Uhaꞌyru atimoheg kahato o epiat Iesui mohey hap aikotã enapin hap kape erewanetup kahato. Miꞌi hawyi etunug ewanetup hap kaipyi wakuap erenapin hap oktan katupono tukupteꞌen epyꞌasetpe yt naku i nug haria. Saꞌawyꞌi miꞌiria Iesui mohey haria tukupteꞌen maꞌato taꞌatupun naꞌyn Iesui mohey hap taꞌatukawiat. Miꞌiria ti tukupteꞌen hoꞌowasat rakaria ewywuaria aikotã aheꞌyara apyꞌat hap yt watipuẽti i raꞌyn hap ewywuaria miꞌiria tukupteꞌen yt kat i poꞌog Iesui mohey hap mio iꞌatukai.
1 Timoteu 1:5 - Sateré-Mawé5 Yt naku i ti watuꞌuka sehay potꞌi ete ereꞌe o itotiaria pe katupono Tupana tikyꞌesat aiwoꞌowese ahehay wuat hap ereꞌe o iꞌatuepe. Wẽtup wanetup hap wywo yn waku watoꞌokyꞌe ereꞌe o. Yt iꞌatuekat kyewi i ti watopotkyꞌe ereꞌe o. Waku watoꞌokyꞌe wẽtup sok yn aito Iesui mohey haria aito pote. Gade chapit la |
1 Timoteu 1:5
43 Referans Kwoze
Timoteu yt erewanetup teiꞌo emotag hap turan epiit mikyꞌesat saꞌag nug hamuat kape maꞌato meremo o etoiat. Erepik meremo o miꞌi hap kaipyi hãpyk nug hap kape Tupana mohey hap kape woꞌokyꞌe hap kape woꞌowese nug hap kape iraniaꞌin Iesui mohey haria upi urupowyro Tupana e haria upi wanetup kahu haria upi.
Iꞌewyte -Waku kahato En uruꞌywot are. Taꞌi Tupana eheropat kahato hat uito Pauru. Emikyꞌesat ewy yn atunug neran. Aikotã saꞌawyꞌi aiꞌywania tunug emikyꞌesat ewy iꞌewyte uito atunug mesup are Tupana pe. Karãpe uiwatetup ewowi turan Timoteu -Waku kahato En Tupana are yn wãtym muo ihatꞌok ewy ewy are Tupana pe.
Miꞌi hap ewy kahato ahetꞌok hap topyhuꞌat. Yꞌy piat wateke aikotã Iesui ikuꞌuro hap ewy. Watuwẽtem yꞌy pyi hawyi aikotã Iesui tuwẽtem guꞌuro pyi hap ewy watoineꞌen. Maꞌato mekewat yꞌy yt aikoho kuap i aipit pit ok hap aiminug saꞌag koꞌi maꞌato ahetꞌok hap watunug hawyi yt kat i haty hap aiwanetup hawe kat pote Tupana mikyꞌesat ewy watunug aikotã Nuꞌe ewy yꞌy sakpo watuwat aheꞌyara puo hap ewy.
Uiwyriaꞌin waku watoiat yne aiminug koꞌi aiwanetup saꞌag hap koꞌi. Miꞌi hawyi waku ahewyry yt kat i haty aipyꞌa piat wywo aiwanetup hawiat aiminug saꞌag wywo. Miꞌi hawyi karãpe iraniaꞌin iꞌatuꞌe saꞌag kahato ahete iꞌatueso hap kaipyi yt kat i aiwemoti hap topyhuꞌat kat pote watikuap yt kat i saꞌag watunug pote. Watikuap Aikaꞌiwat Iesui mikyꞌesat ewy watunug mesuwarote pote.
