1 Timoteu 2:6 - Sateré-Mawé

⁶ Putꞌok e raꞌyn ahehakyeraꞌat hap eꞌat hawyi Aikaꞌiwat ikuꞌuro raꞌyn aikawiatno hamo tuweium naꞌyn ahepe. Miꞌi kape wataꞌakasa raꞌyn hawyi watikuap kahato wuatꞌi ywania Tupana tiꞌatukyꞌesat kahato tomiehakyeraꞌat no hap watikuap taꞌyn.

1 Timoteu 2:6 Referans Kwoze

Mateu 20:28

Uito Eheykeꞌet wuatꞌi miitꞌin eropat hat kahato areineꞌen wuatꞌi miitꞌin powyro hat e. Uito Eiporekuat koro areineꞌen wen maꞌato yt iraniaꞌin morekuaria ewywuat i. Iꞌewyte atum irane uheineꞌen hap saꞌup miitꞌin kyiꞌat Tupana watnuat hamo e Iesui topotmuꞌeria pe.

1 Peteru 3:18

Saꞌawyꞌi Aipotypot Aiporekuat Iesui miitꞌin mikyryꞌi hamo topyhuꞌat mesuwarote aikotã aikotã taꞌatunug saꞌag tuwete waku rakat pykai taꞌatuꞌauka. Maꞌato yt kat i saꞌag tutunug pykai tohoꞌopot kahato. Maꞌato aiminug saꞌag upi tohoꞌopot. Iesui hãpyk kahato rakat maꞌato ikuꞌuro yt hãpyk i rakaria mohãpyk hamo. Ikuꞌuro muap nug hamo Toꞌywot Tupana kapiat muap nug hamuat. Koitywy toineꞌen muap Tupana kapiat Iesui hoꞌopot hap kaipyi. Yt hãpyk i sese rakat toimohãpyk kuap taꞌyn. Pyno ipiit ikuꞌuro ariaꞌyp posak ete maꞌato miꞌi hawyi Tupana Paꞌãu timoieineꞌen Aikaꞌiwat.

Karasia 4:4

Putꞌok e raꞌyn heꞌat tomikyꞌesat ewy raꞌyn topyhuꞌat hawyi Tupana tipoꞌoro Tosaꞌyru haryporia kaipywiat torannia tehay woꞌonapin hap nug hamuat raꞌyn. Putꞌok toꞌe hawyi yt wẽtup i Toꞌywot woꞌonapin hap toiꞌaparap. Tutunug yne imikyꞌesat oktan.

Iesui Aru E Hap 1:5

Tupana Esaꞌyru sese Iesui kaipyi ahẽtup etipoityro emohey haria. Etum no iꞌatuepe i woꞌowese hap are epe. Wuatꞌi Porekuat no En poꞌog poꞌog iraniaꞌin kai are. En ni wuatꞌi eꞌyian mete wuat guꞌuro pywiat ieineꞌen i hat. En ni pywo yn e hat. Iesui En ni urukyꞌe hat sese katupono Esuu wo urupiit pit hap etikoho yne torannia uruminug saꞌag are. Ekuꞌuro hap urukawiatno hap.

1 Iuwãu 4:10

Saꞌawyꞌi yt watikyꞌe hin i Tupana. Miꞌi pykai aikyꞌe kahato hawyi toipoꞌoro Tosaꞌyru aiminug saꞌag koꞌi atumoma yne hamo. Haꞌyru ikuꞌuro hawyi aiꞌapiheg hap tutuꞌu yne raꞌyn.

Titu 2:14

Ahehakyeraꞌat hat Iesui ikuꞌuro raꞌyn ariaꞌyp posak ete aikawiatno. Yne yt nakuap i nug saꞌag po pyi aihep hamo ikuꞌuro. Tupana watnuaria wo ainug neran pote wakuaria wo aito hap toikyꞌesat. Miꞌi pote aihep taꞌyn saꞌag nug hap po pyi aimowaku hamo raꞌyn. Koitywy Ahehakyeraꞌat hat iwepiit kahato raꞌyn.

1 Kuriniu 1:6

Watoineꞌen motꞌi Aikaꞌiwat wywo pote ihay iꞌewyte toineꞌen motꞌi aipyꞌa pe.

1 Timoteu 6:15

Meiũran ti aru Iesui Tupana tipoꞌoro i tepiat ikyꞌesat hap eꞌat pe toipoꞌoro i raꞌyn. Waku kahato Iesui miꞌi yn ni Wuatꞌi Miitꞌin Porekuat no. Miꞌi ti morekuaria Porekuat iꞌewyte wuatꞌi Kaꞌiwat. Waku kahato Iesui.

