Mekewat Sehay e hap het rakat Iesui aiꞌewywuat tuwemoherep miitno aipiit ewywuat tuwemoherep. Miꞌi hawyi watehaꞌat kuap i hẽtyhot atipy kaipywiat Tupana saꞌyru wẽtup yn kape. Miꞌi hawyi toineꞌen aipyꞌasetpe. Putꞌok e mesuwe hegyiꞌat hap moherep hamo. Miꞌi ti Wakuat Sese toineꞌen. Hãpyk hap yn tuete. Pywuat rakat toineꞌen.
1 Timoteu 3:16 - Sateré-Mawé16 Tupana mienoi Iesui etiat watikuap kahato maꞌato yt karãpe i watikuap yne yne. Tupana yn ikuap sese hat. Miꞌi hawyi ikuap hat sese tuwemoherep taꞌyn ahowawi. Mio tã toꞌe ahepe Iesui etiat -Meiũ ti pywuat sese e. Miꞌi Miit kape atipy piaria teꞌeraꞌakasa yne. Miꞌi ti imoherep taꞌyn kat ywania puo kat ywania puo miꞌi hap tuwemoherep taꞌyn tehay wo. Miꞌi hawyi ti iꞌatu kahato raꞌyn imohey haria mesuwat yi tote. Miꞌi hawyi Tupana tioto i raꞌyn atipy kape i are. Gade chapit la |
1 Timoteu 3:16
81 Referans Kwoze
Tupana Iãꞌãkap Sese Haꞌyru yn iꞌewy sese rakat. Wẽtup Miit ewy yn iꞌatueko wẽtup yn iꞌatumikyꞌesat koꞌi wẽtup yn iꞌatumotypot hap toꞌokupitu. Tosaꞌyru esaika hap wo toimopyhuꞌat yne atipy koꞌi mesuwarotiaria iꞌewyte atipy piaria Haꞌyru inug koꞌi yne yne. Toꞌywot ehay upi toimoesaika yne yi aat waikiru koꞌi waty Haꞌyru esaika hap mo inug iheg me. Iꞌewyte Tosaꞌyru suu wo aipit pit hap aiminug saꞌag toikoho yne. Iesui tipuruk yne aiminug saꞌag hawyi -Waku eraꞌapyk mesuwe uipo sese kai uiꞌyatype atipy pe e. Waku eraꞌapyk mesuwe uhepiat emotypot hap tote e katupono woronug En Wuatꞌi Wuatꞌi Porekuatno poꞌog poꞌog wuatꞌi kawiat hesaika rakatno e Tupana Tosaꞌyru pe.
Pyno toꞌiro watimotypot Tupana ahehay wo -Tupana En ni wakuat kahato waku watoꞌe. Ikahu kahato ewakuap urutoꞌe. Urumoehãite kuap kahato Esaꞌyru sese mohey hap ete urutoꞌe. Ehay wakuat Esaꞌyru etiat wo uruporekuat etiat Emimoherep ete urumoehãite kuap kahato urumotag kuap kahato Esaꞌyru mohey hap ete urutoꞌe. Nimo te Esaꞌyru yt putꞌok e i te mesuwat yi tote turan ehay moherep haria urueꞌaseꞌiꞌin timoherep kahato yian mete Esaꞌyru Iesui etiat taꞌatumiwan me waku watoꞌe. Aikotã sehay migꞌi wuat ewy taꞌatumoherep uruepe maꞌato yt heremo kahato i aikotã mesup eꞌat hap ewy urutoꞌe Epe Tupana. Esaꞌyru eꞌyian mete taꞌatumoherep yne Esaꞌyru ete yn urutoꞌe. Putꞌok e hawyi urumoehãite hanuat kahato. Miꞌi miwan kaipyi Esaꞌyru mohey uruepiat hamo urutoꞌe. Urupowyro kahato emohey hap ete urutoꞌe.