Uiwyriaꞌin karãpe Aipotypot suu topyhuꞌat aheha ete aipy ete aiwanetup hawe aipiit ete miꞌi hawyi ikytsig kahato rakat ewy topyhuꞌat aikai. Yt saꞌawyꞌi wuat aiminug saꞌag koꞌi ewywuat hin i. Miꞌi hawyi waku watunug yne Tupana mimoherep tomikyꞌesat koꞌi pywuat koꞌi waku watunug. Yt watunug kuap i wen maꞌato Tupana Paꞌãu aimoesaika kahato mekewat pywuat sehay nug hamo are. Waku Tupana Paꞌãu ainug miitꞌin kyꞌe sese haria wo yt kat i aheso hap aipyꞌa piat miitꞌin kyꞌe hap wywo maꞌato aipyꞌa pyi miitꞌin kyꞌe sese hap yne ahesaika hap wywo. Waku watiꞌatukyꞌe miitꞌin Tupana Paꞌãu aimoesaika hap kaipyi are.
Katupono haꞌawyte Tupana toꞌe -Atipoꞌoro aru Uhaꞌyru Eiporekuat no e. Uwe uwe imohey haria miꞌi haria ti aru waku pe tukupteꞌen uipyꞌa pe e nimo uiꞌywania pe wen maꞌato uruꞌywania Iuteuria yt imohey i hawyi -Ewetunug no yne yne urueꞌaseꞌi Muisei waĩꞌe hap hawyi waku pe eweikupteꞌen Tupana wanetup hawe iꞌatuꞌe mesup wuatꞌi ywania pe. -Atimoma raꞌyn mekewat muap e Tupana yt uwe i inug kuap mote e. Mesup Uimipoꞌoro Eiporekuat nuat Iesui upi yn toineꞌen muap uhowawiat e. Yt karãpe i ehewaku hap putꞌok e uimowepiit hamo e Tupana mesup wuatꞌi miitꞌin me.
Waku hap etiat wanetup haria pe -Waku yne Tupana minug koꞌi mesuwat yi totiat koꞌi iꞌatuꞌe. Teꞌeruwehum yn Tupana minug ete maꞌato iraniaꞌin yt imohey i haria yt wẽtup i waku Tupana minug koꞌi. Yt naku i iꞌatuꞌe yn Tupana miium ete katupono iꞌatuwanetup hawe yt naku i hap yn topyhuꞌat. Teꞌeruwemoti kahato teꞌeruwanetup hawe yt taꞌatunug i iꞌatueko ewy pote.
Yt karãpe i uruiꞌatumaꞌat eipe tawa Kurintiu piaria. Poꞌog hãpyk torannia kai hap ewy urutukupteꞌen eipyꞌasetpe. Tupana motypot hap yn urutunug itote. Yt uruweꞌeg hap kaipyi i urupotpap ehehamo maꞌato Tupana urumoweꞌeg hap kaipyi uruimotypot Tupana miitꞌin pyꞌasetpe. Yt uruhepap hap kaipyi i maꞌato Tupana tum uruepe tegyiꞌat hap tomisepap nug kuap hamo hawyi hesaika hap wywo uruimoherep wakuat itote saꞌawyꞌi. Miꞌi pote uruminug ete Tupana urupowyro hap kaipyi uruimotypot Tupana itote saꞌawyꞌi. Miꞌi hawyi miitꞌin teꞌeruwehum kahato Tupana kape. Yt uruewawi i maꞌato Tupana kape yn teꞌeruwehum uruminug wakuat upi. Miꞌi hawyi Tupana kape teꞌeruwehum hawyi urumowepiit kahato kat pote uruminug kaipyi Tupana motypot hamo urutukupteꞌen mote.
Pyno mesuwat ikahuro hap eꞌat yt pya hin i pote Tupana tikyꞌesat kahato aito tomohey haria wo wẽtup miit ewy aiwoꞌokyꞌe hap toikyꞌesat. Miꞌi tã Tupana tikyꞌesat kahato. Uiwyriaꞌin toikyꞌesat watiꞌatukyꞌe iraniaꞌin Iesui mohey haria yne ahesaika hap wywo. Toikyꞌesat watimoherep aiwoꞌope aiwoꞌokyꞌe hap aimiium kaipyi aimimoꞌẽ hap kaipyi aiminug kaipyi toikyꞌesat aiwoꞌokyꞌe hap. Pywo ti rat toineꞌen aiwoꞌokyꞌe hap sese aiwoꞌopiat hap hawyi yt kat i aiwoꞌomaꞌatꞌi hap toineꞌen. Yt heremo i aiwoꞌoꞌaparap hap koꞌi aiwoꞌokyꞌe kahato hap toineꞌen mote. Aiwuꞌuka hap yt tuwemoherep i. Aiwoꞌokyꞌe hap toineꞌen pote yt watikat aiwyriaꞌin kai iꞌatuminug saꞌag koꞌi aiwoꞌoꞌaparap hap koꞌi.