Ewesu 5:2

Aikotã Aipotypot Iesui aikyꞌe kahato saꞌawyꞌi aikyꞌe kahato te. Aikyꞌe kahato hawyi aikyꞌe hap upi ikuꞌuro. Tutum naꞌyn heineꞌen hap aikawiatno hap aikotã saꞌawyꞌi wuaria tum taꞌatuhũria aria pe Tupana mowepiit hamo. Miꞌi hap ewy ikuꞌuro ariaꞌyp posak ete aikyꞌe kahato haype. Aikyꞌe sese hat Iesui pote ikuꞌuro aiꞌapiheg hap u hamo. Miꞌi pote aikotã aikyꞌe hap ewy waku watikyꞌe iraniaꞌin aikuꞌuro hap kape.

1 Peteru 2:24

Pywo ti rat Aikaꞌiwat Iesui tuut irane kat pote yne aiminug aiꞌapiheg saꞌag koꞌi yne miitꞌin mesuwarotiaria minug saꞌag koꞌi topyhuꞌat Aikaꞌiwat piit pe. Mekewat ariaꞌyp tote tohoꞌopot kahato topiit ete. Tupana miꞌapiheg wo topyhuꞌat. Tuwepyi Aikaꞌiwat yne Tupana piat aiꞌapiheg hap aiminug saꞌag koꞌi u hamo tuut. Miꞌi hawyi aiꞌapiheg hap yne topyhuꞌat Iesui piit ete mekewat ariaꞌyp posak tote. Ipiit ete yne topyhuꞌat Tupana kaipywiat aiꞌapiheg hap koꞌi aiꞌahyk ahyk hap tutuꞌu yne. Haty kahato tuete. Miꞌi hawyi aimoehãite hamuat hap topyhuꞌat. Haty hap yne tutuꞌu yne hawyi ikuꞌuro aheiam me. Aikuꞌuro hap tutuꞌu yne. Miꞌi pote aito watoineꞌen ikuꞌuro rakaria ewy iwywo mekewat aiminug saꞌag ete. Yt ahesaika i poꞌog aito watoineꞌen. Aikotã ikuꞌuro rakat yt wahãꞌãg kuap i yt naku i nug hamo hap ewy. Miꞌi hap ewy watopyhuꞌat mesup. Maꞌato wakuat yn sake i watunug kuap mesup kat pote watuwẽtem guꞌuro pyi Aikaꞌiwat wywo hap ewy. Miꞌi hawyi waku nug haria wo watopyhuꞌat iwywo.

Titu 1:3

Heꞌat putꞌok e raꞌyn hawyi Tupana timoherep taꞌyn uhepe tehay -Atum aru wuatꞌi eꞌat piat eheineꞌen hap Uhaꞌyru mohey haria pe e Tupana ahepe. -Koitywy woropoꞌoro en Pauru uhaꞌyru etiat sehay moherep hamo katupono woromohey en inug hamo e uhepe. Miꞌi tupono ti atimoherep Haꞌyru wuatꞌi ywania pe Tupana e hap ewywuat. Ahehakyeraꞌat Tupana piat hap Iesui mikyiꞌat moherep hat areineꞌen mesup uito. Uito ti Pauru.

2 Kuriniu 5:21

Aikaꞌiwat Iesui yt karãpe i inug saꞌag watoꞌe. -Taꞌi Uhaꞌyru waku sakpo e Tupana. Maꞌato miꞌi pykai Tupana tiꞌapiheg aiminug saꞌag upi. Aiminug saꞌag yne iꞌokpe tote toineꞌen kahato iꞌauka hap. Miꞌi hawyi Iesui topyhuꞌat yt naku i nug hat ewy aiminug saꞌag topiit tote hawyi. Yt towat tominug saꞌag hap upi Tupana tiꞌapiheg Iesui maꞌato aiwat aiminug saꞌag upi tohoꞌopot kahato. Miꞌi watomohey hawyi Tupana ainug wakuat sese rakaria Tosaꞌyru suu aikoho hawyi. Tosaꞌyru ewaku hap totopag ahepe. Waku pe watoineꞌen Tupana wanetup hawe watoꞌe wuatꞌi ywania pe aikope aikope aipoꞌoro hap upi Tosaꞌyru haipepiatno.