Pyno aiwy raꞌyn Tupana. Yt nakuap i watoiat raꞌyn hawyi waku aikyꞌe hat sese watomohey wuatꞌi eꞌat pe. Saꞌawyꞌi watikuap mekewat Iesui etiat sehay wakuat ehay hawyi watomohey raꞌyn Iesui. Miꞌi hawyi watoineꞌen aru wuatꞌi eꞌat pe e hap ewy watomohey. Miitꞌin teꞌeruwekyryꞌi ahetiat pykai imohey hap yt watoiat hin i. Iheg me kahato watoineꞌen imohey hap ete. Saꞌawyꞌi watomohey kahato. Pyno koitywy yt naku i raꞌyn imohey hap watoiat sehay waku kahato Iesui etiat. Miꞌi atikuap saꞌawyꞌi hawyi uheropat kahato aat kaꞌap wuatꞌi miitꞌin kape miꞌi moherep hamo aikope aikope miitꞌin tukupteꞌen hap upi yne ywania pe ahytpok miꞌi ehay wakuat mesuwat yi wato hap oktan. Miꞌi hamo yn uinug uito Pauru.
Saꞌawyꞌi yt heremo i toineꞌen Tupana ehay wakuat rakat maꞌato miꞌi hawyi tuwepiit nug naꞌyn tuwemoherep taꞌyn Miit no sese raꞌyn ahowawi are. Miꞌi Miit wyti urutaꞌakasa raꞌyn. Miꞌi hap ti koitywy uruimoherep taꞌyn ehepuo uruehay wuat. Miꞌi ti wuatꞌi eꞌat piat ieineꞌen hat urutaꞌakasa raꞌyn. Saꞌawyꞌi Toꞌywot atipy piat wywo yn toineꞌen maꞌato koitywy toimoherep ahepe Tosaꞌyru.
Mesup taꞌyn Aheykeꞌet Iesui teke raꞌyn atipy pe. Koitywy taꞌapyk Tupana po sese kai taꞌapyk. Miꞌi tote Tupana mimotypot no topyhuꞌat -Koitywy Uhaꞌyru woronug En wuatꞌi miitꞌin Akag wuatꞌi porekuaria Akag wuatꞌi atipy piaria akag wo woronug En e Tupana Tosaꞌyru pe. Yne esaika hap atum epe e Tupana Tosaꞌyru pe Iesui pe.
Aikotã iꞌatumuꞌetu wuat ewy Tupana Paꞌãu timoherep iꞌatuepe aikotã aru Aipotypot tokuꞌuro hap eꞌyian mete toineꞌen hap koꞌi aikotã tuwẽtem guꞌuro pyi hap taꞌatukuap kahato Tupana Paꞌãu kaipyi. Miꞌi hawyi putꞌok e mekewat eꞌat pe hawyi uruepe topotmuꞌeria sese pe tuwemoherep taꞌyn Aipotypot. Miꞌi hawyi uruimoherep taꞌyn ehepe iꞌatuꞌe hap ewywuat saꞌawyꞌi wuat Tupana ehay moherep haria e hap ewywuat. Urutaꞌakasa yne iꞌatuꞌe hap ewywuat Aikaꞌiwat moherep hap. Urutaꞌakasa yne miꞌi hawyi mesup uruimoherep yne Iesui etiat ehepe uruꞌakasa hap koꞌi. Uruimoherep kahato uruehay wywo Iesui etiat Tupana Paꞌãu urupiit piat uruwanetup hap koꞌi. Uruimoherep mesuwat sehay wakuat Iesui etiat kat pote urutaꞌakasa raꞌyn Tupana Mipoꞌoro atipy kaipywiat. Koitywy uruikuap Tupana miehakyeraꞌat koꞌi wuat aito hap. Mekewat atipy piaria teꞌeruwanetup kahato kat pote saꞌawyꞌi yt uruimohey hin i maꞌato mesup uruimohey raꞌyn. Saꞌawyꞌi yt Tupana kape hin i uruwanetup hap. Koitywy Tupana kape yn naꞌyn uruwanetup hap. Miꞌi hap ete atipy piaria teꞌeruwanetup kahato. Taꞌatukuap teran haype maꞌato yt taꞌatukuap i kat pote mesup Tupana miehakyeraꞌat koꞌi wuat raꞌyn mesup uruto are.
