanetup aat kaꞌap miꞌu sio waku Tupana tikyꞌesat sio waku atuꞌu sio yt aiꞌe hap kape. Iraniaꞌin miꞌu waku sio yt aheko ewy hap kape yn teꞌeruwanetup haria tukupteꞌen. Teꞌeruwanetup miꞌu waku sio yt hap kape yn maꞌato miꞌi haria yt iꞌatuehãite i kahato Iesui mohey hap ete. Hãpyk kahato aheko miꞌu u hap etiat iꞌatuꞌe wen maꞌato Tupana mohey hap kape yt teꞌeruwanetup hin i miꞌi pote yt iꞌatuesaika i te Tupana ehay moherep hamo.

Epereu 12:15

Pyno waku aiweꞌeg wo kahato. Yt naku i watipun Tupana piat aikyꞌe hap aipoityro teran hap. Yt naku i watopyhuꞌat ipyꞌahak miitꞌin etiat rakaria wo iꞌewyte Tupana ete katupono ahaiwot hap uku hapo kahato rakat ewy toineꞌen. Pyno waku aiweꞌeg wo watoineꞌen katupono yt niatpo hin i watopyhuꞌat myꞌahak haria wo watoiat ainapin Tupana piat hap hawyi. Waku watihep hapo miitꞌin auka hap uku ewywuat aipyꞌa pyi yt pote myꞌahak rakaria wo yn watopyhuꞌat miitꞌin ete iꞌewyte Tupana ete. Miꞌi hawyi yt uwe i woꞌokyꞌe hat itote. Ahaiwot iraniaꞌin Iesui mohey haria ete hawyi torannia itote aiwoꞌoꞌewy hawyi yt uwe i iwese toꞌope itote.

2 Timoteu 3:14

Maꞌato Timoteu yt atikyꞌesat i en miꞌi tã ereineꞌen. Maꞌato uhepiat emuꞌe hap ete aat kaꞌap ereineꞌen poꞌog poꞌog katupono saꞌawyꞌi te miꞌi hap ete pywo haty wo eremuꞌe. Miꞌi hap ewy te mesup etimohey te Timoteu katupono etikuap sese raꞌyn uiwẽ pywiat emuꞌe hap.

Iruka 21:34

-Eiweꞌeg wo o mekewat eꞌat pe ariot turan. Ienuk iwato hap tote mahy u hap ete pote yt uhẽtup hin I haria wo eweikupteꞌen ariot turan e.

1 Timoteu 4:6

Pyno mesuwat enapin hamo etiꞌatumuꞌe ro Iesui mohey haria Timoteu. Etiꞌatumuꞌe hãpyk kahato pote ti aru erepyhuꞌat Aipotypot Iesui eropat kahato hatno. Iꞌewyte etikuap kahato raꞌyn uhepiat imohey hap iꞌewyte sehay pywuat sese etiat etikuap taꞌyn. Miꞌi tupono atikyꞌesat poꞌog poꞌog eremuꞌe hap miꞌi etiatno.

1 Timoteu 1:3

Pyno mesup ahẽtup i raꞌyn eupi Timoteu tawa Ewesu piat ereineꞌen hamuat. Aikotã saꞌawyꞌi ahẽtup ewowi karãpe areto yi Masetunia kapiat turan -Ereineꞌen no tawa Ewesu tote mekewat itotiaria sehay yt pywo rakat i enoi haria ewaĩ hamo.

Humanu 16:17

Tukupteꞌen Iesui mohey ran haria maꞌato mesuwat yi tote yt naku i rakaria katupono woꞌoehay uuka teran sehay wuat haria tukupteꞌen. Taꞌi miꞌiria taꞌatupatꞌok patꞌok teran kahato aito hap taꞌatukyꞌesat kahato. Miꞌiria aimoꞌakagꞌaia taꞌatuehay wuat hap taꞌatuehay wo. Yt Iesui kyꞌe hap kaipyi i maꞌato wẽtup mohey hap kape wẽtup sehay kape aimoꞌakagꞌaia teran. Typy mohey hap nug hamo yt Aimimohey Iesui ewy i taꞌatumoherep yt aimimohey sehay yt ewy i yt aimuꞌe hap saꞌawyꞌi wuat Iesui potmuꞌeria piat yt aimuꞌe hap ewy i aimuꞌe. Yt naku i. Uiwyriaꞌin karãpe miꞌiria ewywuaria putꞌok iꞌatuꞌe eipyꞌasetpe ehepiat Iesui mohey hap nug kowoꞌi kowoꞌi hanuaria eiweꞌeg wo o miꞌiria pupi. Miꞌiria putꞌok iꞌatuꞌe turan waku eweikuap meremo iꞌatuepiat eimaꞌat reran hap hawyi yt eweiwat i iꞌatuehay upi. -Urumuꞌe ro uhyt mana yt eweiꞌe teiꞌo iꞌatuepe. Iꞌatuehay pupi eweikenꞌẽ o. Uiwyriaꞌin Iesui mohey haria eipe pyno worohoꞌonapin haty puo yt eweipomeꞌeg teiꞌo ehewaure kaꞌa woꞌopatꞌok patꞌok Iesui mohey haria etiat iꞌatumoꞌakagꞌaia hap kaipywiaria kape.