Humanu 5:6

Saꞌawyꞌi sese mekewat eꞌat wuat Tupana toꞌe -Atipoꞌoro aru En Uhaꞌyru miitꞌin Porekuat nuat e. Uhaꞌyru e koitywy mesuwat eꞌat atiꞌairo eto hamuat yi kape katupono hoꞌowasat kahato miitꞌin tukupteꞌen itote pote iꞌatuminug saꞌag eꞌat yn mote e Tupana tosaꞌyru pe. Mio tã e pote Aipotypot Iesui toto. Miꞌi hawyi aiminug saꞌag kaipywiat aiꞌapiheg hap tutuꞌu yne aheiam mo.

Iuwãu 10:15

Aikotã Uiꞌywot uikuap kahato hat toineꞌen. Iꞌewyte Uito Uiꞌywot kuap hat areineꞌen. Miꞌi hap ewy uihũria kyꞌe kahato hat areineꞌen pote uiꞌauka hamuat iꞌatuehakyeraꞌat hamo e.

Iuwãu 6:51

Uito ti atipy kaipywiat man miitꞌin moieineꞌen hamuat e. Uwe uwe miꞌi man iꞌu miꞌi hat ti aru toineꞌen wuatꞌi eꞌat pe e. Mekewat uimiium man wyti uipiit e. Atum aru uipiit miitꞌin moieineꞌen hamuat e Iesui.

Maku 10:45

Katupono Uito Eheykeꞌet ariot mesuwat yi kape miitꞌin eropat hamo e. Yt ariot i mesuwe miitꞌin miat uheropat hamo e. Taꞌi miitꞌin hep yt nakuap i pywiat hamo ariot ehewowi e. Taꞌi atum neran miitꞌin me iꞌatueieineꞌen hap sese areꞌe. Iꞌatuieineꞌen hap kyiꞌat hamo ariot e topotmuꞌeria pe.

Iesui Aru E Hap 5:9

Miꞌi hawyi araꞌakasa typyꞌi kahato miitꞌin Ihũ Hit motypot haria itote. Miꞌi hawyi teꞌeruwepy kahato iraniaꞌin nywo. Maꞌato iꞌatuwepy hap ipakup takat -Waku kahato En Tupana Hũ iꞌatuꞌe. -Waku kahato En iꞌatuꞌe. Ewaku hap putꞌok e mekewat miwan okpoꞌi porap hamo. Waku etiꞌokpoꞌi porap hawyi etimoherep uruepe Mimi Uhyt iꞌatuꞌe. Ewaku hap yn putꞌok e Tupana mimosatꞌe hap hep hamo iꞌatuꞌe. Ewaku hap yn iwato hap oktan iꞌokman miat miwan moherep hamo eꞌauka urukawiatno pote iꞌatuꞌe Saꞌawyꞌi esuu topyhuꞌat Tupana piat urukyiꞌat towatnuat hawe iꞌatuꞌe. Katupono wuatꞌi mesuwarotiat ywania kaipyi uruhoꞌoekyi Tupana emiit no wuatꞌi miitꞌin wẽtup pusu wẽtup pusu kuap haria iꞌewyte wuatꞌi miitꞌin yt toꞌoꞌewywuat rakaria kaipyi iꞌewyte wuatꞌi miitꞌin wẽtup seko wẽtup seko mohey haria yt toꞌoꞌewy ewywuat i rakaria kaipyi iꞌewyte wuatꞌi yt toꞌoꞌewywuat i iꞌatupiit ete iꞌatueko rakaria kaipyi uruhoꞌokyiꞌat esuu wo iꞌatuꞌe. Iꞌewyte wuatꞌi setama kaipyi uruhoꞌokyiꞌat wuatꞌi ipe hun ipe kytsig ipe hup rakaria kaipyi uruhoꞌoekyi Tupana emiit no Esuu wo iꞌatuꞌe teꞌeruwepy puo wuatꞌi ywania Tupana Mipoꞌoro Aihũ Kuteiru ewywuat aikawiat ikuꞌuro rakat kape.

Epereu 9:12

Ahepaꞌi Koro Iesui teke raꞌyn Tupana yat wato pe. Mekewat imotypot eiam atipy piat pe teke raꞌyn okenꞌypy pyhyp hap sakpo. Towat tosuu wywo teke. Tutum naꞌyn tosuu Tupana pe. Yt tutum i Wewato ahup suu. Yt tutum i aihũria Kaneiru suu maꞌato towat tosuu tutum hekat rakat Tupana pe. Ahehakyeraꞌat hap sese saꞌup tutum hawyi -Waku raꞌyn e Tupana tope. Putꞌok e raꞌyn esuu saꞌup mo wuatꞌi miitꞌin kyiꞌat hap sakpo e Tupana Tosaꞌyru pe.