-Atikyꞌesat miꞌiria ieineꞌen kahato Esaꞌyru mohey hap upi hap ahẽtup. Etimonik to iꞌatuꞌarotꞌi hap areꞌe Tupana pe. Miꞌi hawyi etunug miꞌiria iwepiit rakaria wo are. Etiꞌatuꞌapoꞌahik miꞌiria woꞌokyꞌe haria wo aikotã urueꞌyni uruiꞌokpoꞌi hap ewy are. Atikyꞌesat miꞌiria hesaika rakaria wo surara ewywuaria ehay moherep haria wo are. Atikyꞌesat pywuat sehay kuap kahato haria wo are. Atikyꞌesat ikuap hotꞌok kahato sehay pywuat hawyi -Pywo ti rat e haria wo tukupteꞌen are. Atikyꞌesat kahato taꞌatukuap kahato mekewat eꞌe hap saꞌawyꞌi wuat yt heremo i rakat Iesui eꞌyian mete wuat are. Mekewat -Atipoꞌoro aru Uhaꞌyru Eiporekuat no eꞌe hap are.
Koitywy Tupana toꞌe -Saꞌawyꞌi yt uwe i kape atimoherep uhehay pakup e. Kurin ikuap haria saꞌawyꞌi maꞌato koitywy Uhaꞌyru mohey haria kape atimoherep taꞌyn uhehay ikahu kahato rakat sehay hekat rakat wuatꞌi ywania mesuwat yi totiat kapiat sehay wakuat e. Saꞌawyꞌi migꞌi wo toineꞌen maꞌato mesup atimoherep taꞌyn ehepe e Tupana ahepe. Etunug no Uhaꞌyru Eporekuat no eipyꞌa pe pote eweikupteꞌen aru uhehamo mesuwe atipy pe uimimotypot koꞌi wo e Tupana ahepe.
Koitywy mesuwat Iesui etiat ainapin hap aimoehapyhotꞌok kahato wuatꞌi miitꞌin me mesuwat yi totiaria pe. Tuwesytpok kahato ihay wakuat aikowo aikowo tuwat Tupana ehay wuatꞌi puo. Miꞌi hawyi miꞌiria wy waku pe raꞌyn tukupteꞌen. Tupana mipoityro wo raꞌyn tukupteꞌen. Miꞌi hap ewy raꞌyn eweikupteꞌen eweikuap taꞌyn sehay hawyi. Eipe ti eweikuap taꞌyn Tupana tum ehepiat wuatꞌi eꞌat piat eheineꞌen hamuat hap. Eweikuap taꞌyn yt kat saꞌup i tegyiꞌat hap tutum neran hap eweikuap taꞌyn.
Aikotã seput haria teꞌerahaꞌat popuo taꞌatueput hap etiat -Putꞌok are iꞌatuꞌe hamuat hap kape yn hap ewy waku watehaꞌat aiwanetup hawe -Putꞌok are aru Iesui yatype aiꞌe hap kape yn katupono Iesui topyhuꞌat seput haria akag ewy katupono toimohey Tupana poꞌog torannia kai. Uiwyriaꞌin waku Iesui piat Tupana mohey hap ewy waku watomohey Tupana are. Iesui ti aimoehãite kuap kahato Tupana mohey hap ete. Haꞌawytepyi watomohey Iesui hawyi aiwanetup hap Iesui yn topyhuꞌat miꞌi hap ewy waku watomohey te Iesui putꞌok watoꞌe iꞌyatypiat hap eꞌat kape. Aikotã seput haria taꞌatusaꞌawynug hawyi te ikahuro hap kape teꞌeruwanetup hap ewy Iesui toineꞌen mesuwiat turan seput hat ewy topyhuꞌat. Putꞌok e Tupana etiat hap kape yn iha ariaꞌyp posak kape yn iha Tupana mikyꞌesat nug hap kape yn iha. Miꞌi hap yn imowepiit hap. Miꞌi hawyi tutuꞌu aiꞌapiheg hap ariaꞌyp posak ete. Yt toikyꞌesat hin i miitꞌin mikyryꞌi hap pykai. Toikuap kahato tomohit hap maꞌato yt tuwemoti hin i ariaꞌyp posak totiat toineꞌen saꞌag hap miitꞌin ehaꞌat hap pupi. Tokuꞌuro hawyi taꞌapyk Tupana po sese kai aikope Tupana piat topainug hap tote. Tokuꞌuro hap no aikawiatno hap kape yn toto toineꞌen mesuwe turan. Tupana mikyꞌesat nug hap yn imowepiit hap mesuwarote topyhuꞌat tohoꞌopot hap eꞌat turan. Iesui seput hat akag ewy toineꞌen meiũpe turan.