2 Timoteu 2:10

Maꞌato yt uiwẽpohep hin i Iesui mohey hap ete waĩꞌiꞌatuꞌe pykai. Uiꞌauka pote uiꞌauka maꞌato yt uipohep hin i te. Katupono Tupana tiꞌatuehakyeraꞌat teran kahato tomiꞌairoria ahoꞌopot kahato Iesui mohey iꞌatuepiat hamuat pykai. Miꞌi hap kaipyi Tupana tiꞌatuehakyeraꞌat miꞌiria. Miꞌi hawyi Iesui kahu hap ewywuaria raꞌyn tukupteꞌen iwywo wuatꞌi eꞌat pe raꞌyn.

1 Kuriniu 9:27

Ahetama puo watoꞌoꞌiãꞌãg wuꞌuka hap ete. Miꞌi watunug aat pote watuwemoesaika kahato aipiit. Yt mikyꞌesat ewy i haty hap maꞌato watimopokuap aipiit. Miꞌi hat ewy areineꞌen uito. Maꞌato Tupana ehay moherep hap ete uipiit yt ipap i pykai atunug. Karãpe wẽtup ok yi kai neꞌi raꞌyn watuꞌuka hap ete miꞌi hawyi tuwemoti. Maꞌato uito miꞌi hat ewy yt areineꞌen neran i Tupana ehay moherep hap ete. Areineꞌen neran poꞌog hesaika rakat ewy. Miꞌi hap ewy karãpe areꞌe iraniaꞌin me -Toꞌiro waku Iesui upi watuwat areꞌe maꞌato miꞌi pykai yt areto i Iesui upi pote uito iꞌewyte aremoti. Waĩꞌare uipiit mikyꞌesat saꞌag ete yt atikyꞌesat i Uipoꞌoro hat toꞌe uhepe aru -Saꞌag nug hat en e hap yt atikyꞌesat hin i aru Iesui e hap. Uito ti uipiit mikyꞌesat monik hat Pauru.

Iesui Potmuꞌeria 6:4

Maꞌato uruto wyti Tupana ehay moꞌẽ haria wo yn ni urutukupteꞌen aru aat kaꞌap uruto iꞌatuꞌe. Iꞌewyte Tupana wywo yn uruto uruehay teran aat kaꞌap iꞌatuꞌe.

Maku 13:9

Eiwanetup kahato o katupono wyti aru ehum wanikaptia po pe raꞌyn eipe tuꞌisaria po pe raꞌyn eipe e. Miꞌi hawyi eiꞌahyk ahyk wyti aru Tupana motypot hawe e. Miꞌi hawyi ti aru iꞌatuporekuat po pe iꞌatuetuꞌisa po pe eweikupteꞌen hawyi ehenoi kuap uhetiat hamuat e.

Tiaku 5:20

Uwe uwe yt nakuat i nug hat porerokosap Tupana kapiat iminug saꞌag myi miꞌi hat tihep wẽtup ok miit woꞌoꞌapiheg hap kaipyi iminug saꞌag ahyt po pyi toiporenotem Tupana piat iehakyeraꞌat hamo. Uiwyriaꞌin yt eweiwaure ro miꞌi tã nug hamo yt waure wo teiꞌo. Uito Tiaku ti mekewat Iesui ywyt sese.

Titu 2:15

Pyno uhaꞌyru Titu uimienoi mesuwat uimiwan miat ehenoi yne Iesui mohey haria epotmuꞌeria pe are. Aikotã woꞌomuꞌe hat sese ewy etiꞌatunapin Iesui ainapin hap ewy. Iꞌaparap hap etikuap hawyi waĩꞌere o iꞌatuepe yt iꞌatumohit wywo teiꞌo maꞌato waĩꞌere iꞌatuepe. -Taꞌi Tupana wyti uipoꞌoro meikowo ehepiat sehay wakuat Iesui etiat moherep hamo ereꞌe o iꞌatuepe. Uito ti ehehaytuwy sese ereꞌe o epotmuꞌeria pe Titu.

Korosi 4:17

Miꞌi hawyi atipoꞌoro i sehay uhyt Akipu kape. Pyno koitywy atoiat eipo pe raꞌyn Aikaꞌiwat potpap koꞌi. Miꞌi hap ti koitywy tutum eipo pe raꞌyn. Pyno koitywy eweꞌeg wo o. Eweimoma o ipotpap hap imikyꞌesat oktan are.