2 Timoteu 1:8

Yt eremoti teiꞌo Aikaꞌiwat ehay moherep hamo. Iꞌewyte uito areineꞌen woꞌopyhik hawe Iesui mohey hap upi pykai yt eremoti teiꞌo -Uito Pauru mepyt e hamo. Maꞌato waku ere -Uito iꞌewyte ahoꞌopot hawe areineꞌen wy mesuwat sehay wakuat moherep hap upi waku ere o Tupana pe. Uimoesaika hap oktan aru atunug ere o Tupana pe Timoteu.

2 Tesaronika 1:10

Karãpe taꞌaipok i raꞌyn miꞌi hap eꞌat pe ti aru imohey haria hemiitꞌin torannia imotypot kahato Taꞌatuporekuat koro. Miꞌi hap eꞌat pe eipe iꞌewyte eweimotypot kahato wy katupono uruꞌe hap mohey kahato haria eweikupteꞌen.

Humanu 16:26

Mekewat miwan pywuat sehay etiat yianmiat Tupana ehay moherep haria mienoi heremo kahato topyhuꞌat wuatꞌi ywania mikuap mo kahato. Waku kahato En Tupana urutoꞌe. Taꞌi Iesui etiat miwan koꞌi Emipoꞌoro Aiporekuat nuat etiat waku kahato urutoꞌe. Miꞌi pote uruimoherep Esaꞌyru etiat mesuwat sehay pywuat torannia ywania pe mesuwat yi tote hap uruhẽtup ewowi Tupana. Uruikyꞌesat kahato yne ywania Esaꞌyru mohey haria wo tukupteꞌen hap urutoꞌe. Iꞌewyte uruikyꞌesat yne miꞌiria Esaꞌyru ehay upiaria wo tukupteꞌen urutoꞌe ewowi Tupana.

Ewesu 1:17

-Uruꞌywot koro En ni urupotypot Iesui eTupana are. Etum no Epaꞌãu poꞌog tawa Ewesu piaria pe ekuap poꞌog poꞌog mono areꞌe Tupana pe. Uwe En sese hap kuap hamuat atikyꞌesat. Epaꞌãu kaipyi iweꞌeg kahato rakaria wo tukupteꞌen hap atikyꞌesat are. Etiꞌatumoẽtyhot ro iꞌatuwanetup hap are. Etihep yt iꞌatuehapytig i hap miꞌi hawyi heremo iꞌatuwanetup hawe etum Esaꞌyru mohey hap Tupana are.

Ewesu 1:7

Taꞌi Emipoꞌoro uruporekuat no ikuꞌuro hawyi uruminug saꞌag po pyi urutuwẽtem naꞌyn iꞌewyte uruminug saꞌag haꞌawytewuat etiꞌatuwaure waure raꞌyn En. Waku kahato En. En ni poꞌog poꞌog torannia kai hegyiꞌat rakat urutoꞌe ewowi Tupana urutoꞌe. Esaꞌyru suu ti urukyiꞌat ewatnuat hap urutoꞌe.

Ewesu 3:5

Saꞌawyꞌi wuaria yt uwe i ikuap mesuwat sehay migꞌi wuat Tupana -Atunug aru e hap. Tupana yn ikuap. Iꞌewyte ihay moherep haria saꞌawyꞌi wuaria yt ikuap i maꞌato mesup Tupana Paꞌãu timoherep taꞌyn uruepe tehay moherep haria pe uruto Iesui potpoꞌororia 12 ok takaria pe toimoherep tehay migꞌi wuat Topaꞌãu wo.

Maku 1:15

Miꞌi hawyi toꞌe -Koitywy ti porap putꞌok e raꞌyn Tupana Morekuat nuat ieineꞌen hamuat. Miꞌi tupono eweitoiat ro eiminug yt naku i hap koꞌi hawyi eweimohey ro Tupana ehay wakuat e Iesui tetama piaria pe.

Karasia 1:4

Iesui tikyꞌesat kahato ti miitꞌin ehakyeraꞌat hap. Toikyꞌesat kahato iꞌatuminug saꞌag kaipywiat teꞌeraꞌaipok hap. Miꞌi hamo tuweium ariaꞌyp posak ete Toꞌywot mikyꞌesat ewy. Miꞌi hamo Tupana tum Tosaꞌyru aiꞌapiheg hap u hamo aiminug saꞌag koꞌi hep hamo.