Mio tã e ti Tupana saꞌawyꞌi miitꞌin me. -Meiũran ti aru wẽtup ok haryporia wakuat makuptia te yt heꞌaito i te rakat pykai imepytꞌa rakatno topyhuꞌat hawyi ti aru imepyt ihainia hit. Miꞌi kape ti aru eiwẽpo wat Emanueu katupono Emanueu e wyti Tupana toineꞌen aiwywo e. Topiat yianmiat Tupana ehay enoi hat Isaia tomiwan 7.14 pe e.
Miꞌi hawyi uito Iuwãu arahaꞌat i hawyi araꞌakasa miitꞌin sem kahato yt watimorania kuap i hap ewy. Katupono typyꞌi kahato miꞌiria. Teꞌeruwaꞌatunug Tupana Hũ Kuteiru owa kape Morekuat koro apyk hap tote teꞌeruwaꞌatunug. Tupana Hũ hit Kuteiru motypot hamo teꞌeruwaꞌatunug. Typyꞌi kahato araꞌakasa. Miꞌi hawyi arahaꞌat meimuẽwuaria kape hawyi atikuap yne ywania pyꞌasetpyi teꞌeruwaꞌatunug yt toꞌoꞌewy hin i. Iꞌatupiit koꞌi ihup ikytsig hun. Katupono yne tama kaipyi iꞌatueko yt toꞌoꞌewyꞌewy hin i miꞌiria katupono wuatꞌi pusu kuap hap kaipyi teꞌeruwaꞌatunug wuatꞌi morekuaria etama kaipyi teꞌeruwaꞌatunug Tupana Hũ Kuteiru owa kape. Yne iꞌatupo puat ikahu rakaria ariaꞌyp iaga koꞌi taꞌatuerut Tupana Hũ Kuteiru hit motypot hamo. Taꞌatuesokpe ikytsig nakat ikahu rakat puo tõꞌẽ imotypot hamo.
Saꞌawyꞌi sese Tupana toꞌe tuwepe. Mesuwat yi yt kat i te turan Tupana toꞌe -Atipoꞌoro aru Uhaꞌyru wuatꞌi ywania minug saꞌag saꞌup mo e nimo sese turan. Koitywy tuwemoherep taꞌyn ikuꞌuro raꞌyn Tupana Saꞌyru. Aihũ Kuteiru ewy ikuꞌuro. Gaꞌatpo eꞌat ikuꞌuro raꞌyn Aikaꞌiwat. Howapy hap eꞌat pe hap ewy ikuꞌuro are.
Uito ti Pauru atikyꞌesat ewehẽtup o Tupana pe uipowyro hamuat. Karãpe ewehẽtup iraniaꞌin powyro hamo yt uiwaure teiꞌo eipe. -Etunug o Pauru ewẽ wo ehay moherep hamo wuatꞌi miitꞌin me eweiꞌe ro uikawiatno. Karãpe toimoherep ehay wakuat turan etum o tope iweꞌeg kahato hap iꞌewyte ikuap kahato hamuat hap ewat ewywuat hap eweiꞌe o. -Ehay pywuat yt uwe i mikuap saꞌawyꞌi miwan miat hamo etimoesaika Pauru Iesui etiat moherep hamo eweiꞌe yt kat i miitꞌin kenꞌẽ hap wywo waku eweiꞌe Tupana pe uipowyro hamo.