1 Kuriniu 9:22

Karapeĩ areineꞌen Iesui mohey haria yt hesaika rakaria i te tokpe miꞌi hawyi paa e hat areineꞌen eiꞌewy uito areꞌe iꞌatumoesaika imohey hap ete hamo. Miꞌi kai ahoꞌosat Iesui mohey hanuaria.

Humanu 11:14

Yt atiwaure i uruꞌywania maꞌato ahãꞌãg kahato iꞌatuehakyeraꞌat hap nug hamo. Uiꞌywania tehaꞌat uiminug iraniaꞌin ywania muꞌe hap kape hawyi atikyꞌesat iꞌatuesyꞌat rakaria ewy teꞌeropyhuꞌat iꞌatupyꞌa piat Iesui mohey hap kyewi yt kat i Tupana poityro hap iꞌatukai pote. Taꞌatukuap iraniaꞌin poityro hap hawyi atikyꞌesat taꞌatukat kahato Iuteuria poityro hap iꞌatuehayꞌywyi hap kaipyi. Miꞌi hap atikyꞌesat kahato.

Humanu 2:7

Taꞌi Tupana tum aru tomohey haria pe tomotypot haria pe tomikyꞌesat nug hanuaria pe wuatꞌi eꞌat piat iꞌatuieineꞌen hap sese tomepytꞌin saꞌup e. Miꞌiria yt iꞌatupohep hin i Tupana motypot hap ete. Taꞌatuminug wakuap koꞌi wo taꞌatumotypot aat kaꞌap. Yt karãpe i iꞌatukuꞌuro miꞌiria ete e. Katupono tomotypot saꞌup Tupana tum miꞌiria pe wuatꞌi eꞌat piat iꞌatuieineꞌen waku hap.

Iesui Potmuꞌeria 26:22

Maꞌato Tupana uhehakyeraꞌat raꞌyn porap uiꞌauka hap turan iꞌatupo pyi e. Taꞌi uihep esuraraꞌin iꞌatupo pyi e. Waku kahato rasig Tupana katupono mesup areineꞌen mesuwe ihay moherep hamo toꞌe hap ewy e. Wẽtup ehay yn ahenoi kahato ihakyꞌeꞌi rakaria pe hekat rakaria pe. Wẽtup ehay yn ahenoi henoi mekewat saꞌawyꞌi wuat sehay Tupana mimoherep yianmiaria ehay nimuaria ehay ewywuat Muisei ehay ewywuat yn ahenoi henoi wuatꞌi pe iꞌewyte ehepe e Pauru.

Wiremu 1:19

Pyno ti uipo wo atunug uimiwan mesuwe uimipoꞌoro ewowiat Unesimu weteweru hap ahaꞌup nug yne uiꞌe hap. Uito ti Pauru uipo wo atiwan mesuwe uhet -Atum Unesimu weteweru hap etiatno Wiremu kape are. Uipo wo atopytyk uimiwan nuat mesuwe Pauru. Yt etiwaure teiꞌo maꞌato uhepiat eweterut iwato hap katupono saꞌawyꞌi uiwẽ kaipyi etikuap mesuwat wuatꞌi eꞌat piat ieineꞌen hap uhehay pyi mehin. Miꞌi tupono iwato kahato eweterut hap te yt kat saꞌup i etum pykai.

1 Tesaronika 2:16

Yt ewehenoi teiꞌo iraniaꞌin wẽtup ywania pe iꞌatuꞌe uruepe. Katupono miꞌiria yt tikyꞌesat hin i iraniaꞌin ehakyeraꞌat hap katupono -Howapy yne raꞌyn iꞌatupiit iꞌatuminug saꞌag koꞌi wo. Yt kat i raꞌyn heiam howapy poityꞌi pote e Tupana. Toran naꞌyn putꞌok e raꞌyn koitywy iꞌatuꞌapiheg hap e Tupana Iuteuria pe topyꞌahak popuo.

1 Kuriniu 1:21

Katupono saꞌawyꞌi wuat weꞌeg kahato haria ikuap teran Tupana maꞌato yt putꞌok e i iꞌatuweꞌeg hap Tupana kuap hamuat hap. Katupono koitywy Tupana tikyꞌesat kahato mekewat yt iꞌatuweꞌeg i hap kaipywiat ariaꞌyp posak etiat neꞌi ikuꞌuro rakat mohey haria ehehakyeraꞌat hamuat hap. Poꞌog Tupana iweꞌeg miitꞌin kai Katupono Tupana mikyryꞌi wo toineꞌen miitꞌin weꞌeg kahato hap e.

1 Timoteu 4:15

Timoteu waku mesup uiꞌe hap sepap kahato hatno ereineꞌen. Miꞌi pote ti aru wuatꞌi sehaꞌat haria -Pywo Timoteu tuwemotag kahato Tupana emiit no iꞌatuꞌe.