Pyno karãpe watikyꞌesat watukupteꞌen Tupana wywo miꞌi pote waku watuwat Tupana kape aimikyꞌesat ẽtup hamo. Aiwanetup hap kaipyi aipyꞌa pyi ahehay hawyi tuut ahowawi aimikyꞌesat ewy. Miꞌi hawyi aikotã watuwei aipit pit potiat hap ewy raꞌyn yꞌy pe waku miꞌi hap ewy waku watoꞌe Tupana pe -Uiꞌywot uikoho Esaꞌyru suu wo uimiꞌaparap saꞌag koꞌi waku watoꞌe. Uipo ti iminug yt naku i hap koꞌi pote uipo ipit pit hap ewy. Miꞌi pote etikoho uipo yt naku i nug hap hep hamo waku watoꞌe. Uiꞌywot atipy piat pe uiwanetup hap uipyꞌa piat typy sehay potiat uipiit yt naku i topyhuꞌat. Miꞌi pote etikoho kahato uhepiat iꞌaparap hap koꞌi yne waku watoꞌe Tupana pe.
Pyno toꞌiro Tupana kape uiwyriaꞌin. Waku watipun ahehay aheso hap koꞌi wateke Tupana wywuat piat hamo. Waku yt kat i aipyꞌa piat aheso hap. Miꞌi hawyi yt kat i aimowemoti hap wywo wateke. Toꞌiro pyno Tupana ewowi. Waku watipen aiwanetup hap aipyꞌa piat Iesui suu wo. Waku Iesui aipyꞌa sei hap Tupana tunug suu wo wateke. Waku yt kat i aiwanetup hap saꞌag aimoti hap wywo i waku wateke. Waku watuwei kahato mekewat yꞌy wakuat sese wuatꞌi eꞌat piat wat pe. Miꞌi hawyi waku wateke aipyꞌa sei hap wywo aikoho hap mywo aipiit toran koho hap mywo yn waku wateke Tupana ewowi uiwyriaꞌin.
Yt watikyꞌe i miitꞌin pote yt kat hamo i aimisepap koꞌi sio watikuap yne torannia pusu mesuwarotiat sio watikuap atipy piaria pusu yt kat i miitꞌin kyꞌe hap Tupana kyꞌe hap aikai pote aipusu ahehay topyhuꞌat ipuehay ewy aimogyt hap ewy aikotã tamaraka ehay ewy ihay pirik hap. Watikuap wuatꞌi ywania pusu maꞌato miꞌi pykai yt watiꞌatukyꞌe i iraniaꞌin pote yt kat hamo i watikuap yne pykai.
-Pyno waku watuꞌu yne watoꞌe pote waku aiweꞌeg wo uwe pe mio tã watoꞌe katupono tukupteꞌen iraniaꞌin Iesui mohey haria yt aiwanetup hap ewywuaria i kahato iꞌatueko miꞌu etiat miꞌi pote -Paĩ an waku watuꞌu yne watoꞌe iꞌatuehamo hawyi iꞌatumohey hap mohit haria watopyhuꞌat iꞌatuwanetup hawe. Poꞌog waku watoꞌe -Mehin mana yt naku i watuꞌuka aheko miꞌu ete miꞌi pote atuꞌu teran eimikyꞌesat ewy mesuwe areineꞌen eiwywo turan waku watoꞌe. Miꞌi hawyi waku watuwemoesyꞌat iꞌatueko ewy itote. Tukupteꞌen wy yt imohey i te haria. Miꞌiria pyꞌasetpe watoineꞌen turan waku watiꞌatukyꞌe miꞌiria iꞌatueko miꞌu etiat ewywuat nug hap ete watoineꞌen iꞌatuwywo turan are. Yt naku i wahoꞌomopyꞌahak aimiꞌu u hap wywo iraniaꞌin are. Yt naku i aimiꞌu wo watimopyꞌahak iraniaꞌin seko waĩꞌe hap ete katupono miꞌiria ehakyeraꞌat hamo Iesui ikuꞌuro wy. Maꞌato watenuk kahato iꞌatuehamo -Yt ewetuꞌu teiꞌo miꞌi miꞌu iꞌatuꞌe hap ete pote yt karãpe i taꞌatumohey Iesui hawyi miꞌiria maꞌat haria watopyhuꞌat katupono aimiꞌu wo watiꞌatumopyꞌahak neꞌi pote yt wahoꞌoekyi kuap i miꞌiria Iesui kape.