Saꞌawyꞌi emikyꞌesat ewy ereꞌe ewepe -Atum aru Uhaꞌyru pe wuatꞌi ywania ere. Atum neꞌen neꞌi aru Uhaꞌyru wuatꞌi miitꞌin me Iꞌatuporekuat no. Uimowepiit hap ewy atum aru ereꞌe saꞌawyꞌi ewepe ewanetup hawe yt kat i miitꞌin te turan. Tupana uruikuap teran kat pote urukyꞌe kahato hap. Miꞌi tã yt uruikuap hin i te wen maꞌato urukyꞌe hap miꞌi uruikuap taꞌyn. Waku kahato En urutoꞌe epe Tupana.
Maꞌato uito atiꞌatumuꞌe Iesui mohey haria Tupana weꞌeg hamo yn. Yt miitꞌin mikuap kaipyi hin i atiꞌatumuꞌe maꞌato mekewat weꞌeg hap Tupana kaipywiat yn wo atiꞌatumuꞌe torannia miꞌiria. Maꞌato iraniaꞌin yt kuap i hap ewy mesuwat sehay uimimoherep kat pote uhehay sehay yianmiat ewywuat aikotã saꞌawyꞌi Tupana aiꞌairo mesuwat yi nug hap eꞌyian mete hap ewy.
Uiꞌywania Iuteuria tikuap kahato mesuwat sehay wakuat aikotã morekuat Tawi toꞌe tuwepy hawe tomiwan me hap ewy -Taꞌi uiꞌywania ti Tupana ehay kuap kahato haria e. Aikope aikope taꞌatuewyry mesuwat yi wato hap oktan note aru taꞌatumoherep kahato Tupana ehay itotiaria pe e. Uiꞌywania Iuteuria tukupteꞌen wuatꞌi etama pe Tupana ehay moherep hamo e tomiwan me.
Taꞌi itotiaria tikuap kahato aikotã Tupana Paꞌãu toineꞌen kahato uhetiat hap iraniaꞌin ywania muꞌe Iesui etiat hap taꞌatukuap maꞌato iꞌewyte taꞌatukuap kahato aikotã Ipaꞌãu toineꞌen kahato Peteru kai uruꞌywania Iuteu ywania muꞌe Iesui etiat hamuat hap taꞌatukuap kahato. Miꞌi pote -Taꞌi aiꞌywania Iesui mohey haria muꞌe kahato hat sese Peteru iꞌatuꞌe maꞌato Pauru iꞌewyte te Tupana Paꞌãu ipotpap kahato ipiit pyi iraniaꞌin ywania muꞌe hamo Iesui mohey haria apykok hamo iꞌatuꞌe Ierusarẽi miaria imohey haria akag koꞌi.
Urueꞌaseꞌi sese ti mekewat Aparãu e hap het rakat iꞌewyte urueꞌaseꞌiꞌin koꞌi ti mekewat aseꞌi Isaki iꞌewyte mekewat aseꞌi Isareu e hap het rakat. Miꞌiria ti saꞌawyꞌi hewyry kahato Tupana wywuat rakaria. Pywo ti Tupana kuap haria akag koꞌi uruꞌywania saꞌawyꞌi tukupteꞌen. Saꞌawyꞌi iraniaꞌin ywania eiperia Humanu ywania ewywuaria yt tikuap hin i Tupana sese maꞌato miꞌi hap eꞌat pe uruꞌywania tikuap sakpo Tupana sese. Uruꞌywania saipepiat sese Iesui tuwemoherep. Urupiit ewywuat kahato Iesui tuwemoherep. Taꞌi uruꞌywania piit ewywuat kahato Iesui piit toineꞌen. Tupana Mipoꞌoro Aiporekuat nuat ty ti Iuteu kawiat. Miꞌi pote waku watuwehum kahato Tupana ete -Tupana watuwehum kahato ewowi katupono erepuꞌi nug hawyi ereineꞌen kahato aipyꞌasetpe Aiꞌakag wo. Watomotypot En ni wuatꞌi eꞌat pe. Waku raꞌyn waku raꞌyn waku watoꞌe Tupana pe.