Pyno ewehẽtup i hẽtup i urupowyro hamuat uruwyriaꞌin Tupana kape. Urutunug neran wakuap yn wuatꞌi eꞌat pe. Yt kat i uruminug saꞌag upi urutuwemoti Tupana ehamuat hap uruikyꞌesat. Iꞌewyte yt kat i uruminug saꞌag upi urutuwemoti miitꞌin ehamuat hap uruikyꞌesat. Urutoineꞌen neran hãpyk kahato miitꞌin pyꞌasetpe yt uwe pupiat i uruwemoti hap mywo. Miꞌi pote ewehẽtup uruupi Tupana pe uruieineꞌen hap ikahu rakat nug hamo.
Maꞌato Aikaꞌiwat Iesui suu poꞌog hesaika yn suu kai mohag wo. Saꞌawyꞌi Aikaꞌiwat tum yne topiit Tupana pe ahaꞌup mo. Saꞌawyꞌi ikahu rakat aihũ yn waku aimiium mo yt kat i hatek takat yt kat i iꞌahuu hap rakat. Ipe kyt hap ihãite sese rakat yn ni waku e. Miꞌi hap ewy Iesui poꞌog waku mohag wo katupono yt kat i saꞌag tuete Tupana tipuẽti. Ihãite putꞌok e kahato turan tutum topiit. Pyno koitywy watomohey Iesui hawyi Aihũ Aimiium Tupana piat hap ewy topyhuꞌat. Miꞌi watum Tupana pe hawyi yt kat i hin i aheha yi kape hap. Yt kat i aiwemoti hap aiminug saꞌag kapiat hap ete. Aihũ Aimiium Ikahu Rakat Iesui pote.
Maꞌato Aikaꞌiwat Iesui ahehakyeraꞌat teran haype Tupana yt tuwanetup hin i mekewat seko aiwemusin ãpy sokpe tek hap kape neꞌi. Maꞌato toiehakyeraꞌat kuap miitꞌin yne sio hemusin ãpy sokpe tek hap toĩ sio yt sio Iuteuria sio yt miꞌiria i waku yne. Toimohãpyk kuap wuatꞌi ywania katupono kat seko kat seko kape neꞌi yt ihaꞌat hin i maꞌato tehaꞌat tomohey hap sese kape yn. Tokyꞌe ahepiat hap aikawiat toineꞌen sio yt watikyꞌe i hap kape yn taꞌakasa.
Karãpe watiꞌatukyꞌe miitꞌin pote waku watiꞌatukyꞌe kahato aipyꞌa pyi yt kat aheso hap wywo i. Waku watopyhuꞌat haiwot rakat ewy maꞌato yt miitꞌin ete i. Waku ahaiwot rakaria ewy watopyhuꞌat aiminug saꞌag hap koꞌi ete. Maꞌato waku watikyꞌesat kahato waku nug hap koꞌi. Yne wakuat waku watat maꞌato yt naku i hap waku watipun.
Uhaꞌyru sese ewy kahato ereineꞌen Timoteu. Miꞌi tupono woronapin neran. Saꞌawyꞌi Tupana eꞌairo kahato Iesui mohey haria wẽ pyi. Itote toꞌe epe -En ni uimipoꞌoro uhehay moherep hanuat e Tupana Paꞌãu epe itote. Miꞌi hap o yt etiwaure teiꞌo. Waku etopytyk miꞌi e hap aikotã surara po pe moryꞌa wato hap ewywuat wanikap wywo wuꞌuka hamuat. Miꞌi e hap wywo o waku etuꞌuka ahiag e hap auka hamo woronapin uhaꞌyru.
Piblisite