Miꞌi hawyi Peteru toꞌe tehay wo -Mehinꞌin manaꞌin e mesup ti atikuap sese raꞌyn Tupana wuatꞌi ywania kyꞌe hat koro toineꞌen hap e. Taꞌi toiꞌatukyꞌe wuatꞌi miitꞌin paĩ e. Saꞌawyꞌi uruto Iuteu ywania Tupana mikyꞌe koꞌi tukupteꞌen hap kape yn arewanetup e maꞌato koitywy atikuap taꞌyn aikotã toꞌoꞌewyꞌewy toiꞌatukyꞌe wuatꞌi pusu kuap haria topyꞌa pe urukyꞌe hap oktan ne hap atikuap taꞌyn e Peteru surara Kuneriu Itaria ywania pe.
Saꞌawyꞌi Tupana ainapin kahato Muisei upi. -Miꞌi tã waku etunug e. Miꞌi tã yt naku i etunug e maꞌato mekewat eꞌat yt watunug kuap i imikyꞌesat koꞌi katupono aimikyꞌesat saꞌag aipyhyp kahato inug hap ete. Miꞌi hawyi Tupana piat ainapin hap yt aimohãpyk kuap i yt watunug i pote. -Pyno atimohãpyk miꞌiria e Tupana tuwepe. Miꞌi toꞌe hawyi toipoꞌoro Tosaꞌyru sese. Putꞌok e hawyi aiꞌewy ipiit Miit kahato Miꞌi. Toiꞌaparap kuap aito ewy wen maꞌato yt toiꞌaparap hin i. Yt karãpe i tutunug saꞌag. Toiꞌakit kahato tomikyꞌesat saꞌag nug hamuat -Yt atunug i e tuwepe. Miitꞌin mikyꞌesat saꞌag toiꞌakit yne. Miit no tuwenug hawyi aiꞌapiheg hap tutuꞌu yne ariaꞌyp posak ete.
Putꞌok taꞌatuꞌe itotiat hawyi taꞌatukay kay yne Iesui mohey haria. Miꞌi hawyi aikotã Tupana tunug muap upi iꞌatupo wo miꞌi hap ewy yne taꞌatumoherep itotiaria pe -Koitywy ti Tupana tomoherep taꞌyn Iesui yt aiꞌywania pe yn i raꞌyn iꞌatuꞌe Iuteuria pe. Taꞌi mio raꞌyn ti yt Iuteuria yn i raꞌyn imoherep iꞌatuꞌe.
Mekewat haryporia yt naku i nug hat akag ete toineꞌen mekewat haryporia set itote miwan me -Uito ti wuatꞌi weweneru haria ty e. Uito tawa Papironia piaria morekuat haryporia kawiat e. Yt naku i nug hap etiat miitꞌin muꞌe hat uito e. Yt uwe i te mikuap yt naku i nug hap moherep hat uito e miwan howatuꞌa ete.
Saꞌawyꞌi Aipotypot Aiporekuat Iesui miitꞌin mikyryꞌi hamo topyhuꞌat mesuwarote aikotã aikotã taꞌatunug saꞌag tuwete waku rakat pykai taꞌatuꞌauka. Maꞌato yt kat i saꞌag tutunug pykai tohoꞌopot kahato. Maꞌato aiminug saꞌag upi tohoꞌopot. Iesui hãpyk kahato rakat maꞌato ikuꞌuro yt hãpyk i rakaria mohãpyk hamo. Ikuꞌuro muap nug hamo Toꞌywot Tupana kapiat muap nug hamuat. Koitywy toineꞌen muap Tupana kapiat Iesui hoꞌopot hap kaipyi. Yt hãpyk i sese rakat toimohãpyk kuap taꞌyn. Pyno ipiit ikuꞌuro ariaꞌyp posak ete maꞌato miꞌi hawyi Tupana Paꞌãu timoieineꞌen Aikaꞌiwat.
Tupana toꞌe wuatꞌi miitꞌin me sio aito Iuteuria ywania sio wẽtup ywania -Uwe uwe uimohey hat uimowepiit hat sese toineꞌen sio Iuteu ywania sio wẽtup ywania e. Taꞌi Kereku ywania sio gaꞌapy piat ywania uimohey haria uikay kay Uhaꞌyru set upi pote uimiehakyeraꞌat nuaria tukupteꞌen e Tupana yne ywania pe.
Tupana ti yt heso kuap i rakat paĩ. Saꞌawyꞌi -Atiꞌatupoityro aru emiariru emiariruꞌin e Tupana urueꞌaseꞌiꞌin me. Miꞌi hap ete yt karãpe i Tupana heso. Tutunug yne toꞌe hap ewywuat. Urutoria Iuteu ywania heso kuap maꞌato Tupana yt karamuat i heso kuap e. Aikotã morekuat Tawi pe toꞌe saꞌawyꞌi hap ewy tutunug wuatꞌi eꞌat pe. Mio tã toꞌe -Tawi e atunug aru uiꞌe hap ewywuat wuatꞌi eꞌat pe e. Atunug esaipepiat Morekuat Koro wo wuatꞌi eꞌat pe e. Eꞌywania yt uimohey i pykai aru atunug uiꞌe hap ewy e. Yt uwe i uipyhyp kuap uiꞌe hap nug hamuat ete e Tupana nimo morekuat Tawi pe hawyi toiwan towepy hap miwan me.
Mekewat miwan pywuat sehay etiat yianmiat Tupana ehay moherep haria mienoi heremo kahato topyhuꞌat wuatꞌi ywania mikuap mo kahato. Waku kahato En Tupana urutoꞌe. Taꞌi Iesui etiat miwan koꞌi Emipoꞌoro Aiporekuat nuat etiat waku kahato urutoꞌe. Miꞌi pote uruimoherep Esaꞌyru etiat mesuwat sehay pywuat torannia ywania pe mesuwat yi tote hap uruhẽtup ewowi Tupana. Uruikyꞌesat kahato yne ywania Esaꞌyru mohey haria wo tukupteꞌen hap urutoꞌe. Iꞌewyte uruikyꞌesat yne miꞌiria Esaꞌyru ehay upiaria wo tukupteꞌen urutoꞌe ewowi Tupana.
Saꞌawyꞌi mehin Sira mehin Timoteu iꞌewyte uito urutuwat ehewowi eimuꞌe hamo. Miꞌi hawyi itote uruiꞌatumuꞌe kahato aikotã Tupana tipoꞌoro Tosaꞌyru hap etiatno. Tupana motypot haria wo yn uruiꞌatumuꞌe eipe. Yt kat i urueso hap wywo uruiꞌatumuꞌe eipe. Miꞌi hap eꞌat pe urutunug aru urutoꞌe pote urutunug uruꞌe hap ewy. Yt typy sehay wywo hin i uruiꞌatumuꞌe saꞌawyꞌi eipe Iesui etiat uruhenoi raꞌyn.
Miꞌi pote mesup yt niatpo hin i watomohey Tupana aipyꞌa pe kat pote uruehamo Aikaꞌiwat toihep guꞌuro pyi. Miꞌi hawyi Tupana toꞌe itote wuatꞌi ehamo -Miitꞌin Ehakyeraꞌat hanuat Miꞌi Miit e. Miꞌi pote koitywy Iesui yn watomohey ahehakyeraꞌat hamo. Waku watoꞌe tope -Uruimohey En yn Iesui uruehakyeraꞌat hanuat waku watoꞌe Iesui pe are.
Piblisite